మత్తయి 13

జాడ మొక్కొయఁ ఉదాహారణ

24 ఏవసి ఓరొ రొండి ఉదాహారణ ఏవరితొల్లె వెస్తెసి, "లెక్కొపురు రాజి ఏవణి సొబయఁత నెహిఁ బిచ్చ మట్టితి కమ్మగట్టరఇఁ పోల్హ మన్నె. 25 రో దిన్న మణిసియఁ ఇద్దకిహఁ మచ్చటి ఏవణి పగ్గగట్టసి వాహిఁసహఁ గోదుమయఁ మద్ది జాడ మొక్కొయఁ బిచ్చ మట్ట హచ్చెసి. 26 మొక్కొయ కజ్జఇ ఆహిఁ జేంగు హోచిచటి ఏ జాడ మొక్కొయవ తోంజఆతు. 27 ఎచ్చెటిఎ ఏ ఇల్లుతి తంజి సేబగట్టరి దరి వాహఁ ‘ప్రెబు, నీను నీ సొబత నెహిఁ బిచ్చయఁ మట్టితిమ సమ్మ, ఏదఅఁతక్కి జాడ మొక్కొయ ఏనికి వాతు?’ ఇంజిహిఁ వెచ్చెరి. 28 ‘ఇది పగ్గగట్టసి కిత్తి కమ్మ’ ఇంజిహిఁ ఈవసి ఏవరతొల్లె వెస్తెసి. ఏ సేబగట్టరి ‘మాంబు హజ్జహఁ ఏ కల్తి మొక్కొయణి రెమ్ము ఇంజదికి?’ ఇంజిహిఁ ఏవణిఇఁ వెచ్చెరి. 29 ఏదఅఁతక్కి ఏ తంజి, ‘ఇల్లెకీఁ కిఅదు. జాడ జాండు రెజ్జహిఁ ఏవఁతొల్లెవ గోదుమయఁ మొన్నయఁ రెన్నెరి హబు. 30 కోత డాని కాల వాని పత్తెక రిండఅఁతి పడ్డఅయ్యలి హీదు తొల్లి జాడ మొక్కొయణి కూడికిహఁ హూడలితక్కి వెహ్క దొహ్దు. గోదుమయఁ నా క్డానుత ఇట్టదు, ఇంజిహిఁ రొచ్చెక దాపకాల పత్తెక ఏవరకి వెస్తెమ’ ఇచ్చెసి."