1 ବେନ ଜିସୁଙ୍କ୍ କ୍ରିଷ୍ଟ ଇଞ୍ଜ ବିଶ୍ୱାସ୍ ମାଡ଼ିତଣ୍ଡ୍‍, ଅଣ୍ଡ୍‌ ଇଶ୍ୱର୍‌ତେ ମାର୍‍ । ବେନ ଆୟି ୱେରନ୍ ବାବାଙ୍କ୍ ପ୍ରେମ୍‌ ମାଡ଼ିତନ୍, ଆ ବାବାନ୍ ମାରିଙ୍କ୍ ମିକା ଅଣ୍ଡ୍‌ ସ୍ନେହ ମାଡ଼ିତନ୍ । 2 ଯଦି ମାମେ ଇଶ୍ୱର୍‌ତିଙ୍କ୍ ପ୍ରେମ ମାଡ଼ି ଅନାଦ୍‌ ଆଜ୍ଞା ପାଲନ୍‍ ମାଡ଼ିତାଡ଼୍‍ ଇଶ୍ୱର୍‌ତେ ପିଲାନ୍‍ ସେଙ୍ଗେ ମାୟାଦ୍ ପ୍ରେମ ମିନ୍ଦେ ଇଞ୍ଜ ପୁନ୍ଦାଙ୍କ୍ ଆଦ୍‍ତେ । 3 ✝ଇଶ୍ୱର୍‌ତେ ସେଙ୍ଗେ ମାନାଦ୍‍ ପ୍ରେମ ମିନ୍ଦେ, ଇଦିନ୍ ଅର୍ତ, ମାନାଡ଼୍ ଅନ୍‌ ଆଜ୍ଞା ପାଲନ୍ ମାଡ଼ିତାଡ଼୍ । ଅନ୍‌ ଆଜ୍ଞା ପାଲନ୍ ମାଡ଼ାନାଦ୍ ଗାଟି କଷ୍ଟ ଇଲେ, 4 ବାତେଙ୍କ୍‍ଇତ୍କେ ଅନ୍‌‍ ପିଲା ଇଦ୍ ଜଗତ୍‍ତିଙ୍କ୍ ଆରା ମାଡ଼ାନଙ୍କ୍ ଶକ୍ତି ପାଏମ୍ ଆତ୍‍ତଡ଼୍‍ । ବିଶ୍ୱାସ୍ ଶକ୍ତିତେ ମାମେ ଜଗତ୍‍ତେ ପରୁ ଜିଡ଼ାନାଦ୍ ଲାବ୍ ମାଡ଼େ ପାର୍‍ତାଡ଼୍ । 5 ଇଦ୍ ଜଗତିଙ୍କ୍‍ ବେନ ଆରା ମାଡ଼େ ପାର୍‍ତଣ୍ଡ୍‍ ? ଜିସୁ ଇଶ୍ୱର୍‌ତେ ମାର୍‍ ଇଞ୍ଜ ବେନ ବିଶ୍ୱାସ୍ ମାଡ଼ିତନ୍, ଅଣ୍ଡେକେ ଜଗତ୍‍ତିଙ୍କ୍‍ ଜିଡ଼େ ପାର୍‍ଦ୍‍ତଣ୍ଡ୍‍ ।

6 ଜିସୁ କ୍ରିଷ୍ଟ ଇଶ୍ୱର୍‌ତେ ମାର୍‍ ଇଞ୍ଜ ବାପ୍ତିସ୍ମ ତଡ଼୍ ନୁ ନିଜର୍‍ ନେତୁର୍‍ ତଡ଼୍‍ ନାରୁଡ଼ାଦ୍‍ ପରିତ୍ରାଣ ସାଦନ୍‍ ମାଡ଼୍‍ତଣ୍ଡ୍ । ମାତର୍‍ ଏର୍‍ତଡ଼୍‍ ଆୟ ମାତର୍‌ ରେଣ୍ଡ୍‍ଆସ ଏର୍‍ ନୁ ନେତୁର୍‍ ଇସ୍‍ ୱାସ୍‍ମାତ୍‍ତଣ୍ଡ୍‍ । ଆତ୍ମା ଆନ୍‌ତେ ଇଦିନାଦ୍‍ ସାକ୍ଷୀ ଇଦୁତା । ବାତ୍‍ତିଙ୍କ୍ଇତ୍କେ ପରମାଆତ୍ମା କେ ସତ୍ । 7 ମେଣ୍ଡେ ଇୱୁ ମୁଣ୍ଡିନ୍‍ ସାକ୍ଷ୍ୟ ଅଣ୍ଡୟ୍‌‍ ସମାନ୍‍ । 8 ଆତ୍ମା, ଏର୍‍ ନୁ ନେତୁର୍‍, ଇୱୁ ମୁଣ୍ଡିନ୍‍ ସାକ୍ଷ୍ୟ ଅଣ୍ଡୟ୍‌‍ । 9 ମାମେ ଯଦି ନାରୁନ୍‍ ସାକ୍ଷ୍ୟ ଗ୍ରହନ୍‍ମାଡ଼୍‍କେ ଆଲେକ୍ ଇଶ୍ୱର୍‌ତେ ସାକ୍ଷ୍ୟ ଆଦିନାଗାଙ୍କ୍ ଶ୍ରେଷ୍ଠ, ମେଣ୍ଡେ ଇଶ୍ୱର୍‌ତେ ସାକ୍ଷ୍ୟ ଇଦ୍ ‍ଯେ ଅଣ୍ଡ୍‌ ତାନ୍ ମାରିନ୍ ବିଷୟତେ ସାକ୍ଷ୍ୟ ଇତ୍‍ତନ୍ । 10 ବେନ ଇଶ୍ୱର୍‌ତେ ମାରିନାଗ୍‍ ବିଶ୍ୱାସ୍‍ ମାଡ଼ିତଣ୍ଡ୍‍, ଅଣ୍ଡ୍‌‍ ନିଜର୍‍ ହୃଦୟତାଗ୍‍ ଇଦ୍‍ ସାକ୍ଷ୍ୟ ପାଏମ୍‍ ଆତ୍‍ତଣ୍ଡ୍‍, ବେନ ଇଶ୍ୱର୍‌ତେ ସାକ୍ଷ ବିଶ୍ୱାସ୍‍ ମାଡ଼ଣ୍ଡ୍‍, ଅଣ୍ଡ୍‌‍ ଅଂକିଙ୍କ୍‌ ମିଚ୍‍ ଇଞ୍ଜ କେତ୍‍ତଣ୍ଡ୍‍, ବାତେଙ୍କ୍ଇତ୍କେ ଇଶ୍ୱର୍‍ ନିଜେ ମାରିନ୍ ବିଷୟତେ ବେନ୍ ସାକ୍ଷ୍ୟ ଇସ୍‍ମିନ୍ଦେଣ୍ଡ୍, ଆଗେ ଅଣ୍ଡ୍‌ ବିଶ୍ୱାସ୍‍ ମାଡ଼ଣ୍ଡ୍ । 11 ✝ଆଦ୍ ସାକ୍ଷ୍ୟ ଆତ୍‍ତେ, ଇଶ୍ୱର୍‍ ମାନାଙ୍କ୍ ଅନନ୍ତ ଜିୱୁନ୍ ଇତ୍‍ତନ୍; ମେଣ୍ଡେ ଆଦ୍‍ ଜିୱୁଣ୍ଡ୍ ତାନ୍ ମାରିନାଗେ ମିନ୍ଦେ । 12 ବେନ ମାରିଙ୍କ୍ ପାହେମ୍ ଆତ୍‍ତନ୍, ଅଣ୍ଡ୍‌ ଜିୱୁଣ୍ଡ୍ ପାହେମ୍ ଆତ୍‍ତନ୍; ବେନ ଇଶ୍ୱର୍‌ତେ ମାରିଙ୍କ୍ ପାହେମ୍ ଆୟନ୍, ଅଣ୍ଡ୍‌ ଜିୱୁଣ୍ଡ୍ ପାହେମ୍‍ ଆୟଣ୍ଡ୍ ।

13 ମିକିଙ୍କ୍ ଇଦ୍ ଚିଟି ଲେକୁତାନ୍, ସାରେଦିନତ୍ ଜିୱେତେ ଅଦିକାର୍‌ ଇଞ୍ଜ ମିଡ଼୍ ବେଲାନ୍ ପୁନ୍‍ତିଡ଼୍, ବାତେଙ୍କ୍‍ଇତ୍କେ ଇଶ୍ୱର୍‌ତେ ମାରିନାଗେ ମୀଇ ବିଶ୍ୱାସ ମିନ୍ଦେ । 14 ମେଣ୍ଡେ ମାନାଡ଼୍ ବେସୁଟ୍‌ ଅନାଦ୍‌ ଇଚ୍ଛା ଲେକାମ୍‌ ବାତ୍‍ଆଇ ପ୍ରାର୍ତନା ମାଡ଼ିତାଡ଼୍, ଆସୁଟ୍ ଅଣ୍ଡ୍‌ ମାନାଦ୍‍ ଆଦ୍ ପ୍ରାର୍ତନା କେଞ୍ଜିତନ୍, ଅନ୍‌ ମୁନେ ମାନାଦ୍‍ ଇଦ୍ ସାହାସ୍ ମିନ୍ଦେ । 15 ମେଣ୍ଡେ ମାନାଡ଼୍ ଅନ୍‌ ଗାରେ ବାତ୍‍ଆୟି ପ୍ରାର୍ତନା ମାଡ଼୍‍କେ, ଆଦ୍ ଅଣ୍ଡ୍‌ କେଞ୍ଜିତନ୍ ଇଞ୍ଜ୍ ଯଦି ମାନାଡ଼୍ ପୁତ୍‍ତାଡ଼୍‍, ଆଲେକ୍ ଅନ୍‌‍ ମିନେ ବାତ୍‍ ପ୍ରାର୍ତନା ମାଡ଼୍‍ତାଡ଼୍, ଆୱୁ ସାରେ ପାହେମ୍ ଆତ୍‌ତାଡ଼୍, ଇଦ୍ ମିକା ପୁତ୍‍ତାଡ଼୍ ।

16 ଯଦି ମୀଇ ୱେରଣ୍ଡ୍ ବିଶ୍ୱାସୀ ଏଲାଡ଼୍‍ତାମୁଣ୍ଡ୍ ପାପ ମାଡ଼ମାନ୍ଦାନ୍ ଉଡ଼ିତିଡ଼୍‍, ମେଣ୍ଡେ ଆଦ୍‍ ପାପ୍ ଡଲାନାଦ୍ ଆୟ, ଅନ୍‌ ସେଙ୍ଗେ ଇଶ୍ୱର୍‌ତିଙ୍କ୍ ପ୍ରାର୍ତନା ମାଡ଼ାଟ୍ ମେଣ୍ଡେ ଇଶ୍ୱର୍ ଅଂକିଙ୍କ୍‌ କ୍ଷମା ଇସ୍ ରକ୍ଷା ମାଡ଼ିତଣ୍ଡ୍‍ । ବେନଡ଼ାୱୁ ପାପାମ୍‍ ଡଲାନ୍‍ ଲେକାମ୍‍, ଆଦ୍‍ ବିଷୟ୍‍ତେ ନାନ୍‍ ଇଶ୍ୱର୍‌ତିଙ୍କ୍‍ ପ୍ରାର୍ତନା ମାଡ଼ାନଙ୍କ୍‍ କେଲନ୍‍ । 17 ସାରେ ଅଦର୍ମ ପାପାମ୍‍ ଆଦ୍‍ତେ, କିନ୍ତୁ ସାରେ ପାପାମ୍‍ ଡଲାନାଦ୍‍ ଆୟ ।

18 ବେନ ଆୟି ଇଶ୍ୱର୍‍ତାଗାଙ୍କ୍‍ ପୁଟ୍‍ତଣ୍ଡ୍‍ ଅଣ୍ଡ୍‌‍ ପାପାମ୍‍ତାଗ୍‍ ମାନଣ୍ଡ୍‍ । ବାତେଙ୍କ୍ଇତ୍କେ ଇଶ୍ୱର୍‌ତେ ମାର୍‍ ଅଙ୍କ୍‌ ରକ୍ଷା ମାଡ଼ିତଣ୍ଡ୍ ଶୟତାନ୍ ଅନାଦ୍‌ କ୍ଷତି ମାଡ଼େ ପାର୍‍ୱ ।

19 ମାନାଡ଼୍ ଇଶ୍ୱର୍‌ତାଗଙ୍କ୍‍ ପୁଟ୍‍ତାଡ଼୍ ନୁ ସାରେ ଜଗତ୍‍ ପାପାମ୍‍ତେ ଅଦିନ୍‌ତାଗ୍ ମିନ୍ଦେ, ଇଦ୍‍ ମାନାଡ଼୍‍ ପୁତ୍‍ତାଡ଼୍ ।

20 ମାମେ ପୁତ୍‍ତମ୍, ଇଶ୍ୱର୍‌ତେ ମାର୍‍ ଇଗେ ୱାସ୍ ସତ୍‍ ଇଶ୍ୱର୍‌ତେ ସତ୍‌ ଏର୍କେ ମାଡ଼ାନଙ୍କ୍ ମାନାଙ୍କ୍ ଜ୍ଞାନ୍ ଇସ୍‍ମିନ୍ତେନ୍ । ମାନାଡ଼୍ ସତ୍‍ ଇଶ୍ୱର୍ ନୁ ଅନ୍‌‍ମାର୍ ଜିସୁ କ୍ରିଷ୍ଟନ୍‍ ତଡ଼୍ କାଇଲି ମାନ୍ଦାନ୍ ଜିୱେ ବାଦ୍‍କୁତାଡ଼୍ । ଅଣ୍ଡେ କେ ସତ୍ ଇଶ୍ୱର୍ ନୁ ଅଣ୍ଡେ କେ ସାରେଦିନାତ୍ ଜିୱେ ।

21 ଆ ପିଲାନଡ଼ି, ଆସତ୍ ଦେୟାକିନାଗାଙ୍କ୍ ଯେକା ମାନୁଟ୍ ।