1 మహపురు లోకుతి కోసొమి ఈ సేబతి పాయిఁ నాను మింగె రాచ్చలి ఔసొరొమి హిల్లెఎ. 2 మీ ఆసతి నాను పుంజెఎమఇఁ. ఏదఅఁ పాయిఁ మాసిదోనియ లోకు నోకిత మిమ్మఅఁ గౌరొమి కిహమంజఇఁ డాండుటిఎ అకయ రాజితరి తెయర ఆహమన్నెరి ఇంజిహిఁ ఏవరఇఁ. మీ ఆసతి మెస్స ఏవరి హారెఎలోకు తెయర ఆతెరి. 3 ఇంజహఁ మీ పాయిఁ మాంబు గౌరొమితొల్లె వెస్తికత్తయఁ ఉజ్జెఎ ఆఅరేటు నాను వెస్తిలెహెఁ మీరు తెయర ఆహఁ మంజలివల్లె ఇంజిహిఁ నమ్మకొముగట్టరఇఁ పండతెఎఁ. 4 మాసిదోనియతరి నాతొల్లె వాహఁ మీరు తెయర ఆహలొఒతెరి ఇంజిహిఁ పుంజతిహిఁ మింగెఎదెఁ ఆఎ, సమ్మ మీ ముహెఁ ఇచ్చెక నమ్మకొము ఇట్టితి మాంబువ లజ్జ ప్డానొమి. 5 ఏదఅఁతక్కి నమ్మకొముగట్టరఇఁ తొల్లిఎ మీ తాణ వాహఁ హచ్చి బర్సటిఎ మీరు హీనొమి ఇంజిహిఁ ఆంజితి చందతి తెయర కిహాజెరివ ఇంజిహిఁ వెస్సిలితకి ఏవరఇఁ పండనయి నెహిఁ ఇంజిహిఁ నాను జొహొర్కకిత్తెఎఁ. ఎచ్చెటిఎ మీ చంద బల్మిఎ హీతయి ఆఅన రాఁహఁతొల్లె హీతయిలెఁ మన్నె ఇంజిహిఁ నాను నమ్మిమఇఁ.

6 "కొచ్చెక మట్టినసి ఇచ్చణిఎ అర్నతి దాఎనెసి. గడ్డు మట్టినసి గడ్డు అర్నెఎ దాఎనెసి." ఇంజిహిఁ ఇదఅఁపాయిఁ వెస్సలిఆనె. 7 ఎంబఅసి ఇచ్చివ బితిబత ఆఅన బల్మిఎ ఆఅన తన్ని హిఁయఁత ఇచ్చెక హీతిదెఁ ఇంజిహిఁ ఒణ్పితిలెఁకి హీనయిమన్నె. ఏనఅకి ఇచ్చిహిఁ, మహపురు రాఁహఁతొల్లె హీనణఇఁ జీవునోనెసి. 8 ఓడె బర్రెతాణ మింగె ఆడ్డిని ఎచ్చెక కాల్లెఎ మన్నిలెహెఁ, బర్రె నెహిఁ కమ్మతి కోసొమి మింగె పుస్టినంగ మన్నిలెఁ మహపురు మింగె తన్ని కర్మతి గడ్డుకియ్యనెసి.

9 ఇదఅఁతకిఎ ఏవసి ఆస్తితి కర్మగట్టరకి బాటికీహ హిత్తెసి.

ఏవణి నీతి దయ కాల్లెఎ నిచ్చమన్నె ఇంజిహిఁ మహపురు కత్తత రాస్కిఆహమన్నె.

10 బిచ్చమట్టినణకి బిచ్చతి తింజలితక్కి రాందతి హిఁయాఁణి మహపురు మింగె బిచ్చ హీహఁ గడ్డుకిన్నెసి. మీ నీతి ఇన్ని అర్నతివ గడ్డుకిన్నెసి. 11 మీ తాణటి హారెఎగడ్డు బ్డాయు పాటి లోకు మా పాడియటి మహపురుఇఁ జొహొరకిమన్నెరి. 12 మీరు కిన్ని ఈ సేబ మహపురు లోకుతక్కి ఔసొరొమి తీర్సినయిఎదెఁ ఆఅన మహపురుఇఁ జొహొర వెహ్నిలెఁ కిహిమన్నె. 13 ఏనికిఁ ఇచ్చిహిఁ క్రీస్తు నెహిఁకబ్రుతి ఓపిసవాఁ లొంగిఁనతెరి ఆతకి ఏవరి పాయిఁవ బర్రెతి పాయిఁ, హారెఎ నెహిఁ మణుసుతొల్లె మీరు హీతకి, ఈ కమ్మటిఎ మీరు బర్రెతాణ సరిఆతతెరిలెహెఁ తోంజఆతకి ఏవరి మహపురుఇఁ గౌరొమికిన్నెరి. 14 ఓడె మీ ముహెఁ మహపురు తోంజికియ్యతి కజ్జ ఆసీర్వాదొమితి మెస్సహఁ, ఏవరి మీ పాయిఁ ప్రాతన కిహిహిఁ, మిమ్మఅఁ మెస్సలివల్లె ఇంజిహిఁ కజ్జ ఆస తొల్లె మన్నెరి. 15 ఒణ్పలి జోలలి ఆడ్డఅఎచ్చెక మహపురు వరొమితి పాయిఁ మహపురుకి జొహొర ఆపె.