Mateus 21

Jitikena Juwa

1 Jitia Jisu aru tai laga chela khan Jerusalem te punchise aru Bethphage te ahise, Oliv Pahar te, titia Jisu duita chela ke pathaise, 2 taikhan ke eneka koi kene, "Tumikhan laga usorte thaka bosti te jabi, aru tumikhan loge-loge ekta gadha aru tai laga puwali ke bandi kene thaka dikhibo. Taikhan ke khuli kene Ami logote anibi. 3 Jodi kunba manu etu nimite kiba hudise koile, eneka koi dibi, ‘Probhu pora lagi ase,’ aru utu manu pora apnikhan ke eku bhi nakobo." 4 Aru juntu kotha bhabobadi khan pora Isor kotha koi disele, eitu khan purah hoise. Tai eneka koise,

5 "Zion laga chukri khan ke koi dibi,

‘Sabi, tumi laga Raja tumi logote ahi ase,

Nomro hoi kene gadha uporte-

Ekta jawan gadha laga puwali uporte*21.5 Zech. 9:9.."’

6 Etu pichete chela khan jaise aru jineka Jisu pora koise, thik eneka he korise. 7 Taikhan gadha aru tai laga puwali ke loi kene anise aru taikhan laga uporte chador urai dise, aru Jisu taikhan uporte bohise. 8 Jerusalem te jai thaka somoite, bisi manu khan nijor laga bahar kapra bichai dise, aru kunba khan to ghas laga pata kati kene rasta pura te bichai dise.*21.8 Jisu ke sonman diya thakise. 9 Etu pichete Jisu laga age te aru pichete jai thaka manu khan hala korise, eneka koi kene,

"Hosanna David laga Putro ke!

Asis te ase jun Probhu laga naam loi kene ahi ase!

Hosanna sob pora uporte!*21.9 Ps. 118:26."

10 Jitia Jisu Jerusalem te ahise, pura sheher Taike dikhi kene asurit hoise aru taikhan majote eneka koise, "Etu kun ase?" 11 Aru manu khan jowab dise, "Etu Jisu ase Galilee laga Nazareth te thaka ekjon bhabobadi."