1 Aŋ Yeecüwa koowi Wääktäŋ Jooŋ iññe woo teettälaŋ ogo püüccï booŋïn. 2 Aŋ büüṭṭü nïïnkä caykä kä ŋan, aŋ näägi käñ.

3 Aŋ booŋïn äätin Ike ti aŋ Ike kiini ogo, "Naana Ïkï agä Minneni Jooŋ ye, pämkä yaakka kiinä dalä wäätï a bïggï."

4 Aŋ luugi Yeecüwa ogo, "A pergon Meeŋka Jiik Jooŋ jï ogo,

‘Batta a ginäämkä pare ken mänbaan ḍooje,

a jiik’a jaaygä Jooŋ ye, ken mänbaan ḍooje.’"

5 Aŋ koowi booŋïn iññe baan laṇṇä yen mä Oorcalïïm ti, aŋ yuutte änlaṇṇä yen Jooŋ leŋŋe ti ñaalok. 6 Aŋ kiinne ogo, "Naana Ïkï agä Minneni Jooŋ ye, ḍoŋü yeepci ïñï, a pergon Meeŋka Jiik Jooŋ jï ogo,

‘Malaŋŋi yeeke bi iingee jiik ogo Ïkï,

aŋ Ïkï bi tïïjjïda,

aŋ Ïkï bi ḍürdïda ñaalok ïnken ti,

nuŋko ŋana tojdïda ko pääm kïyü ti.’"

7 Aŋ luugi Yeecüwa ogo, "Cäänna a pergon Meeŋka Jiik Jooŋ jï ogo, ‘Ŋana Pïṭo Jooŋ yüünü puuccudu.’"

8 Aŋ iji booŋïn ñaalok pääm bääynä ṭïṭṭe ti, aŋ nüütkene waak yek yätkïtïnnï yek ŋommañ wiñe muure ke gällä yeenen. 9 Aŋ kiinne ogo, "Wakkä yaakka muure bi iñenii kä, naana ika ḍüŋganaa ïñï aŋ ika maaŋŋaa ye."

10 Aŋ luugi Yeecüwa ogo, "Wükcü woo Ika ti, Wiñ yen Meŋkeekeni! A pergon Meeŋka Jiik Jooŋ jï ogo,

‘Pïṭo Jooŋ yüünü ken ḍüŋgüdü ïñï,

aŋ Ike pare ken maaŋä.’"

11 Aŋ mañji ïñï booŋïn, aŋ malaŋŋi äätin Ike yüükkï ti.

12 Aŋ wääna Yeecüwa tiiŋŋee kä ogo Yaaya müŋŋïï me aŋ üüljïnïï me ye, Ike ḍukcin ŋommañ mä Jalïïl ti. 13 Aŋ Naacira daljene ïñï, Ike attä cääynä Kaparnahuum kä koon mooye taaŋ, ŋommañ mä Jaabïloon ke Naptaalï ti. 14 Aŋ yaakki ḍääkit yaaka jaayi bäṭo Ïcaaya ye ogo,

15 "Ŋommañ mä Jaabïloon ke Naptaalï,

koon mooye taaŋ wii mä Üürdün taaŋŋañja,

Jalïïl yaana cääyene boorgu ye.

16 M’aka cäyok mïïllä gïtï ye,

yuṭṭu bownu mooye.

Aŋ m’aka cäyok ṭïïbbä tüwnü ti ye,*4.16 m’aka cäyok ṭïïbbä tüwnü ti ye, a m’aka Jooŋ kucu aŋ a yääyin cäyok mïïllä gïtï ye.

bownu diikin ïñï iken ti."

17 Waan yaanja ti Yeecüwa juwin kä paŋŋä ogo, "Ḍage kä nääŋkä yaackä yeekic aŋ ḍuuke Jooŋ ti, Yätkïtïn Polloŋ jïñe cokilin."

18 Aŋ wääna Yeecüwa äätee kä koon mooye yen mä Jalïïl taaŋŋe ti ye, Ike yurcin mädin kä yewwe, Camaan yaana battä me ogo Bütürüc ye ke määden Aṇdaraawuc. Yïïpcïdï ääŋ piitti, iken a m’aka müügü yak ye. 19 Aŋ kiinne ogo, "Ääte, bääte Ika ti, aŋ ikee bi nüütke müüŋŋü me bata yaana müüge kä yak ye." 20 Aŋ wina äŋkä yeeken dalji ïñï aŋ bäätcin Ike ti.

21 Aŋ wääna atene kä ye, Ike yurcin mädin yakkalaŋ kä yewwe ŋuca. Yaagüüp män Jabadï ke määden Yuhanna, cäyok kuun jï ke wäyen Jabadï, tütï äŋkä yeeken. Aŋ bärki Yeecüwa. 22 Aŋ wina kuun yeenen dalji ïñï ke wäyen aŋ bäätcin Ike ti.

23 Aŋ Yeecüwa attä laaynä Jalïïl jï muure, aŋ nüütï daaŋmallä yen Yühüüṇṇï jï, aŋ päkï kä Jiik Ŋerkä yek Yätkïtïn Polloŋ jïñe. Aŋ ṭïïñï yor carre ke rackïtïn muure waadgä mäbaan. 24 Aŋ ŋäjji me aŋ yäṇtonḍe ḍakkä ke Cüürïya jï muure, aŋ m’aka a rackä ye, äbi me Ike ti yaaka cääyge rackïtïnnï a päkkitṇi ke pillä yoken ti ye, ke yaaka cääygene meŋkeekeni ye, ke yaaka tüwdïdï ye, ke yaaka ämgen ke buggen a tüwïn ye, aŋ ṭeeññe muure. 25 Aŋ ṭoŋ diirken bäätcin ŋäñe ti mä Jalïïl ke Bänkä Caay, ke Oorcalïïm ke Yühüdïya, ke wii mä Üürdün taaŋŋañja.