1 మహపురు సేబగట్టసి జీసు క్రీస్తు అపొస్తుల ఆతి పౌలు,

మహపురుతొల్లె ఎర్సకొడితి లోకుతక్కి నమ్ముత తాకికిహిఁ సొత్తొతి జియ్యుత జాప్హలితక్కివ ఎర్సకొడ్డితత్తెఎఁ. 2 బొంకగట్టి మహపురు నోకెఎ మంగె వాగ్దానొమి కియ్యతి ఏ జీవుతిఁ పాయిఁ ఆసతొల్లె కూడితి ఏ కాలెఎతి జీవు. 3 రొ బేలత ఏవసి నీఎఁ మా గెల్పినసి ఆతి మహపురుతి హెల్లొతి సొమన నంగె హెర్పతి కబ్రుతాణటి తన్ని బోలుతి పుఁణ్బికిత్తెసి.

4 ఇంబఅఁ మా బర్రెతి నమ్ముతాణ నా సొంతె మీరెఎసిఆతి తీతుకుకి రాచ్చిమన్ని ఉత్రొమి,

తంజి ఆతి మహపురు తాణటి మా జీణకిని క్రీస్తు జీసుటి క్రుప, కానికర్మ హిత్డి నింగెకి వాపెదెఁ.

5 నాను నింగెకి హెల్లొ హియ్యతి సొమన నీను నెహిఁకిహిల్లఅతెహెఁ సరికిహఁ, బర్రె గాడత కజ్జరఇఁ నిప్హలితకిఎ నాను క్రేతు గాడత నిన్నఅఁ పిస్సహఁ వయ్యతెఎఁ. 6 సంగొమితక్కి హావుఁత ఆఇఁ ఇన్నసి, నింద హిలఅగట్టసి ఆహఁ, రొండిఎ డొక్రిఆహఁ మంజలివల్లె, నాడికినరి ఆఅన ఏవఁణి కొక్కరిపోదయఁ నమ్ముత మన్నరి ఆహఁ మంజలివలె. 7 ఏనఅఁతక్కి ఇచ్చిహిఁ, కజ్జసి మహపురు ఇల్లు సేబకిన్నసి నింద హిలఅగట్టసి ఆహఁ మచ్చిదెహెఁ, ఏవసి బొడ్డొపొణొ, కోపగట్టసి, కాడుగొహ్నసి, గుప్ననసిఆఅన, ఆసగట్టసిఆఅతిదెఁ. 8 వాణి గొత్తబందతి గౌరొమికిన్నసి, నెహిఁ జీవునోనసి, ఒడ్డితి బుద్దిగట్టసి, నీతిగట్టసి, సుద్దుగట్టసి, ఆసతి ఓర్హిఁ ఇట్టకొడ్డినసి ఆహఁ నెహిఁ మచ్చిదెఁ. 9 తాను నెహిఁ హాడ్డత జాప్నసి కత్తత లోకుణి వెస్సలితక్కి, వెండెజోల్లిని హాడ్డతి వెండెవెస్సలితకి సక్తి మన్నరిలెహెఁ, నమ్మలి ఆడ్డినని నమ్మిఅతని జాప్నిహాడ్డతి పిహఅన ఏ కత్తతి అస్సకొడ్డిహిఁ మచ్చిదెఁ.

10 మెహ్నరి, సున్నతి నియొమొమిత నమ్మహఁ, లగ్గెఎతి కమ్మయఁ కిన్నెరి, మోసొమికిన్నరిలెహెఁ ఆహఁ మన్నెరి. 11 ఏవరి గూతియఁ ముద్ద కివికిత్తిదెఁ. ఏవరి లజ్జ హిల్లఅ అక్రెమణ లాబొమి కోసొమి జాపగట్టఅఁతి జాప్హిఁ, కుటుంబొమికణి హేడి కిహిమన్నెరి. 12 ఏవరి తాణటి రొఒసి, ఇచ్చిహిఁ ఏవరి తాణ సొంతె ప్రవక్తయఁటి రొఒసి ఇల్లెకీఁ ఇచ్చెసి, క్రేతీత లోకు ఎచ్చెలవ బొంకినరి, లగ్గెఎతి ముర్కొగట్టరి, నిస్తగట్టి, టిండిబుతుయఁలెహెఁ మన్నెరి. 13 ఈ హాడ్డయఁ అస్సులిఎ. ఏదఅఁతక్కి ఏవరి యూదుయఁ ఆతి ఆఅతి పుస్పొణిక,సొత్తొటి పిట్టొవిఆతి ఏవరి మేర్రతి పాయిఁ సముయొమితి కాడెఎ కిఅణ సాక్కి వెహ్ము. 14 నమ్ముతొల్లె యూదుయఁ సొత్తొత నిన్నిలెహెఁ ఏవరఇఁ గట్టినంగ హెల్లొ హీహిఁ లాగము. 15 సుద్దుగట్టరకి బర్రె నెహఁయిఎ, లగ్గెఎతరకి నమ్ముకొము హిల్లఅగట్టరకి ఏనయివ నెహఁయి ఆఎ, ఏవరి మణుసు ఏవరి మోనొ సాక్కిఎ లగ్గెఎతయి ఆహానె. 16 మహపురుఇఁ పుంజెఎన్నొమి ఇంజిహిఁ ఏవరి నెహిఁ వెస్సకొడ్డినెరి సమ్మ, ఏవరి లగ్గెఎతరి, లొఙఅగట్టరి, ఏవరి తమ్మి కమ్మయఁ తాణటి మహపురు ఎంబసిఎనొ మాంబు పున్నొఒమి ఇంజిహిఁ తోసకొడ్డినెరి,