1 କ୍ରିଷ୍ଟବିଶ୍ୱାସି କ୍ରୀତଦାସନଡ଼୍ କର୍ତ୍ତାଲଡ଼୍‍କ୍ ସାରେକିଚବିଦି ସମ୍ମାନ୍ ଇଦ୍‍ତଡ଼୍ । ଆଲେକ୍, ଇଶ୍ୱର୍‌ତେ ବିରୁଦ୍ଦତେ ବା ମାନ୍‍ ଶିକ୍ଷା ସମ୍ପର୍କତେ ବେନ ବାତେ କାରାପ୍‍ ମାଡ଼େପାର୍‍ୱଡ଼୍ । 2 ବେନଡ଼୍‍ଉ କର୍ତ୍ତାନଡ଼୍ "ଦାଦା," ହେର୍କା ମାଡ଼ି ଅଡ଼୍‌‍କିଂଙ୍କ୍ ଯୋଥସିତ ସମ୍ମାନ୍ ଇଦାନ୍ ଲେଟ୍ ମାଡ଼୍‍ମାଟ୍, ବରଂ ଅଦିକ୍‌ ନିଷ୍ଟାପର୍ ଲେକାମ୍ ଅଡ଼୍‌ ସେବା ମାଡ଼ାଟ୍, ବାତେଙ୍କ୍‍ଇତ୍କେ ଅଡ଼୍‌‍ ମିକା କ୍ରିଷ୍ଟବିଶ୍ୱାସି ନୁ ଗାଟି ପ୍ରିୟ ନାରୁଡ଼୍‍ । ଇଦ୍ ସାରେ ବିଷୟ ମୀଇ ଶିକ୍ଷା ଇସ୍ ପ୍ରଚାର୍ ମାଡ଼ିତିଡ଼୍ ।

3 ବେନଡ଼୍ ପ୍ରବୁ ଜିସୁକ୍ରିଷ୍ଟଙ୍କ୍ ଶିକ୍ଷାତଡ଼୍ ସାନଞ୍ଜସ୍ୟ ମାନକଟ ନୁ ମାନ୍‍ ଦର୍ମ ଶିକ୍ଷାତେ ବିରୋଦ୍ ମାଡ଼ମାନ୍ଦା‍ନ୍ ମେଣ୍ଡନ୍ ଲେକାମ୍ ପ୍ରଚାର୍ ମାଡ଼ିତଡ଼୍, 4 ଅଡ଼୍‌ ମାତର୍ ଆଶେତେ ସ୍ପୀତ ୱିଡ଼୍‍ସି ମେଣ୍ଡେ ବାତ୍‍ ଆୟ । ଅଡ଼୍‌ ଶାସ୍ତ୍ରତେ ଅର୍ତ ଆସ୍ ରାମ୍‍କ୍ ମାଡ଼ିତଡ଼୍; ହିଗାଙ୍କ୍ ମାତର୍ କପାମ୍ ସନ୍ଦେହ, କୁତ୍ସାରଟନା ନୁ ଗଣ୍ଡଗଲ୍‍ ଆଦ୍‍ତେ । 5 ଅଡ଼୍‌ ବିଚାର୍ ଲେକାମ୍ ଆସ୍ ଆସାମ୍ ଯୁକ୍ତିତର୍କ ତଡ଼୍ ସତ୍ୟତାଦ୍ ଅପଲାପ ମାଡ଼ିତଡ଼୍ । ଦର୍ମବିଶ୍ୱାସ୍‍ତିଙ୍କ୍ ମାତର୍ ସାଉକାର୍ ଆଦାନ୍ ଅଣ୍ଡୟ୍‌ ଆର୍ର୍ ଇଞ୍ଜ ଅଡ଼୍‌ ହେର୍କା ମାଡ଼ିତଡ଼୍ ।

6 ଦର୍ମପରାୟନ୍ ନାରୁଡ଼୍ ମୁନେଙ୍କ୍ କଞ୍ଜ୍ ସାଉକାର୍, ବାତେଙ୍କ୍‍ଇତ୍କେ ଅନାଦ୍‌, ବେସର୍ ମିନ୍ଦେ, ଆଚର୍‍ତିଙ୍କ୍ ଅଣ୍ଡ୍‌ ସନ୍ତୁଷ୍ଟ । 7 ମାମେ ଇଦ୍ ଜଗତ୍‍ତିଙ୍କ୍ ବାତେ ଆସ୍ ତାତ୍‍ତମ୍ ? ବାତେ ତ ଆୟ । ମେଣ୍ଡେ ହିଗାଙ୍ଗ୍ ସାଙ୍ଗେତେ ଆସ୍ ମାଲ୍‍ସ୍ ଆଦାନାଦ୍ ? ବାତେ ଆୟ । 8 ଆଲାହିତ୍‍କେ, ମାୟାୱ ଅନ୍‌ନ ବସ୍ତ୍ରତେ ସଂସ୍ଥାର୍ ଆଦେ ପାର୍‍ତମ୍, ଇଦ୍ ମା ସେଙ୍ଗେ ଯଥେଷ୍ଟ ଆୟ କି ? 9 ଦନ୍ ସମ୍ପତ୍ତିତେ ଲୋବ୍ ନାରିନାଗେ ପରିକ୍ଷା ନୁ ଚକ୍ରାନ୍ତ ଲୋପେଙ୍କ୍ ଲାଗିଆଦ୍‍ତେ; ଅନ୍‌ ମନ୍‍ଦାଗ୍ ଗାଟି ତୁଚ୍ଚ ଅନିଷ୍ଟ ଲାଳସା ଜାଗ୍ରତ ମାଡ଼ି ଆଦାଙ୍କ୍ ଦ୍ୱସଂ ନୁ ସର୍ବନାଶ ପାକେ ଲାଗିଆଦ୍‍ତେ । 10 ଅର୍ତଲୋବ୍ ସାରେତଡ଼୍ ଅନର୍ତତେ ମୁଲ । ବେନଡ଼୍ ସାରେଦାମ୍ ମାତର୍ ଅର୍ତାଗମନ୍ ପନ୍ଥା ମେହେକ ମାନ୍‍ତଡ଼୍, ଅଡ଼୍‌ ଦର୍ମବିଶ୍ୱାସ୍‍ତିଙ୍କ୍ ଆରାମାଡ଼ିତଡ଼୍, ମରିମାନତେ ମାତର୍ ନୁ ଦୁଃକାମ୍‍ତେ ଅଡ଼୍‌ ହୃଦୟ କଷ୍ଟ ଆଦ୍‍ତେ ।

11 କିନ୍ତୁ ଆ ତୀମତି ନିମେ ୱେରଣ୍ଡ୍‍ ଇଶ୍ୱର୍‌ତେ ନାରୁନି ଆଦିଙ୍କ୍‍ ହି ସାରେତାଗାଙ୍କ୍ ନିମେ ଦୂରାମ୍ ମାନୁଟ୍ । ଦର୍ମତେ ନୁ ଇଶ୍ୱର୍‌ତେ ପାକେ ବିଶ୍ୱାସ୍, ପ୍ରେମ, ସହିଷ୍ଣତା ନୁ ସୌଜନ୍ୟ ଲେକାମ୍ ସଦ୍‍ଗୁତାୱ ପରିପୂର୍ଣ୍ଣ ଆଦାଙ୍କ୍ ଚେଷ୍ଟା ମାଡ଼ାଟ୍ । 12 ବିଶ୍ୱାସ୍‌ତେ ସାୟେ ଯୁଦ୍‌ତାଗେ ପ୍ରାନପନ ମାଡ଼ାଟ୍, ଅନନ୍ତ ଜିୱୁନ୍ ପଇସ୍‌ ନେହେମୁଟ୍; ଆଦିନ୍ ସେଙ୍ଗେ ତ ମୀଡ଼୍ ଜିୱେ ଆସ୍‍ମିନ୍ଦେଡ଼ି ନୁ ନାର୍‍ଗେ ସାକ୍ଷିଙ୍କ୍ ସାକ୍ଷାତ୍‍ତେ ଲେକେତ୍‍ ସାକ୍ଷ୍ୟ ଇସ୍‍ମିନ୍ଦେଡ଼ି । 13 ✝ସାରେ ପଶୁକିନ୍ ଜିୱେ ଦାତାଲ୍ ଇଶ୍ୱର୍‌ତେ ମୁନେ ନୁ ପନ୍ତିଆସ୍ ପିଲାତନ୍ ମୁନେ ଦୃଡ଼ ବିଶ୍ୱାସ୍‍ତେ ପରିଚୟ ଇସ୍‍ମାନ୍ଦାନ୍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍ତେ ମିକିଙ୍କ୍ ଆଦେଶ୍‍ ଇସ୍ କେତୁତାନ୍, 14 ପ୍ରବୁ ଜିସୁ କ୍ରିଷ୍ଟ ୱାଦାନ୍ ଦିନାଯାକ ମିକିଙ୍କ୍ ଇସ୍‍ମାନ୍ଦାନ୍ ଦର୍ମବିଦି ବିଶ୍ୱାସ୍‍ତେ ପାଲନ୍ ମାଡ଼ି ନିର୍ମଲ ନୁ ନିନ୍ଦେ ଆୟକଟ ମାନୁଟ୍‍ । 15 ଅନାଦ୍‌ ମେଣ୍ଡେ ୱାଦାନାଦ୍ ଦିନାମ୍ ହେଉଦାନ୍ ଦିନାମ୍ ମାଡ଼ିତନ୍ ସ୍ୱୟଂ ଇଶ୍ୱର୍‍ କେନେସାୟ୍‍, ରାଜାଦିରାଜ, ପ୍ରବୁନଡ଼୍ ପ୍ରବୁ, ଅଦ୍ୱୀତିୟ ଅଦିପତି; 16 ଇଶ୍ୱର୍ ଅମର୍‍, ଅଣ୍ଡ୍‌ ମାତର୍ ମାନାଦ୍‍, ନାରିଡ଼୍‍ତେ ଏୱୁଦାଙ୍କ୍‍ ପାର୍‍ୱେ ୱେସ୍ ରାଜ୍ୟତେ ଅଣ୍ଡ୍‌ ଆଗେ ମାନ୍‍ତନ୍; ବେନ ଅଙ୍କ୍‌ ବେସୁଙ୍କ୍‍ ଉଡ଼ନ୍; ବେନ ବା ବେସୁଙ୍କ୍‍ ୱୁଡ଼େ ପାର୍‍ୱଣ୍ଡ୍ । ଅନ୍‌ ଗୌରବ୍ ନୁ ସ୍ୱର୍ଗ ରାଜ୍ୟ ଯୁଗ୍‍ଯୁଗ୍‍ ମାନି । ଆମେନ୍‍ ।

17 ବେନଡ଼୍ ମୁନେଙ୍କ୍‍କଞ୍ଜ୍ ସାଉକାର୍, ଅଡ଼୍‌‍ ବେଲାନ୍ କି ଆଙ୍କାରିଡ଼୍ ଆୟଡ଼୍ ନୁ ସାରେତ୍ ଦନ୍‍ଦେ ପର ଆସେ ମାଡ଼ଡ଼୍, ବରଞ୍ଚ ବୋଗ୍‍ଦେ ସେଙ୍ଗେ ସାରେତ୍‍ ବିଷୟ ନାର୍ଗେ ଲେକାମ୍ ମାକିଙ୍କ୍ ଦାନ ମାଡ଼ିତଡ଼୍ ବେନ୍ ଇଶ୍ୱର୍, ଅନ୍‌ ପର ଆଶେ ମାଡ଼ିତ୍, 18 ମେଣ୍ଡେ ଅର୍‍ତୁଡ଼୍ ସାହାଯ୍ୟତେ ସାରେତଡ଼୍ ସତ୍‍କାମ୍‍ଦେ ସାଉକାର୍ ଆଦ୍‍ତଡ଼୍; ମେଣ୍ଡେ ମୁକ୍ତ କାଇଦେ ନୁ ଉଦାର୍‍ତେ ଦାନ ମାଡ଼ିତନ୍, ଅଦିନ୍‌ ସେଙ୍ଗେ ଅଡ଼୍‌‍କିଂଙ୍କ୍ ଆଜ୍ଞା ଇମୁଟ୍; 19 ଇଦ୍ ଲେକେତ୍‍ ନାରିଡ଼୍ ଅଡ଼୍‌‍ ଆଲ୍‍ସି ଜିୱେତ୍‍ ସେଙ୍ଗେ ଲେକେତ୍ ଦନ୍ ନିଜେ ନିଜେ ସେଙ୍ଗେ ଦର୍‍କାଟ୍, ବେଦ୍‍ଲେକାମ୍ ପ୍ରକୃତେ ଜିୱୁନ୍ ପ୍ରାପ୍ତ ଆଦ୍‍ତଡ଼୍ ।

20 ହୋ ତିମତି, ନିୟାଗ୍ ବେନ୍‍ ଦାୟିତ୍ୱ ସମର୍ପିତ ଆସ୍‍ମିନ୍ଦେ, ଆଦ୍ ରକ୍ଷା ମାଡ଼େ; ଆସର୍ ବକୁଆତନ୍ ନୁ କେତାକେତି ଜ୍ଞାନ୍‍ତେ ଯୁକ୍ତିତର୍କତାଗାଙ୍କ୍ ୱେର୍‌ମାଟ୍‌; 21 ବେନ ଆଦ୍ ପାଲନ୍‍ ମାଡ଼୍‍ୱେ ବିଶ୍ୱାସ୍‍ତେ ମୁନେ ଆର୍ ବୁଲ୍‍କା ଆସ୍‍ମିନ୍ଦେଡ଼୍ । ଇଶ୍ୱର୍‌ତେ ଅନୁଗ୍ରହ ମୀଇ ଗାରେ ସାରେଦିନାମ୍ ମାନି ।