Marcos 6

పాసమాణ లోకుతక్కి రాంద హీనయి

30 ఎచ్చెటిఎ అపొస్తుయఁ జీసు తాణ కూడఆహాఁ తాంబు కితఅఁబర్రె జాప్హఅఁబర్రె జీసుఇఁ పుఁణ్బికిత్తెరి. 31 "ఎచ్చెటిఎ జీసు ఏవరఇఁ జాదు లోకు హిల్లఅటాయుత హజ్జహఁ రో గాడెక వాహు తీరికికహన్నొ ఇంజిహిఁ వెస్తెసి," ఏనఅకి ఇచ్చిహిఁ హారెఎ లోకు వాహిహిఁ హజ్జిహిఁ మచ్చకి, రాంద తింజలితకివ పాటిహిలఅతెరి. 32 ఇంజహఁ ఏవరి డొంగొత హోచహఁ లోకు హిల్లఅఁ టాయుత వరిఇ తాంబుఎ హచ్చెరి.

33 ఏవరి హజ్జిమచ్చణి లోకు మెస్సహఁ, హారెఎ జాణ ఏవణఇఁ బచ్చిపుంజహఁ, సారిసుట్టు నాస్కటి గాడాఁటి ఎంబఅఁ వరిఇ తాకుతొల్లె ఏవరి కిహఁ తొల్లిఎ ఏ టాయుత ఎగహచ్చెరి. 34 ఇంజహఁ జీసు వాహఁ ఏ కజ్జమందతి మెస్సహఁ, ఏవరి గోడు హిల్లఅ మేండయఁలెహెఁ మచ్చకి ఏవరి ముహెఁ కర్మఆహఁ, ఏవరకి హారెఎ కత్తాణి వెస్సలి మాట్హెసి. 35 హారెఎ మిడిఒల ఆయ్యలిఎ సిసుయఁ జీసు తాణ వాహఁ "ఇది జాడరాజి, నీఎఁ హారెఎ మిడిఒల ఆహఁ హచ్చె, 36 సుట్టుపక వల్హవాడియఁ నాస్కణ ఏవరి హజ్జహఁ తాంబు ఏనఅఁ పట్టె కొడ్డతిఁడ్బెరివ." ఇంజిహిఁ ఏవరఇఁ పండము ఇచ్చెరి.

37 ఏదఅఁతక్కి జీసు ఏవరఇఁ ఇల్లెఇచ్చెసి "మీరుఎ ఏవరకి రాంద హీదు!" ఇంజలిఎ

ఏవరి మాంబు హజ్జహఁ "రీ వంజ కాసుతి*6:37 రో "దేనారము" రో దిన్నతి కూలి రాంద కొడ్డహఁ ఏవరకి హీనొమికి" ఇంజిహిఁ జీసుఇఁ వెచ్చెరి.

38 ఏదఅఁతక్కి జీసు ఎల్లెఇచ్చెసి "మీ తాణ ఎచ్చొరగొట్ట రొట్టెయఁ మన్ను? హజ్జహఁ సినికీదు" ఇంజిహిఁ ఏవరఇఁ వెస్తెసి,

ఏవరి హజ్జహఁ సినికియలిఎ "పాసగొట్ట రొట్టెయఁ, జోడెక మ్ణీక మన్ను" ఇచ్చెరి.

39 ఎచ్చెటిఎ జీసు ఏవరఇఁ గర్కిగుడ్డియత వర్సె కుగ్గికిద్దు ఇంజిహిఁ సిసుయఁణి వెస్సలిఎ, 40 ఏవరి పస్కొడి జన్నలక దుయికొడి దొస్సొ జన్నలక వర్సె కుగ్గితెరి. 41 ఎచ్చెటిఎ జీసు పాసగొట్ట రొట్టెయఁణి రీ మ్ణీకాఁణి అస్సహఁ, హాగువకి త్రాయుఁ పెర్హఁ మహపురుఇఁ జొహొర వెస్సహఁ ఆసీర్వాదొమి కిహఁ, ఏ రొట్టెణి డిక్హఁ, ఏవరకి హాస్పలి తన్ని సిసుయఁకి హిత్తెసి, ఏ రీ మ్ణీకాఁణివ బర్రెతక్కి హాస్పితెరి. 42 ఏవరి బర్రెజాణ తింజహఁ ఊస్కితీరితి డాయు 43 హారితి మ్ణీకాఁణి రొట్టె గండ్రాణి బారొ దొడ్వ నెంజెపెర్హెరి. 44 ఏ రొట్టెయఁ తిచ్చరి ఆబెలంగెఎ పాసమాణ జాణ లోకు.