1 ଦାଦାଲଡ଼ି ନୁ ଏଲାସ୍କ୍, ନାନ୍ ବେନ୍ ସାୟେତ୍ କାବୁର୍ ମିଇ ବକେତ୍ ପ୍ରଚାର୍ ମାଡ଼୍‍ତାନ୍, ବାତ୍ ମିଡ଼୍ ଗ୍ରହନ୍ ମାଡ଼୍‍ତିଡ଼୍ ନୁ ବେଦିନାଗ୍ ମିୟାଦ୍ ବିଶ୍ୱାସ୍ ମିନ୍ଦେ, ଆଦ୍ ବିଷୟ୍ ମିକିଂଙ୍କ୍ ଏର୍କା ମାଡ଼ିଦାନ୍ ସେଙ୍ଗେ ନାନ୍ ଇଚ୍ଛା ମାଡ଼ୁତାନ୍ । 2 ନାନ୍ ମିଇ ବକେତ୍ ପ୍ରଚାର୍ ମାଡ଼ିମାନ୍ଦାନ୍ ଆଦ୍ ସାୟେତ୍ କାବୁର୍ କେ ସୁସମାଚାର୍ । ମିଡ଼୍ ଆଦ୍ ସୁସମାଚାର୍‍ତାଗ୍ ଗାଡ଼୍‍ସ୍ ବିଶ୍ୱାସୀ ଆଶେ ମାତ୍‍କେ, ପରିତ୍ରାଣ୍ ପାଏମ୍ ଆଦ୍‍ତିଡ଼୍ । ଇଲୁକ୍ ମିୟାଦ୍ ବିଶ୍ୱାସ୍ ଆଙ୍ଗ୍‍ଡ଼ାମ୍ ।

3 ନାନ୍ ପାଏମ୍ ଆତ୍‍ତେ ୱେରଡ଼୍ ଶିକ୍ଷା ମିକିଂଙ୍କ୍ କେତ୍‍ତାନ୍ । ଆଦ୍ ସାର୍ରେତିଙ୍କ୍ ଗାଟି ଦର୍‍କାର୍ । ଆଦ୍ ଆଦୁତ୍‍ତେ, ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ଆତ୍‍ତେ ଲେକାମ୍, କ୍ରିଷ୍ଟ ମାନ୍‍ ପାପ୍‌ ସେଙ୍ଗେ ଡଲ୍‍ତଣ୍ଡ୍, 4 ✝ସମାଦି ପାଏମ୍ ଆତ୍‍ତଣ୍ଡ୍ ନୁ ମୁଣ୍ଡ୍ ଦିନେତେ ତେଏଦ୍‍ତଣ୍ଡ୍ । 5 ✝ଅଣ୍ଡ୍‌ ପିତର୍ ନୁ ପେର୍‍କେ ତାନ୍ ବାରଜାନ୍ ଶିଷ୍ୟଡ଼୍‍କ୍ ତଅନ୍‌ଦିମାତ୍‍ଣ୍ଡ୍ । 6 ତାନ୍ ପେର୍‍କେ ଅଣ୍ଡ୍‌ ଅଣ୍ଡୟ୍‌‍ଦାମ୍ ତାନ୍ ପାଞ୍ଚ୍‍ଶହ ନାର୍‍ଗେ ତାନ୍ ବିଶ୍ୱାସୀଡ଼୍‍କ୍ ତଅନ୍‌ଦିମାତ୍‍ତଣ୍ଡ୍ । ଅଡ଼୍‌ ଲୋପେଙ୍କ୍ ଇଞ୍ଜେ ବେସ୍‍କ୍‍ତୁଡ଼୍‍ ଜଗତ୍‍ତାଗ୍ ଇଲେଡ଼୍, ଇତ୍‍କେ ନାର୍‍ଗେ ମୁଲ୍ ଜିୱୁଣ୍ଡ୍ ମିନ୍ଦେଡ଼୍‌ । 7 ଇଦିନ୍ ପେର୍‍କେ ଅଣ୍ଡ୍‌ ଜାକୁବ୍ ନୁ ସାର୍‍ରେ ପ୍ରେରିତ୍ ଶିଷ୍ୟଡ଼୍‍କ୍ ତଅନ୍‌ଦିମାତ୍‍ତଣ୍ଡ୍ ।

8 ✝ସାର୍‌ତିଙ୍କ୍‌ ପେର୍କେ ଅଣ୍ଡ୍‌ ନା ରକମ୍ ୱେରଣ୍ଡ୍ ଆକାଲ୍‌ଜାତଙ୍କ୍ ମିକା ତଅନ୍‌ଦ୍‍ତଣ୍ଡ୍ । 9 ✝ପ୍ରେରିତ୍ ଶିଷ୍ୟଡ଼୍ ଲୋପେଙ୍କ୍ ନାନ୍ ସାର୍ରେତିଙ୍କ୍ କାରାପ୍, ଇଦ୍‍ରକମ୍ କି ପ୍ରେରିତ୍ ପେଦେର୍‍ତିଙ୍କ୍ ଯୋଗ୍ୟ ଆୟନ୍, ବାତେଙ୍କ୍‍ଇତ୍‍କେ ନାନ୍ ଇଶ୍ୱର୍‌ତେ ମଣ୍ଡଲିତିଙ୍କ୍ ଗାଟିତିପାଲ୍ ମାଡ଼୍‍ତାନ୍ । 10 ଇତ୍‍କେ ଇଞ୍ଜେ ନାନ୍ ବାତ୍ ଆତ୍‍ତାନ୍, ଆଦ୍ ଇଶ୍ୱର୍‌ତେ ଅନୁଗ୍ରହ୍ ମାୟ୍‍ଦିଙ୍କ୍ ଆତ୍‍ତେ ନୁ ନା ସେଙ୍ଗେ ଅନାଦ୍‌ ଅନୁଗ୍ରହ୍ ଆସାମ୍ ଆୟ୍‍ୟ । ଇତ୍‍କେ ମେଣ୍ଡେବାଗାତ୍ ପ୍ରେରିତ୍ ଶିଷ୍ୟଡ଼ାଗାଙ୍କ୍ ନାନ୍ ଗାଟି ପାଡ଼୍‍ୟି ମାଡ଼୍‍ତାନ୍ । ନିଜାତେ ଇୱୁସାର୍ରେ ନାନ୍ ମାଡ଼ନ୍, ଇତ୍‍କେ ନା ସେଙ୍ଗେ ଇଶ୍ୱର୍‌ତାଦ୍ ଅନୁଗ୍ରହ୍ ମାନ୍ଦାନ୍ ମାୟ୍‍ଦିଙ୍କ୍ ଇଦ୍ ସମ୍ଭବ୍ ଆତ୍‍ତେ । 11 ଆଦିଙ୍କ୍ ନାନ୍ ଆୟି ବା ଅଡ଼୍‌ ଆୟି, ମାମ୍‍ମେ ସାର୍ରେତମ୍ ଆଦ୍ ଅଣ୍ଡୟ୍‌ ଗଟ୍ ପ୍ରଚାର୍ ମାଡ଼ୁତମ୍ ନୁ ମିଡ଼୍ ଆଗେ ବିଶ୍ୱାସ୍ ମାଡ଼୍‍ତିଡ଼୍ ।

12 କ୍ରିଷ୍ଟ, ଡଲ୍‍ତାଗାଙ୍କ୍ ତେଏଦିମିନ୍ଦେଣ୍ଡ୍, ଇଦ୍ କେ ମାନ୍‍ ପ୍ରଚାର୍‍ତାଦ୍ ବିଷୟ୍ । ଆଗେକ୍‍ବା ଇଞ୍ଜେ ମିଇ ଲୋପେଙ୍କ୍ ବେନ ଡଲ୍‍ତଡ଼ାଦ୍ ପୁନରୁତ୍‍ତାନ୍ ଇଲ୍‍ଲେ ଇଞ୍ଜ ବେଲା କେତୁତିଡ଼୍ ? 13 ଯଦି ନାରୁଡ଼୍ ଡଲ୍‍ତାଗାଙ୍କ୍ ପୁନରୁତ୍‍ତାନ୍ ଆୟକ୍, କ୍ରିଷ୍ଟ ମିକା ଡଲ୍‍ତାଗାଙ୍କ୍ ଜିୱୁଣ୍ଡ୍ ଆୟ୍‍ୟଣ୍ଡ୍ । 14 ଯଦି କ୍ରିଷ୍ଟ ଡଲ୍‍ତାଗାଙ୍କ୍ ତେଏଦଣ୍ଡ୍, ଆଲେକେ ମାନାଦ୍‍ ପ୍ରଚାର୍ ଆଙ୍ଗ୍‍ଡ଼ାମ୍ ନୁ ମିୟାଦ୍ ବିଶ୍ୱାସ୍ ମିକା ଆଙ୍ଗ୍‍ଡ଼ାମ୍ । 15 ନାର୍‍ଗେ ମାନାଡ଼୍ ଇଶ୍ୱର୍ ବିଷୟ୍‍ତେ ମିଚ୍ କେତ୍‍ତାନ୍ ଲେକାମ୍ ଆଦ୍‍ତେ, ବାତେଙ୍କ୍‍ଇତ୍‍କେ ମାନାଡ଼୍ କେତୁତାଡ଼୍ ଜେ, ଅଣ୍ଡ୍‌ କ୍ରିଷ୍ଟଙ୍କ୍ ପୁନର୍ଜୀବିତ୍ ମାଡ଼୍‍ତଣ୍ଡ୍ । ଇତ୍‍କେ ଯଦି ନିଜାମ୍ ଡଲ୍‍ତଡ଼ାଦ୍ ପୁନରୁତ୍‍ତାନ୍ ଇଲ୍‍ଲେ, ଆଲେକେ ଇଶ୍ୱର୍ କ୍ରିଷ୍ଟଙ୍କ୍ ପୁନରୁତ୍‍ତିତ୍ ମାଡ଼ଣ୍ଡ୍ । 16 ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆଦେ ପାର୍‍ୱକ୍, କ୍ରିଷ୍ଟ ବେଲା ପୁନରୁତ୍‍ତିତ୍ ଆୟେଣ୍ଡ୍ ? 17 ଯଦି କ୍ରିଷ୍ଟ ଡଲ୍‍ତାଗାଙ୍କ୍ ପୁନରୁତ୍‍ତିତ୍ ଆୟ୍‍ୟଣ୍ଡ୍, ଆଲେକେ ମିୟାଦ୍ ବିଶ୍ୱାସ୍ ମିଚ୍ ନୁ ମିଡ଼୍ ଇଞ୍ଜେ ପାପ୍‌ତାଗ୍ ମୁଡ଼୍‍ନ୍ଦି ମିନ୍ଦେଡ଼ି । 18 ମେଣ୍ଡେ ଇଦିନାଦ୍ ଇତ୍‍କେ ଆଦ୍‍ତେ ଜେ, ଡଲିମାନ୍ଦାନ୍ କ୍ରିଷ୍ଟ ବିଶ୍ୱାସୀଡ଼୍ ମିକା ନଷ୍ଟ ଆଦ୍‍ତଡ଼୍ । 19 ଯଦି କ୍ରିଷ୍ଟନାଗ୍ ମାୟାଦ୍‌ ଆଶେ ମାତର୍ ଇଦ୍ ଜିୱୁଣ୍ଡ୍‍ତେ ମାୟ୍‍ଦିଙ୍କ୍ ଆତ୍‍ତେ, ଆଲେକେ ମେଣ୍ଡେ ବାଗାତଡ଼ାଗାଙ୍କ୍ ମାୟାଦ୍‌ ଅବସ୍ଥାତେ ଗାଟି ତିପାଲ୍ ।

20 ଇତ୍‍କେ ନିଜାମ୍ କ୍ରିଷ୍ଟ ଡଲିମାନ୍ଦାନ୍ ନାରୁଡ଼ାଦ୍ ପୁନରୁତ୍‍ତାନ୍ ନିଜାମ୍ ତଅତାନ୍ ସେଙ୍ଗେ ଅଡ଼୍‌ ଲୋପେଙ୍କ୍ ନିଜେ ମୁନେନ୍ ତେଏଦି ମିନ୍ଦେ । 21 ୱେରଣ୍ଡ୍ ମାୟ୍‍ଦିଙ୍କ୍ ଡଲ୍‍ନାଦ୍ ଜଗତ୍‍ତାଗ୍ ଆସ୍‍ତେ । ଆଦେରକମ୍ ୱେରଣ୍ଡ୍ ମାୟ୍‍ଦିଙ୍କ୍ ଡଲ୍‍ତଡ଼ାଦ୍ ପୁନରୁତ୍‍ତାନ୍ ସମ୍ଭବ୍ ଆତ୍‍ତେ । 22 ଆଦମ୍ ତଡ଼୍ କାୟ୍‍ଲିମାନ୍ଦାନ୍ ମାୟ୍‍ଦିଙ୍କ୍ ସାର୍‍ରେ ନାରୁଡ଼୍ ଡଲ୍‍ତଡ଼୍ । ଆଦେରକମ୍ କ୍ରିଷ୍ଟନ୍ ତଡ଼୍ କାୟ୍‍ଲାନ୍ ତଡ଼୍ ସାର୍ରେତଡ଼୍ ପୁନର୍ଜିୱୁଣ୍ଡ୍ ପାଏମ୍ ଆଦ୍‍ତଡ଼୍ । 23 ଇତ୍‍କେ ସାର୍‍ରେ ଟିକ୍ ଆତ୍‍ତେ ସମୟ୍‍ତେ ପୁନରୁତ୍‍ତିତ୍ ଆଦ୍‍ତେ । ସାର୍ରେତିଙ୍କ୍ ମୁନେନ୍ କ୍ରିଷ୍ଟ ପୁନରୁତ୍‍ତିତ୍ ଆତ୍‍ତଣ୍ଡ୍ । ଆଦିଙ୍କ୍ ଅଣ୍ଡ୍‌ ୱାଦାନ୍ ସମୟ୍‍ତେ ବେନଡ଼୍ ତାମ୍ ନାରୁଡ଼୍ ଅଡ଼୍‌ ମୁନେନ୍ ଜିୱୁଣ୍ଡ୍ ଆଦ୍‍ତଡ଼୍ । 24 ତାନ୍‍ପେର୍କେ ଯୁଗ୍ ତେରିତ୍ । କ୍ରିଷ୍ଟ ସାର୍‍ରେ କାରାପ୍ ଆତ୍ମା ବେନନାଦ୍ ଶାସନ୍‍, ଅଦିକାର୍‌ ନୁ ଶାତ୍‍ୱାମ୍‍ତିଙ୍କ୍ ତେର୍‍ସ୍‍ପି ବାବାଲ୍ ଇଶ୍ୱର୍‌ତିଙ୍କ୍ ରାଜ୍ୟ ସର୍ପା ମାଡ଼ିତନ୍ । 25 ଇଶ୍ୱର୍ ସାର୍‍ରେ ଶତ୍ରୁଡ଼୍‍କ୍ ଆରେମ୍ ମାଡ଼ି କ୍ରିଷ୍ଟନ୍ ଡେକେତ୍ ମଦଲ୍ ଆଦ୍‍ମାନ୍ ଯାକ, କ୍ରିଷ୍ଟ ଶାସନ୍‍ ମାଡ଼ିତନ୍ । 26 ତେର୍‍ତେପେର୍କେ ମାଡ଼େଙ୍ଗ୍ ଶତ୍ରୁଡ଼୍ ଡଲ୍‍ତାଦ୍, ଆଦ୍ ମିକା ଆରେମ୍ ଆଦ୍‍ତେ । 27 ବାତେଙ୍କ୍‍ ଇତ୍କେ ଦର୍ମଶାସ୍ତ୍ରତାଗ୍ ଲେକାମିନ୍ଦେ, "ଇଶ୍ୱର୍ ସାର୍‍ରେ ବିଷୟ୍ କ୍ରିଷ୍ଟନ୍ ଅଦିନ୍ ମାଡ଼ିତନ୍ ।" ଆଗେକ୍‍ବା ଇଶ୍ୱର୍ ଇୱୁ ସାର୍‍ରେ ବିଷୟ୍ ଲୋପେ ଇଲାଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ସାର୍‍ରେ ବିଷୟ୍‍ତିଙ୍କ୍ କ୍ରିଷ୍ଟନ୍ ଅଦିନ୍ ମାଡ଼ିତନ୍ । 28 ସାର୍‍ରେ ବିଷୟ୍ କ୍ରିଷ୍ଟନ୍ ଶାସନ୍‍ ଅଦିନ୍ ଆତ୍‍ତେ ପେର୍‍କେ, ଅଣ୍ଡ୍‌ ନିଜେତ୍ ବାବାଲ୍ ଇଶ୍ୱର୍‌ତେ ଅଦିନ୍ ଆଦ୍‍ତନ୍ ନୁ ସାର୍‍ରେ ବିଷୟ୍‍ତେ ପର୍‍ର ଇଶ୍ୱର୍‌ତେ ରାଜ୍ ସାରେ ଆଦ୍‍ତେ ।

29 ଡଲ୍‍ତଡ଼୍ ସେଙ୍ଗେ ବେନଡ଼୍ ଏର୍‍ଦିକ୍ଷା ଗ୍ରହନ୍ ମାଡ଼ିତଡ଼୍, ଅଡ଼୍‌ ବିଷୟ୍‍ତେ ମିଡ଼୍ ବାତ୍ ଲେକ୍‍ତାଡ଼୍ ? ବେସ୍କ୍‍ତୁଡ଼ାଦ୍ ମତ ଇସାବ୍‍ତେ, ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆୟ୍‍ୱିଡ଼୍, ଅଡ଼୍‌ ସେଙ୍ଗେ ମେଣ୍ଡେ ବାଗାତଡ଼୍‍କ୍ ବାତେଙ୍କ୍ ଏର୍‍ଦିକ୍ଷା ଇଦ୍‍ତଡ଼୍ ? 30 ମେଣ୍ଡେ ମାନାଡ଼୍ ବା ବାତେଙ୍କ୍ ସେନେକ୍‍ ସେନେକ୍‍ତିଙ୍କ୍ ବିପଦ୍‍ତେ ମୁନ୍‍ନେ ଆଦୁତାଡ଼୍ ? 31 ଦାଦାଲଡ଼ି ନୁ ଏଲାସ୍କ୍‍ନଡ଼ି, ମାନାଦ୍‍ ଜିୱୁଣ୍ଡ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ କାୟ୍‍ଲି ମାନ୍ଦାନ୍ ମାୟ୍‍ଦିଙ୍କ୍, ମିଇ ସେଙ୍ଗେ ନାୟାଦ୍ ବେନ୍ ଗର୍ବ, ଆଦିନ୍ ତଅସ୍ କେତୁତାନ୍, ନାନ୍ ସାର୍ରେଦିନା ଡଲାନ୍ ମକମ୍‍ତାଗ୍ ମିଶି ଆଦୁତାନ୍ । 32 ଯଦି ନାନ୍ ମାତର୍ ନାରୁଡ଼୍ ଲକ୍ଷ ଅସ୍ ଏଫିସିୟତାଗ୍ ଇଂସା ଜୀୱାକିନ୍ ଲେକାମ୍ ନାରୁଡ଼୍‍ତଡ଼୍ ଲଡ଼େମ୍ ଆସ୍ ମାତ୍‍ତାନ୍, ଆଲେକେ ନାୟାଦ୍ ବାତ୍ ଲାବ୍ ଆତ୍‍ତେ ? ଯଦି ଡଲ୍‍ତଡ଼୍ ପୁନରୁତ୍‍ତିତ୍ ଆୟ୍‍ୟଡ଼୍, ଆଲେକେ ଶିକ୍ଷା ଲେକାମ୍, "ୱାଡ଼ାଟ୍, ତିଞ୍ଜ୍ଉଞ୍ଜ୍ ଦିନାମ୍ ତେର୍‍ସ୍ପିତାଡ଼୍, ବାତେଙ୍କ୍‍ଇତ୍‍କେ ନାଡ଼୍ ତ ମାନ୍‍ ଡଲାନଙ୍କ୍ ଆଦ୍‍ତେ ।"

33 ମିଡ଼୍ ପ୍ରତାରିତ୍ ଆୟ୍‍ମାଟ୍, "କାରାପ୍ ସାଙ୍ଗେ ନିଜାତ୍‍ଚରିତ୍ରତିଙ୍କ୍ ନଷ୍ଟ ମାଡ଼ିତେ ।" 34 ଆଦିଙ୍କ୍ ସାୟେତ୍‍ ବୁଦ୍‍ତେ ମାନୁଟ୍, ପାପାମ୍ ମାଡ଼୍‍ମାଟ୍ । ମିକିଂଙ୍କ୍ ସିଗିଙ୍କ୍ ସେଙ୍ଗେ ନାନ୍‍ନେ ଇଦ୍ କେତୁତାନ୍, ମିଇ ଲୋପେଙ୍କ୍ ବେସ୍‍କ୍‍ତୁଡ଼୍‍ ଇଶ୍ୱର୍‌ତିଙ୍କ୍ ପୁନଡ଼୍ !

35 ବେନ ପାଚ୍ରା ମାଡ଼େ ପାର୍‍ଦ୍‍ତଣ୍ଡ୍, "ମିଡ଼୍ ବେଲା ପୁନରୁତ୍‍ତିତ୍ ଆଦ୍‍ତିଡ଼୍ ?" ଅଡ଼୍‌ ବେଦ୍‍ପୁଟୁଙ୍କ୍ ମେନ୍ଦୁଲ୍ ପୟ୍‍ସ୍ ମାନ୍‍ତଡ଼୍ ? 36 ମିଡ଼୍ ବେସର୍ ବାକ୍‍ୱା । ଇସୁର୍‍ବା ବାତ୍ ପୁନ୍‍ୱିଡ଼୍, ବେନ୍ ୱିଜ୍ ୱିତିତଡ଼୍, ଆଦ୍ ଡଲକ୍‌କେ ଗାଜ୍‍ଜେ ଆୟ୍‍ୟ ? 37 ବେନ୍ ମାଡ଼େ ତିୟାର୍ ଆଦ୍‍ତେ, ମିଡ଼୍ ଆଦିଙ୍କ୍ ୱିତ୍‍ୱିଡ଼୍ । ମିଡ଼୍ ଗହମ୍ ୱିତିମାନ୍‍ତିଡ଼୍ କି ମେଣ୍ଡେଅନ୍‌ ୱିଜେତ୍ ଅଣ୍ଡୟ୍‌ ପେଡ଼େମ୍ । 38 ଇତ୍‍କେ ଇଶ୍ୱର୍ ନିଜେତ୍ ଇଚ୍ଛା ଲେକାମ୍ ତାନ୍ ମେନ୍ଦୁଲ୍ ତିୟାର୍ ମାଡ଼ିତନ୍ । ସାର୍‍ରେ ୱିଜେତିଙ୍କ୍ ଅଣ୍ଡ୍‌ ତାନ୍ ନିଜେତ୍ ପୁଟୁଙ୍କ୍ ଇଦ୍‍ତଣ୍ଡ୍ ।

39 ସାର୍‍ରେ ଜୀୱାକିନାୱୁ ମେନ୍ଦୁଲ୍ ଅଣ୍ଡୟ୍‌ ଲେକାମ୍ ଆୟ୍‍ୟ । ନାରୁଡ଼ାଦ୍ ମେନ୍ଦୁଲ୍ ଅଣ୍ଡୟ୍‌ ରକମ୍, ଜିୱୁକିନାୱୁ ମେନ୍ଦୁଲ୍ ମେଣ୍ଡେଅନ୍‌ ରକମ୍ । ପିଟ୍‍ଟେ ନୁ କିକେ ମେନ୍ଦୁଲ୍ ୱେରେ ।

40 ସ୍ୱର୍ଗତଡ଼୍ ନୁ ପୃତିବିତଡ଼୍ ଇର୍‍ୱୁଡ଼୍ ରେଣ୍ଡ୍ ପ୍ରକାର୍‍ତେ ମେନ୍ଦୁଲ୍ ମିନ୍ଦେ । ସ୍ୱର୍ଗତଡ଼ାଦ୍ ମେନ୍ଦୁଲ୍ ଅଣ୍ଡ୍‌ ରକମ୍ ସୁନ୍ଦର୍ ନୁ ପୃତିବିତଡ଼ାଦ୍ ମେନ୍ଦୁଲ୍ ମେଣ୍ଡେଅନ୍‌ ରକମ୍ ସୁନ୍ଦର୍ । 41 ପଡ଼୍‍ଦ୍‍ତାଦ୍ ସୁନ୍ଦର୍ ଅଣ୍ଡ୍‌ ଲେକାତ୍, ନେଲ୍‍ଞ୍ଜ୍‍ତାଦ୍ ମେଣ୍ଡେଅନ୍‌ ରକମ୍ ନୁ ଉକାକିନାଦ୍ ସୁନ୍ଦର୍ ୱେରେ ଲେକାତ୍ । ଇଦ୍ ରକମ୍ କି ୱେରଡ଼୍ ଉକାମ୍‍ତେ ସୁନ୍ଦର୍, ମେଣ୍ଡେଅନ୍‌ ଉକାମ୍‍ତେ ତଡ଼୍ ୱେରେ ।

42 ଡଲ୍‍ତଡ଼ାଦ୍ ପୁନରୁତ୍‍ତାନ୍ ବିଷୟ୍‍ତେ ମିକା ଇଦ୍ ଗଟ୍ ଦର୍‍କାର୍ । ସମାଦି ଇସମାନ୍ଦାନ୍ ମେନ୍ଦୁଲ୍ ମିକା ଦଂସ ଆଦ୍‍ତେ । ଇତ୍‍କେ ପୁନରୁତ୍‍ତିତ୍ ମେନ୍ଦୁଲ୍ ନଷ୍ଟ ଆୟ୍‍ୟ । 43 ସମାଦି ଇଦାନ୍ ମେନ୍ଦୁଲ୍ ସୁନ୍ଦର୍ ଆୟ୍‍ୟ ନୁ ଶାତ୍‍ୱାମ୍‍ ଇଲ୍‍ୱାଦ୍ । ଇତ୍‍କେ ପୁନରୁତ୍‍ତିତ୍ ମେନ୍ଦୁଲ୍ ସୁନ୍ଦର୍ ନୁ ଶାତ୍‍ୱାମ୍‍ତାଦ୍ । 44 ସମାଦି ଇଦାନ୍ ୱେଲେ ମେନ୍ଦୁଲ୍ ଲେକାମ୍ ମାନ୍‍ତେ; ଇତ୍‍କେ ପୁନର୍ଜୀବିତ୍ ଆଦାନ୍‍ୱେଲେ, ଆଦ୍ ଆଦ୍‍ତେ ଆତ୍ମିକ ମେନ୍ଦୁଲ୍ । ଲେକାମ୍ ମେନ୍ଦୁଲ୍‍ତାଦ୍ ଆତ୍ମିକ୍‌ ମାନ୍ଦାନ୍ ମାୟ୍‍ଦିଙ୍କ୍, ଆତ୍ମିକ ଆଦୁତ୍‍ତେ । 45 ଦର୍ମଶାସ୍ତ୍ରତାଗ୍ ଲେକ୍‍ତାଦ୍ ମିନ୍ଦେ, "ମୁନେନ୍ ଆଦମ୍ ଅଣ୍ଡୟ୍‌ ଜିୱେ ପଶୁ ଲେକାମ୍ ତିଆର୍ ଆସ୍ ମାତ୍‍ତଣ୍ଡ୍ ।" ପେର୍କେତ୍‌ ଆଦମ୍ ମାତ୍‍ତଣ୍ଡ୍, ଜିୱେମାନ୍ଦାନ୍‌ ଆତ୍ମା ଆତ୍‌ତନ୍‌। 46 ମୁନେନ୍‍କନ୍ସ୍ ଆତ୍ମିକ ବିଷୟ୍ ଇଲ୍‍ୱେମାତ୍‍ତେ । ମୁନେନ୍ ବାତ୍ ମାତ୍‍ତେ ଆଦ୍ ପ୍ରାକୃତିକ୍, ତାନ୍‍ପେର୍କେ ୱାତ୍‍ତେ ଆତ୍ମିକ ବିଷୟ୍ । 47 ମୁନେତ୍ ନାରୁଡ଼୍ ଆଦମ୍ ମାତ୍‍ତଣ୍ଡ୍ ପୃତିବିତଣ୍ଡ୍, ମାଣ୍ଡୁଲ୍‍ତଡ଼୍ ତିୟାର୍‍ ଆତ୍‍ତଣ୍ଡ୍; ଇତ୍‍କେ ଦ୍ୱିତୀୟ୍ ଆଦମ୍ ସ୍ୱର୍ଗତାଗାଙ୍କ୍ ଡିଗ୍‍ତଣ୍ଡ୍ । 48 ପୃତିବିତେ ନାରୁଡ଼୍ ସାରେତଡ଼୍ ଆଦ୍ ମାଣ୍ଡୁଲ୍‍ତଡ଼୍ ତିୟାର୍‍ ଆତ୍‍ତେ ନାରୁଡ଼୍ ଲେକାମ୍ । ଇତ୍‍କେ ସ୍ୱର୍ଗତଡ଼୍ ସ୍ୱବାବ୍‍ତେ ନାରୁଡ଼୍ ଆଦ୍ ସ୍ୱର୍ଗତଣ୍ଡ୍ ନାରୁଡ଼୍ ଲେକାମ୍ । 49 ମାନାଡ଼୍ ଇଞ୍ଜେ ମାଣ୍ଡୁଲ୍‍ତଡ଼୍ ତିୟାର୍ ଆତ୍‍ତେ ନାରୁଡ଼୍ ଲେକାମ୍ ପୁଟୁଙ୍କ୍ ପୟ୍‍ସ୍ ମିନ୍ଦେ, ଇତ୍‍କେ ଅନ୍‌‍ଦିନେ ଆଦ୍ ସ୍ୱର୍ଗତଣ୍ଡ୍ ମାନେୟ୍‍ତେ ଲେକାମ୍ ପୁଟୁଙ୍କ୍ ଆଦ୍‍ତାଡ଼୍ । 50 ଆଦିଙ୍କ୍ ଦାଦାଲଡ଼ି ନୁ ଏଲାସ୍କ୍, ନାନ୍ ମିକିଂଙ୍କ୍ କେତାନଙ୍କ୍ ଆଲ୍‍ସୁତାନ୍ ଜେ, ନେତୁର୍ ଆଉଙ୍ଗ୍ ମେନ୍ଦୁଲ୍ ପୟ୍‍ସ୍ ମାନାଡ଼୍ ଇଶ୍ୱର୍‌ତେ ରାଜ୍ୟତ୍ ଅଦିକାରି ଆଦାନଙ୍କ୍ ପାର୍‍ୱାଦ୍, ବାତେଙ୍କ୍ ଇତ୍‍କେ ଦଂସ ଆଦାନ୍ ଜିନିଷ୍ ନଷ୍ଟ ଆୟ୍‍ୱାଦ୍ ଆଦାନଙ୍କ୍ ପାର୍‍ୱ ।

51 ✝କେଞ୍ଜାଟ୍ ନାନ୍ ମିକିଂଙ୍କ୍ ଅଣ୍ଡୟ୍‌ ନିଜାତାଦ୍ ସତ୍ ଗଟ୍ କେତୁତାନ୍ । ମାନାଡ଼୍ ସାର୍ରେତଡ଼୍ ଡଲ୍‍ୱାଡ଼୍ ନୁ ମାନାଡ଼୍ ସାର୍ରେତଡ଼୍ ପରିବର୍ତ୍ତିତ୍ ଆଦ୍‍ତାଡ଼୍ । 52 ଇତ୍‍କେ ମାଡ଼େଙ୍କ୍‌ତାଦ୍ ତୂରି ଲେଙ୍ଗ୍ ଆଦାନ୍‍ୱେଲେ, ଅଣ୍ଡୟ୍‌ ମୁହୁର୍ତ୍ତ୍‍ତେ, କଣ୍ଡେ ମିଟ୍‍କେତେ ମାନାଡ଼୍ ସାର୍ରେତଡ଼୍ ବଦ୍‍ଲେମ୍ ଆଦ୍‍ତାଡ଼୍ । ଆସୁଟେ ଡଲ୍‍ତଡ଼୍ ଅମର୍ ଆସ୍ ତେଏଦିତଡ଼୍ । 53 ବାତେଙ୍କ୍ ଇତ୍‍କେ ବାତ୍ ନଷ୍ଟ ଆଦ୍‍ତେ, ଆଦିଙ୍କ୍ ନଷ୍ଟ ଆୟ୍‍ୱାଦ୍ ବଦ୍‍ଲେମ୍ ମାଡ଼ାନଙ୍କ୍ ଆଦ୍‍ତେ; ବେନ୍ ପୃତିବିତାନ୍ ମେନ୍ଦୁଲ୍ ଡଲିଆଦ୍‍ତେ, ଆଦିଙ୍କ୍ ଅମର୍ ଚକାସିଲେ କେର୍‍ସ୍ପାନଙ୍କ୍ ଆଦ୍‍ତେ । 54 ଆଲାଆତ୍‍କେ ନୁ ଇଦ୍ ନାୟାଦ୍ ମେନ୍ଦୁଲ୍ ଅମର୍ ଆତ୍‍କେ, ଦର୍ମଶାସ୍ତ୍ରତାଦ୍ ଇଦ୍ ଗଟ୍ ସାରେ ଆଦ୍‍ତେ, "ଡଲ୍‍ନାଦ୍ ଡଲିଆତ୍‍ତେ, ସାରେ ଜିଡ଼୍‍ତେ ।

55 ରେ ଡଲ୍‍ନାଦ୍ ! ବେଗେ ନିୟାଦ୍ ଜିଡ଼୍‍ତାଦ୍ ? ରେ ଡଲ୍‍ନାଦ୍ ! ବେଗେ ନିୟାଦ୍ ରେହେତାନାଦ୍ ଶାତ୍‍ୱାମ୍ ?" 56 ରେହେତାନ୍‍ ଶାତ୍‍ୱାମ୍ ଡଲ୍‍ନାଦ୍ ପାପ୍ ତାଗାଙ୍କ୍ ଦର୍ସିକି ଆଦ୍‍ତେ, ପାପାମ୍‍ତେ ଶାତ୍‍ୱାମ୍‍ ନିୟମ୍ । 57 ଇତ୍‍କେ ମାନାଡ଼୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ କେତିତାଡ଼୍‍, ବାତେଙ୍କ୍‍ଇତ୍‍କେ ଅଣ୍ଡ୍‌ ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ମାନାଡ଼୍‍କିଙ୍କ୍ ଜିଡ଼୍‍ପ୍‍ତଣ୍ଡ୍ ।

58 ଆଦିଙ୍କ୍ ପ୍ରିୟ ଦାଦାଲଡ଼ି ନୁ ଏଲାସ୍କ୍, ଗାଡ଼୍‍ସ୍ ନୁ ମେୟ୍‍ଲକନ୍‌ସ୍ ମାନୁଟ୍ । ପ୍ରବୁନ୍ ପାଡ଼୍‍ୟିତାଗ୍ ସାର୍ରେୱେଲେ ତିୟାର୍ ଆସ୍ ମାନୁଟ୍ । ବାତେଙ୍କ୍‍ଇତ୍‍କେ ମିଡ଼୍ ପୁତ୍‍ତିଡ଼୍ ଜେ, ପ୍ରବୁନ୍ ସେଙ୍ଗେ ମିୟାଦ୍ ପାଡ଼୍‍ୟି ବେସୁଟ୍‍ବା ଆଙ୍ଗ୍‍ଡ଼ାମ୍ ଆୟ୍‍ୟ ।