1 జీసు గలిలయ సమ్దురి గట్టుత ఓడె వెండె వెస్సలితక్కి మాట్హెసి, హారెఎ జన్నలోకు ఏవణి తాణ కూడఆహమచ్చకి ఏవసి సమ్దురిత రో డొంగొత హోచ్చఁ కుగ్గమచ్చెసి, లోకు బర్రెజాణ సమ్దురి గట్టుత తోజొ కుగ్గమచ్చెరి. 2 ఏవసి పుస్పొనిక తొల్లె హారెఎ కత్తయఁ ఏవరఇఁ వెస్సహఁ ఏవసి ఏవరఇఁ ఇల్లెకీఁ ఇచ్చెసి.

3 "వెంజు! రో దిన్న బిచ్చ మట్టినసి మట్టలితక్కి హచ్చెసి." 4 ఏవసి మట్టిమచ్చటి కొచ్చెక బిచ్చ జియ్యుటొటొత రీతు, పొట్టయఁ వాహఁ ఏవఅఁతి తిచ్చు. 5 కొచ్చెక హారెఎ ఇఇర హిలఅగట్టి పాక బూమిత రీతు, ఎంబఅఁ ఇఇర హెక్కొ హిలఅతి పాయిఁ ఏవి జిక్కి నెయిఁతు. 6 సమ్మ, వేడ హోపురేటుఎ ఏవి వాడజాఁ, హీరు హెక్కొహలఅతక్కి వాయహచు. 7 కొచ్చెక హాప్కదుప్పయఁణ రీతు, హాప్కదుప్పయఁ పడ్డఆహిఁ ఏవఅఁతి డస్తుస్తకి ఏవి ఆయఆతు. 8 కొచ్చెక నెహిఁ బూమిత రీతు, ఏవి నెయిఁసవాఁ పడ్డఆహిసవాఁ ఆయితు; ఇంజఁ కోడె దొస్సొగుణ, తీనికోడి గుణ, పాస్కొడి గుణ, అర్నహీతు.

9 వెంజలితక్కి "క్రియుఁగట్టసిఎదెఁహెఁ వెన్నెసి" ఇంజిహిఁ వెస్తెసి.

10 జీసు రొఒసిఎ మచ్చటి బారొజాణ సిసుయెఁఎ ఏవణి సుట్టుమచ్చరిఎ ఏ పుస్పొనితి పాయిఁ ఏవణఇఁ వెచ్చెరి. 11 ఏదఅఁతక్కి ఏవసి మహపురు రాజితి పాయిఁ పుంజలితకి డుగమని సొత్తొ మింగె హీప్కిఆహానె, సమ్మ పంగతరకి బర్రెకత్తయఁ ఉదాహారణలెహెఁ వెస్పిఆహిమన్ను. 12 ఏనఅకి ఇచ్చిహిఁ, ఏవరి

మెస్సి మెస్సిఎ

పున్నొఒరి,

వెంజివెంజిఎ

అస్సకొడ్డొఒరి

వెంజహఁ ఏవరి మహపురు బకి తిర్వినరి ఇచ్చిఁమ

తమ్మి పాపుటి కెమాపాటెరిమ ఇంజిహిఁ ఏవరితొల్లె వెస్తెసి.

13 ఎచ్చెటిఎ జీసు ఏవరఇఁ ఇల్లెకీఁ ఇచ్చెసి, "ఈ పుస్పొనితి మీరు పున్నఅతెరికి? ఎలెకిఁఇచ్చిహిఁ మన్ని పుస్పొనికాణి మీరు ఏనికిహిఁ పుంజెరి? 14 మట్టినసి మహపురు హాడ్డ మట్టిమన్నెసి. 15 జియ్యు టొట్టొత రీతరి పాడెయలెఁతరి అంబఅరి ఇచ్చిహిఁ మహపురు బోలు ఏవరితాణ రీతెసమ్మ వెచ్చిదేచొఎ సాతాను వాహిఁసవ రీతి బోలుతి పెర్హఓనెసి. 16 ఎల్లెకీఁ వల్లి బూమిత రీతి పాడెయలెఁతరి అంబఅరి ఇచ్చిహిఁ మహపురు బోలు వెంజహఁ రాఁహఁతొల్లె ఓపిన్నరి. 17 ఇంజహఁ ఏవరితాణటి హీరు హెక్కొహలఅతక్కి కొచ్చెక కాలొమి పత్తెక ఏవరి నిన్నెరి సమ్మ మహపురు బోలుతి పాయిఁ కొస్టొయఁ హింసయఁ వాతిసరి ఏవరి పిస్తుహున్నెరి. 18 కొచ్చెక జాణ హాప్క దుపాణ రీతి పాడెయ సొమనతరి. 19 ఈవరి మహపురు బోలు వెన్నెరి సమ్మ బత్కుత ఒణ్పుయఁ, దొన్నొ టక్కయఁ, ఎట్కతరఇఁ నాడికిని ఒణ్పుయఁ బిత్రొహోడఁ మహపురు బోలుతి డస్తిసరి, ఏవరి నీడెఒరిదెఁ. 20 ఇంజహఁ నెహిఁ బూమిత రీతి పాడెయసొమనతరి అంబఅరి ఇచ్చిహిఁ, మహపురు బోలుతి వెంజహఁ ఎదణితి నమ్మిసవాఁ కోడెదొస్సొగుణ హారెఎ తీనికొడిగుణ హారెఎ పాసకొడిగుణ హారెఎ అయినెరి" ఇంజిహిఁ వెస్తెసి.

21 ఓడె జీసు ఏవరఇఁ ఇల్లెకీఁ ఇచ్చెసి, "దీఁవుఁ సోడయఁ లెక్కొ ఇట్టలితక్కిఎదెఁ సమ్మ మాణడోఇ ఇచ్చివ కట్టెలిడొఇ ఇచ్చివ ఇట్టలితక్కి తప్పిఆఎ మా! 22 పిడ్కహమన్నయి ఏనయివ పంగత తోంజఆఅన మన్నెఎ, ప్డిక్హమన్నయి ఎచ్చెలతక్కివ దెప్పిఆఅనా మన్నెఎ. 23 వెంజలితక్కి అంబరకి క్రియుమన్నె ఏవరిఎదెఁ వెన్నెరి."

24 ఓడె ఏవసి ఇల్లెకీఁ ఇచ్చెసి "మీరు ఏనఅఁ వెంజిజెర్రి జాగెర్త సినికిహ కొడ్డదు! మీరు హారెఎ కొల్లతొల్లె కొల్లకిహఁ హీదెరి ఏదిఎ కొల్లతొల్లె కొల్లకిహఁ మహపురు మింగె హియ్యనెసి, ఏదఅఁకిహఁ ఓడె గడ్డు హియ్యనెసి. 25 ఊణ మన్నణకి హీప్కిఆనె, హిల్లఅగట్టణకి మన్ని ఇచ్చణితివ రెజ్జకుతలి" ఆనె ఇంజిహిఁ ఏవరఇఁ వెస్తెసి.

26 జీసు ఓడె ఏవరఇఁ ఎల్లెఇచ్చెసి, "మహపురు రాజి రో మణిసి బూమిత బిచ్చమట్టినణి సొమన మన్నె. 27 ఏవసి లాఅఁయఁ ఇదకిహిఁ మద్దెన తెఇలిహిఁ ఏవసి పున్నఅఁరేటు బిచ్చ నెయిఁసవాఁ పడ్డఆనిలెఁ మన్నె. 28 ఏనఅఁకి ఇచ్చిహిఁ బూమి తంగొతకి తానుఎ మొక్కొతి పడ్డఆనిలెఁ కిన్నె, తొల్లి నెయ్యఁహఁ పడ్డఆనె డాయు పోట్ర ఆహఁ జేంగు ఆనె, ఎచ్చెటిఎ ఏ జేంగు ముద్రహఁ కంబిన్నె. 29 అర్న కంబిసరి ఏవసి దాపకాలొమి వాతె ఇంజిహిఁ రేటుఎ కోంచడొవ్వెలి అస్సహఁ డాన్నెసి."

30 ఓడె జీసు ఎలెఇచ్చెసి "మహపురు రాజితి ఏనఅతొల్లె పోల్హినయి? ఏని పుస్పొనితొల్లె ఏదఅఁతి వెహ్నయి? 31 ఏది హావఁగింజ్జలెఁతయి, హావఁగింజ్జ బూమి లెక్కొ నెయ్యిఁతి బిచ్చయఁకిహఁ ఇచ్చాయిఎ. 32 మట్టిని డాయు ఏది నెయ్యఁహఁ పడ్డఆహిసవఁ కుచ్చమొక్కొయఁకిహఁ కజ్జయి ఆహఁ కొమ్మయఁఆనె ఏదఅఁతక్కి హాగుత ఊంబిని పొట్టయఁ బోఁడొయఁ దొస్సహఁ ఏదని సాయిఁత బస్సఆను."

33 ఏవరి వెంజలి ఆడిని సెక్తి మన్ని పత్తెక హారెఎ ఇల్లెతి పుస్పొనికతొల్లె వెస్సహఁ ఏవసి ఏవరఇఁ మహపురు బోలు వెస్తెసి. 34 పుస్పొనిహిలఅన్నా ఏవరఇఁ ఏనఅఁవ వెస్సలొఒసి, సమ్మ రొఒసిఎ మన్నటి తన్ని సిసుయఁణి బర్రె పుఁణ్బె వెస్తెసి.

35 ఏ దిన్నమిడొఒల అయ్యలిఎ జీసు తన్ని సిసుయఁణి "సమ్దురి గ్ణాంచహఁ అత్తల గట్టుత హన్నొజాదు" ఇంజిహిఁ వెస్తెసి. 36 ఏవరి నోరొలోకుతి పండిసవాఁ ఏవణఇఁ ఏవసి మచ్చిడొంగొటిఎ ఊణడొంగొత ఓహిఁహచ్చెరి, ఏవరి దేచొ కొచ్చెక డొంగొయఁ వాతు. 37 రేటుఎ కజ్జగాలిపియు వయ్యలిఎ ఏవసి మచ్చి డొంగొలెకొ ఏయు వేచ్చలిఎ డొంగొ నెంజహచ్చు. 38 ఏవసి డొంగొత తార్పు ఆంగిసహఁ హుంజాఁ ఇదకిహిఁ మచ్చెసి, ఏవరి ఏవణఇఁ నిక్హిసవఁ "హే గూరు! మాంబు హేడహజ్జినొమి నింగె ఒణ్పుహిలెఎకి?" ఇంజిహిఁ ఏవణఇఁ ఇచ్చెరి.

39 ఏదఅఁతక్కి జీసు నింగహఁ గాలితి "డూంగము" ఇచ్చెసి, సమ్దురితి "పల్లెఎ ఆము" ఇంజిహిఁ హెల్లొహియలిఎ, గాలి సమ్దురి డూంగిసవఁ సుస్తార ఆతె. 40 ఎచ్చెటిఎ జీసు తన్ని సిసుయఁణి "మీరు ఎన్నఅకి అజ్జిమంజ్జెరి? మీరు ఓడెవ నమ్ముహిలఅ రేటుఎ మంజెరికి?" ఇంజిహిఁ ఏవరఇఁ వెస్తెసి.

41 ఏవరి హారెఎ అజ్జిసహఁ "ఈవసి అంబఅసిఎకి? గాలివ సమ్దురివ అజ్జిమన్ను!" ఇంజిహిఁ రొఒణితొల్లె రొఒసి వెస్పిఆతెరి.