1 କ୍ରିଷ୍ଟବିଶ୍ୱାସି ଦାଦାଲଡ଼୍‍ ନୁ ଏଲାସ୍କିନଡ଼୍‍ ନିଜେ ନିଜର୍‍ ଲୋପେ ପ୍ରେମ ମାଡ଼ମାନୁଟ୍ । 2 ୱାସମାନ୍ଦାନ୍ ନାରୁଡ଼୍‍କିଙ୍କ୍ ମୀଇ ଲୋତ୍‍ତାଗେ ସେବା ମାଡ଼ାଟ୍ । ଆଦ୍‍ ମାଡ଼ାନ୍‍ୱେଲେ ବେନ ଦୂତକିଙ୍କ୍ ସେବା ମାଡ଼୍‍ତଡ଼୍ । 3 କାରାଗାର୍‍ତାଗେ ମାନ୍ଦାନ୍ ନାରୁଡ଼୍‍ ତଡ଼୍ ମିଡ଼୍ ନିଜେ କାରାଗାରତାଗ୍‍ କଷ୍ଟ ମାଡ଼ମାନ୍ଦାନ୍ ଲେକାମ୍ ଆଲ୍‍ସି ଅଡ଼୍‌‍କିଂଙ୍କ୍ ଏର୍କା ମାଡ଼ାଟ୍ । ଦୁଃକାମ୍ କଷ୍ଟ ଆସମାନ୍ଦାନ୍ ନାରୁଡ଼୍‍ତଡ଼୍ ସାରେଦୁଃକାମ୍ ଆଲ୍‍ସି ଅଡ଼୍‌‍କିଂଙ୍କ୍ ଏର୍କା ମାଡ଼ାଟ୍ ।

4 ପେଣ୍ଡୁଲ୍‍ ସାରେତଡ଼୍ କଣ୍ଡେତେ ସାରେ ପୁରା ଆୟି, ମୁଦ୍‍ପାନଡ଼୍ ନୁ ମୁତେ ନିଜେ ନିଜେଲୋପେ ପାପ୍‍ ମାଡ଼୍‍ୱେ ମାନୁଟ୍ । ଇଶ୍ୱର୍‍ ଲାଲସା ନୁ ବେବିଚାର୍‍ଡ଼୍‍ ବିଚାର୍ ମାଡ଼ିତଣ୍ଡ୍ । 5 ଦନ୍ ଆସେତାଗାଙ୍କ୍‍ ପେୟ୍‍ସ୍‍ ୱାଡ଼ାଟ୍ ନୁ ମିୟାଦ୍ ବାତେ ମିନ୍ଦେ, ଆଗେ ସନ୍ତୁଷ୍ଟ ମାନୁଟ୍ । ବାତେଙ୍କ୍‍ଇତ୍କେ ଇଶ୍ୱର୍‍ କେତ୍‍ତନ୍, "ନାନ୍‍ ମିକିଙ୍କ୍ ୱିଡ଼୍‍ସିୱନ୍, ନାନ୍‍ ମିକିଙ୍କ୍ ବେସୁଙ୍କ୍‍ ବର୍ଜନ୍ ମାଡ଼ନ୍ ।" 6 ଆଦିଙ୍କ୍ ମାମେ ସାହାସ୍‍ତେ କେତେ ପାର୍‍ତାଡ଼୍, "ପ୍ରବୁ ନାୟାଦ୍ ସାହାସ୍‍ତେ । ନାନ୍‍ ୱେର୍‍ୟନ୍, ବେନ ନା ଅନିଷ୍ଟ ମାଡ଼େପାର୍‍ୱଡ଼୍ ?"

7 ବେନ୍ ନେତାଲଡ଼୍ ମୁନେଙ୍କ୍ ମିକିଙ୍କ୍ ଇଶ୍ୱର୍‌ତେ ଗଟି କେଞ୍ଜ୍‍ପି ମାତ୍‍ତଡ଼୍, ଅଡ଼୍‌‍କିଂଙ୍କ୍ ଏର୍କାମାଡ଼ାଟ୍ । ଅଡ଼ାଦ୍ ଜିୱେ ବା ଡଲ୍‍ତାଦ୍ ବେଦ୍ ଲେକାମ୍ ମାତ୍‍ତେ, ଆଦ୍ ଏର୍କା ମାଡ଼ି ଅଡ଼ାଦ୍‌ ବିଶ୍ୱାସ୍‍ତିଙ୍କ୍ ନିଜେତ୍ ଜିୱେତେ କାମ୍‌ ମାଡ଼ାଟ୍ । 8 ଜିସୁ କ୍ରିଷ୍ଟ ନିନେ, ନେଣ୍ଡ୍ ନୁ ସାରେଦିନାମ୍ ସାମାନ୍‍ ମାନ୍‍ତଣ୍ଡ୍ । 9 ବେସ୍‍ବେସତାୱୁ ବୁସାତାୱୁ ଦର୍ମଶିକ୍ଷା ମିକିଙ୍କ୍ ସତ୍‍ ଆର୍ଦାଗାଙ୍କ୍ ୱେରେ ମାଡ଼୍‍ମାକି । ଇଶ୍ୱର୍‌ତେ ଅନୁଗ୍ରମାମେ ଅନ୍‌ୟାୟ୍‌ତେ ଲୋପେତ୍‍ଆତ୍ମା ସେଙ୍ଗେ ଶକ୍ତି ତାତାନାଦ୍‍ ସାୟେ, ତିନ୍ଦାନ୍‍ କାଦି ନିୟମ୍ ପାଲନ୍ ମାଡ଼ମାନ୍ଦାନ୍ ତଡ଼୍‍ ଇଦ୍‍ ଆଦାନଙ୍କ୍‍ ପାର୍‍ୱ । ଆୱୁ ବାୟ୍‍ଦେତ୍‍ ନୀତିନିୟମ୍‍ ପାଲନ୍‍ ମାଡ଼ମାନ୍ଦାନ୍‍ ନାରୁଡ଼୍ ଆଗେ ବାତ୍‍ ଉପକାର୍‍ ପାଏମ୍‍ ଆୟଡ଼୍‍ ।

10 ମାନାୱୁ ବେନ୍ ଦିବ୍ୟ ବେଦୀ ମିନ୍ଦେ, ଆଗେ ମାନ୍ଦାନ୍ ନୈବେଦ୍ୟ ତିଞ୍ଜମାନ୍ଦାନ୍ ଇହୁଦୀ ଯାଜକିଡ଼ାୱୁ ଅଦିକାର୍‌ ଇଲେ । 11 ଇହୁଦୀ ବେଡ଼୍‍ୟ୍ ଯାଜକ୍‍ ଲେକାମ୍ ଇସ୍‍ମାନ୍ଦାନ୍ ପଶୁତେ ନେତୁର୍ ପାପତେ ପ୍ରାୟଶ୍ଚିତ୍ ଲେକାମ୍ ଉତ୍ସର୍ଗ ମାଡ଼ାନଙ୍କ୍ ମହାପବିତ୍ର ପଡ଼ିୟେତାଗ୍ ଆଦ୍‍ତଡ଼୍; କିନ୍ତୁ ବେଡ଼୍‍ୟି ପଶୁତେ ମେନ୍ଦୁଲ୍ ମାନ୍ଦାନ୍‍ ପଡ଼୍‍ୟେତାଗାଙ୍କ୍‍ ବାଇଦେ ଆସ୍‍ ପଡ଼୍‍ସ୍‍ନୁଡ଼୍‍ । 12 ଆଦେଲେକାମ୍ ଜିସୁ ମିକା ନିଜେତ୍ ନେତୁର୍‍ତେ ନାରୁଡ଼୍‍କିଙ୍କ୍ ପାପତାଗାଙ୍କ୍ ପରିଷ୍କାର୍‍ ମାଡ଼ାନ୍ ସେଙ୍ଗେ ନାର୍‍ଦେ ବାଇଦେ ଡଲ୍‍ତନ୍ । 13 ଆଦିଙ୍କ୍ ଦାଟିଟ୍, ମାନାଡ଼୍ ମିକା ନାର୍ଦେ ବାଇଦେ ଅନ୍‌ ପାକେ ଆଦିକାଡ଼୍‍ ନୁ ଅନ୍‌‍ତଡ଼୍ ନିନ୍ଦା, ଅପମାନ୍ ସହ୍ୟ ମାଡ଼ିକାଡ଼୍ । 14 ବାତେଇତ୍କେ ମାନ୍‍ସେଙ୍ଗେ ଇଦ୍ ଜଗତ୍‍ତାଗେ ବାତେମିକା ଲେକେତ୍ ନଗର୍ ଇଲେ; ବେନ୍ ନଗର୍ ବବିଷ୍ୟତ୍‍ତେ ତିଆର୍ ଆଦ୍‍ତେ, ମାନାଡ଼୍ ଆଦ୍ ନଗର୍‍ତିଙ୍କ୍ କେପିମାନ୍ଦିକାଡ଼୍ । 15 ଇତ୍‍କେ ୱାରାଟ୍‌, ମାନାଡ଼୍ ଜିସୁଙ୍କ୍ ପୟ୍‍ସ୍ ଇଶ୍ୱର୍‌ତିଙ୍କ୍ ମାନ୍‍ୱାଦ୍ ପ୍ରଶଂସା ଲେକେମ୍‍ ପୁଜ୍ ଇଦ୍‍ତାଡ଼୍ । ଇଦ୍ ପୁଜ୍ ଜିସୁଙ୍କ୍ "ପ୍ରବୁ," କେତାନାଦ୍ ମାନ୍‍ ପାୟୁର୍‍ତାଲା ପେୟ୍‍ତିତ୍ । 16 ଅନ୍‌ୟାଇ ନାରୁଡ଼୍‍କ୍ ଉପ୍‍କାର୍ ମାଡ଼ାନାଦ୍ ନୁ ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ାନାଦ୍ ମାର୍‍ଙ୍ଗ୍‍ମାଟ୍, ଇୱୁସାର୍ରେକେ ଇଶ୍ୱର୍‌ତେ ଲେକେତ୍ ବଲି ଲେକାମ୍‍ ।

17 ମି ନେତାଲଡ଼୍ ଗଟି ମାନେମ୍‍ ଆୟ୍‍ମୁଟ୍, ଅଡ଼୍‌ କେତାନାଦ୍ କେଞ୍ଜାଟ୍ । ଅଡ଼୍‌ କେପାନ୍ ନାରୁଡ଼୍ ଲେକାମ୍ ମି ଆତ୍ମାତିଙ୍କ୍ ସୁରକ୍ଷାମାଡ଼ି କେପିତଡ଼୍, ବାତ୍‍ଙ୍କ୍‍ଇତ୍କେ ଅଡ଼୍‌ ଇଶ୍ୱର୍‌ତେ ଗାର୍ରେ ନିଜର୍ ପାଡ଼୍‍ୟିଦେ ଇସାପ୍ ଇଦ୍‍ୱେୟ୍‍ତିତ୍ । ମିଡ଼୍ ଅଡ଼୍‌ ଗଟିଙ୍କ୍ କେଞ୍ଜାଟ୍, ଆଲେକେ ଅଡ଼୍‌ ସାର୍‍ଦେ ମାନ୍‍ଦେ ନିଜର୍ ପାଡ଼୍‍ୟି ୱିଡ଼୍‍ସିତଡ଼୍, ଇତ୍‍କେ ଯଦି ଆଲା ମାଡ଼୍‍ୱିଡ଼୍, ଆଲେକେ ଅଡ଼୍‌ କପାମ୍‍ ଆସ୍ ମାଡ଼ିତଡ଼୍ ନୁ ଆଦ୍ ମିକିଙ୍କ୍ ସାୟେ ଆୟ ।

18 ମାନ୍‍ ମାୟ୍‍ଦିଙ୍କ୍ ପ୍ରାର୍ତନା ମାଡ଼ମାନୁଟ୍ । ମା ମନ୍ ବେଲା ସାୟେ, ଇଗେ ବାତ୍ କେତାନାଦ୍ ଇଲ୍‍ଲେ, ବାତେଙ୍କ୍‍ଇତ୍‍କେ ସାର୍ରେୱେଲେ ନ୍ୟାୟତାଦ୍ ପାଡ଼୍‍ୟି ମାଡ଼ାନାଦ୍ ମାୟାଦ୍‌ ଇଚ୍ଛା । 19 ମେଣ୍ଡେ ଇଶ୍ୱର୍ ନାକିଙ୍କ୍ ମି ଗାର୍ରେ ଯାପେ ରହସିଦ୍‍ତଣ୍ଡ୍, ମିଡ଼୍ ନା ମାୟ୍‍ଦିଙ୍କ୍ ଇଦ୍ ପ୍ରାର୍ତନା ମାଡ଼ମାନୁଟ୍ । ଇଦ୍ ମି ଗାର୍ରେ ନାୟାଦ୍ ଲୋପେକସ୍ ନିବେଦନ୍ ମାଡ଼ୁତାନ୍‍ ।

20 ବେନ ନିଜର୍ ଜିୱୁଣ୍ଡ୍ ଇସ୍ ମେଣ୍ଢାକିନ୍ ବାଡ଼୍‍ୟଣ୍ଡ୍ ପଡ଼୍‍ପାନଣ୍ଡ୍ ଆତ୍‍ତଣ୍ଡ୍, ମାନ୍‍ ଅଣ୍ଡ୍‌ ପ୍ରବୁ ଜିସୁଙ୍କ୍ ଇଶ୍ୱର୍ ଡଲ୍‍ତାଗାଙ୍କ୍ ତେଏତଣ୍ଡ୍ । ଆ ଜିସୁନ୍ ଜିୱୁଣ୍ଡ୍ ଇତ୍‍ତେ ନେତୁର୍‍କନ୍ସ୍ ଅଣ୍ଡୟ୍‌ ସାର୍ରେଦିନାତାଦ୍ ଚିଃନେ ଆତ୍‍ତେ । 21 ଶାନ୍ତିଦାତାଲ୍ ଇଶ୍ୱର୍ ତାନ୍ ଇଚ୍ଛା ପାଲନ୍ ମାଡ଼ାନ୍ ସେଙ୍ଗେ ମିୟାଦ୍ ଦର୍‍କାର୍‍ ଇସାବ୍‍ ସାର୍ରେ ଲେକେତ୍ ବିଷୟ ଇୱିଣ୍ଡ୍ ନୁ ଜିସୁ କ୍ରିଷ୍ଟନ୍ ତଡ଼୍ ମାନ୍‍ ଜିୱୁଣ୍ଡ୍‍ତାଗ୍ ଅନାଦ୍‌ ସାୟେ ପାଡ଼୍‍ୟି ମାଡ଼ୁତଣ୍ଡ୍ । ଯୁଗ୍‍ଯୁଗ୍ କ୍ରିଷ୍ଟ ମହିମା ଆୟିଣ୍ଡ୍ । ଆମେନ୍‍ ।

22 ଆ ଦାଦାଲଡ଼ି ନୁ ଏଲାସ୍କ୍‍, ନାନ୍ ମିକିଙ୍କ୍ କେତୁତାନ୍, ନାୟାଦ୍ ଇଦ୍ ସୁଦୁର୍‍ ଲେକ୍‍ତାଦ୍‍ ଚିଟିତେ କାବୁର୍ ସେଙ୍ଗେ ଗାଡ଼୍‍ସ୍ ଆସ୍ ମାନ୍‍ ଇମୁଟ୍ । ମିକିଙ୍କ୍ ସାର୍‍ଦେ ମାଡ଼ାନ୍ ସେଙ୍ଗେ ଇଦ୍ ନାନ୍ ଲେକିମିନ୍ଦେନ୍ । 23 ମାନ୍‍ ଦାଦାଲ୍‍ ତିମତି ଜେଲ୍‍ତାଗାଙ୍କ୍ ମୁକ୍ତି ପାଏମ୍‍ ଆତ୍‍ତଣ୍ଡ୍ ପୁନ୍ଦିତାଡ଼୍ । ଅଣ୍ଡ୍‌ ଯଦି ସିଟ୍‍ପାଟ୍ ୱାଦୁତଣ୍ଡ୍, ଆଲେକେ ନାନ୍ ଅଂକିଙ୍କ୍‌ ନା ତଡ଼୍ ମି ଗାର୍ରେ ତାତିତାନ୍ ।

24 ମିୱଡ଼୍ କ୍ରିଷ୍ଟ ବିଶ୍ୱାସୀଡ଼୍‍କ୍ ମାୟାଦ୍‌ ନମସ୍କାର୍ କେତିତିଡ଼୍ । ଇଟାଲି ଦେଶ୍‍ତାଗାଙ୍କ୍‍ ୱାଦାନ୍ ଦାଦାଲଡ଼୍ ମିକିଙ୍କ୍ ନମସ୍କାର୍ ମାଡ଼ୁତଡ଼୍ ।

25 ମି ସାର୍ରେତଡ଼୍ ଗାର୍ରେ ଇଶ୍ୱର୍‌ତେ ଅନୁଗ୍ରହ୍ ସାରେଦାମ୍‍ ମାନି ।