1 ଜିସୁ ନିସ୍ତାର୍ ପାଣ୍ଡୁମ୍‍ତ ଆରୁଦିନା ମୁନେଙ୍କ୍ ବେତନିୟାତାଗ୍ ୱାତ୍‍ତନ୍; ବେନ୍ ଲାଜାର୍‍ତିଙ୍କ୍ ଅଣ୍ଡ୍‌ ଡଲ୍‍ତେ ଆଗାଙ୍କ୍ ତେସ୍ ମାତ୍‍ତନ୍, ଅଣ୍ଡ୍‌ ଆଦ୍ ପଡ଼ିୟେ ତାଗ୍ ମାତ୍‍ତଣ୍ଡ୍ । 2 ଆଦିଙ୍କ୍ ଅଡ଼୍‌ ଜିସୁନ୍ ମାଇଦିଙ୍କ୍ ଆଦ୍ ପଡ଼ିୟେତାଗ୍ ଅଣ୍ଡୟ୍‌ ନାର୍କା ବଜି ମାଡ଼୍‍ତଡ଼୍; ମାର୍ତାଲ୍ ସେବା ମାଡ଼ମାତ୍‍ତେ, ମେଣ୍ଡେ ବେନଡ଼୍ ଅନ୍‌ ତଡ଼୍ ତିନ୍ଦାଙ୍କ୍ କୁଦ୍‍ତଡ଼୍, ଲାଜାର୍ ଅଡ଼୍‌ ଆଗାଙ୍କ୍ ୱେରଣ୍ଡ୍ ମାତ୍‍ତନ୍ । 3 ✝୧୨:3 ଲୁକ ୭:3୭,3୮.ଆସୁଙ୍କ୍ ମରୀୟମ୍ ଅଦ୍‍ଦା ଲିଟର୍ ଗାଟି ଦାମ୍ ତେ ନିୟ୍‍ ଲେକେତ୍‍ ଗାବ୍‍ତାଦା ନିୟ୍ ଅସ୍ ଜିସୁନ୍ ଡ଼େକାନାଗ୍ ଆଦ୍ ତୋମି ତାନ୍ କେଲ୍‍କିନେ ଅନ୍‌ ଡେକାଙ୍କ୍ ଉଞ୍ଜ୍‍ପିତେ, ମେଣ୍ଡେ ନିୟ୍‍ଦେ ଗାବ୍ ଦେ ଲୋନ୍‌ ଆନ୍‌‍ତେ ମହକେମ୍ ଆତ୍‍ତେ 4 ବାତେଙ୍କ୍ ଇତ୍କେ ଜିସୁନ୍ ଶିଷ୍ୟନଡ଼୍ ଆଗାଙ୍କ୍ ଇଷ୍କାରୀୟତିୟ ଯିହୁଦା ପେଦେର୍ ତନ୍ ବେନ୍ ଶିଷ୍ୟ ଅଂକିଙ୍କ୍‌ ଶତ୍ରୁଡ଼୍ କାଇଦେ ପସ୍‍ପିଦାଙ୍କ୍ ଆଞ୍ଜମାତ୍‍ତଣ୍ଡ୍, ଅଣ୍ଡ୍‌ କେତ୍‍ତଣ୍ଡ୍‌, 5 "ଆଦ୍ ନିୟ୍ ମୁଣ୍ଡ୍‍ୱାନ୍ଦା ରୁପାଡାବ୍‍କିନ୍ ବାତେଙ୍କ୍ ୱାମ୍‍ତା ? ବାତ୍‍ତିଙ୍କ୍ ଦରିଦ୍ର ନାରୁଡ଼୍‍କ୍ ଇୱ ଆତ୍‍ତେ ?" 6 ଅଣ୍ଡ୍‌ ଯେ ଦରିଦ୍ର ନାରୁଡ଼୍ ସେଙ୍ଗେ ଚିନ୍ତେ ମାଡ଼ମାତ୍‍ତନ୍ ଇଞ୍ଜ ଇଦ୍ କେତ୍‍ତେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଅଣ୍ଡ୍‌ ୱେରଣ୍ଡ୍ ଡଙ୍ଗାଲ୍, ମେଣ୍ଡେ ଅନାଗାଙ୍କ୍ ଡାବ୍‍ ମୁନେ ମାନ୍‍ନାଙ୍କ୍, ଆଗେ ବାତା ୱାଟି ମାତ୍‍ତଡ଼୍, ହାଉସାରେ ଡଙ୍ଗି ମିକା ଆସମାତ୍‍ତନ୍ ।

7 ବାତେଙ୍କ୍ ଇତ୍କେ ଜିସୁ କେତ୍‍ତଣ୍ଡ୍‌, "ଇଦିଙ୍କ୍ ୱିଡ଼୍‍ସିମୁଟ୍, ବେଲା ନା ସମାଦି ଦିନାତ୍ ୱେଲେ ଅଣ୍ଡ୍‌ ଇଦ୍ ନେହେତେ ପାର୍‍ତଣ୍ଡ୍ । 8 ଦରିଦ୍ର ନାରୁଡ଼୍ ତ ସାରେଦିନା ମିଇ ପାକେ ମିନ୍ଦେଡ଼୍‍, ମାତର୍ ନାନ୍ ସାରେଦାମ୍ ମିଇ ପାକେ ମାନନ୍ ।"

9 ଆଗାଙ୍କ୍ ଗାଟି ଯିହୁଦି ନାରୁଡ଼୍ ଜିସୁ ବେତନିୟାତାଗ୍ ମିନ୍ଦେଣ୍ଡ୍ ଇଞ୍ଜ୍ ପୁଞ୍ଜ୍ ମିକା ମାତର୍ ଜିସୁନ୍ ମାଇଦିଙ୍କ୍ ଆୟ୍‍ୟ, ମାତର୍ ବେନ୍ ଲାଜାର୍‍ତିଙ୍କ୍ ଅଣ୍ଡ୍‌ ଡଲ୍‍ତାଗାଙ୍କ୍ ତେହେସ୍‍ମାତ୍‍ତନ୍, ଅଂକିଙ୍କ୍‌ ଉଡାଙ୍କ୍ ମାଇଦିଙ୍କ୍ ୱାତ୍‍ତଡ଼୍ । 10 ଆଗେ ଲାଜାର୍ ତିଙ୍କ୍ ମିକା ହାଉକାଙ୍କ୍ ସେଙ୍ଗେ ବେଡ଼ିଇ ଯାଜକ୍‍ନଡ଼୍ ମନ୍ତ୍ରନା ମାଡ଼୍‍ତଡ଼୍, 11 ବାତେଙ୍କ୍ ଇତ୍‍କେ ଅନ୍‌ ସେଙ୍ଗେ ଯିହୁଦିନଡ଼୍ ଆଗାଙ୍କ୍ ନାର୍‍ଗେ ନାରୁଡ଼୍ ଆଞ୍ଜ୍ ଅଡ଼୍‌‍କ୍ ଅବିଶ୍ୱାସ୍ ମାଡ଼ମାତ୍‍ତଡ଼୍ ନୁ ଜିସୁ ନାଗେ ବିଶ୍ୱାସ୍ ମାଡ଼ମାତ୍‍ତଡ଼୍ ।

12 ମେଣ୍ଡେଅନ୍‌ ଦିନ୍ ନିସ୍ତାର୍ ପାଣ୍ଡୁମ୍‍ତାଗ୍ ୱାସ୍ ମାନ୍ଦାନ୍ ନାର୍‍ଗେ ନାରୁଡ଼୍ ଜିସୁ ଜିରୂଶାଲମ୍ ତା ୱାଦୁତନ୍ ଇଞ୍ଜ କେଞ୍ଜ୍‍ତଡ଼୍, 13 ଆଦିଙ୍କ୍ ହେତେଲ୍ ମାଟା ଆସ୍ ଅଂକିଙ୍କ୍‌ କାଇଲାନ୍ ସେଙ୍ଗେ ପେଇସ୍ ଆଦ୍‍ତଡ଼୍ ନୁ ଗାଟି ଲେଙ୍ଗ୍‍ଦେ କେତାଙ୍କ୍ ପସ୍‍ପ୍‍ତ୍‍ତଡ଼୍, "ପ୍ରସଂଶା । ପ୍ରବୁନ୍ ପେଦେର୍‍ତେ ବେନ ୱାଦୁତନ୍, ଅଣ୍ଡ୍‌ ଦନ୍ୟ; ଦନ୍ୟ ଇସ୍ରାଏଲ୍‍ତେ ରାଜା ।"

14 ଜିସୁ ୱେରଡ଼୍ ଗଦ ପର୍‍ର କୁଦି ୱାସମାତ୍‍ତନ୍ । ହିଦିନ୍ ତଡ଼୍ ଶାସ୍ତ୍ରତାଗ୍ ୱେର୍‍ଡ଼୍ ବାବବାନି ସାରେ ଆତ୍‍ତେ;

15 "ହୋ ସିୟନ୍‍ତେ ପିକିଡ଼୍, ୱେର୍‍ମା;

ଉଡ଼େ ମିୱନ୍‌ ରାଜାଲ୍ ୱାଦୁତନ୍,

ଅଣ୍ଡ୍‌ ଗଦତ୍ ପର୍‍ର କୁଦି ୱାଦୁତନ୍ ।"

16 ଅନ୍‌ ଶିଷ୍ୟନଡ଼୍ ମୁନେଙ୍କ୍ ଇଦ୍ ସାରେ ବିଷୟ ବୁଜେମ୍ ଆୟ୍‍ୟଡ଼୍, ବାତେଙ୍କ୍ ଇତ୍‍କେ ଜିସୁ ମହିମାନିତ ଆତ୍‍ତେ ୱେଲେ ଇଦ୍ ସାରେ ବିଷୟ ଯେ ଅନ୍‌ ମୁନେ ଲେକାମାତ୍‍ତେ, ମେଣ୍ଡେ ଅନ୍‌ ସେଙ୍ଗେ ଅଡ଼୍‌ ଯେ ଇଦ୍‍ସାରେ ମାଡ଼ିମାତ୍‍ତଡ଼୍, ଆଦ୍ ଅଡ଼୍‌ ମାନ୍‍ ଦାଗ୍ ୱାତ୍‍ତେ ।

17 ମେଣ୍ଡେ, ଜିସୁ ଲାଜାର୍ ତିଙ୍କ୍ ସମାଦି ତାଗାଙ୍କ୍ ଡଲ୍‍ତେ ଆଗାଙ୍କ୍ ତେତାନ୍ ୱେଲେ ବେନ୍ ନାରୁଡ଼୍ ମୁନେ ଅନ୍‌ ତଡ଼୍ ମାତ୍‍ତଡ଼୍, ଅଡ଼୍‌ ଆଦ୍ ଗଟ୍‍ନା ବିଷୟ୍‍ତେ ସାକ୍ଷ୍ୟ ହିଦାଙ୍କ୍ ପସ୍‍ପ୍‍ତ୍‍ତଡ଼୍ । 18 ହିଦିନ୍ ସେଙ୍ଗେ ନାରୁଡ଼୍ ଅଂକିଙ୍କ୍‌ କାହିଲାନଙ୍କ୍‌ ଆଞ୍ଜ୍ ମାତ୍‍ତଡ଼୍, ବାତେଙ୍କ୍ ଇତ୍‍କେ ଆଦିଙ୍କ୍ ଅଣ୍ଡ୍‌ ଇଦ୍ ବାକ୍‌ୱାକାମ୍ ମାଡ଼୍‍ତଣ୍ଡ୍ ଇଞ୍ଜ ଅଡ଼୍‌ କେଞ୍ଜିମାତ୍‍ତଡ଼୍ । 19 ଆଗାଙ୍କ୍ ପାରୂଶୀଡ଼୍ ତାମ୍‍ତାମ୍ କେତା କେତି ଆଦ୍‍ତଡ଼୍, "ଉଡ଼ୁତିଡ଼୍ ତ, ମାୱାଦ୍ ସାରେତଡ଼ାଦ୍ ଆଲ୍‍ସି ଲେକେତ୍ ଆଦୁତେ; ଉଡ଼ାଟ୍, ଜଗତ୍‍ଯାକ ସାରେତଡ଼୍ ଅନ୍‌ ପେର୍‍କେ ଅଦୁତ୍‍ତଡ଼୍ ।"

20 ପାଣ୍ଡୁମ୍ ସମୟ୍‍ତେ ଉପବାସ୍ ମାଡ଼ାନ୍ ସେଙ୍ଗେ ୱାସ୍‍ମାନ୍ଦାନ୍ ନାରୁଡ଼ାଗାଙ୍କ୍ ବେସ୍‌କ୍ ତୁଡ଼୍ ଗ୍ରୀକ୍‍ ନାରୁଡ଼୍ ମାତ୍‍ତଡ଼୍ । 21 ଅଡ଼୍‌ ଗାଲିଲୀତେ ବେତ୍‍ସାଇଦା ନାରୁଡ଼୍ । ଅଡ଼୍‌ ପିଲିପ୍‍ତେ ଗାର୍‍ରେ ଆଞ୍ଜ୍ କେତ୍‍ତଡ଼୍, "ପାୟ୍‍କା ମାମ୍‍ମେ ଜିସୁଙ୍କ୍ କାଇଲାନ୍‌ ସେଙ୍ଗେ ମାୟାଦ୍‌ ଇଚ୍ଛା ।"

22 ପିଲିପ୍ ଆଞ୍ଜ୍ ଆନ୍‌ଦ୍ରିୟଙ୍କ୍ କେତ୍‍ତଣ୍ଡ୍‍, ମେଣ୍ଡେ ଆନ୍ଦ୍ରିୟ ନୁ ପିଲିପ୍ ଆଞ୍ଜ୍ ଜିସୁଙ୍କ୍ କେତ୍‍ତଡ଼୍ । 23 ଜିସୁ ଅଡ଼୍‌‍କ୍ ଉତ୍ତର୍ ହିତ୍‍ତନ୍, "ନାରୁନ୍ ପିଲେ ମହିମାନିତ ଆଦାନ୍ ସେଙ୍ଗେ ଦିନାମ୍ ହେୱୁତେ ।" 24 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ଗଅମ୍ ପେଡ଼େମ୍ ଯଦି ବୂମ୍‌ଦାଗେ ରାଲୀ ଡ଼ଲ୍‍ୱେ ମାନ୍‍ତେ, ଆଲେକେ ଆଦ୍ ଅଣ୍ଡୟ୍‌ ମାନ୍‍ତେ, ବାତେଙ୍କ୍ ଇତ୍‍କେ ଡଲିତ୍, ଆଲେକେ ନାର୍‍ଗେ କାୟା ଆଦିତେ । 25 ✝୧୨:୨୫ ମାତିଉ ୧୦:3୯; ୧୬:୨୫; ମାର୍କ ୮:3୫; ଲୁକ ୯:୨୪; ୧୭:33.ବେନ ନିଜେତ୍ ଜିୱୁଣ୍ଡ୍‍ତିଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍‌ ଆଦ୍ ଆରା ମାଡ଼ିତନ୍; ମେଣ୍ଡେ ବେନ ନିଜେତ୍ ଜିୱେତିଙ୍କ୍ ପ୍ରେମ ମାଡ଼ଣ୍ଡ୍ ନୁ ଜଗତ୍ ଅଙ୍କ୍‌ ପାସ୍‍କିତ୍, ଅଣ୍ଡ୍‌ ଆଦ୍ ସାରେଦିନାତ୍ ଜିୱୁନ୍ ସେଙ୍ଗେ ରକ୍ଷା ମାଡ଼ିତନ୍ । 26 ବେନ ନା ଦାସ ଆତ୍‍ଦାଙ୍କ୍ ଇଚ୍ଛା ମାଡ଼ିତନ୍, ଆଲେକେ ଅଣ୍ଡ୍‌ ନା ପେର୍‍କେ ୱାଡ଼ିଣ୍ଡ୍; ମେଣ୍ଡେ, ନାନ୍ ବେଗା ମାନ୍‍ତାନ୍, ଆଗେ ଅଣ୍ଡ୍‌ ଆନ୍‌‍ତେ ମାନ୍‍ତନ୍; ବେନ ନା ସେବା ମାଡ଼ିତନ୍, ଆଲେକେ ବାବାଲ୍ ଅଂକିଙ୍କ୍‌ ସମ୍ମାନ୍ ହିଦ୍‍ତଣ୍ଡ୍ ।

27 "ଇଞ୍ଜେ ନାନ୍ ଗାଟି ଦୁଃକାମ୍, ନାନ୍ ବାତେଏ ମାଡ଼ିତାନ୍ ? ‘ବାବା, ଇଦ୍ ଦୁଃକ ସମୟ୍‍ତାଗାଙ୍କ୍ ନାକିଂଙ୍କ୍ ଉଦାର୍ ମାଡ଼େ, ଆଦିନ୍ ସେଙ୍ଗେ ତ ନାନ୍ ଇ ସମୟ୍‍ତାଗ୍ ୱାସ୍ ମିନ୍ଦେନ୍ ।’ 28 ବାବା, ନିୱାଦ୍ ପେଦେର୍ ମହିମାନିତ ମାଡ଼େ ।" ଆଗାଙ୍କ୍ ମାବ୍ ତାଗାଙ୍କ୍ ଇଦ୍ ବାଣି ଆତ୍‍ତେ, "ମାମ୍‍ମେ ଆଦ୍ ମହିମାନିତ ମାଡ଼ିମିନ୍ଦେମ୍, ମେଣ୍ଡନ୍ ଦାମ୍ ମହିମାନିତ ମାଡ଼ିତମ୍ ।"

29 ଆସୁଙ୍କ୍ ଗାର୍‍ରେ ନିସ୍ ମାନ୍ଦାନ୍ ନାରୁଡ଼୍ ଇଦ୍ କେଞ୍ଜି ମାବ୍ ନେକ୍‍ତେ ଇଞ୍ଜ୍ କେତ୍‍ତଡ଼୍; ମେଣ୍ଡେ ବାଗାତଡ଼୍ କେତ୍‍ତଡ଼୍, "ୱେରନ୍ ଦୂତ ଅଂକିଙ୍କ୍‌ ଗଟ୍ କେସ୍‍ମିନ୍ଦେ ।"

30 ଜିସୁ ଅଡ଼୍‌‍କ୍ କେତ୍‍ତଣ୍ଡ୍, "ନା ମାଇଦିଙ୍କ୍ ଇଦ୍ ବାଣି ଆୟ୍‍ୟ, ମାତର୍ ମିଇ ମାଇଦିଙ୍କ୍ ଆସ୍‍ମିନ୍ଦେ । 31 ଇଞ୍ଜେ ଇ ଜଗତ୍‍ତାଦ୍ ବିଚାର୍ ହେୱୁତେ; ଇଞ୍ଜେ ଇ ଜଗତ୍‍ତଣ୍ଡ୍ ଅଦିପତିଙ୍କ୍ ବାଇଦେ ଏସ୍ ୱେଇତିତ୍ । 32 ଯଦି ନାନ୍ ପୃତିବିତେ ପର୍‍ର ଆଦ୍‍ତନ୍, ଆଲେକେ ସାରେତଡ଼୍‌କିଂଙ୍କ୍ ନା ଗାର୍‍ରେ ଅଦ୍‍ତାନ୍ ।" 33 ଅଣ୍ଡ୍‌ ବେଦ୍‍ଲେକାମ୍ ଡଲାନଙ୍କ୍ ଆଦୁତନ୍, ଆଗେତ୍ ଗଟ୍ ଇସ୍ ଇଦ୍ କେତ୍‍ତାନ୍ ।

34 ଆଗାଙ୍କ୍ ନାରୁଡ଼୍ କେତ୍‍ତଡ଼୍, "ମସିହ ସାରେଦିନାମ୍ ମାନ୍ଦାନାଦ୍ ମାମ୍‍ମେ ବ୍ୟବସ୍ଥାତାଗ୍ ସାରେ କେଞ୍ଜିମିନ୍ଦେମ୍, ଆଲେକେ ନାରୁନ୍ ପିଲା ପର୍‍ର ଆଦ୍‍ତନ୍ ଇଞ୍ଜ୍ ନିମ୍‍ ବେଲା କେତୁତି ? ଇ ନାରୁନ୍ ପିଲା ବେନ ?"

35 ଆଗାଙ୍କ୍ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍‌, "ମେଣ୍ଡେ ସୁଦୁଟ୍ ଦିନାମ୍ ମାତର୍ ୱେସ୍ ମିୟାଗ୍ ମିନ୍ଦେ । ଇକାଡ଼୍ ବେଲା ମିକିଂଙ୍କ୍ ଆଦ୍‍ପାପ୍ ମାଡ଼, ଆଦିନ୍ ସେଙ୍ଗେ ମିଡ଼୍ ୱେସ୍ ମାନ୍‍ନା ଆଦାନଙ୍କ୍ ତିଆର୍ ଆୟ୍‍ମୁଟ୍, ବେନ ଇକାଡ଼୍‌ତାଗ୍ ତାକିତନ୍, ଅନ୍‌ ବେକେ ଆଦୁତନ୍, ଆଦ୍ ପୁନନ୍ । 36 ମିଡ଼୍ ବେଲା ୱେସ୍‍ତେ ପିଲା ଆଦ୍‍ତିଡ଼୍, ଆଦିନ୍ ସେଙ୍ଗେ ୱେସ୍ ମିୟାଗେ ମାନ୍‍ନା ୱେସ୍‍ତିଙ୍କ୍‍ ବିଶ୍ୱାସ୍ ମାଡ଼ାଟ୍ ।" ଜିସୁ ଇଦ୍‍ସାରେ ଗଟି କେସ୍ ପେଇସ୍‍ଆଞ୍ଜ୍ ଅଡ଼୍‌ଆଗାଙ୍କ୍‌ ମାୟି ଆତ୍‍ତଣ୍ଡ୍ ।

37 ଯଦି ଜିସୁ ଅଡ଼୍‌ ମୁନେ ଆସର୍ ଆଶର୍ଯ୍ୟ ପାଡ଼୍‍ୟି ମାଡ଼ିମାତନ୍, ଆଗେକ୍ ବା ଅଡ଼୍‌ ଅନାଗ୍ ବିଶ୍ୱାସ୍ ମାଡ଼୍‍ୱେ ମାତ୍‍ତଡ଼୍, 38 ବେଦ୍‍ଲେକାମ୍ ଜିଶାଇୟ ବାବବାଦିଡ଼୍ ବାକ୍ୟ ସାରେ ଆଦ୍‍ତେ,

"ହଁ ପ୍ରବୁ, ବେନ ମା ସମ୍ୱାଦ ବିଶ୍ୱାସ୍ ମାଡ଼୍‍ତଣ୍ଡ୍ ?

ମେଣ୍ଡେ ବେନ ଗାର୍‍ରେ ପ୍ରବୁ ଅନାଦ୍‌ ଶକ୍ତି ତିଆର୍ ମାଡ଼୍‍ତଣ୍ଡ୍ ?"

39 ଇଦିନ୍ ସେଙ୍ଗେ ଅଡ଼୍‌ ବିଶ୍ୱାସ୍ ମାଡ଼୍ ପାର୍‍ୱେ ମାତ୍‍ତଡ଼୍, ବାତେଙ୍କ୍ ଇତ୍‍କେ ଜିଶାଇୟ ମେଣ୍ଡନ୍‌ଦାମ୍‌ କେସ୍‍ମିନ୍ଦେନ୍,

40 "ଇଶ୍ୱର୍ ଅଡ଼ାୱୁ କଣ୍ଡାଙ୍କ୍ କାନାଲ୍‌ ମାଡ଼ିମିନ୍ଦେଣ୍ଡ୍,

ମେଣ୍ଡେ ଅଡ଼ାଦ୍‌ ଜିୱୁନ୍ ଡୁଟ୍‍ଟାଙ୍କ୍ ମାଡ଼ିମିନ୍ଦେଡ଼୍,

ବେଦ୍‍ଲେକାମ୍ ଅଡ଼୍‌ କଣ୍ଡାନେ ଉଡ଼େ ପାର୍‍ୱାଦ୍,

ମେଣ୍ଡେ ଜିୱେତାଗ୍ ବୁଜେମ୍ ଆଦ୍‍ପାର୍‍ୱଡ଼୍,

ମେଣ୍ଡେ ମାଲ୍‍ଦେ ପାର୍‍ୱଡ଼୍,

ମାମ୍‍ମେ ଅଡ଼୍‌‍କିଂଙ୍କ୍ ସୁସ୍ଥ ମାଡ଼ମ୍ ।"

41 ଜିଶାଇୟ ଇଦ୍‍ସାରେ କେତ୍‍ତାଙ୍କ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଜିସୁନାଦ୍ ମହିମା ଉଡ଼୍‍ତନ୍ ନୁ ଅନ୍‌ ବିଷୟ୍‍ତେ ଗଟିକେତ୍‍ତନ୍ ।

42 ଆଗେକ୍ ବା ନେତ୍‍ତାନଡ଼୍ ଲୋପେଙ୍କ୍ ନାର୍‍ଗେ ଜିସୁନାଗ୍ ବିଶ୍ୱାସ୍ ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ବେସୁଙ୍କ୍‍ ଅଡ଼୍‌ ସମାଜଚ୍ୟୁତ ଆଦ୍‍ତଡ଼୍, ଆଦିନ୍ ସେଙ୍ଗେ ପାରୂଶୀନଡ଼୍ ମାଇଦିଙ୍କ୍ ଆଦ୍ ସ୍ୱୀକାର୍ ମାଡ଼୍‍ୱେ ମାତ୍‍ତଡ଼୍, 43 ବାତେଙ୍କ୍ ଇତ୍‍କେ ଅଡ଼୍‌ ଇଶ୍ୱର୍‌ତେ ପ୍ରଶଂସା ୱିଡ଼୍‍ସି ବେଲାନ୍ ନାରୁଡ଼ାଦ୍ ଅନୁମତିତିଙ୍କ୍ ଗାଟି ପ୍ରେମ ମାଡ଼୍‍ତଡ଼୍ ।

44 ଜିସୁ ଗାଟିଲେଙ୍କ୍‍ଦେ କେତ୍‍ତଣ୍ଡ୍‌, "ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ମାତର୍ ନାୟାଗେ ବିଶ୍ୱାସ୍ ମାଡ଼ନ୍, ମାତର୍ ନା ପ୍ରେରଣାକର୍ତ୍ତାନ୍ ନାଗେ ବିଶ୍ୱାସ୍ ମାଡ଼ିତନ୍; 45 ବେନ ନାକିଂଙ୍କ୍ ଉଡ଼୍‍ତନ୍, ଅଣ୍ଡ୍‌ ନା ୱାଦାନ୍‍କର୍ତାଙ୍କ୍ ମିକା ଉଡ଼୍‍ତନ୍ । 46 ଆଦିନ୍ ସେଙ୍ଗେ ନାନ୍ ଜଗତ୍‍ତେ ୱେସ୍ ଆସ୍ ୱାସ୍‍ମିନ୍ଦେନ୍, ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ଇକାଡ଼୍‌ତାଗ୍ ମାନନ୍ । 47 ବେନ ନା ଗଟି କେଞ୍ଜି ପାଲନ୍ ମାଡ଼ନ୍, ନାନ୍ ଅନାଦ୍‌ ବିଚାର୍ ମାଡ଼ନ୍, ବାତେଙ୍କ୍ ଇତ୍‍କେ ନାନ୍ ଜଗତ୍‍ତାଗ୍ ବିଚାର୍ ମାଡ଼ାଙ୍କ୍ ୱାଡ଼ନ୍, ନାନ୍ ଜଗତ୍‍ତିଙ୍କ୍ ରକ୍ଷା ମାଡ଼ାଙ୍କ୍ ୱାତ୍‍ତାନ୍ । 48 ବେନ ନାକିଂଙ୍କ୍ ଆଗ୍ରାହ୍ୟ ମାଡ଼ିତନ୍ ନୁ ନାୟାଦ୍ ବାକ୍ୟ ଗ୍ରହନ୍ ମାଡ଼ନ୍, ନାୟାଦ୍ ମକମ୍‍ତେ ଗଟ୍ ଶେଷ ଦିନେତେ ଅନାଦ୍‌ ବିଚାର୍ ମାଡ଼ିତ୍ । 49 ଇଦ୍ ସତ୍, ବାତେଙ୍କ୍ ଇତ୍‍କେ ନାନ୍ ନିଜେତାଗାଙ୍କ୍ କେଲନ୍, ମାତର୍ ନାନ୍ ବାତେଏ କେତିତାନ୍ ନୁ ବାତେଏ କେଞ୍ଜ୍‍ପିତାନ୍, ଆଦ୍ ନା ମାଲ୍‍ସ୍‍ୱାଦାନ୍ ବାବାଲ୍ ନାକିଂଙ୍କ୍ ଗଟ୍ ହିତ୍‍ତନ୍; 50 ମେଣ୍ଡେ ନାନ୍ ପୁତ୍‍ତାନ୍ ଅନ୍‌ ଗଟ୍ ସାରେଦିନାତ୍ ଜିୱୁନ୍ ହିଦ୍‍ତେ, ନା ବାବାଲ୍ ନାକିଂଙ୍କ୍ ବାତେଏ କେତାଙ୍କ୍ କେସ୍‍ମିନ୍ଦେଣ୍ଡ୍, ଆଦେ ଲେକାମ୍ କେତ୍‍ତାନ୍ ।"