Hebreus 8

Yiisu nguu a ngaanga a Nziaambi kwaa bisi

1 Dimono ndaa yavulu mufunu mu mandaa ma bisi dili mu uleele: Ni nguu a ngaanga a Nziaambi wa pili yii bisi dili na nde, nde wadiaali mu mayulu nha koo kia babaala kia mbata ipfumu ya Nziaambi, Puungu-lituu. 2 Nde li mu usa isala kia nde nha mbuu ya ngira, pili mosi ti, nzo a ngooto ya ngwanya yi Pfumu atuungu, ka a yi baata batuungu pe.

3 Pasi nguu a ngaanga a Nziaambi, babiaalisi nde mu uha na mu utsuu bungori. Mu yii, bwafwaana ti nguu a ngaanga a Nziaambi wa bisi ka, aha bungori. 4 Mbiiti nde ali nha tsina tsieengi, nde a akeni uba so ngaanga a Nziaambi pe. Mundaa ti, nha tsina tsieengi kwakwaba na babali mu uha bungori weti buli mu uloombo Mikele mia Mooso. 5 Likuundu la bo, lili ifwaani, so a buu pe, iziimi kia mimili mu uyilimi ku yula, weti bu balibili yo moonyi kwaa Mooso mu taanga di nde akeni utuungu nzo a ngooto ya mvuutini: «We afwaana uyiluu bioosi weti buli ifwaani ki me nalayi we ku yulu a mulaanda✝8.5 Pal 25.40.»

6 Ka mu taanga di, isala kia Yiisu ili isala kiavulu mu bunene. Mundaa ti, nde li nha kati a Nziaambi na baata mu nzuyisini yavulu bubwe, yibatuungu nha yulu a ndasina diavulu bubwe.

7 Mu ngwanya, mbiiti nzuyisini✝8.7 Pal 24.3-8 ya tsiomi a yali na toono pe, a kwa keni uba na tsata pe ya usobo yo mu nzuyisini ya moolo. 8 Ka Nziaambi amoni toono mu baata ba nde, nde asieembi bo bu aleeli kwaa bo:

«Biluumbu bili mu uyiri, buleeli Pfumu,

bi me kaatuungu nzuyisini yinyatii

na baata ba Iseraeli

na baata ba Yuuda.

9 Yo a yikaaba pe weti yi me nakuti na bakaa ba bo,

mu taanga di me naholi bo mu koo kia me,

mu upalisa bo mu tsi ya Ngipiti.

Bo a bakiinzi pe nzuyisini yii.

Ni mu buu, me ka a nabwikwiilili bo ngebe pe, buleeli Pfumu.

10 Dimono, bukaaba nzuyisini yi me kaatuungu na baata ba Iseraeli

nha mbisi a biluumbu bii, buleeli Pfumu:

Me sa sonuu mikele mia me mu matsimi ma bo,

me sa sonuu mio mu mitimi mia bo:

me sa ba Nziaambi a bo,

na bo sa baba baata ba me!

11 Muutu so mosi pe kaaba na nzala uyiisi mbaayi a nde,

so a buu pe, mwaana nguu a nde

mu uleele ti: "Yii mu uyaaba Pfumu!"

Mundaa ti baata boosi sa bayaaba me,

umata mu wavulu bungebe,

natee mu wavulu bukuutu.

12 Mu ngwanya, me sa sa masumu ma bo kolokolo,

me a nibwalibili moonyi mu matoono ma bo pe✝8.12 Yel 31.31-34.»

13 Bu Nziaambi ali mu utsuu mu «nzuyisini yinyatii», nde asi ti nzuyisini yatsiomi yiba ka yikulu. Ka isii mbiiti ka ki ikulu na imaanunu, kio ka bebele mu udiimbili.