Marcos 5

Dusto Atma Pora Dhuri Thaka Manu

1 Aru Jisu aru chela khan Galilee Nodi laga dusra phale, Gerasenes jagate ahise. 2 Aru jitia Jisu naw pora ulai ahise, ekjon junke dusto atma pora dhorise, joldi kobor pora ulai ahi kene Taike lok paise. 3 Tai kobor te he thake, aru kunbi taike rukhabole manu thaka nai, luha rusi pora bhi bandhi rakhibole napara hoise. 4 Kelemane taike bar-bar theng te luha rusi pora bandhi rakhise, kintu tai bhangai di thake. Aru ta te kun bhi taike dhori kene rakhibo paribole takot thaka nai. 5 Tai rati din hoile bhi hodai pahar te aru kobor te he thake, aru kandi kene tai dhar pathor pora nijorke jokhom kori thake. 6 Jitia tai dur pora Jisu ke dikhise, tai Jisu phale polaikene jaise aru salam korise. 7 Aru tai jor pora kandi kene koise, "Jisu, Porom Prodhan Isor laga Putro? Apuni ami logote ki kaam ase? Ami Isor naam pora Apuni ke anurodh kori ase, amike dukh nadibi.*5.7 Mat. 8:29; I Kin. 17:18." 8 Kelemane poila pora Jisu eneka koidisele, "O dusto atma, etu manu pora ulai jabi." 9 Titia Tai taike hudise, "Tumi laga ki naam ase?" Aru tai koise, "Ami laga naam Legion ase, kelemane amikhan bisi ase." 10 Aru tai Jisu ke anurodh korise taikhan ke etu jaga pora bahar napothabo nimite. 11 Aru ta te pahar te gahori khan kiba khai thakisele, 12 aru biya atma khan Tai logote binti korise, "Amikhan ke gahori laga bhitor te ghusi jabo dibi." 13 Karone Tai taikhan ke jabole koi dise, titia dusto atma to ulaikene gahori te ghusi jaise, etu sob dui-hajar nisena gahori thakise, rang-khang pora polai ahi kene nodi te giri dubi jaise. 14 Titia jun manu gahori ke khilai thakisele, taikhan polai ahi kene sheher te aru bosti te thaka sobke koi dise, aru ki hoise koi kene manu khan sabole ulai ahise.