1 Aŋ Yeecüwa baaddoni yeeke yaaka kä caay witken kä yew ye, bärkene ti, aŋ iññe mügdïn ñuuṭene wääktäŋŋi yaackä aŋ ṭiiñene rackïtïnnï ke yor carrä muure. 2 A yäṇtäŋŋi yek tüüjgï yaaka kä caay witken kä yew ye ikki,

ïïjjïdï kä Camaan, yaana battä me ogo Bütürüc ye,

ke määden Aṇdaraawuc,

ke Yaagüüp minneni Jabadï,

ke määden Yuhanna,

3 ke Pïlïp,

ke Bartalamaawuc,

ke Yuungon,

ke Matta yaana a ḍüṭo ye,

ke Yaagüüp minneni Alpï,

ke Ṭaḍawuuc,

4 ke Camaan yaana näkä maam kä baan yeene ye,

ke Yahüüja Garyüütï yaana a aagdo ŋäc yeene ye.

5 Yeecüwa tuccin woo tüüjgï caay witken kä yew kä eenjinni yaakki ogo, "Ŋana ikee ate boorgu ti, aŋ ŋana ikee kaaccede ti baan mä Caamira yaŋkalaŋ jï. 6 Ṭääkce ate mä Icärayiil ti käbälgä yääyin yek Jooŋ. 7 Ate aŋ päke ogo, ‘Yätkïtïn Polloŋ jïñe cokilin ti.’ 8 M’aka a rackä ye ṭeeñe, aŋ mä tüwïn cuujge tüwnü ti, aŋ mä jaan laade yokïn aŋ meŋkeekeni ñooṭe woo. Ikee kuññe käpet aŋ daa ice käpet.

9 "Ŋana ikee kujde tiilgä ke tiilgä gälkä kumku yeekic gïtï, ŋana tiil mäyken ke lïcken cäänna. 10 Ŋana ikee kujde kücümgü wään yeenic ti, ke buruŋgu ŋana kügde ke waygä ke läcäŋgä, m’ana ñuugal ye päjjïdï äämgä me.

11 "Aŋ baan mooye ke tooyle yaana kääckene ti ye, määje m’ana päjjïdï ye. Aŋ cääye än yeene ti ke kaace kä woo. 12 Aŋ naana ikee kaacce ti än ti ye, ŋïïpce. 13 Aŋ naana mä än päjjïdï ye, dale ŋïïbbïn yeenic wäätï iken ti, aŋ naana mä än batta päjjïdï ye, dale ŋïïbbïn yeenic ḍuku ikee ti. 14 Aŋ m’ana ikee tuuññe yokïn kä gïmgïn aŋ batta a tiiŋon jiik yeekic ye, i än ke baan mooye yaanna dalje ïñï aŋ kïïgïc ṭeŋje woo kä ṭabür aŋ aŋan nüütï ogo ikee tuuññeeda me yokïn. 15 Ikee kiine a gïtken, jooññu mä Caduum ke Amuura bi lïïkïdï kä nïïnnä jooññu yaana bi jucu baan mooye yaanja ye.

16 "Aŋ ikee tuccede woo bata käbälgä waadgä bäwni, dale witkic bïtäraŋ bata käggä, aŋ dale ḍuuggic ladaŋ bata gülküteni. 17 Waŋgic tïïce kä me! Ikee bi müükkene yokïn tajdoni, aŋ ikee bi ḍooyge kä bäädan daaŋmallä yen Yühüüṇṇï ti. 18 Aŋ ikee bi ice mügdoni ñomgen ti, ke yätkäni ñomgen ti, nääŋka age kä baaddoni yeeki ye. Aŋ yaanna bi wäätï a waan yeenic yaana bi päkke kä mügdoni ke m’aka batta a lüggïnï, kä Ika ye. 19 Aŋ naana ikee müügene ye, ŋana ikee payde jiik gïtkïc ogo ikee bi jaayje ogo ŋaaka halla jiik bi jaayje ogoo. Jooŋ ikee bi iñe jiik wuuŋ yaanja ti. 20 Batta bi a ikee ken bi jaaye, a Wääktäŋ yen Wääc ken bi jaay kä ikee.

21 "Men bi määden ääkke ŋäc kä tüwnü, aŋ wäy minneni yeene bi ääkke ŋäc, aŋ merkälen bi juwu migen ke wäygen lapä ḍugin aŋ näkä me ḍugin. 22 Me muure ikee bi putkene gïtï nääŋka age kä baaddoni yeeki ye. Aŋ m’ana yuddin ke düüñïn ti ye, bi käñï mäkkin. 23 Aŋ naana ikee putkene me gïtï baan yaŋkalaŋ ti ye, lüüde yaŋkalaŋ ti, ikee kiine a gïtken, Minneni Mänbaan bi ätä, i batta mor bänkä mä Icärayiil ḍaage kä laaynä muure.

24 "Baati baaddo yaana nüüto yeene käälede ïñï ye, aŋ baati kiingon yaana men mooye yeene käälede ïñï ye. 25 Päjjïdï baaddo beeljï bata nüüto yeene, aŋ kiingon beeljï bata men mooye yeene. Aŋ naana men mooye yen än battä me ogo Baljabüül ye, i cäänna mä paanä yeeke bi bäärgä me kä yäṇtäŋŋi yaacken.

26 "Ŋana ikee booje kä iken, baati gin’a a kümgon wic aŋ batta bi ükü woo ye, aŋ baati gin’a a paangon yok aŋ batta bi ŋäjjänä me ye. 27 Jiik’a nüüde kä mïïllä gïtï ye, i daa jääye woo bownu gïtï aŋ jiik’a tiiŋŋe pääkic ye, i pääge woo nänkä küülkü witin. 28 Ŋana ikee booje kä m’aka nääkä gaan, aŋ batta nääkä yor ye. Ṭääkce booje kä Jooŋ yaana nääkä gaan ke yor muuṭuk maccük ye. 29 Yerñä yaaka kä yewwe ye, batta yääygä me kä tiilñanle? Baati yaŋkalaŋ yaana ḍïmmïdï ïñï i batta ŋäjjänä Wääc ye. 30 Cäänna ke jiik witkic a pakin muure. 31 Ŋana ikee booje, ikee kääṭe kä yaac kä yerñä.

32 "M’ana Ika gïmgana me ñomgen ti ye, cäänna daa bi gïmgä Wäyo yaana ñaalok polloŋ jï ye ñome ti. 33 Aŋ m’ana Ika reecca woo me ñomgen ti ye, cäänna daa bi reecä woo Wäyo yaana ñaalok polloŋ jï ye ñome ti.

34 "Ŋana ikee ḍuuce ogo Ika äätonoo ääconoo ŋïïbbïn ŋommañ wic. Ika batta äätänä ääcädä ŋïïbbïn, a gaaḍal.

35 ‘Ika äätänä ḍuccudu yiñ waan men ke wäyen,

aŋ ṭuulle ke meen,

aŋ ṭuulle ke ṭiinmeen oore.

36 Aŋ men ädäŋŋi yeeke a mä än yeene ti.’

37 "M’ana wäyen ke meen bilgene kä yaac ke käälce woo Ika ti ye, batta päjjïdï ke Ika, aŋ m’ana billä minneni yeene ke ṭuulle yeene kä yaac käälcïdï woo Ika ti ye, batta päjjïdï ke Ika. 38 Aŋ m’ana kaakkon yeene batta koowde aŋ bäätïdï Ika ti ye, batta päjjïdï ke Ika. 39 Aŋ m’ana üṇṇü yeene kaññe ye, i bi yääye, aŋ m’ana üṇṇü yeene yääyne ogo Ika ye, i bi kañe.

40 "M’ana ikee gïmgene ye, i Ika gïmgana, aŋ m’ana Ika gïmgana ye, i m’ana Ika tuujana ye gïmgene. 41 Aŋ m’ana bäṭo gïmgene ogo bäṭo ye, i bi käñï iññä bata bäṭo, aŋ m’ana män woṇṇu gïmgene ogo wodowot ye, bi käñï iññä yeene bata män woṇṇu. 42 Aŋ m’ana minneni ḍeerconḍe iññe piik lüykü kä ḍonṭule ogo baaddo yeeni ye, ikee kiine a gïtken, iññä yeene batta bi yääy."