1 ଜିସୁ କ୍ରିଷ୍ଟଟନ୍ ସେଙ୍ଗେ କାୟିଦ୍ ଆସ୍‍ମାନ୍ଦାନ୍ ନାନ୍ ପାଉଲ୍, ନୁ ମାନ୍‍ ଦାଦାଲ୍ ତିମତିନାଗାଙ୍କ୍, ତାନ୍ ପ୍ରିୟ ସାଙ୍ଗ ନୁ ଅନ୍‌‍ ତଡ଼୍ ପାଡ଼୍‍ୟି ମାଡ଼ାନଣ୍ଡ୍ ପିଲିମନ୍‍, 2 ✝୧:୨ କଲସୀୟ ୪:୧୭.ତାମ୍ ଲୋନ୍‌ ଗୁଡ଼ମାନ୍ଦାନ୍ ମଣ୍ଡଲିତେ ନାରୁଡ଼୍, ଏଲାଡ଼୍‍ ଅପ୍‍ପିୟା ନୁ ସହ ସୈନିକ ଅକିପ୍‍ପନ୍ ଗାର୍‍ରେ ଚିଟି । 3 ବାବାଲ୍ ନୁ ପ୍ରବୁ ଜିସୁ କ୍ରିଷ୍ଟ ମିକିଂଙ୍କ୍ ଦୟା ନୁ ଶାନ୍ତି ଇୱିଣ୍ଡ୍ ।

4 ଦାଦାଲ୍ ଫିଲିମନ୍, ସାରେଦାମ୍ ନାନ୍ ପ୍ରାର୍ତନା ମାଡ଼ାନ୍ ୱେଲେ ନିକିଂଙ୍କ୍ ଏର୍କା ମାଡ଼ି ଇଶ୍ୱର୍‌ତିଙ୍କ୍ ଦନ୍ୟବାଦ୍ ଇଦ୍‍ତାନ୍, 5 ବାତେଙ୍କ୍ ଇତ୍‍କେ ନାନ୍ କେଞ୍ଜ୍‍ତାନ୍, ପ୍ରବୁ ଜିସୁନାଗ୍ ନିୟାଦ୍ ବିଶ୍ୱାସ୍ ନୁ ଇଶ୍ୱର୍ ବକ୍ତି ନାରୁଡ଼୍‍କିଂଙ୍କ୍ ନିୟାଦ୍ ବେସର୍ ପ୍ରେମ ମିନ୍ଦେ ! 6 କ୍ରିଷ୍ଟଟନ୍ ତଡ଼୍ କାୟ୍‍ଲି ମାମ୍‍ମେ ଜିୱୁଣ୍ଡ୍‍ତାଗ୍ ବେନ୍ ସାରେ ଆର୍ଶିବାଦ୍‌ ପାଏମ୍ ଆତ୍‍ତମ୍, କ୍ରିଷ୍ଟ ବିଶ୍ୱାସି ଲେକାମ୍ ନିତଡ଼୍ ମାୟାଦ୍‌ କାଇଲାନାଦ୍‍ ଲୋପେତ୍‌ ବିଷୟ ସାୟେ ବୁଜେମ୍ ଆଦାନ୍ ସେଙ୍ଗେ ନିକିଂଙ୍କ୍ ସାହାଯ୍ୟ ମାଡ଼ି, ଇଦ୍ ନାନ୍ ପ୍ରାର୍ତନା ମାଡ଼ୁତାନ୍ । 7 ହୋ ଦାଦା, ନିୟାଦ୍ ପ୍ରେମ ନାକିଂଙ୍କ୍ ଗାଟି ୱେଡ଼୍‍କ୍‍ ମାଡ଼୍‍ତେ ନୁ ଉତ୍ସାଇତ୍ ମିକା ମାଡ଼୍‍ତେ; ବାତେଙ୍କ୍ ଇତ୍‍କେ ନିମ୍‍ ଇଶ୍ୱର୍‌ତେ ନାରୁଡ଼୍‍ତେ ହୃର୍ଦୟ୍‌ତିଙ୍କ୍ ୱେଡ଼୍‍କ୍‍ ମାଡ଼୍‍ତି ।

8 ଆଦିଙ୍କ୍ କ୍ରିଷ୍ଟ ବିଶ୍ୱାସି ତାମୁଣ୍ଡ୍ ଇନା ନିୟାଦ୍ କର୍ତବ୍ୟ ବିଷୟ ନିର୍ଦ୍ଦେଶ୍‌ ଇଦାନଙ୍କ୍ ନାୟାଦ୍ ସାଆସ୍ ମିନ୍ଦେ । 9 ଇତ୍‍କେ ନି ପର୍‍ର ନାୟାଦ୍ ପ୍ରେମ ମାନ୍ଦାନ୍ ମାୟ୍‍ଦିଙ୍କ୍ ଅନୁରଦ୍‌ କେ ମାଡ଼ିତାନ୍ । ଯଦିବା ନାନ୍ ପାଉଲ୍, ୱେରଣ୍ଡ୍ ପେଦ୍‍ୱାଲ୍, ଜିସୁ କ୍ରିଷ୍ଟଟନ୍ ସେଙ୍ଗେ ଇଞ୍ଜେ ବନ୍ଦି ଆତ୍‍ତାନ୍ । 10 ✝୧:୧୦ କଲସୀୟ ୪:୯.ନାନ୍ କେତୁତାନ୍, ଇଗେ ବନ୍ଦି ମାନ୍ଦାନ୍ ୱେଲେ ନାନ୍ ବେନଙ୍କ୍ କ୍ରିଷ୍ଟଟନ୍ ସେଙ୍ଗେ ନିଜେତ୍ ମାର୍‍ ଇନା ପାଏମ୍ ଆତ୍‍ତାନ୍, ନୁ ନାନ୍ ଅନ୍‌ ଆତ୍ମାତେ ବାବାଲ୍ ଲେକାମ୍ ଆତ୍‍ତାନ୍, ଆଦ୍ ଅନିସିମସ୍ ମାୟ୍‍ଦିଙ୍କ୍ ନାନ୍ ଇଦ୍ ଅନୁରଦ୍‌ ମାଡ଼ୁତାନ୍ । 11 ଅନ୍‌‍ଦିନେ ଅନିସିମସ୍ ନିକିଂଙ୍କ୍ ଦର୍‍କାର୍ ଇଲ୍‍ୱେ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଇଞ୍ଜେ ଅଣ୍ଡ୍‌ ନିକିଂଙ୍କ୍ ନୁ ନାକିଂଙ୍କ୍ ଗାଟି ଦର୍‍କାର୍ ଆଦ୍‍ତନ୍ । 12 ଅଣ୍ଡ୍‌ ନା ଜିୱୁଣ୍ଡ୍ ଲେକାମ୍ ନାନ୍ ଅଂକିଙ୍କ୍‌ ମିଇ ବକେତ୍ ନୁ ମାଲ୍‍ପି ରଅତୁତାନ୍ । 13 ସୁସମାଚାର୍ ସେଙ୍ଗେ ବନ୍ଦି ଇସାବ୍‍ତେ ଅଂକିଙ୍କ୍‌ ନା ସେବା ମାଡ଼ାନଙ୍କ୍ ଗାର୍ରେ ନେଃଏତାନଙ୍କ୍ ମାନ୍‍ ଆସ୍‍ସ ମାତ୍‍ତେ । 14 ଇଦ୍ ଲେକେତ୍‍ ବିଷୟ୍‍ତିଙ୍କ୍ ରାଜି ମାଡ଼ାନ୍ ସେଙ୍ଗେ ନାନ୍ ନିକିଂଙ୍କ୍ କେଲନ୍ ଯଦି ନିୟାଦ୍ ମାନ୍‍ ମିନ୍ଦେ ଆଲେକେ ନିମ୍‍ ରାଜି ଆୟ୍‍ମା । ଆଦ୍ ବାତ୍‍ଆଇ ନି ଗଟ୍ ୱିଡ଼୍‍ସି ନାନ୍ ବାତ୍ ମାଡ଼ନ୍ ।

15 ସାରେ ଦିନା ନିୟାଗ୍ ମାନ୍‍ତଣ୍ଡ୍ ଇଞ୍ଜ, ଅନିସିମସ୍ ବେସ୍‌କ୍ ଦିନାତ୍ ମାୟ୍‍ଦିଙ୍କ୍ ନିକିଂଙ୍କ୍ ୱିଡ଼୍‍ସି ଆଞ୍ଜ୍ ମାତ୍‍ତଣ୍ଡ୍ । 16 ଏର୍କା ମାଡ଼େ, ଅଣ୍ଡ୍‌ ଇଞ୍ଜେ କ୍ରିତଦାସ୍ ଆୟ୍‍ୟଣ୍ଡ୍ । କ୍ରିଷ୍ଟଟନ୍ ବିଶ୍ୱାସି ଲେକାମ୍ ଅଣ୍ଡ୍‌ ଇଞ୍ଜେ ମାନ୍‍ ପ୍ରିୟ ତାମୁଣ୍ଡ୍ । ନା କଣ୍ଡେତାଗ୍ ଅଣ୍ଡ୍‌ ବେସର୍ ଉପ୍‍କାର୍ ! ନିକିଂଙ୍କ୍ ଅର୍‍ତୁଣ୍ଡ୍ ଦାସ ନୁ କ୍ରିଷ୍ଟ ବିଶ୍ୱାସି ତାମୁଣ୍ଡ୍ ଇନା ଅଣ୍ଡ୍‌ ନି ସେଙ୍ଗେ ମେଣ୍ଡେ ବେସର୍ ଉପ୍‍କାର୍ ଆୟ୍‍ୟଣ୍ଡ୍ ! 17 ଯଦି ନିମ୍‍ ନାକିଂଙ୍କ୍ ନି ତଡ଼୍ ମାନ୍ଦାନଣ୍ଡ୍ ଇଞ୍ଜ ଆଲ୍‍ସୁତିନ୍, ନାକିଂଙ୍କ୍ ବେଲା ସ୍ୱାଗତ୍ ମାଡ଼େନି, ଅଂକିଙ୍କ୍‌ ଆଦେ ପୁଟୁଙ୍କ୍ ମାଡ଼େ । 18 ଅଣ୍ଡ୍‌ ଯଦି ନିକିଂଙ୍କ୍ ବାତ୍ କ୍ଷତି ମାଡ଼ିମାନ୍‍ତଣ୍ଡ୍ କି ନିକିଂଙ୍କ୍ ଅଣ୍ଡ୍‌ ବାତ୍ ଇଦାନ୍ ମାନ୍‍ତେ, ଆଲେକେ ଆଦ୍ ନା ଇସାବ୍‍ତାଗ୍ ଲେକିଇମ୍ । 19 ଇଦ୍ ଉଡ଼େ, ନାନ୍ ନିଜେତ୍ କାୟ୍‍ଦେ ଲେକୁତାନ୍; ନାନ୍, ପାଉଲ୍, ନିଜାମ୍ ଆଦ୍ କାର୍ରେ ଦେଃତିତାନ୍ । ଆଲେକ୍‍ବା ନିକିଂଙ୍କ୍ ନାନ୍ ଏର୍କା ମାଡ଼ାନାଦ୍ ଇଲ୍‍ୱେମାତ୍‍ତେ, ନିୟାଦ୍ ଲୋପେତ୍‍ ଆତ୍ମା ସେଙ୍ଗେ ମିକା ନିମ୍‍ ନାୟାଗ୍ ଋଣ୍‍ । 20 ଆଦିଙ୍କ୍ ତାମୁ ! ନା ଲେକେ ୱେରଣ୍ଡ୍ କ୍ରିଷ୍ଟ ବିଶ୍ୱାସି ତାମୁଙ୍କ୍ ପ୍ରବୁନ୍ ସେଙ୍ଗେ ଅନୁଗ୍ରହ ମାଡ଼େ, ଇଲା ମାଡ଼୍‍କେ ନାନ୍ ଗାଟି ୱେଡ଼୍‍କିତାନ୍ । 21 ନିମ୍‍ ନାୟାଦ୍ ଅନୁରଦ୍‌ ନେଃତିତି ଇଞ୍ଜ ପୁଞ୍ଜ୍, ନାନ୍ ଇଦ୍ ଚିଟି ଲେକୁତାନ୍ । ନାନ୍ ପୁତ୍‍ତାନ୍, ନିୟାଗାଙ୍କ୍ ନାନ୍ ବେସର୍ ଆଶେ ମାଡ଼ୁତାନ୍, ନିମ୍‍ ନାୟାଗାଙ୍କ୍ ମେଣ୍ଡେ ଅଦିକ୍‌ ଆଶେ ମାଡ଼ିତିନ୍ । 22 ଇଦିନ୍ ତଡ଼୍ ନାୟାଦ୍ ମେଣ୍ଡେ ଅଣ୍ଡୟ୍‌ ଅନୁରଦ୍‌, ଆଗେ ନା ମାୟ୍‍ଦିଙ୍କ୍ ଅଣ୍ଡୟ୍‌ ବାକ୍‍ଡ଼େ ତିଆର୍ ମାଡ଼ି ନେଃମ୍ । ନାୟାଦ୍ ଆଶେ ମିନ୍ଦେ, ମିଡ଼୍ ପ୍ରାର୍ତନା ମାଡ଼୍‍କେ ନାନ୍ ମିଇ ବକେତ୍ ମାଲ୍‍ସ୍ ୱାଦ୍‍ତାନ୍ ।

23 ✝ ୧:୨3 କଲସୀୟ ୧:୭; ୪:୧୨. କ୍ରିଷ୍ଟଟନ୍ ସେଙ୍ଗେ ନା ତଡ଼୍ କାୟ୍‍ଦି ମାନ୍ଦାନଣ୍ଡ୍ ଏପାପ୍ରା ମିକିଂଙ୍କ୍ ନମସ୍କାର୍ ମାଡ଼ୁତଣ୍ଡ୍ । 24 ✝୧:୨୪ ପ୍ରେରିତ ୧୨:୧୨,୨୫; ୧3:୧3; ୧୫:3୭-3୯; କଲସୀୟ ୪:୧୦; ପ୍ରେରିତ ୧୯:୨୯; ୨୭:୨; କଲସୀୟ ୪:୧୦; କଲସୀୟ ୪:୧୪; ୨ ତୀମତି ୪:୧୦; କଲସୀୟ ୪:୧୪; ୨ ତୀମତି ୪:୧୧.ମେଣ୍ଡେ ନା ତଡ଼୍ ପାଡ଼୍‍ୟି ମାଡ଼ାନଡ଼ି ମାର୍କ, ଆରିସ୍ତାର୍କ, ଦୀମା ନୁ ଲୁକ ମିକା ମିକିଂଙ୍କ୍ ନସ୍କାର୍ ମାଡ଼ୁତଡ଼୍ । 25 ପ୍ରବୁ ଜିସୁ କ୍ରିଷ୍ଟଟନ୍ ଅନୁଗ୍ରହ ମିଇ ସାରେତଡ଼୍ ତଡ଼୍ ମାନି । ଆମେନ୍‌ ।