1 ତାନ୍ ପେର୍‍କେ ପିଲାତ ଜିସୁଙ୍କ୍ ହସ୍‍ମିକା କରଡ଼ା ତଡ଼୍ ରେହେତାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍ । 2 ସୈନିକିଡ଼୍ କୟେ ମାଡ଼େତ୍ ସହଜ୍‍ ତିଆର୍ ମାଡ଼ି ଜିସୁନ୍ ତାଲେତାଗ୍ କେର୍‍ସ୍ପତଡ଼୍ ନୁ ଅଂକିଙ୍କ୍‌ ଆପ୍ ରଙ୍ଗତାଦ୍ ଚକା କେର୍‍ସ୍ପତଡ଼୍ । 3 ଅଡ଼୍‌ ଜିସୁନ୍ ଗାର୍‍ରେ ୱାସ୍ କେତ୍‍ତଡ଼୍, "ହଁ ଯିହୁଦୀଡ଼୍ ରାଜା, ନିମ୍‍ ନାର୍‍ଗେ ଜେଲ୍ ବାଦ୍‍କା;" ମେଣ୍ଡେ ଅଡ଼୍‌ ଅଂକିଙ୍କ୍‌ ଚାପୁଡ଼ା ରେହେତାଙ୍କ୍ ପସ୍ପ୍‍ତ୍‍ତଡ଼୍ ।

4 ପିଲାତ ମେଣ୍ଡେ ଅନ୍‌‍ଦାମ୍ ବାଇଦେ ଆଞ୍ଜ୍ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, "ଉଡ଼ାଟ୍, ନାନ୍ ଅନାଗେ ବାତେଏ ମିକା ଦଷ୍ ଦର୍‍ସ୍‍କନ୍, ଇଦ୍ ବେଲା ମିଡ଼୍ ପୁନ୍‍ତିଡ଼୍, ଇଦିନ୍ ସେଙ୍ଗେ ନାନ୍ ଅଂକିଙ୍କ୍‌ ମିଇ ଗାର୍‍ରେ ବାଇଦେ ତାତ୍‍ତାନ୍ ।" 5 ଆଗାଙ୍କ୍ ଜିସୁ ଆ କୟେନାଦ୍ ସହଜ୍‍ ନୁ ଆପ୍ କାୟାନ୍ ରଙ୍ଗତାଦ୍ ଚକା କେର୍‍ସ୍ ବାଇଦେ ୱାତ୍‍ତଣ୍ଡ୍ । ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ଉଡ଼ାଟ୍, ଇଣ୍ଡ୍ ଆ ନାରୁଣ୍ଡ୍‌ !"

6 ଆଗାଙ୍କ୍ ମୁକ୍ୟ ଯାଜକ୍ ନୁ ମନ୍ଦିର୍‍ତିଙ୍କ୍ ସୁରକ୍ଷାହିଦାନଡ଼୍ ଉଡ଼ି ଗାଟି ଲେଙ୍ଗ୍ ଦେ କେତ୍‍ତଡ଼୍, "କ୍ରୁଶତାଗ୍ ତାର୍‍ସ୍‍ପାଟ୍, କ୍ରୁଶତାଗ୍ ତାର୍‍ସ୍‍ପାଟ୍," ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ମିଡ଼୍ ଅଂକିଙ୍କ୍‌ ଅସ୍ କ୍ରୁଶତାଗ୍ ତାର୍‍ସ୍‍ପାଟ୍, ବାତେଙ୍କ୍ ଇତ୍‍କେ ନାନ୍ ଅନାଗେ ବାତେଏ ମିକା ଦଷ୍ ଦର୍‍ସ୍‍କନ୍ ।"

7 ଯିହୁଦୀଡ଼୍ ଅଂକିଙ୍କ୍‌ କେତ୍‍ତଡ଼୍, "ମାୟାଗ୍‌ ୱେରନ୍ ନିୟମ୍ ମିନ୍ଦେ ନୁ ଆଦ୍ ନିୟମ୍ ଲେକାମ୍ ଅଣ୍ଡ୍‌ ଡଲାନ୍‍ଦଣ୍ଡ୍ ଜିୱେଦର୍‍କିତ୍, ବାତେଙ୍କ୍ ଇତ୍‍କେ ଅଣ୍ଡ୍‌ ନିଜେତିଙ୍କ୍ ‘ଇଶ୍ୱର୍‌ତେ ମାର୍‍’ ଇଞ୍ଜ କେସ୍‍ମିନ୍ଦେଣ୍ଡ୍ ।"

8 ଆଗାଙ୍କ୍ ପିଲାତ ଇଦ୍ ଗଟ୍ କେଞ୍ଜି ଗାଟି ୱେର୍‍ତଣ୍ଡ୍; 9 ମେଣ୍ଡେ ଅଣ୍ଡ୍‌ ପ୍ରାସାଦ୍‍ତେ ଲୋପେ ଆସି ଜିସୁଙ୍କ୍ ପାଚ୍ରାମାଡ଼୍‍ତଣ୍ଡ୍, "ନିମ୍‍ ବେଗାଙ୍କ୍ ୱାତ୍‍ତିନ୍ ?"

ବାତେଙ୍କ୍ ଇତ୍କେ ଜିସୁ ଅଂକିଙ୍କ୍‌ ଉତ୍ତର୍ ହିୱଣ୍ଡ୍ । 10 ଆଗାଙ୍କ୍ ପିଲାତ ମେଣ୍ଡେ ଜିସୁଙ୍କ୍ କେତ୍‍ତଣ୍ଡ୍, "ନିମ୍‍ ନାକିଂଙ୍କ୍ ବାତେଙ୍କ୍ ଗଟି ତିରିୟ୍‍ୱି ? ନିକିଂଙ୍କ୍ ମୁକ୍ତି ମାଡ଼ାନଙ୍କ୍ ନାୟାଗ୍ ଅଦିକାର୍‌ ମିନ୍ଦେ ନୁ ନିକିଂଙ୍କ୍ କ୍ରୁଶତାଗ୍ ତାର୍ସ୍‍ପାନଙ୍କ୍ ମିକା ନାୟାଦ୍ ଅଦିକାର୍‌ ମିନ୍ଦେ, ଇଦ୍ ନିମ୍‍ ପୁନ୍‍ୱିନ୍ କି ?"

11 ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, "ନା ପର୍‍ର ନିୱାଦ୍ ବେନ୍ ଅଦିକାର୍‌ ମିନ୍ଦେ, ଆଦ୍ ଅଦିକାର୍‌ ନିକିଂଙ୍କ୍ ପରମେଶ୍ୱର୍ ହିତ୍‍ତଣ୍ଡ୍ । ତ ବେନ ନାକିଂଙ୍କ୍ ନି ଗାର୍‍ରେ ତାତ୍‍ତଣ୍ଡ୍, ଅଣ୍ଡ୍‌ ଗାଟି ପାପ୍ ମାଡ଼୍‍ତଣ୍ଡ୍ ।"

12 ଆଗାଙ୍କ୍ ପିଲାତ ଜିସୁଙ୍କ୍ ମୁକ୍ତି ମାଡ଼ାଙ୍କ୍ ଆଲ୍‍ସି ମାତ୍‌ଣ୍ଡ୍, ବାତେଙ୍କ୍ ଇତ୍‍କେ ଯିହୁଦୀଡ଼୍ ଗାଟି ଲେଙ୍ଗ୍ ଦେ କେତ୍‍ତଡ଼୍, "ଯଦି ନିମ୍‍ ଇ ନାରୁଙ୍କ୍ ମୁକ୍ତି ମାଡ଼ିତିନ୍, ଆଲେକେ ନିମ୍‍ ସମ୍ରାଟ୍‍ତେ ସାଙ୍ଗ ଆୟିୱିନ୍; ବେନଆଇ ନିଜେତିଙ୍କ୍ ରାଜା ଇଞ୍ଜ କେତିତଣ୍ଡ୍, ଅଣ୍ଡ୍‌ କାଇସର୍‍ତେ ବିରଦ୍ଦ୍‌ତାଦ୍ ଗଟ୍ କେତିତଣ୍ଡ୍ ।"

13 ପିଲାତ ଇଦ୍ ସାରେ ଗଟ୍ କେଞ୍ଜି ଜିସୁଙ୍କ୍ ପେସ୍ପିତାସ୍ "କାଲ୍‍ମଣ୍ଡପ୍," ବେଦିଙ୍କ୍ ଏବ୍ରି ଗଟ୍‍ ତେ "ଗବ୍‍ବତା," ଇଞ୍ଜ କେତିତଡ଼୍‍, ଆଦ୍ ପଡ଼ିୟେତାଗ୍ ବିଚାର୍ ମାଡ଼ାନାଦ୍ କେତିତାଗ୍ କୁଦ୍‍ତଣ୍ଡ୍ । 14 ଆଦ୍ ଦିନ୍ ନିସ୍ତାର୍ ପାଣ୍ଡୁତାଦ୍ ମିଟିଙ୍କ୍ ଦିନାମ୍ ମାତ୍‍ତା, ମେଣ୍ଡେ ଆସୁଟେ ଦିନାମ୍ ବାର ଗାଣ୍ଟା ଆସ୍‍ମାତ୍‍ତା । ପିଲାତ ଯିହୁଦୀଡ଼୍‍କ୍ କେତ୍‍ତଣ୍ଡ୍, "ଉଡ଼ାଟ୍, ମିୱଣ୍ଡ୍ ରାଜାଲ୍ !"

15 ଆଗାଙ୍କ୍ ଅଡ଼୍‌ ଗାଟି ଲେଙ୍ଗ୍ ଦେ କେତ୍‍ତଡ଼୍, "ଅଂକିଙ୍କ୍‌ ହାୱ୍‍କାଟ୍, ହାୱ୍‍କାଟ୍, କ୍ରୁଶତାଗ୍ ତାର୍‍ସ୍‍ପାଟ୍ ।"

ପିଲାତ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ମିଡ଼୍ ବାତେଏ ଇଚ୍ଛା ମାଡ଼ୁତିଡ଼୍ ନାନ୍ ମିଇ ରାଜାଙ୍କ୍ କ୍ରୁଶତାଗ୍ ତାର୍‍ସ୍ପି ହାୱ୍‍କିତାନ୍ ?"

ମୁକ୍ୟ ଯାଜକିଡ଼୍ କେତ୍‍ତଡ଼୍, "ସମ୍ରାଟ୍‍ତେ ୱିଡ଼୍‍ସି ମାକିଂଙ୍କ୍ ମେଣ୍ଡେ ରାଜାଲ୍ ଇଲାଣ୍ଡ୍ ।"

16 ଆସୁଣ୍ଟ୍ ପିଲାତ ଜିସୁଙ୍କ୍ କ୍ରୁଶତାଗ୍ ତାର୍‍ପାନ୍ ସେଙ୍ଗେ ଅଡ଼୍‌ କାଇଦେ ସମର୍‍ପନ୍ ମାଡ଼୍‍ତଣ୍ଡ୍ । ଆସୁଣ୍ଟ୍ ଅଡ଼୍‌ ଜିସୁଙ୍କ୍ ହତ୍‍ତଡ଼୍ ।

17 ମେଣ୍ଡେ ଜିସୁ ନିଜେ କ୍ରୁଶତିଙ୍କ୍ କାଞ୍ଜି "କାପାଲସ୍ଥଲ," ପେଦେର୍‍ତେ ପଡ଼ିୟେତାଗ୍, ବେଦିଙ୍କ୍ ଏବ୍ରି ଗଟ୍‍ ତେ "ଗଲ୍‍ଗତା," ଇଞ୍ଜ କେତିତଡ଼୍‍, ଆଗେ ପେଇସ୍ ଆତ୍‍ତଣ୍ଡ୍ । 18 ଆଗେ ଅଡ଼୍‌ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପତଡ଼୍ ନୁ ଅନ୍‌ ତଡ଼୍ ମେଣ୍ଡେ ଇର୍‍ୱୁଡ଼୍‍କ୍ ତାର୍‍ସ୍ପତଡ଼୍, ରେଣ୍ଡ୍ ପାକେ ଇର୍‍ୱୁଡ଼୍‍କ୍ ନୁ ନାଡ଼୍‍ମେ ଜିସୁଙ୍କ୍ ୱାଟ୍‍ତଡ଼୍ । 19 ପିଲାତ ୱେରନ୍ ଚିଟି ଲେକି କ୍ରୁଶତେ ପର୍‍ର ୱାଟିତ୍‍ତଣ୍ଡ୍ । ଆଗେ ଲେକ୍‍ତାଦ୍ ମାତ୍‍ତା, "ନାଜରିତିୟ ଜିସୁ, ଯିହୁଦୀଡ଼୍ ରାଜାଲ୍ ।" 20 ଯିହୁଦୀଡ଼୍ ଲୋପେକେ ନାର୍‍ଗେ ନାରୁଡ଼୍ ଇଦ୍ ଚିଟି କାର୍‍ତଡ଼୍, ବାତେଙ୍କ୍ ଇତ୍‍କେ ବେନ୍ ପଡ଼୍‍ୟ୍‍ତାଗ୍ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପିମାତ୍‍ତଡ଼୍, ଆଦ୍ ନାର୍ ଗାର୍‍ରେ ମାତ୍‍ତା; ମେଣ୍ଡେ ଆଦ୍ ଚିଟି ଲାଟିନ୍, ଗ୍ରୀକ୍ ନୁ ଏବ୍ରି ଗଟ୍‍ ତେ ଲେକ୍‍ତାଦ୍ ଆସ୍‍ମାତ୍‍ତା । 21 ଆଦିଙ୍କ୍ ଯିହୁଦୀଡ଼୍ ମୁକ୍ୟ ଯାଜକିଡ଼୍ ପୀଲାତଙ୍କ୍ କେତ୍‍ତଡ଼୍, "‘ଅଣ୍ଡ୍‌ ଯିହୁଦୀଡ଼୍ ରାଜା ଇଞ୍ଜ ଲେକାମ୍ ବେଲାନ୍ ନାନ୍ ଯିହୁଦୀଡ଼୍ ରାଜାନ୍ ଇଞ୍ଜ ଅଣ୍ଡ୍‌ କେତ୍‍ତଣ୍ଡ୍,’ ଇଲା ଲେକିମ୍ ।"

22 ପିଲାତ କେତ୍‍ତଣ୍ଡ୍, "ନାନ୍ ବାତ୍ ଲେକ୍‍ତାନ୍, ଆଦ୍ ଆଦ୍‍ଲେକାମ୍ ଲେକ୍‍ତାଦ୍ ମାନ୍‍ତେ ।"

23 ନାଲୁୱୁଡ଼୍ ସୈନିକ୍ ଜିସୁଙ୍କ୍ କ୍ରୁଶତାଗ୍ ତାର୍‍ସ୍ପ୍‌ତେ ପେର୍‍କେ ଅନ୍‌‍ୱାଦ୍ ଚକାତିଙ୍କ୍ ଅସ୍ ନାଲୁ ଦୁଡ଼ା ମାଡ଼୍‍ତଡ଼୍, ସାରେତଡ଼୍ ସୈନ୍ୟଡ଼କ୍ ସେଙ୍ଗେ ଅଣ୍ଡୟ୍‌ ଦୁଡ଼ା, ମେଣ୍ଡେ ଅଡ଼୍‌ ଜିସୁନ୍ ଉତରୀୟ ସିଲେତିଙ୍କ୍ ମିକା ଆତ୍‍ତଡ଼୍ । ଆଦ୍ ପରକନ୍‍ସ ମଦଲ୍ ହେୱୁନା ୱିଡ଼୍‍ସି ସିଲେଇତେ ଅଣ୍ଡୟ୍‌ ସିଲେ ମାତ୍‍ତା । 24 ଆଦିଙ୍କ୍ ସୈନ୍ୟଡ଼୍ ତାମ୍‍ତାମ୍ ତିରିୟ୍‍ତଡ଼୍, "ଇଦିଙ୍କ୍ ହିକ୍‍ମାଟ୍, ବାତେଙ୍କ୍ ଇତ୍‍କେ ଇଦ୍ ବେନନାଦ୍ ଆଦ୍‍ତେ ଆଦିନ୍ ସେଙ୍ଗେ ଗୁଲିବାଣ୍ଟ ମାଡ଼ିକାଡ଼୍," ଦର୍ମଶାସ୍ତ୍ରତାଗ୍ ଇଦ୍ ଗଟ୍ ସତ୍ ଆଦ୍‍ତେ, "ଅଡ଼୍‌ ତାମ୍‍ତାମ୍ ଲୋପେ ନାୟାଦ୍ ଚକାତିଙ୍କ୍ ତୁହୁସ୍‍ତଡ଼୍, ମେଣ୍ଡେ ନାୟାଦ୍ ଉତରୀୟ ସିଲେତ୍ ସେଙ୍ଗେ ଗୁଲିବାଣ୍ଟ ମାଡ଼୍‍ତଡ଼୍ ।" ଇଦିନ୍ ସେଙ୍ଗେ ସୈନ୍ୟଡ଼୍ ଇଲା ମାଡ଼୍‍ତଡ଼୍ ।

25 ବାତେଙ୍କ୍ ଇତ୍‍କେ ଜିସୁନ୍ କ୍ରୁଶତେ ଗାର୍‍ରେ ତାମ୍ ୟାୟ୍‍, ତାମ୍ ୟାୟାନ୍ ଏଲାଡ଼୍‍, କ୍ଲପାନ୍ ମୁତ୍‍ତେ ମରୀୟମ୍ ନୁ ମଗ୍‍ଦଲୀନି ମରୀୟମ୍ ନିସ୍ ମାତ୍‍ତା । 26 ଜିସୁ ତାମ୍ ୟାୟ୍‍ ନୁ ବେନ୍ ଶିଷ୍ୟଙ୍କ୍ ପ୍ରେମ ମାଡ଼ମାତ୍‍ତଣ୍ଡ୍, ଅଡ଼୍‌‍କିଂଙ୍କ୍ ଗାର୍‍ରେ ନିସ୍ ମାନ୍ଦାନାଦ୍ ଉଡ଼ି ୟାୟାଙ୍କ୍ କେତ୍‍ତଣ୍ଡ୍, "ଉଡ଼େ, ନି ମାର୍‍ରିଙ୍କ୍ !"

27 ତାନ୍‍ପେର୍କେ ଆ ଶିଷ୍ୟଙ୍କ୍ କେତ୍‍ତଣ୍ଡ୍, "ଉଡ଼େ, ମିଇ ୟାୟାଙ୍କ୍ !" ଆ ଶିଷ୍ୟ ଆସୁଣ୍ଟ୍ ଜିସୁନ୍ ୟାୟାଙ୍କ୍ ତାମ୍ ଲୋନ୍‌ ଅତ୍‌ତଣ୍ଡ୍ ।

28 ଇଞ୍ଜେ ସାରେ ବିଷୟ୍ ଶେଷ୍ ଆଦ୍‍ତେ, ଜିସୁ ଇଦ୍ ପୁତ୍‍ତଣ୍ଡ୍ । ଦର୍ମଶାସ୍ତ୍ରତାଦ୍ ବାକ୍ୟ ସତ୍ ଆତ୍‍ତାଙ୍କ୍ ଅଣ୍ଡ୍‌ କେତ୍‍ତଣ୍ଡ୍, "ନାକିଂଙ୍କ୍ ଉନ୍ଦେୱାତୁତ୍ ।"

29 ଆଗେ ଗିନେତାଗ୍ ବର୍ତ୍ତି ପୁଲ୍‍ସ୍‍ତାଦ୍ ରସ୍ ମାତ୍‍ତା । ଅଡ଼୍‌‍ ସପ୍‍ଆଞ୍ଜ୍ ପସ୍କେତିଙ୍କ୍ ରସ୍‍ତାଗ୍ ମୁହୁସ୍ ଏଜୋପ*୧୯:୨୯ ଲାଟିଲାଦ୍ ଡୁଡ୍ ଟିକ୍‍କାତାଗ୍ ୱାଟି ଜିସୁନ୍ ପାୟୁର୍ ବକେତ୍ ଆତ୍‍ତଡ଼୍ । 30 ଜିସୁ ଆଦିଙ୍କ୍ ଉଞ୍ଜ୍ କେତ୍‍ତଣ୍ଡ୍, "ଶେଷ୍ ଆଦ୍‍ତେ ।" ତାନ୍‍ପେର୍କେ ଅଣ୍ଡ୍‌ ତାଲେତିଙ୍କ୍ ମଦଲ୍ ମାଡ଼ି ଡଲ୍‍ତଣ୍ଡ୍ ।

31 ଆଦ୍ ଦିନ୍ ନିସ୍ତାର୍ ପାଣ୍ଡୁତେ ତିଆର୍ ଦିନାମ୍ ମାତ୍‍ତା । ଅନାଦ୍‌ ମେନ୍ଦୁଲ୍ ବେଲା କ୍ରୁଶତାଗ୍ ମାନ୍‍ନ, ତାନ୍ ମେଣ୍ଡେଅନ୍‌ ଦିନ୍ ବିଶ୍ରାମବାରତାଦ୍ ବେଡ଼େୟାଦ୍ ଦିନାମ୍ ମାତ୍‍ତା । ଆଦିନ୍ ସେଙ୍ଗେ ବିଶ୍ରାମ୍‍ଦିନେତାଗ୍ କ୍ରୁଶତାଗ୍ ପର୍‍ର ମାନ୍ଦାନାୱ୍ ମେନ୍ଦୁଲ୍‍କିନ୍ ଡେକା ଉହୁସ୍ ନୁ ଅଡ଼୍‌‍କିଂଙ୍କ୍ ମେଣ୍ଡେଅନ୍‌ ପଡ଼ିୟେତାଗ୍ ଆଦାନଙ୍କ୍ ଯିହୁଦୀଡ଼୍ ପୀଲାତଙ୍କ୍ ଅନୁରଦ୍‌ ମାଡ଼୍‍ତଡ଼୍ । 32 ତାନ୍‍ପେର୍କେ ସୈନିକିଡ଼୍ ୱାସ୍ ପ୍ରତମ୍ ଅର୍‍ତୁନାଦ୍ ଡେକେ ନୁ ଅନ୍‌ ତଡ଼୍ ମେଣ୍ଡେ ୱେରଣ୍ଡ୍ କ୍ରୁଶତାଗ୍ ତାର୍‍ସ୍ପି ମାତ୍‍ତଡ଼୍, ଅନାଦ୍‌ ଡେକେ ଉହୁତ୍‍ତଡ଼୍ । 33 ମାତର୍ ଅଡ଼୍‌ ଜିସୁନ୍ ଗାର୍‍ରେ ୱାସ୍ ଅଣ୍ଡ୍‌ ଡଲ୍‍ତଣ୍ଡ୍ ଇଞ୍ଜ ଉଡ଼ି ଅନାଦ୍‌ ଡେକେତିଙ୍କ୍ ଉହୁୱଡ଼୍ । 34 ବାତେଙ୍କ୍ ଇତ୍‍କେ ସୈନିକିଡ଼୍ ଲୋପେକେ ୱେରଣ୍ଡ୍ ଜିସୁନ୍ ଗୁଣ୍ଡେତାଗ୍ ବର୍ଚ୍ଛାତଡ଼୍ କଟ୍‍ତଣ୍ଡ୍, ମେଣ୍ଡେ ସାଙ୍ଗେ ସାଙ୍ଗେ ନେତୁର୍ ନୁ ଏର୍‍ ପେଇତା । 35 ବେନ ଉଡ଼୍‍ତଣ୍ଡ୍ ଅଣ୍ଡ୍‌ ସାକ୍ଷ୍ୟ ହିତ୍‍ତଣ୍ଡ୍, ବେଲାକି ମିଡ଼୍ ଆନ୍‌‍ତେ ବିଶ୍ଵାସ୍ ମାଡ଼ାଟ୍; ମେଣ୍ଡେ ଅନାଦ୍‌ ଗଟ୍ ନିଜାମ୍, ଅଣ୍ଡ୍‌ ନିଜାମ୍ କେତୁତଣ୍ଡ୍ ଇଦ୍ ଅଣ୍ଡ୍‌ ପୁତ୍‍ତଣ୍ଡ୍ । 36 ଦର୍ମଶାସ୍ତ୍ରତାଗ୍ ହିଦ୍ ଗଟ୍ ସତ୍ ଆଦାନ୍ ସେଙ୍ଗେ ଇଦ୍ ସାରେ ଗଟେମ୍ଆତ୍‍ତା, "ଅନାଦ୍‌ ୱେରନ୍ ମିକା ବୁଲା ଉହୁତାନାଦ୍ ଆୟ୍‍ୟ ।" 37 ✝୧୯:3୭ ପ୍ରକାଶିତ୍‌ ବାକ୍ୟ ୧:୭.ଦର୍ମଶାସ୍ତ୍ରତାଗ୍ ମେଣ୍ଡେ ଅଣ୍ଡ୍‌ ବାକ୍ୟ ଲେକ୍‍ତାଦ୍ ମିନ୍ଦେ, "ଅଡ଼୍‌ ବେନଙ୍କ୍ ବର୍ଚ୍ଛାତଡ଼୍ କଟ୍‍ତଣ୍ଡ୍, ଅନ୍‌ପରୁ କଣ୍ଡେ ୱାଟାନାଦ୍‌ ।"

38 ତାନ୍‍ପେର୍କେ ଆରମାତିଆତଣ୍ଡ୍ ଜଷେପ୍‍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଡ଼୍ ପୀଲାତଙ୍କ୍ ଜିସୁନ୍ ମେନ୍ଦୁଲ୍ ତାଲ୍‍କ୍‍ତଣ୍ଡ୍ । ଜଷେପ୍‍ ଜିସୁନ୍ ୱେରନ୍ ଶିଷ୍ୟ ମାତ୍‍ତଣ୍ଡ୍ । ବାତେଙ୍କ୍ ଇତ୍‍କେ ଅଣ୍ଡ୍‌ ନାରୁଡ଼୍‍କ୍ ଜିସୁନ୍ ଶିଷ୍ୟ ଇଞ୍ଜ କେଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଯିହୁଦି ନେତାନଡ଼୍‍କ୍ ୱେର୍‍ସ୍ ମାତ୍‍ତଣ୍ଡ୍ । ପିଲାତ ଜଷେପ୍‍ତିଙ୍କ୍ ଜିସୁନ୍ ମେନ୍ଦୁଲ୍ ଆଦାନ୍ ସେଙ୍ଗେ ଗଟ୍ ହିତ୍‍ତଣ୍ଡ୍ । ଆଦିଙ୍କ୍ ଜଷେପ୍‍ ୱାସ୍ ଜିସୁନ୍ ମେନ୍ଦୁଲ୍‍ତିଙ୍କ୍ ହତ୍‍ତଣ୍ଡ୍ । 39 ✝୧୯:3୯ ଯୋହନ୍‌ 3:୧,୨.ନିକଦୀମ ମିକା ଜଷେପ୍‍ତଡ଼୍ ଆତ୍‍ତଣ୍ଡ୍ । ଅଣ୍ଡ୍‌ ମୁନେନ୍ ଜିସୁଙ୍କ୍ ଉଡାଙ୍କ୍ ନାର୍‍କେତ୍ ୱାସ୍ ମାତ୍‍ତଣ୍ଡ୍ ନୁ ଅନ୍‌ ତଡ଼୍ ତିରିଇ ମାତ୍‍ତଣ୍ଡ୍ । ଅଣ୍ଡ୍‌ ଜିସୁନ୍ ମେନ୍ଦୁଲ୍‍ତାଗ୍ ଅକାନ୍ ସେଙ୍ଗେ ତିରିଶ୍ କେଜି ସାଏତ୍ ଗାବ୍ କାଇଲ୍‍ତାଦ୍ ଅଗୁର୍*୧୯:୩୯ ନାର୍‍ଗେ ବାତ୍‍ବାତା କାଇଲ୍‍ତାଦ୍ ନିିୟ୍ ତାତ୍‍ତଣ୍ଡ୍ । 40 ଯିହୁଦୀଡ଼୍ ସମାଦି ଇଦାନ୍ ନିୟମ୍ ଲେକାମ୍ ଅଡ଼୍‌ ଇର୍‍ୱୁଡ଼୍ ଜିସୁନ୍ ମୋଡ଼୍‍ତିଙ୍କ୍ ସାଏତ୍ ଗାବ୍‍ତାଦ୍ ଜିନିଷ୍‍ତଡ଼୍ ପାଲ୍‍ସା ସିଲେତ୍ ମୁସିତ୍‍ତଡ଼୍ । 41 ଜିସୁଙ୍କ୍ ବେଗେ କ୍ରୁଶବିଦ୍ଦ ମାଡ଼ିମାତ୍‍ତଡ଼୍, ଆଦ୍ ପଡ଼ିୟେତ୍ ଗାର୍‍ରେ ୱେରନ୍ ବଗିଚା ମାତ୍‍ତା । ଆଦ୍ ବଗିଚାତାଗ୍ ୱେରନ୍ ପୁନାଦ୍ କବର୍ ମାତ୍‍ତା, ଆଗେ ମୁନେନ୍ ବେନଙ୍କେ ମିକା ସମାଦି ହିୱକଟ୍ ମାତ୍‍ତଡ଼୍ । 42 ମେଣ୍ଡେ ଯିହୁଦୀଡ଼ାଦ୍‍ ଆୟୋଜନ ଦିନ୍‍ତେ, ଅଡ଼୍‌ ଜିସୁଙ୍କ୍ ଆଦ୍ ପଡ଼ିୟେତାଗ୍ ସମାଦି ଇତ୍‍ତଡ଼୍, ବାତେଙ୍କ୍ ଇତ୍‍କେ ଆଦ୍ ସମାଦି ଗାର୍‍ରେ ମାତ୍‍ତା ।