1 ✝ମିୟାଦ୍ କେଞ୍ଜ୍‍ୱାଦ୍ ନୁ ପାପ୍ ସେଙ୍ଗେ ମୁନେଙ୍କ୍ ଦିନାମ୍‍ତେ ଡଲାନାଦ୍ ମାତ୍‍ତେ । 2 ଆଦ୍ ସମୟ୍‍ତେ ମିଡ଼୍, ବେନ୍ ଆତ୍ମା ଇଞ୍ଜେ ମିକା ବୁଦ୍‍ଇଲ୍‍ୱେ ପିଲାନାଗ୍ ପାଡ଼୍‍ୟି ମାଡ଼୍‍ତଣ୍ଡ୍, ଆଦିନ୍ ଇଚ୍ଛାଲେକାମ୍ ମିଡ଼୍‍ଆନ୍‌ନ୍ତେ ମୁନେଙ୍କ୍‍କଞ୍ଜ୍ ପାଲନ୍ ମାଡ଼ଡ଼୍‍ ଅପରାଦ୍‌ତେ ନୁ ପାପତେ ଡଲିମାତ୍‍ତିଡ଼୍ । 3 ଆଦ୍‍ଲେକାମ୍ ମାମ୍‍ମେ ସାରେତମ୍ ଅଡ଼୍‌‍ପୁଟୁଙ୍କ୍ ମାତ୍‍ତମ୍ ନୁ ମେନ୍ଦୁଲ୍ ନୁ ମନ୍‍ଦେ ଅବିଲାଷତିଙ୍କ୍ ବ୍ୟବହାର୍‌ ମାଡ଼ି ବାଦ୍‍କମାତ୍‍ତମ୍ । ସମ୍ଭବତଃ, ବାଗାତଡ଼୍ ଲେକାମ୍ ମାମ୍‍ମେ ମିକା ଇଶ୍ୱର୍‌ତେ କପାମ୍‍ତେ ପରିମାଣ ବୋଗ୍ ମାଡ଼ାନଙ୍କ୍ ଆଞ୍ଜମାତ୍‍ତମ୍ । 4 ଇତ୍‍କେ ଇଦ୍‍ଲେକାମ୍ କାରାପ୍‍ତେ ଡଲ୍‍କେ କେ ଦୟାତଣ୍ଡ୍‍ ଯେ ଇଶ୍ୱର୍, ଅଣ୍ଡ୍‌ ମାନ୍‍ ବେନ୍ ନାର୍‍ଗେ ପ୍ରେମତଡ଼୍‍ ପ୍ରେମ ମାଡ଼୍‍ତଣ୍ଡ୍ । 5 ଆଦିନ୍ ସେଙ୍ଗେ ମିକିଂଙ୍କ୍ କ୍ରିଷ୍ଟନ୍ ତଡ଼୍ ଜିୱେ ମାଡ଼୍‍ତନ୍, ଅନୁଗ୍ରହ ତଡ଼୍‍ ମିକିଂଙ୍କ୍‍ ପରିତ୍ରାଣ୍ ପାଏମ୍‍ ଆତ୍‍ତିଡ଼୍ । 6 କ୍ରିଷ୍ଟ ଜିସୁନ୍‍ତଡ଼୍ ୱେରଡ଼୍ ଆତ୍‍ତେ ପେର୍‍କେ ଅନ୍‌‍ତଡ଼୍ ସ୍ୱର୍ଗତାଗ୍ ରାଜ୍‍ମାଡ଼ାନ୍ ସେଙ୍ଗେ ଅଣ୍ଡ୍‌ ମାନାଙ୍କ୍‍ ମିକା ତେଏସ୍ ମିନ୍ଦେନ୍ । 7 ଜିସୁ କ୍ରିଷ୍ଟନାଗେ ଇସ୍‍ମାନ୍ଦାନ୍ ପ୍ରେମତେ ଅନାଦ୍‌ ଅନୁଗ୍ରହତେ ଶାନ୍ତି ମହତ୍ୱ ଯୁଗ୍‍ଯୁଗ୍ ସାରେଦିନା ମାଡ଼ାନ୍ ସେଙ୍ଗେ ଇଶ୍ୱର୍ ଇଦ୍‍ ମାଡ଼୍‍ତଣ୍ଡ୍ । 8 ବାତେଙ୍କ୍‍ଇତ୍କେ ଅନୁଗ୍ରହତେ ବିଶ୍ୱାସ୍ ତଡ଼୍ ମିଡ଼୍ ପରିତ୍ରାଣ୍ ଦର୍ସିକି ଆସ୍ ମିନ୍ଦେଡ଼ି; ଆଦ୍ ମିୟାଗାଙ୍କ୍ ନିଜେତ୍ ଲୋପେଙ୍କ୍ ଆୟ୍‍ୟ, ଆଦ୍ ଇଶ୍ୱର୍‌ତେ ଦାନ । 9 ଆଦିଙ୍କ୍‍ ଇଦ୍‍ ବିଷୟ୍‍ତେ ବେନ ଗର୍ବ ମାଡ଼୍‍ମାକିଣ୍ଡ୍ । 10 ମାମ୍‍ମେ ବାତେଏ ଆଦ୍‍ପାର୍‍ୱମ୍, ମାତର୍ ଇଶ୍ୱର୍‍କେ ଆଦ୍‍ ମାଡ଼୍‍ତେ; ବେନ୍ ସାରେ ସାୟେ ପାଡ଼୍‍ୟି ମାମ୍‍ମେ ମାଡ଼ିତମ୍ ଇଞ୍ଜ ଇଶ୍ୱର୍ ମୁନେଙ୍କ୍ ତିଆର୍ କିସ୍ ମାତ୍‍ତନ୍, ମାମ୍‍ମେ କ୍ରିଷ୍ଟ ଜିସୁନ୍ ତଡ଼୍ କାଇଲି ମାନ୍ଦାନ୍ ସେଙ୍ଗେ ମା ଜିୱେତାଗ୍ ଆଦ୍ ସାରେ ଆତ୍‍ତେ ।

11 ନିଜର୍‍ ମୁନେଙ୍କ୍‍ତେ ଦିନାମ୍‍ ଏର୍କା ମାଡ଼ାଟ୍, ଜାତିତାଗ୍ ମିଡ଼୍ ଅଣଇହୁଦି ମାତ୍‍ତିଡ଼୍, ନିଜେତିଙ୍କ୍ "ସୁନ୍ନତ୍," କେସ୍‍ମାନ୍ଦାନ୍ ଇହୁଦିଡ଼୍ ମିକିଂଙ୍କ୍ "ଅସୁନ୍ନତ," କେତିତଡ଼୍‍ । ଇଦ୍ ମାତର୍‌ ୱେରଡ଼୍ ମେନ୍ଦୁଲ୍‍ତେ ଅବସ୍ଥାତିଙ୍କ୍ ପୁନ୍ଦାଙ୍କ୍ଆଦ୍‍ତେ । 12 ମୁନେ ମିଡ଼୍ କ୍ରିଷ୍ଟନାଗାଙ୍କ୍ ଯେକା ମାତ୍‍ତିଡ଼୍, ମିଡ଼୍ ବିଦେଶି ମାତ୍‍ତିଡ଼୍ ନୁ ଇଶ୍ୱର୍‌ତେ ହେଞ୍ଚ୍‍ତେ ଜାତିତାଗ୍ କାଇଲ୍‍ୱେ ମାତ୍‍ତିଡ଼୍ । ଇଶ୍ୱର୍ ତାନ୍ ନାରୁଡ଼୍ ସେଙ୍ଗେ ମାଡ଼ିମାନ୍ଦାନ୍ ପ୍ରତିଜ୍ଞା ପରୁ ତିଆର୍ ନିୟମ୍‍ତେ ମିୟାଦ୍ ବେନେବା କାଇଲ୍‍ୱେ ମାତ୍‍ତେ । ଆଶେ ଶୁନ୍ୟ ନୁ ଇଶ୍ୱର୍ ବିହିନ ଆସ୍ ମିଡ଼୍ ଜଗତ୍‍ତାଗ୍ ମାଞ୍ଜମାତ୍‍ତିଡ଼୍ । 13 ଆଦେଲେକାମ୍ ଯେକା ମାତ୍‌ତିଡ଼୍; ଇଞ୍ଜେ ଜିସୁନ୍‍ତଡ଼୍ ଅଣ୍ଡୟ୍‌‍ ଆସ୍ କ୍ରିଷ୍ଟନ୍ ଡଲ୍‍ତାଦ୍ ସେଙ୍ଗେ ଗାର୍‍ରେ ହେଉସ୍ ମିନ୍ଦେ । 14 ବାତେଙ୍କ୍‍ଇତ୍କେ ଇହୁଦି ନୁ ଅଣଇହୁଦିଡ଼୍ ୱେରଡ଼୍ ମାଡ଼ି କ୍ରିଷ୍ଟ ନିଜେ ମାନାଙ୍କ୍‍ ଶାନ୍ତି ଇସ୍‍ମିନ୍ତେନ୍ । ଅଡ଼୍‌‍କିଂଙ୍କ୍ ଡୁଟାଙ୍କ୍ ମାଡ଼ି ନିଜେ ନିଜେ ଶତ୍ରୁଡ଼୍ ଲେକାମ୍ ନେହେସ୍ ମାନ୍ଦାନ୍ ନେଟେତିଙ୍କ୍ ଅଣ୍ଡ୍‌ ତାନ୍ ନିଜେତ୍ ମେନ୍ଦୁଲ୍ ତଡ଼୍ ଉୱୁତନ୍ । 15 ✝ଅଡ଼୍‌ ଇହୁଦିନଡ଼୍ ସାରେ ବିଦିବିଦାନ୍ ସାର୍‌ରେ ବ୍ୟବସ୍ଥାତିଙ୍କ୍‍ ଉଚ୍ଛେଦ ମାଡ଼ି ଇହୁଦିଡ଼୍ ନୁ ଅଣଇହୁଦିଡ଼୍ ଆଗାଙ୍କ୍ ଅଡ଼ାଦ୍‌ ସାହାଯ୍ୟ ମାଡ଼ମାନ୍ଦାନ୍ ୱେରଡ଼୍ ପୁଃନେ ମାନବ୍ ଜାତି ତିଆର୍ ମାଡ଼୍‍ତଣ୍ଡ୍ । ଆଗେ ପୃତିବିତାଗ୍ ଶାନ୍ତି ତିଆର୍ ଆଦ୍‍ତେ । 16 ✝କ୍ରୁଶତାଗ୍ ଅନାଦ୍‌ ଡଲ୍‍ତେ ସେଙ୍ଗେ କ୍ରିଷ୍ଟ ଆ ଯିହୁଦିଡ଼୍‍ ନୁ ଯିହୁଦିଡ଼ାଗ୍‍ ମାନ୍ଦାନାଦ୍ ଶତ୍ରୁତିଙ୍କ୍ ମାପିମିନ୍ଦେନ୍; କ୍ରୁଶତଡ଼୍ ଅଣ୍ଡ୍‌ ୱେରେ ଜାତିତିଙ୍କ୍ ସମ୍ମିଲତ ମାଡ଼ି, ୱେରଡ଼୍ ମେନ୍ଦୁଲ୍ ଲେକାମ୍ ମାଡ଼୍‍ତଣ୍ଡ୍ ନୁ ଇଶ୍ୱର୍‌ତେ ପାକେ ଅଡ଼୍‌‍କିଂଙ୍କ୍ ମାଲ୍‍ପି ତାତ୍‍ତନ୍ । 17 ଆଦିନ୍ ସେଙ୍ଗେ କ୍ରିଷ୍ଟ ୱାସ୍‍ମାତ୍‍ତନ୍ ନୁ ଇଶ୍ୱର୍‌ତାଗାଙ୍କ୍ ଯେକା ଆଞ୍ଜ୍‍ମାନ୍ଦାନ୍ ଅଣଇହୁଦୀଡ଼୍ ନୁ ଅନ୍‌ ଗାର୍‍ରେ ତଡ଼୍ ଇହୁଦିଡ଼୍ ପାକେ ସୁସମାଚାର୍ କେସ୍‍ମାତ୍‍ତନ୍ । 18 କ୍ରିଷ୍ଟନ୍ ତଡ଼୍ କେ ଇହୁଦି ନୁ ଅଣଇହୁଦିଡ଼୍ ସାରେତଡ଼୍ ଅଣ୍ଡୟ୍‌ ଆତ୍ମାତେ ବାବାନ୍ ମୁନେ ୱାଦାନ୍ ସେଙ୍ଗେ ସାହାସ୍‍ ଆତ୍‍ତମ୍ । 19 ଆଦିନ୍ ସେଙ୍ଗେ ହୋ ଇହୁଦିନଡ଼ି, ମିଡ଼୍ ମେଣ୍ଡେ ବିଦେଶି ବା ନାରୁଡ଼୍‌ ଆୟ୍‍ୟ, ଇଞ୍ଜେ ଇଶ୍ୱର୍‌ତେ ନାରୁଡ଼୍‍ତଡ଼୍ କାଇଲି ମିଡ଼୍ ଆନ୍‌‍ତେ ତାନ୍ ରାଜ୍ୟତେ ନାରୁଡ଼ି ନୁ ତାନ୍ ପରିବାର୍‍ତେନଡ଼ି ଆତ୍‍ତିଡ଼୍‍ । 20 ମିଡ଼୍ ଆନ୍‌‍ତେ ପ୍ରେରିତ୍ ଶିଷ୍ୟ ନୁ ବାବବାଦିନଡ଼୍ ତଡ଼୍ ତିଆର୍ ଆଶେ ମାନ୍ଦାନ୍ ବିତ୍ତିମୁଲ ପରୁ ତିଆର୍‍ତେ ଲେକାମ୍ । ଆଦ୍ ଲୋତେ ମୁଲେତ୍‍ କାଲ୍‍ ନିଜେ ଜିସୁ କ୍ରିଷ୍ଟ । 21 ଅଣ୍ଡେକେ ମାତର୍ ଇଦ୍ ଲତ୍‌ତିଙ୍କ୍ କାଲ୍‌ପି ନେହେତିତନ୍ ନୁ ପ୍ରବୁନ୍ ସେଙ୍ଗେ ୱେରଡ଼୍ ଉତ୍ସର୍ଗିତ ପବିତ୍ର ମନ୍ଦିର୍ ଲେକାମ୍ ଡୁଟାଙ୍ଗ୍‍ ମାଡ଼ିତନ୍ । 22 ଅନାଦ୍‌ ଶକ୍ତିତଡ଼୍ ମିଡ଼୍‍ ଆନ୍‌ତେ ବାଗାତ୍ ସାରେତଡ଼ାଦ୍‍ ତଡ଼୍‍ ଆତ୍ମା ଲେକାମ୍ ଇଶ୍ୱର୍‌ତେ ମାନ୍ଦାନ୍‍ ସେଙ୍ଗେ ୱେରଡ଼୍ ଲନ୍‍ ଲେକାମ୍ ତିଆର୍ ଆତ୍‍ତେ ।