1 ଆଦିଙ୍କ୍ ପ୍ରେମ ସେଙ୍ଗେ ମିଡ଼୍ ତିଆର୍‍ତେ ଆୟ୍‍ମୁଟ୍ । ମେଣ୍ଡେବାଗାତ୍ ଆତ୍ମାତାଦ୍ ଦାନ ପାଏମ୍ ଆଦାନଙ୍କ୍, ବିଶେଷ୍‍ମାଡ଼ି ଇଶ୍ୱର୍‌ତାଦ୍ ବାକ୍ୟ ପ୍ରଚାର୍ ମାଡ଼ାନଙ୍କ୍, ମିୟାଦ୍ ଲୋପେତ୍ ଇଚ୍ଛା ଆୟି । 2 ବେନ ୱେରେ ଗଟ୍‍ତେ ତିର୍‍ୟିତଣ୍ଡ୍, ଅଣ୍ଡ୍‌ ନାରୁଡ଼୍ ତଡ଼୍ ଗଟି ତିର୍‍ୟଣ୍ଡ୍, ଇଶ୍ୱର୍‌ତେ ଉଦେଶ୍ୟ କେତିତଣ୍ଡ୍ । ଅନ୍‌ ଗଟି ବେନ ବୁଜେମ୍ ଆୟ୍‍ୟଣ୍ଡ୍ । ଅଣ୍ଡ୍‌ ଆତ୍ମାତେ ଶକ୍ତିତେ ଲୋପେତ୍ ଜିନିଷ୍ କେତିତଣ୍ଡ୍ । 3 ଇତ୍‍କେ ବେନ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିତନ୍, ଅଣ୍ଡ୍‌ ଆଦ୍ ନାରୁଡ଼୍‍କିଂଙ୍କ୍ କବର୍ କେତିତଣ୍ଡ୍, ଆଦିନ୍ ତଡ଼୍ ଅଡ଼୍‌‍କିଂଙ୍କ୍ ସାହାଯ୍ୟ, ୱେଡ଼୍‍କ୍‍ ନୁ ସାନ୍ତନା ଇଦ୍‍ତେ । 4 ବେନ ୱେରେ ଗଟ୍‍ତେ ଗଟି ତିର୍‍ୟିତଣ୍ଡ୍, ଅଣ୍ଡ୍‌ ମାତର୍ ନିଜେତ୍ ସେଙ୍ଗେ ଆଦ୍ ମାଡ଼ିତନ୍; ଇତ୍‍କେ ବେନ ଇଶ୍ୱର୍‌ତେ ବାକ୍ୟ* ପ୍ରଚାର୍ ମାଡ଼ିତନ୍, ଅଣ୍ଡ୍‌ ସାର୍ରେତାୱୁ ମଣ୍ଡଲିକିଙ୍କ୍ ସାହାଯ୍ୟ ମାଡ଼ିତନ୍ ।

5 ମିଡ଼୍ ସାର୍ରେତଡ଼ି ୱେରେ ଗଟ୍‍ତେ ତିର୍‍ୟିକେ, ନାନ୍ ୱେଡ଼୍‍କ୍‍ ଆଦ୍‍ତନ୍, ଇତ୍‍କେ ନାନ୍ ଆଲ୍‍ସୁତାନ୍, ମିଡ଼୍ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ାନଙ୍କ୍ ଶକ୍ତି ପାଏମ୍ ଆୟ୍‍ମୁଟ୍ । ୱେରେ ଗଟ୍‍ତେ ଗଟି ତିର୍‍ୟାନାଦ୍, ମଣ୍ଡଲିତିଙ୍କ୍ ଟିକ୍ ଆୟ୍‍ୟ; ଯଦି ବେନ ଆଦିନ୍ ଇତ୍‍କେ କେସ୍ ବୁଜାମାଡ଼ିତଣ୍ଡ୍, ଇଲୁକ୍ ୱେରେ ଗଟ୍‍ତେ ଗଟି ତିର୍‍ୟାନାଗାକନ୍ସ୍ ଇଶ୍ୱର୍‌ତେ କବର୍ ପ୍ରଚାର୍ ମାଡ଼ାନାଦ୍ ସାୟେ । 6 ଦାଦାଲଡ଼ି ନୁ ଏଲାସ୍କ୍, ନାନ୍ ଯଦି ମିଇ ବକେତ୍ ୱାସ୍ ୱେରେ ଗଟ୍‍ତେ ଗଟି କେତିତାନ୍, ବା ଇଶ୍ୱର୍‌ତାଗାଙ୍କ୍ ବାତ୍‍ଆଇ ଗଟ୍ କି ବାକ୍ୟ କି ବାତ୍‍ଆଇ ନାଡ଼୍‍ସାନାଦ୍ ବିଷୟ୍ କେଲନ୍, ଆଲେକେ ମିୟାଦ୍ ବାତ୍ ଉପ୍‍କାର୍ ଆଦ୍‍ତେ ?

7 ହସଡ଼୍ ବା ବୀଣା ଲେକାମ୍ ଜିୱେଇଲ୍‍ୱାଦ୍ ପେଞ୍ଚାନାଦ୍ ବିବେଚନା ମାଡ଼ାଟ୍, ଯଦି ଟିକ୍ ଲେଙ୍ଗ୍‌ଦେ ନେକକ୍, ଆଲେକେ ଆଗେ ବାତ୍ ନେକୁତ୍, ବେନ ବାତ୍ ପୁନ୍ଦାନଙ୍କ୍ ପାର୍‍ଦ୍‍ତଣ୍ଡ୍ ? 8 ତୁରୀ ନେକାନାଲ୍‌ଦ୍ ସାୟେ ୱାଡ଼କ୍, ବେନ ବାତେଙ୍କ୍ ଯୁଦ୍‌ ମାଡ଼ାନଙ୍କ୍ ତିୟାର୍ ଆଦ୍‍ତନ୍ ? 9 ଆଦେପୁଟୁଙ୍କ୍, ଯଦି ପୁନ୍‍ୱାଦ୍ ଗଟ୍‍ତେ ଗଟି କେତ୍‍କେ, ଆଲେକେ ଆଦିଙ୍କ୍ ବେନ ବୁଜେମ୍ ଆଦ୍‍ତନ୍ ? ଇଦ୍ ଗାଲ୍‍ଦିଙ୍କ୍ କେତ୍‍ତାନ୍ ଲେକାମ୍ ଆଦ୍‍ତେ । 10 ଜଗତ୍‍ତାଗ୍ ନାର୍‍ଗେ ଗଟି ମିନ୍ଦେ, ଇତ୍‍କେ ଆୱୁସାର୍ରେ ଲୋପେଙ୍କ୍ ୱେରଡ଼୍ ମିକା ଇତ୍‍କେ ଇଲ୍‍ୱାଦ୍ ଆୟ୍‍ୟ । 11 ଯଦି ନା ତଡ଼୍ ତିର୍‍ୟମାନ୍ଦାନ୍ ନାରୁନାଦ୍ ଗଟି ନାନ୍ ବୁଜେମ୍ ଆଦାନଙ୍କ୍ ପାର୍‍ୱନ୍, ଆଲେକେ ଆଦ୍ ନାରୁଡ଼୍ ନା ବକେତ୍ ପୁନ୍‍ୱେନଣ୍ଡ୍ ଆଦ୍‍ତନ୍, ନାନ୍ ମିକା ଅନ୍‌ ବକେତ୍ ପୁନ୍‍ୱେ ନାରୁଡ଼୍ ଲେକାମ୍ ଆଦ୍‍ତନ୍ । 12 ମିଡ଼୍ ବାତ୍‍ବାତ୍ ପବିତ୍ର ଆତ୍ମାନ୍‍ ଦାନ ପାଏମ୍ ଆଦାନ୍ ସେଙ୍ଗେ ଇଚ୍ଛା ମାଡ଼ିମାନ୍ଦାଙ୍କ୍, ଆୱୁ ଲୋପେଙ୍କ୍ ବେନାସାର୍ରେ ମଣ୍ଡଲିତେ ସାୟେ ସେଙ୍ଗେ ଲେକାମ୍ ମାଡ଼େ ପାର୍‍ଦ୍‍ତା, ଆୱିଙ୍କ୍ ଗାଟି ବ୍ୟବହାର୍‌ ମାଡ଼ାନଙ୍କ୍ ଆଲ୍‍ସି ମାଡ଼ାଟ୍ । ପେନ୍‍ସାନ୍‌ ସାମାନ୍‌

13 ଆଦିଙ୍କ୍ ବେନ ୱେରେ ଗଟ୍‍ତେ ଗଟି ତିର୍‍ୟିତଣ୍ଡ୍, ଅଣ୍ଡ୍‌ ଆଦିନାଦ୍ ଇତ୍‍କେ ବୁଜା ମାଡ଼ାନଙ୍କ୍ ଦାନ ପାଏମ୍ ଆଦାନଙ୍କ୍ ପ୍ରାର୍ତନା ମାଡ଼ିଣ୍ଡ୍ । 14 ଯଦି ନାନ୍ ୱେରେ ଗଟ୍‍ତେ ପ୍ରାର୍ତନା ମାଡ଼ିତାନ୍, ମାତର୍ ନାୟାଦ୍ ଲୋପେତ୍ ଆତ୍ମା ଆଦ୍ ମାଡ଼ିତ୍, ନାୟାଦ୍ ମାନ୍‍ ଆଗେ ଇଲ୍‍ୱେ ମାନ୍‍ତେ । 15 ଆଲେକେ ନାନ୍ ବାତ୍ ମାଡ଼ିତାନ୍ ? ନାନ୍ ନା ଆତ୍ମାତେ ଇଚ୍ଛାତେ ପ୍ରାର୍ତନା ମାଡ଼ିତାନ୍, ଇତ୍‍କେ ସାଙ୍ଗେ ସାଙ୍ଗେ ନାୟାଦ୍ ବୁଦ୍ ଆଲ୍‍ସି ମିକା ପ୍ରାର୍ତନା ମାଡ଼ିତାନ୍ । ନାନ୍ ନା ଆତ୍ମାତେ ଲେକାମ୍ ପାଟା ପାରିତାନ୍, ଇତ୍‍କେ ଆଦିନ୍ ତଡ଼୍ ମାନ୍‍ ଇସ୍ ପାଟା ପାରିତାନ୍ । 16 ଆଲା ଆୟକ୍ ଇଶ୍ୱର୍‌ତିଙ୍କ୍ ମିୟାଦ୍ ଆତ୍ମାତେ ଇଚ୍ଛାତେ ଦନ୍ୟବାଦ୍ ଇଦାନ୍‍ୱେଲେ, ଆଗେ ମାନ୍ଦାନ୍ ୱେରଣ୍ଡ୍ ନାରୁଡ଼୍ ବେଲା ମିଇ ତଡ଼୍ "ଆମେନ୍‍" କେତିତଣ୍ଡ୍ ? ବାତେଙ୍କ୍‍ଇତ୍‍କେ ମିଡ଼୍ ବାତ୍ କେତୁତିଡ଼୍, ଆଦ୍ ଅଣ୍ଡ୍‌ ପୁନ୍ଦାନଙ୍କ୍ ପାର୍‍ୱଣ୍ଡ୍ । 17 ମିଡ଼୍ ସାୟେ ଲେକାମ୍ ଦନ୍ୟବାଦ୍ ଇସ୍ ମାତ୍‍କେ ଗାଲା, ଆଦିନ୍ ତଡ଼୍ ଆଦ୍ ନାରୁଡ଼୍ ବେଲାମେଣ୍ଡେ ଉପ୍‍କାର୍ ଅଦାନଙ୍କ୍ ପାର୍‍ୱଣ୍ଡ୍ ।

18 ନାନ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦୁତାନ୍, ବାତେଙ୍କ୍‍ଇତ୍‍କେ ନାନ୍ ମିଇ ସାର୍ରେତଡ଼୍ ତାଗାଙ୍କ୍ ଗାଟି ୱେରେ ଗଟି କେତ୍‍ପାର୍‍ଦ୍‍ତାନ୍ । 19 ଇତ୍‍କେ ମଣ୍ଡଲିତାଗ୍ ଉପାସନାତାଗ୍ ୱେରେ ଗଟ୍‍ତେ ହଜାର୍‌ ହଜାର୍‌ ଶଦ୍ଦ ବ୍ୟବହାର୍‌ ମାଡ଼୍‍ୱେକନ୍ସ୍ ସାର୍ରେତଡ଼୍ ବୁଜେମ୍ ଆଦାନ୍ ରକମ୍ ଏଇଙ୍ଗ୍ ଶଦ୍ଦ କେତାନାଦ୍ ସାୟେ ।

20 ଦାଦାଲଡ଼ି ନୁ ଏଲାସ୍କ୍, ଚିନ୍ତେତାଗ୍ ପିଲାନ୍ ଲେକାମ୍ ଆୟ୍‍ମାଟ୍ । କାରାପ୍ ବିଷୟ୍ ସେଙ୍ଗେ ପିଲାନ୍ ଲେକାମ୍ ଆୟ୍‍ମୁଟ୍; ଇତ୍‍କେ ବୁଦ୍ ବିଚାର୍‍ତାଗ୍ ମିଡ଼୍ ସାରେ ବୟସ୍‍ତଡ଼୍ ଆଦାନାଦ୍ ସାୟେ । 21 ଦର୍ମଶାସ୍ତ୍ରତାଗ୍ ଲେକାମିନ୍ଦେ,

"ପ୍ରବୁ କେତୁତଣ୍ଡ୍, ପୁନ୍‍ୱାଦ୍ ଗଟ୍ କେସମାନ୍ଦାନ୍

ବିଦେଶୀ ନାରୁଡ଼୍‍କିନ୍ ପାୟୁର୍‍ତାଗ୍

ନାନ୍ ଇଦ୍ ଜାତି ତଡ଼୍ ଗଟି କେତିତାନ୍ ।

ଆଗେକ୍‍ବା ଅଡ଼୍‌ ନା ଗଟି କେଞ୍ଜଡ଼୍ ।"

22 ଇତ୍‍କେ ୱେରେ ଗଟ୍ କେତ୍‍ତାନ୍ ଶକ୍ତି ବିଶ୍ୱାସୀଡ଼୍ ସେଙ୍ଗେ ବାତ୍‍ବା ବିଷୟ୍‍ତାଦ୍ ନିର୍ଦେଶ୍ ଇନା ଆୟ୍‍ୟ । ଆଦ୍ ଆସାମ୍ ଅବିଶ୍ୱାସୀଡ଼ାଗ୍ ଆଶ୍ଚର୍ଯ୍ୟ ଶକ୍ତିତାଦ୍‍ ନିର୍ଦେଶ୍ । ମେଣ୍ଡେଅନ୍‌ ରକମ୍, ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନାଦ୍ ଶକ୍ତି ବିଶ୍ୱାସ୍ ଇଲ୍‍ୱେ ସେଙ୍ଗେ ଆୟ୍‍ୟ, ମାତର୍ ବିଶ୍ୱାସୀଡ଼୍ ସେଙ୍ଗେ ଇଦ୍ ଆଶ୍ଚର୍ଯ୍ୟ ଶକ୍ତି ଆଦ୍‍ତେ ।

23 ମଣ୍ଡଲିତାଗ୍ ସାର୍ରେତଡ଼୍ ଗୁଡ଼ାନ୍ ୱେଲେ ଯଦି ସାର୍ରେତଡ଼୍ ପୁନ୍‍ୱାଦ୍ ଗଟ୍‍ତେ ଗଟି ତିର୍‍ୟିତଡ଼୍ ନୁ ଆଗେ ନାରୁଡ଼୍ ବା ୱେରେ ଦର୍ମତଡ଼୍ ୱାଦ୍‍ତଣ୍ଡ୍, ଅଡ଼୍‌ ବାତେଏ ମଣ୍ଡଲିତେ ସାର୍ରେତଡ଼୍‍କିଙ୍କ୍ ବାୟାଲଡ଼୍ ଇଞ୍ଜ ଆଲ୍‍ସଡ଼୍ ? 24 ଇତ୍‍କେ ଅଡ଼୍‌ ଯଦି ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ିତଡ଼୍ ନୁ ୱେରଣ୍ଡ୍ ମେଣ୍ଡେଅର୍‍ତୁନ୍ ବୁଜେମ୍ଆଦ୍‍ତଡ଼୍ ବା ନାରୁଡ଼୍ ଆଗେ ୱାତ୍‍କେ, ଅଣ୍ଡ୍‌ ବାତ୍ କେଞ୍ଜିତଣ୍ଡ୍, 25 ଆଦିନ୍ ତଡ଼୍ ଅଣ୍ଡ୍‌ ତାନ୍ ପାପାମ୍‍ତିଙ୍କ୍ ଆଲ୍‍ସ୍‍ ପାର୍‍ଦ୍‍ତଣ୍ଡ୍; ଅନ୍‌ ଜିୱୁଣ୍ଡ୍‍ତାଗ୍ ମାନ୍ଦାନ୍ ମିଞ୍ଜ୍‍ତାଦ୍ ବିଷୟ୍‍ସାର୍ରେ ପେୟ୍‍ତିତ୍; ଅଣ୍ଡ୍‌ ଇଶ୍ୱର୍‌ତେ ବକେତ୍ ସର୍ପା ଆସ୍ ଅଡ଼ାଦ୍‌ ଆରାଦାନା ମାଡ଼ିତନ୍ ନୁ ପ୍ରଚାର୍ ମାଡ଼ିତନ୍, "ନିଜାତେ ଇଶ୍ୱର୍ ମିଇ ଲୋପେ ମିନ୍ଦେଣ୍ଡ୍ !"

26 ଦାଦାଲଡ଼ି ନୁ ଏଲାସ୍କ୍‍, ମିକିଂଙ୍କ୍ ନାନ୍ କେତ୍‍ତାନ୍ ଲେକାମ୍‌; ଉପବାସ୍ ମାଡ଼ାନ୍ ସେଙ୍ଗେ ଗୁଡ଼ାନ୍‍ ୱେଲେ ବେନ ୱେରଣ୍ଡ୍ ପାଟା ପାରିଣ୍ଡ୍, ମେଣ୍ଡେ ୱେରଣ୍ଡ୍ ଶିକ୍ଷା ଇୱିଣ୍ଡ୍, ବେନ ୱେରଣ୍ଡ୍ ଇଶ୍ୱର୍‌ତେ ଗଟ୍ କେଲିଣ୍ଡ୍, ମେଣ୍ଡେଅର୍‍ତୁଣ୍ଡ୍ ୱେରେ ଗଟ୍‍ତେ ଗଟି କେଲିଣ୍ଡ୍ ନୁ ମେଣ୍ଡେ ବେନ ୱେରଣ୍ଡ୍ ପୁନ୍‍ୱାଦ୍ ଗଟ୍‍ତେ ଇତ୍‍କେ ବୁଜା ମାଡ଼ିଣ୍ଡ୍ । ଇୱୁସାର୍ରେ ମଣ୍ଡଲିତେ ସାୟେତ୍ ସେଙ୍ଗେ ମାଡ଼ାନାଦ୍ ଦର୍‍କାର୍ । 27 ଯଦି ବେସ୍‍କ୍‍ତୁଡ଼୍‍ ୱେରେ ଗଟ୍‍ତେ ଗଟି କେତ୍‍ତାନ୍ ସେଙ୍ଗେ ଆଲ୍‍ସିତଡ଼୍, ଆଲେକେ ୱେରଣ୍ଡ୍ ପେର୍‍କେ ୱେରଣ୍ଡ୍ ଇଦ୍‍ରକମ୍ ରେଣ୍ଡ୍ ବା ଗାଟି ନାର୍‍ଗେ ଆତ୍‍କେ, ମୁୱୁଡ଼୍ କେଲିଡ଼୍ ନୁ ବେନ ୱେରଣ୍ଡ୍ ନିଜାମ୍ ଆଦିନ୍ ଇତ୍‍କେ ବୁଜା ମାଡ଼ିୱିଣ୍ଡ୍ । 28 ଇତ୍‍କେ ବୁଜାମାଡ଼ାନଙ୍କ୍ ବେନ ଇଲ୍‍ଉକ୍, ୱେରେ ଗଟ୍‍ତେ କେତାନଙ୍କ୍ ଆଲ୍‍ସମାନ୍ଦାନ୍ ନାରୁଡ଼୍ ଉପାସନାତାଗ୍ କଟ ମାନିଣ୍ଡ୍ । ଅଣ୍ଡ୍‌ ମାତର୍ ହେର୍କାତେ ଇଶ୍ୱର୍‌ତଡ଼୍ ଆଲା କେଲିଣ୍ଡ୍ । 29 ଇର୍‍ୱୁଡ଼୍ ବା ମୁୱୁଡ଼୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ିଡ଼୍, ମେଣ୍ଡେବାଗାତଡ଼୍ ଆଦ୍ ବିଚାର୍ ମାଡ଼ି ଉଡ଼ାଟ୍ । 30 ଇତକେ ଉପାସନାତାଗ୍ ମାନ୍ଦାନ୍ ବେନ ଯଦି ହଟାତ୍ ଇଶ୍ୱର୍‌ତାଗାଙ୍କ୍ ସୁସମାଚାର୍ ପାଏମ୍ ଆଦ୍‍ତନ୍, ଆଲେକେ ବାଷନ୍ ଇସମାନ୍ଦାନ୍ ନାରୁଡ଼୍ ତାନ୍ ଗଟି ବନ୍ଦ୍ ମାଡ଼ିଣ୍ଡ୍ । 31 ସାର୍ରେତଡ଼୍‍ୱାଦ୍ ଶିକ୍ଷା ନୁ ୱାଦାନ୍ ସେଙ୍ଗେ ସାର୍ରେତଡ଼୍ ୱେରଣ୍ଡ୍ ପେର୍‍କେ ୱେରଣ୍ଡ୍ ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼େ ପାର୍‍ଦ୍‍ତଡ଼୍ । 32 ଇତ୍‍କେ ଇଶ୍ୱର୍‌ତେ ବାକ୍ୟ ପ୍ରଚାର୍ ମାଡ଼ାନ୍ ଦାନ ପ୍ରଚାର୍ ମାଡ଼ାନଣ୍ଡ୍‍ତେ ଆଦିନ୍ ଆଦାନ୍ ସାୟେ । 33 ବାତେଙ୍କ୍‍ଇତ୍‍କେ ଇଶ୍ୱର୍ ବିଶୃଙ୍କଲା ମାଡ଼ାନଣ୍ଡ୍ ଆୟ୍‍ୟଣ୍ଡ୍, ମାତର୍ ଅଣ୍ଡ୍‌ ଶାନ୍ତିତେ ଇଶ୍ୱର୍ । ଇଶ୍ୱର୍‌ତେ ମେଣ୍ଡେବାଗାତ୍ ଉପବାସ୍ ପବିତ୍ର ମଣ୍ଡଲି ବେଲା, 34 ମିଇ ମଣ୍ଡଲିତେ ସବାକିନାଗ୍ ମିକା ଆଦେରକମ୍ ନାଟାଙ୍କ୍ କଟ ମାନୀ । ଆଗେ ଗଟି ତିର୍‍ୟାନ୍ ସେଙ୍ଗେ ଆୱିଙ୍କ୍ ଗଟ୍ ଦର୍‍କ । ଇହୁଦୀ ନିୟମ୍ ଲେକାମ୍ ଆୱୁ ମାନେୟ୍‍ତାଗ୍ ବଶୀଭୂତ ଆସ୍ ମାନୀ । 35 ଆୱୁ ବାତ୍ ବିଷୟ୍ ବୁଜେମ୍ ଆଦାନଙ୍କ୍ ଆଲ୍‍ସ୍‍କେ, ଲୋନ୍‌ ମାଲ୍‍ସ୍ ନିଜେତ୍ ମୁଦ୍‍ପାଙ୍କ୍ ପାଚ୍ରା ମାଡ଼ି । ବାତେଙ୍କ୍‍ଇତ୍‍କେ ମଣ୍ଡଲିତାଗ୍ ଗଟି କେତ୍‍କେ, ନାଟାକିଙ୍କ୍ ସିଗ୍‍ଆଦ୍‍ତେ ।

36 ଇଶ୍ୱର୍‌ତେ ବାକ୍ୟ ବାତ୍ ମିୟାଗାଙ୍କ୍ ପୁଟି ମାତ୍‍ତେ ? ବା ଇଦ୍ ବାତ୍ ମାତର୍ ମିଇ ବକେତ୍ ୱାସ୍‍ମାତ୍‍ତେ ? 37 ମିଇ ଲୋପେଙ୍କ୍ ବେନ ଯଦି ନିଜେ ୱେରଣ୍ଡ୍ ବାବବାଦୀ ବା ଆତ୍ମିକ ଦାନ ପାଏମ୍ ଆତ୍‍ତେ ନାରୁଡ଼୍ ଇଞ୍ଜ ଆଲ୍‍ସିତିଡ଼୍, ଅଣ୍ଡ୍‌ ପୁଞ୍ଜ୍‍ମାନିଣ୍ଡ୍ ଜେ, ଇଗେ ନାନ୍ ବାତ୍‍ସାର୍ରେ ଲେକ୍‍ତାନ୍, ଆଦ୍ ପ୍ରବୁନ୍ ଗଟ୍ । 38 ଇତ୍‍କେ ଯଦି ଅଣ୍ଡ୍‌ ଇୱୁସାର୍ରେ ଗଟିକିଙ୍କ୍ ପାସ୍‍କିତଣ୍ଡ୍, ମିଡ଼୍ ଅଂକିଙ୍କ୍‌ ପାସ୍‍କାଟ୍ ।

39 ଆଦିଙ୍କ୍ ଦାଦାଲଡ଼ି ନୁ ଏଲାସ୍କ୍‍, ଇଶ୍ୱର୍‌ତେ ଗଟ୍ ପ୍ରଚାର୍ ମାଡ଼ାନ୍ ସେଙ୍ଗେ ମାନ୍‍ ମାଡ଼ାଟ୍ । ଇତ୍‍କେ ୱେରେ ଗଟ୍‍ତେ ଗଟି କେତ୍‍ତାନ୍ ସେଙ୍ଗେ ବେନଙ୍କ୍ ମାନ୍‍ନା ମାଡ଼୍‍ମାଟ୍ । 40 ସାର୍‍ରେ ପାଡ଼୍‍ୟି ଟିକ୍ ଲେକାମ୍ ନୁ ଶାନ୍ତି ତଡ଼୍ ମାଡ଼ାନ୍ ଦର୍‍କାର୍ ।