1 Aŋ Yeecüwa kääjin woo kaal yen änlaṇṇä jï aŋ wääna atee kä ye, baaddoni yeeke äätin Ike ti, aŋ Ike nüütcütü ogo däämjo baṇṇäni yek änlaṇṇä ti. 2 Aŋ luukke ogo, "Baṇṇäni yaakka muure yoodde? Ikee kiine a gïtken, baati guṇṇan yaana bi mañjänä me menen wic ye, bi ḍüümtït gïtï muure."

3 Aŋ wääna Yeecüwa cääjjenee kä pääm yaana wiñe a jengä jeytüünni ye ti, i baaddoni yeeke äätin Ike ti pääken, aŋ Ike taaji ogo, "Nüütkoon waak yaakki bi näŋe ḍuuggen tooku? Aŋ a ŋaaka ken bi a gin’a nüütï äätin yüünü ke düüñïn yuungu ye?"

4 Aŋ luugi Yeecüwa ogo, "Waŋgic tïïce ŋana ikee yääyte mäŋkalaŋ. 5 Me ḍiirken bi ätä kä yäṇtonḍi, aŋ jayok ogo, ‘Ika agä Macii!’ Aŋ iken me ḍiirken bi malgä ŋïngïn. 6 Aŋ ikee bi tiiŋe kä yääñdaŋŋi ke jigärgä yek yääñdaŋŋi, aŋ ŋana yokic cükcede, waak yaakka bääkkan daa bi näŋï ḍuuggen, aŋ batta mor a düüñïn ina. 7 Aŋ ṭoŋ yakkalaŋ bi juwu kä yiñ ṭoŋ yakkalaŋ ti, aŋ yätkïtïn bi juwu kä yiñ yätkïtïn ti. Aŋ käñ bi wäätï ke buktuŋ ŋommañ nänkä yaaka a päkkiṇṇi ye ti. 8 Aŋ yaakki muure a ïïjjïn ti pillä yen giidä aŋ yaŋkalaŋ mor irä.

9 "Aŋ wäättan ikee bi müüke me, aŋ näke me ḍugin, aŋ ikee bi putkene gïtï ṭoŋ muure ogo Ika. 10 Aŋ waan yaanja ti me ḍiirken bi ñomgen yeljänä woo luggin ti, aŋ bi äägä ŋätin, aŋ bi puudu gïtï waadgen ti. 11 Aŋ bäṭoni ḍiirken yaaka a yeloŋŋi ye, bi ükü woo, aŋ me diirken bi yääygä ḍugin. 12 Aŋ kä ḍiirin yen liiŋŋä gïtï jiik ḍoocin, biilin yen me ḍiirken bi lüy. 13 Aŋ m’ana wääcï ke düüñïn ti ye, bi käñï mäkkin. 14 Aŋ Jiik Ŋerkä yek Yätkïtïn Polloŋ jïñe bi pakä me ŋommañ wic muure, nuŋko tiiŋge daa ṭoŋ muure, aŋ wäättan düüñïn bi ätä.

15 "Ikee bi yuṭe ḍällä yen cüültïn yaana jaayi bäṭo Ḍaniyal ye, yudit külok nänṭä laṇṇä jï. Dale m’ana päkï ye ükcï gïtï. 16 Aŋ wäättan dale m’aka baan mä Yühüdïya ye, lüdok pämkä witin. 17 Aŋ dale m’ana cääy daaŋ wic ye, ŋana kääjïdï ïñï ogo ike kujje gin’a äräk baanne ye. 18 Aŋ dale m’ana yiil jï ye ŋana ḍükcïdï ŋäjäk ogo ike kujdee burŋu yeene. 19 Aŋ bi yaajaŋ kä yaac määngä yaaka lacok ke yaaka nïïtï ye nïïnkä yaakca ti! 20 Mäṭe nuŋko ŋana ŋañ yeenic wäätcedee a wiiññäk aŋŋi ke Äŋ Jïñe Wääktäŋ ti. 21 Aŋ tïñïdïn mooye bi näŋï ḍoŋe waan yaanja ti, yaana batta a näŋon ḍoŋe wääna daa kä ïïjjïn ti ŋommañ ye ke tiññaŋ. Aŋ batta bi ŋüccï näŋï ḍoŋe ŋuca. 22 Aŋ naana nïïnkä yaakca batta ŋüüŋtü me yokïn ye, i baati m’ana bi üt ye, aŋ kä jiik mä wakin yek Jooŋ ken nïïnkä yaakca bi ŋüüŋge daa me yokïn. 23 Aŋ naana mäŋkalaŋ ikee kiinne ogo, ‘Däämme Macii inninne!’ Ke ogo, ‘Ïya wïca ye!’ I ŋana ikee luggede. 24 Maciini yaaka a yeloŋŋi ke bäṭoni yaaka a yeloŋŋi ye bi ükü woo, aŋ näŋï nääŋkä ke waak’a yäwaŋ ye, ogo yääjjï ko witin me, ke cäänna m’aka a wakin kä Jooŋ ye naana päjjodo ye. 25 Yoore, ikee nüütkene kä yaakki i batta mor wuuŋ ḍägä.

26 "Aŋ naana mäŋkalaŋ ikee kiinne ogo, ‘Däämje, Macii ïya luummuk,’ ye, ŋana ikee kaaccede woo. Aŋ naana jaajjin ogo, ‘Däämme ike inni äräk,’ ye, ŋana ikee luggede. 27 Bata yaana wïldïn diikedee kä ñomuk atee ke ŋäjäk ye, bi beeljï bata äätin yen Minneni Mänbaan. 28 Aŋ nänṭ’a cääyge gin tüwon ye, i weñgä yoken ḍültü wïca.

29 "Aŋ kä ḍeeraŋ aŋŋi naana tïñïdïn yen nïïnkä yaakca ti düüñïn ye,

‘äŋ bi üljï ïñï,

aŋ paan batta bi dïkï

aŋ kirkä polloŋ bi ḍiimdit ïñï,

aŋ teynäni yek wakkä polloŋ jïñe*24.29 teynäni yek wakkä polloŋ jïñe jiik yaakki nüütï waak polloŋ jïñe teyken, bata äŋ, paan ke kirkä. bi bükcï.’

30 "Aŋ waan yaanja ti gin’a nüütï ye, bi ükü woo polloŋ jï yen Minneni Mänbaan, aŋ wäättan ṭoŋ yek ŋommañ wiñe bi nüüjjï. Aŋ iken bi yürcï Minneni Mänbaan äätä curuŋgu gïtï kä teynä ke gällä yäwconḍe. 31 Aŋ malaŋŋi yeeke bi tuce kä ïwok gültete, aŋ m’aka waŋŋe ye bi ḍüülünü ti kä ñomuk ke ŋäjäk ke ñaalok ke ïñï ke nänkä muure ïñï polloŋ ŋoy.

32 "Ŋäjje nüüṇṇü gäärrä yen jaan yaana beel bata kaapṭä yaanni ti. Naana kimke kattä ïñï aŋ gitke ŋiimmin ye, i ŋäjje ogo yïltüke cokolono. 33 Aŋ cäänna naana ikee yuṭṭe waak yaakka muure ye, i ŋïje ogo Minneni Mänbaan cokolono ti äntüke tük. 34 Ikee kiine a gïtken, waak yaakka muure bi näŋï ḍuuggen, i batta mor kil yaanni tüw. 35 Polloŋ ke ŋommañ bi wïïcï ïñï, aŋ jiik yeeki batta bi wïïcï ïñï.

36 "Nïïnnä yaanja ke wuuŋ yaanja baati m’ana ŋäjjä ye, cäänna ke malaŋŋi yek polloŋ jïñe batta ŋäjjä, a Wäy pare ken ŋäjjä. 37 Bata wääna wäättee kä nïïnkä Noo ti ye, cäänna bi wäätï äätin Minneni Mänbaan ti. 38 Aŋ nïïnkä yaakca ti i mor tääl irä iken ämï aŋ mätï, aŋ iken ḍïjï aŋ ḍeygä me, ke nïïnnä yaana kaaccene kä Noo kuun jï ye. 39 Aŋ iken batta ŋäjjä ginkalaŋ ke tääl ääte aŋ iken müüññe muure, aŋ bi wäätï bata äätin yen Minneni Mänbaan ti.

40 "Aŋ ook kä yew bi ñuugal yiil jï muuṭuk, aŋ keelok bi koowgu me aŋ yaŋkalaŋ bi mañjänä me ïñï. 41 Aŋ määngä kä yew bi ḍïjï päämḍeynä ti aŋ keelok bi koowgu me aŋ yaŋkalaŋ bi mañjänä me ïñï.

42 "Aŋ cääyä i ïkï kiijjädä woo kä yaana äätin Pïṭo yüünü kujjeeda kä ye. 43 Aŋ yaakki ookci gïtï naana yoku men mooye yen än ŋäjjä wuuŋ yaana wali ken bi äätete käṭo ye, ike yoku kïïjjïdï woo, aŋ än yeene batta bäägge liikä me gïtï. 44 Ikee dale yokic age tootin wuuggu muure, Minneni Mänbaan bi äätee kä wuuŋ yaana batta Ike payde daa kä ye.

45 "Aŋ a ŋaani ken a ñuugulo yaana a lüggïnï aŋ a ŋäjjo, yaana müükkünü men mooye yeene än yeene jïñe muure, aŋ meken iñde waak äämkä kä wuuŋ yaana päjjïdï ye ti? 46 Ŋüülkïn ñuugulo yaana wäädänä men mooye yeene ñuugal naana ike ḍuku ye. 47 Ikee kiine a gïtken, men mooye ñuugulo yaanna bi müükke wakkä yeeke muure. 48 Aŋ naana ñuugulo yaana a yaajgonḍe aŋ payit jone ti ogo, ‘Men mooye yeeni bi kuru,’ 49 aŋ üccï kä giimmä ñuuguloni meken aŋ ämï aŋ mätï ke maaddo määŋŋi ye, 50 i men mooye yen ñuugulo yaanna bi ätä kä nïïnnä yaana batta ŋäjje ye, ke wuuŋ yaana batta ŋäjje ye. 51 Aŋ ñuugulo yaanna bi jooje kä jooññu yaajgonḍe, aŋ bi ḍooce ke lääñoni nänṭä ba' ïwok ke ŋeeynä me leken.