1 ପାରୂଶୀଡ଼୍ କେଞ୍ଜ୍‍ତଡ଼୍ ଯେ ଜିସୁ ବାପ୍ତିସ୍ମ ଯୋହନ୍‌ତେ କନ୍‍ସ୍ ନାର୍‍ଗେ ଶିଷ୍ୟ ମାଡ଼ୁତଣ୍ଡ୍ ନୁ ଅଡ଼୍‌‍କିଂଙ୍କ୍ ବାପ୍ତିସ୍ମ ଇଦୁତଣ୍ଡ୍ । 2 ପ୍ରକୃତ୍‍ରେ ଜିସୁ ନିଜେ ବେନଙ୍କ୍‍ବା ବାପ୍ତିସ୍ମ ହିୱକଟ୍ ମାତ୍‍ତଣ୍ଡ୍, ମାତର୍ ଆଦ୍ ତାମ୍ ଶିଷ୍ୟଡ଼୍ ହିସମାତ୍‍ତଡ଼୍ । 3 ହିଦ୍ ପାରୂଶୀଡ଼୍ କେତୁତଡ଼୍ ଇଞ୍ଜ ଜିସୁ ବେସୁଟ୍‌ କେଞ୍ଜ୍‍ତଣ୍ଡ୍, ଆସୁଟେ ଅଣ୍ଡ୍‌ ଯିହୁଦା ପ୍ରଦେଶ୍‍ତିଙ୍କ୍ ୱିଡ଼୍‍ସି ମେଣ୍ଡନ୍‍ନ୍ଦାମ୍ ଗାଲିଲୀତାଗ୍ ଆତ୍‍ତଣ୍ଡ୍ । 4 ଆଦାନ୍ ହାର୍‍ଦାଗ୍ ଶମିରୋଣ ଲୋପେଙ୍କ୍ ଇସ୍‌ ଅଂକିଙ୍କ୍‌ ଆଦ୍‍ୱେୟ୍‍ତେ ।

5 ଆଦିଙ୍କ୍ ଜିସୁ ଆଞ୍ଜ୍ ଯାକୁବ୍ ନିଜେତ୍ ମାର୍‍ ଯଷେପ୍‍ତିଙ୍କ୍ ବେନ୍ ୱାୟାଙ୍କ୍ ତୁସି ମାତ୍‍ତଡ଼୍, ଆଦିନ୍ ଗାର୍‍ରେ ଶମିରଣତେ ସୁକାର୍‍ ପେଦେର୍‍ତେ ୱେରଡ଼୍ ନାର୍‍ଦାଗ୍ ହେୱ୍‍ତଣ୍ଡ୍; 6 ଆଦ୍ ପଡ଼ିୟେତାଗ୍ ଯାକୁବନ୍ ନୂୟ୍ ମାତ୍‍ତେ । ଜିସୁ ଆୟ୍‍ୱି ମାନ୍ଦାନ୍ ମାଇଦିଙ୍କ୍ ଆଦ୍ ନୂୟ୍‍ଦ୍‍ ଗାର୍‍ରେ କୁଦିମାତ୍‍ତଣ୍ଡ୍ । ଆସୁଟେ ପାୟାଲ୍ ଆସ୍‍ମାତ୍‍ତେ ।

7 ଅଣ୍ଡୟ୍‌ ଶମିରୋଣୀୟ ମୁତ୍‍ତେ ଏର୍‍ ତରାନ୍‍ ମାଇଦିଙ୍କ୍ ୱାତ୍‍ତେ । ଜିସୁ ତାଙ୍କ୍ କେତ୍‍ତଣ୍ଡ୍, "ନାକିଂଙ୍କ୍ ଉନ୍ଦାନ୍ ମାଇଦିଙ୍କ୍ ଏର୍‍ ହିମ୍ ।" 8 ଆସୁଟେ ତାନ୍ ଶିଷ୍ୟଡ଼୍ କାଦି ଆସାନ୍ ମାଇଦିଙ୍କ୍ ନାର୍‍ଦାଗ୍ ଆଞ୍ଜ ମାତ୍‍ତଡ଼୍ ।

9 ଆସୁଟେ ଶମିରୋଣୀୟ ମୁତ୍‍ତେ ଜିସୁଙ୍କ୍ କେତ୍‍ତେ, "ନିମ୍‍ ୱେରନ୍ ଯିହୁଦିନି ମେଣ୍ଡେ ନାନ୍ ୱେରନ୍ ଶମିରୋଣୀୟ ମୁତେନ୍‍, ବେଲା ନା କାୟ୍‍ଦେ ଉନ୍ଦାଙ୍କ୍ ତାଲ୍‍କୁତିନ୍‍ ?" ବାତେଙ୍କ୍ ଇତ୍‍କେ ଶମିରୋଣୀୟଡ଼୍ ତଡ଼୍ ଯିହୁଦୀ ନାରୁଡ଼ାଦ୍ ବ୍ୟବହାର୍ ଇଲା ।

10 ଜିସୁ ତାଙ୍କ୍ ଉତ୍ତର୍ ହିତ୍‍ତଣ୍ଡ୍, "ଇଶ୍ୱର୍ ବାତେଏ ହିଦ୍‍ପାର୍‍ତଣ୍ଡ୍ ନିମ୍‍ ଯଦି ପୁଞ୍ଜ୍ ମାନେନି ମେଣ୍ଡେ ବେନ ନି କାଇଦେ କନ୍‍ସ୍ ଉନ୍ଦାନଙ୍କ୍ ତାଲ୍‍କୁତଣ୍ଡ୍ ଆଦ୍ ଯଦି ପୁଞ୍ଜ୍ ମାନେନି ନିମ୍‍ ଅଂକିଙ୍କ୍‌ ତାଲ୍‍କେନି, ମେଣ୍ଡେ ଅଣ୍ଡ୍‌ ନିକିଂଙ୍କ୍ ଜିୱୁନ୍‍ତେ ଏର୍‍ ହିୱେଣ୍ଡ୍ ।"

11 ଆଦ୍ ମୁତ୍‍ତେ ଅଂକିଙ୍କ୍‌ କେତ୍‍ତେ, "ଗୁରୁ, ଏର୍‍ ତରାନ୍‍ ମାଇଦିଙ୍କ୍ ନି ଗାର୍‍ରେ ବାତେଏ ଜିନିଷ୍ ଇଲା, ମେଣ୍ଡେ ନୂୟ୍ ତ କୁୟ୍‍ଙ୍ଗ୍; ଆଲାଇତ୍‍କେ ନିମ୍‍ ବେଗାକନ୍‍ସ୍ ଆଦ୍ ଜିୱୁନ୍‍ ଏର୍‍ ଦର୍ସିକି ଆସ୍‌ମିନ୍ଦେନୀ ? 12 ମା ଆନିଦାଦି ଯାକୁବ୍ ହି ନୂୟ୍ ମାକିଂଙ୍କ୍ ଇସ୍‌‍ମାତ୍‍ତଣ୍ଡ୍, ମେଣ୍ଡେ ନିଜେ, ମେଣ୍ଡେ ତାନ୍ ମାର୍‍କ୍ ନୁ ଜିୱାକିନ୍‍ ଲନ୍ ହିଗାଙ୍କ୍ ହୁଞ୍ଜ ମାତ୍‍ତା, ଅନ୍‌ ଆଗାଙ୍କ୍ କି ନିମ୍‍ ବେଡ଼୍‍ୟନି ?"

13 ଜିସୁ ତାଙ୍କ୍ ଉତ୍ତର୍ ହିତତଣ୍ଡ୍, "ବେନ୍‌ଆଇ ହି ଏର୍‍ ଉନ୍‍ତଣ୍ଡ୍, ଅଂକିଙ୍କ୍‌ ମେଣ୍ଡନ୍ ଦାମ୍ ଉନ୍ଦ୍ ୱାହାତିତ୍‍; 14 ବାତେଙ୍କ୍ ଇତ୍‍କେ ନାନ୍ ବେନ୍ ଏର୍‍ ହିଦ୍‍ତାନ୍, ଆଦ୍ ବେନମେଣ୍ଡେ ଉନ୍‍ତଣ୍ଡ୍, ଅଂକିଙ୍କ୍‌ ବେସୁଙ୍କ୍‍ମେଣ୍ଡେ ଉନ୍ଦେୱାୱ, ବେଲାନ୍ ନାନ୍ ହିସମାନ୍ଦାନ୍ ଏର୍‍ ଅନ୍‌ ହୃଦୟ୍‍ତାଗ୍ ୱେରନ୍ ଜିୱୁନ୍ ହିଦାନଣ୍ଡ୍ ନିର୍ଜତେ ପରିନତ ଆଦ୍‍ତେ, ଆଗାଙ୍କ୍ ଉତ୍‍କେ ଅଣ୍ଡ୍‌ ସାରେଦିନାତ୍ ଜିୱୁନ୍‍ ଜିୱେଦର୍‍କିତ୍ ।"

15 ନାଟାଡ଼୍ ଅଂକିଙ୍କ୍‌ କେତ୍‍ତେ, "ଗୁରୁ, ନାକିଂଙ୍କ୍ ଆଦ୍ ଏର୍‍ ହିମ୍, ମେଣ୍ଡେ ବେସୁଙ୍କ୍‌ବା ଉନ୍ଦେୱାୱ, ଇସ ଜେକେ ୱାଦାଙ୍କ୍ ମେଣ୍ଡେ ଦର୍‍କାର୍ ଆୟ୍‍ୟ ।"

16 ଜିସୁ ତାଙ୍କ୍ କେତ୍‍ତଣ୍ଡ୍, "ଅନ୍‌, ନି ମୁଦ୍‍ପାଙ୍କ୍ କାର୍‍ଙ୍ଗି ଇଗେ ତାଡ଼ା ।"

17 ନାଟାଡ଼୍ ଅଂକିଙ୍କ୍‌ ଉତ୍ତର୍ ହିତ୍‍ତେ, ନା ମୁଦ୍‍ପାଲ୍‍ ଇଲେଣ୍ଡ୍ ।

ଜିସୁ ତାଙ୍କ୍ କେତ୍‍ତଣ୍ଡ୍, "ନା ମୁଦ୍‍ପାଲ୍‍ ଇଲେଣ୍ଡ୍ ଇଞ୍ଜ କେତାନାଦ୍ ଟିକ୍ କେତ୍‍ତିନ୍; 18 ବାତେଙ୍କ୍ ଇତ୍‍କେ ନିକିଂଙ୍କ୍ ଏୟ୍‍ୱୁଡ଼୍‍ ମୁଦ୍‍ପାଲଡ଼୍‍ ମାତ୍‍ତଡ଼୍, ମେଣ୍ଡେ ଇଞ୍ଜେ ନିମ୍‍ ବେନନ୍‌ ତଡ଼୍ ମିନ୍ଦେନି, ଅଣ୍ଡ୍‌ ନି ମୁଦ୍‍ପାଲ୍‍ ଆୟ୍‍ୟଣ୍ଡ୍; ଇଦ୍ ସତ୍ କେସ୍‍ମିନ୍ଦେନି ।"

19 ନାଟାଡ଼୍ ଅଂକିଙ୍କ୍‌ କେତ୍‍ତେ, "ଗୁରୁ, ନିମ୍‍ ଯେ ୱେରେତନି ବାବବାଦୀ, ଇଦ୍ ନାନ୍ ଉଡ଼ୁତାନ୍ । 20 ମା ଆନିଦାଦିଡ଼୍ ହି ମେଟେତାଗ୍ ଉପବାସ୍ ମାଡ଼୍‍ତଡ଼୍; ମେଣ୍ଡେ, ମିଡ଼୍ ଯିହୁଦିଡ଼୍ କେସମିନ୍ଦେଡ଼ି, ବେନ୍ ପଡ଼୍‍ୟ୍‍ତାଗ୍ ଉପବାସ୍ ମାଡ଼ାନାଦ୍ ଲେକାମ୍, ଆଦ୍ ଜିରୂଶାଲାମ୍‍ତାଗ୍ ମିନ୍ଦେ ।"

21 ଜିସୁ ତାଙ୍କ୍ କେତ୍‍ତଣ୍ଡ୍, "ଆଗୋ ନାଟାଡ଼୍‍ତନୀ, ନା ଗଟ୍ ବିଶ୍ୱାସ୍ ମାଡ଼ା, ଇଦ୍‍ରକମ୍ ଦିନାମ୍ ୱାଦୁତେ, ବେନ୍ ସମୟ୍‍ତେ ମିଡ଼୍ ହି ମେଟେତାଗ୍ ବା ଯିରୁଶାଲେମ୍ ତାଗ୍ ବାବାନାଦ୍ ଉପବାସ୍ ମାଡ଼୍‍ୱିଡ଼୍ । 22 ମିଡ଼୍ ଶମିରନିୟଡ଼ି ପ୍ରକୃତ୍‍ତେ ବେନଙ୍କ୍ ପୁନ୍‍ୱିଡ଼୍, ଅନାଦ୍‌ ଉପବାସ୍ ମାଡ଼ିତିଡ଼୍, ବାତେଙ୍କ୍ ଇତ୍‍କେ ମାମ୍‍ମେ ଯିହୂଦୀମ୍ ବେନଙ୍କ୍ ପୁତ୍‍ତମ୍, ଅଂକିଙ୍କ୍‌ ଉପବାସ୍ ମାଡ଼ିତମ୍, ବାତେଙ୍କ୍ ଇତ୍‍କେ ପରିତ୍ରାଣ୍ ଯିହୂଦିଡ଼ାଗାଙ୍କ୍ ୱାଦ୍‍ତେ । 23 ବାତେଙ୍କ୍ ଇତ୍‍କେ ବେନ୍ ସମୟ୍‍ତେ ସତ୍ ଉପବାସ୍ ମାଡ଼ାନଡ଼ି ଆତ୍ମାତେ ନୁ ସତ୍ୟତେ ବାବାନାଦ୍ ଉପବାସ୍ ମାଡ଼ିତଡ଼୍, ଆସତ୍‍ ଦିନାମ୍ ୱାସମିନ୍ଦେ; ମେଣ୍ଡେ ଇଞ୍ଜେକ୍ ମିକା ମିନ୍ଦେ; ବାତେଙ୍କ୍‍ଇତ୍କେ ବାବାଲ୍ ହିସତ୍ ଉପବାସ୍ ଇଚ୍ଛାମାଡ଼ୁତନ୍ । 24 ଇଶ୍ୱର୍ ୱେରନ୍ ଆତ୍ମା, ମେଣ୍ଡେ ବେନଡ଼୍ ଅନ୍‌‍ଆଦ୍‍ ଉପବାସ୍ ମାଡ଼ିତଡ଼୍, ଆତ୍ମାତେ ନୁ ସତ୍ୟତେ ଉପବାସ୍ ମାଡ଼ାନାଦ୍ ଅଡ଼୍‌କିଂଙ୍କ୍‍ ଦର୍‌କାର୍‍ ।"

25 ନାଟାଡ଼୍ ଅଂକିଙ୍କ୍‌ କେତ୍‍ତେ, "ମସିହ, ବେନଙ୍କ୍ କ୍ରିଷ୍ଟ କେତିତଡ଼୍‍, ଅଣ୍ଡ୍‌ ୱାସମିନ୍ଦେଣ୍ଡ୍ ଇଞ୍ଜ ନାନ୍ ପୁତ୍‍ତାନ୍; ବେସୁଙ୍କ୍‍ ଅଣ୍ଡ୍‌ ୱାଦ୍‍ତଣ୍ଡ୍, ଅଣ୍ଡ୍‌ ମାନ୍‍ ସାରେ ବିଷୟ୍‍ତିଙ୍କ୍ କେତିତନ୍ ।"

26 ଜିସୁ ତାଙ୍କ୍ କେତ୍‍ତଣ୍ଡ୍, "ନି ତଡ଼୍ ତିର୍‍ୟୁତାନ୍ ଯେ ନାନ୍, ଅଣ୍ଡେ ।"

27 ଆଦ୍ ସମୟ୍‍ତେ ତାନ୍ ଶିଷ୍ୟଡ଼୍ ୱାସ୍ ଅଂକିଙ୍କ୍‌ ୱେରଡ଼୍ ନାଟାଡ଼୍ ତ ତିର୍‍ୟ ମାନ୍ଦାନାଦ୍ ଉଡ଼ି ବାକ୍‍ୱା ଆଦ୍‍ତଡ଼୍, "ମିକା ନିମ୍‍ ବାତେଏ ଇଚ୍ଛାମାଡ଼ୁତିନ୍‌, ବା ବାତେଙ୍କ୍ ତାନ୍ ତଡ଼୍ ଗଟି କେସମିନ୍ଦେନି, ହିଦ୍ ବେନମେଣ୍ଡେ ପାଚ୍ରାମାଡ଼ାଙ୍କ୍ ସାହାସ୍ ମାଡ଼ଡ଼୍‍ ।"

28 ଆସୁଟେ ଆଦ୍ ନାଟାଡ଼୍ ତାନାଦ୍ ଏର୍‍ କୁଣ୍ଡ୍ ନେଲ୍ ୱାଟି ନାର୍‍ଦାଗ୍ ଆଞ୍ଜ୍ ନାରୁଡ୍‍କ୍‍ କେତ୍‍ତେ, 29 ୱାଡ଼ାଟ୍, ଅର୍‍ତୁଙ୍କ୍ ଉଡ଼ିତିଡ଼୍, "ନାନ୍ ବାତା ମାଡ଼ିମିନ୍ଦେଣ୍ଡ୍, ହାଉସାରେ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍; ଅଣ୍ଡ୍‌ ଉମ୍ଭ ମସିହ ଆଦ୍‍ତନ୍ ୱେୟ୍‍ୟ ?" 30 ଆସୁଟେ ନାରୁଡ଼୍ ନାର୍‍ତାଗାଙ୍କ୍ ପେୟିସ୍ ଅନ୍‌‍ଗାରେ ଆଦାଙ୍କ୍ ପସ୍‍ପ୍‍ତ୍‍ତଡ଼୍ ।

31 ଆଗାକଞ୍ଜ୍ ଶିଷ୍ୟଡ଼୍ ଅଂକିଙ୍କ୍‌ ଅନୁରଦ୍‌ ମାଡ଼ି କେତ୍‍ତଡ଼୍, ହୋ ଗୁରୁ, ସୁଦୁଟ୍ ତିନ୍ଦାନଙ୍କ୍ ୱାଡ଼ା ।

32 ବାତେଙ୍କ୍ ଇତ୍‍କେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ତିନ୍ଦାନଙ୍କ୍ ବେନ୍ କାଦି ନାୟାଗ୍ ମିନ୍ଦେ ତାନ୍ ବିଷୟ୍‍ତେ ମିଡ଼୍ ବାତେମିକା ପୁନ୍‍ୱିଡ଼୍ ।"

33 ଆସୁଟେ ଶିଷ୍ୟଡ଼୍ ନିଜେ ନିଜେ କେତାଙ୍କ୍ ପସ୍‍ପ୍‍ତ୍‍ତଡ଼୍, "ବେନ ଅଂକିଙ୍କ୍‌ କାଦି ତାସିସ୍‍ ମିନ୍ଦେଡ଼୍‍ ବାନେ ?"

34 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ନା ପ୍ରେରଣାକର୍ତ୍ତାନ୍ ଇଚ୍ଛା ପାଲନ୍ ମାଡ଼ାନାଦ୍ ନୁ ଅନ୍‌ ତଡ଼୍ ଇସ୍‌ ମାନ୍ଦାନ୍ ପାଡ଼ିୟି ତେର୍‍ସ୍ପାନାଦ୍‍ ଇଦ୍‍ଏକେ ନାୟାଦ୍ କାଦି । 35 ମିଡ଼୍ କେତୁତିଡ଼୍ କେଡ଼୍ କୟ୍‍ଦାନ୍‍ ମାଇଦିଙ୍କ୍ ମଣ୍ଡେ ନାଲୁ ନେଲ୍‍ଞ୍ଜ୍‍ ମିନ୍ଦେ । ବାତେଙ୍କ୍ ଇତ୍‍କେ ନାନ୍ ମିକିଂଙ୍କ୍ କେତୁତାନ୍ କେଡ଼୍ ୱାୟାଙ୍କ୍ ଉଡ଼ାଟ୍, ଆୱ୍ ସାରେ କଇଦାନଙ୍କ୍ ଆସ୍‍ମିନ୍ଦେ । 36 ଇଞ୍ଜ୍ ଆନ୍‌‍ତେ କୟ୍‍ତେନଣ୍ଡ୍ ମଜୁରି ଦର୍‍କିତ୍‍ତା ନୁ ସାରେଦିନାତ୍ ଜିୱୁନ୍‍ତେ ମାଇଦିଙ୍କ୍ କାୟା ଗୁଡ଼୍‍ପି ମାଡ଼ମିନ୍ଦେନ୍, ବେଦ୍‍ପୁଟୁଙ୍କ୍ ୱିତାନଣ୍ଡ୍ ନୁ କୟ୍‍ଦାନଣ୍ଡ୍ ହିର୍‍ୱୁଡ଼୍‍ କାୟ୍‍ଲି ୱେଡ଼୍‍କା ମାଡ଼ିତଡ଼୍ । 37 ବାତେଙ୍କ୍ ଇତ୍‍କେ ୱେରଣ୍ଡ୍ ୱିତିତଣ୍ଡ୍ ନୁ ମେଣ୍ଡେଆର୍‍ତୁଣ୍ଡ୍ କୟ୍‍ଦ୍‍ତଣ୍ଡ୍, ହିଦ୍ ଗଟ୍ ସତ୍ । 38 ମିଡ଼୍ ବାତେତ୍‍ ମାଇଦିଙ୍କ୍ କଷ୍ଟ ମାଡ଼୍‍ୱିଡ଼୍, ଆୱ୍ କୟ୍‍ଦାନ୍‍ ମାଇଦିଙ୍କ୍ ନାନ୍ ମିକିଂଙ୍କ୍ ରହ୍‍ତାନ୍; ମେଣ୍ଡେ ବାଗାତଡ଼୍ ତିପାଲ୍ ମାଡ଼ିମିନ୍ଦେଡ଼୍, ମେଣ୍ଡେ ମିଡ଼୍ ଅଡ଼୍‌‍ୱାଦ୍‍ ତିପାଲ୍‍ତେ କାୟା ଦର୍ସକୁତିଡ଼୍ ।"

39 "ନାନ୍ ବାତା ମାଡ଼ିମିନ୍ଦେଣ୍ଡ୍, ହାଉସାରେ ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ଇଞ୍ଜ ବେନ୍ ନାଟାଡ଼୍ ସାକ୍ଷ୍ୟ ଇସ୍‌‍ମାତେ, ତାନାଦ୍ ଗଟ୍‍ତେ ମାଇଦିଙ୍କ୍ ଆଦ୍ ନଗର୍‍ ଶମିରୋଣୀୟ ଡ଼ାଗାଙ୍କ୍ ଲୋପେଙ୍କ୍ ନାର୍‍ଗେ ନାରୁଡ଼୍ ଅନ୍‌‍ଆଗେ ବିଶ୍ୱାସ୍ ମାଡ଼୍‍ତଡ଼୍ ।" 40 ଆଦ୍ ଶମିରୋଣିୟଡ଼୍ ଆନ୍‌‍ତେ ଅନ୍‌ ଗାର୍‍ରେ ୱାସ୍ ଅଡ଼୍‌ ତ ମାନ୍ଦାନ୍ ମାଇଦିଙ୍କ୍ ଅଂକିଙ୍କ୍‌ ଅନୁରଦ୍‌ ମାଡ଼୍‍ତଡ଼୍ । ମେଣ୍ଡେ ଅଣ୍ଡ୍‌ ରେଣ୍ଡ୍ ଦିନା ଆଦ୍ ପଡ଼ିୟେତାଗ୍ ମାତ୍‍ତଣ୍ଡ୍ ।

41 ମେଣ୍ଡେ, ଜିସୁନ୍ ଗଟ୍ କେଞ୍ଜି ମେଣ୍ଡେ ନାର୍‍ଗେ ନାରୁଡ଼୍ ଅନାଗ୍ ବିଶ୍ୱାସ୍ ମାଡ଼୍‍ତଡ଼୍; 42 ମେଣ୍ଡେ, ଅଡ଼୍‌ ଆଦ୍ ନାଟାଡ଼୍‍ତିଙ୍କ୍ କେତ୍‍ତଡ଼୍, "ଇଞ୍ଜେ ନି ଗଟ୍‍ତେ ସେଙ୍ଗେ ମାତର୍ ମାମ୍‍ମେ ବିଶ୍ୱାସ୍ ମାଡ଼ମ୍, ବାତେଙ୍କ୍ ଇତ୍‍କେ ମାମ୍‍ମେ ନିଜେ ନିଜେ କେଞ୍ଜିମିନ୍ଦେମ୍, ମେଣ୍ଡେ ଇଣ୍ଡ୍ ଯେ ନିଜାମ୍ ଜଗତ୍‍ତେ ତ୍ରାଣକର୍ତ୍ତାଲ୍, ହିଦ୍ ମାମ୍‍ମେ ପୁଞ୍ଜ୍‍ମିନ୍ଦେମ୍ ।"

43 ରେଣ୍ଡ୍‍ଦିନାତେ ପେର୍‍କେ ଜିସୁ ଆଗାଙ୍କ୍ ପେୟିସ୍ ଗାଲିଲୀତାଗ୍ ଆତ୍‍ତଣ୍ଡ୍ । 44 ✝"ବାତେଙ୍କ୍ ଇତ୍‍କେ ବାବବାଦୀ ସ୍ୱଦେଶ୍‍ତେ ଆଦର୍‍ ଦର୍‍କିତ୍‍ତେ ଆୟ୍‍ୟଡ଼୍ ଇଞ୍ଜ୍ ଜିସୁ ନିଜେ ସାକ୍ଷ୍ୟ ହିତ୍‍ତଣ୍ଡ୍ ।" 45 ✝ମେଣ୍ଡେ, ଅଣ୍ଡ୍‌ ଗାଲିଲୀତାଗ୍ ୱାତ୍‍ତେ ସାଙ୍ଗେ ସାଙ୍ଗେ, ପାଣ୍ଡୁମ୍ ଦିନାମ୍ ତେ ଅଣ୍ଡ୍‌ ଯିରୁଶାଲେମ୍‌‍ତାଗ୍ ବାତା ମାଡ଼ି ମାତ୍‍ତଣ୍ଡ୍, ହାଉସାରେ ଉଡ଼ିମାନ୍ଦାନ୍ ଗାଲିଲୀୟଡ଼୍‍ ଅଂକିଙ୍କ୍‌ ଗ୍ରହନ୍ ମାଡ଼୍‍ତଡ଼୍, ବେଲାକି ଅଡ଼୍‌‍ ଆନ୍‌‍ତେ ପାଣ୍ଡୁମ୍‍ତାଗ୍ ଆଞ୍ଜ୍ ମାତ୍‍ତଡ଼୍ ।

46 ✝ଇଗାକଞ୍ଜ୍ ଗାଲିଲୀତାଗ୍ ବେନ୍ କାନାଲ୍‌ ନାର୍‍ଦାଗ୍ ଜିସୁ ଏର୍‍ଦିଙ୍କ୍ ଦ୍ରାକ୍ଷାରସ୍ ମାଡ଼ି ମାତ୍‍ତଣ୍ଡ୍, ଆଦ୍ ପଡ଼ିୟେତାଗ୍ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଆଦ୍‍ତନ୍ । ମେଣ୍ଡେ ଆଗେ ୱେରଣ୍ଡ୍ ରାଜକର୍ମଚାରୀ ମାତ୍‍ତଣ୍ଡ୍, ଅନ୍‌ ମାର୍‍ କଫର୍ନାହୁମ୍‍ତାଗ୍‍ ପିଡ଼ିତ୍ ମାତ୍‍ତଣ୍ଡ୍ । 47 ଜିସୁ ଯିହୁଦା ପ୍ରଦେଶ୍‍ତାଗାଙ୍କ୍ ଗାଲିଲୀତାଗ୍ ପେୟିସ୍ ୱାସ୍ ମିନ୍ଦେଣ୍ଡ୍, ଇଦ୍ କେଞ୍ଜି ଅଣ୍ଡ୍‌ ଅନ୍‌ ଗାର୍‍ରେ ଆଞ୍ଜ୍ ଅଣ୍ଡ୍‌ ବେଦ୍‍ପୁଟୁଙ୍କ୍ ଆଞ୍ଜ୍ ତାନ୍ ମାର୍‍ଦିଙ୍କ୍ ସୁସ୍ଥ ମାଡ଼ିଦ୍‍ତଣ୍ଡ୍, ଆଦିନ୍‌ମାଇଦିଙ୍କ୍ ଅଂକିଙ୍କ୍‌ ଅନୁରଦ୍‌ ମାଡ଼ାଙ୍କ୍ ପସ୍‍ପ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଡଲାନ୍ ରକମ୍ ଆସ୍ ମାତ୍‍ତଣ୍ଡ୍ । 48 ଆସୁଟେ ଜିସୁ ଅଂକିଙ୍କ୍‌ କେତ୍‍ତଣ୍ଡ୍, "ଚିହ୍ନେ ନୁ ଆଶର୍ଯ୍ୟ ପାଡ଼୍‍ୟି ହୁଡ଼କଟମାତ୍କେ ମିଡ଼୍ ବେସୁଟ୍‌ ବା ବିଶ୍ୱାସ୍ ମାଡ଼୍‍ୱିଡ଼୍ ।"

49 ରାଜାନ୍‍ଦାସ ଅଂକିଙ୍କ୍‌ କେତ୍‍ତଣ୍ଡ୍, "ହୋ ଗୁରୁ, ନା ମାର୍‍ ଡଲାନ୍ ମୁନେଙ୍କ୍ ୱାଡ଼ା ।"

50 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, "ଅନ୍‌ ନି ମାର୍‍ ଗେଲ୍‍ସି ଆତ୍‍ତଣ୍ଡ୍ ।

ଆଦ୍ ନାରୁନ୍ ଜିସୁଙ୍କ୍ କେତ୍‍ତେ ଗଟ୍ ବିଶ୍ୱାସ୍ ମାଡ଼ି ମାଲ୍‍ସ୍ ଆଦ୍‍ତନ୍ ।" 51 ମେଣ୍ଡେ, ଅଣ୍ଡ୍‌ ଆଞ୍ଜ ଆଞ୍ଜ ଅନ୍‌ ଦାସଡ଼୍ ଅଂକିଙ୍କ୍‌ କାୟ୍‍ଲି ନି ମାର୍‍ ଗେଲ୍‍ସି ଆତ୍‍ତଣ୍ଡ୍ ଇଞ୍ଜ କେତ୍‍ତଡ଼୍ ।

52 ଆଦିଙ୍କ୍ ବେନ୍ ସମୟ୍‍ତେ ଅଣ୍ଡ୍‌ ସୁସ୍ଥ ଆତ୍‍ତଣ୍ଡ୍, ଆଦ୍ ଅଣ୍ଡ୍‌ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍ । ଆସୁଟେ ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, "ନିନେ ପାୟାଲ୍ ଗାଣ୍ଟେ ସମୟ୍‍ତେ ଅଂକିଙ୍କ୍‌ ହେଡ଼୍‍କ୍ ୱିଡ଼୍‍ସ୍‍ତେ ।" 53 ଆସୁଟେ ବାବାଲ୍ ବୁଜେମ୍ ଆତ୍‍ତଣ୍ଡ୍ ଯେ, "ଜିସୁ ବେନ୍ ସମୟ୍‍ତେ ନିମାର୍‍ ଗେଲ୍‍ସ୍‍ତଣ୍ଡ୍ ଇଞ୍ଜ ଅଂକିଙ୍କ୍‌ କେସ୍‍ମାତ୍‍ତଣ୍ଡ୍, ଟିକ୍ ଆଦ୍ ସମୟ୍‍ତେକେ ହିଦ୍ ଗଟେମ୍‍ଆସ୍‍ ମାତ୍‍ତେ । ମେଣ୍ଡେ, ଅଣ୍ଡ୍‌ ନିଜେ ନୁ ତାନ୍ ପରିବାର୍‍ତେ ସାର୍‍ତଡ଼୍ ଜିସୁଙ୍କ୍ ବିଶ୍ୱାସ୍ ମାଡ଼୍‍ତଡ଼୍ ।"

54 ଯିହୁଦାତାଗାଙ୍କ୍ ମେଣ୍ଡନ୍‍ନ୍ଦାମ୍ ଗାଲିଲୀତାଗ୍ ୱାତ୍‍ତେ ପେର୍‍କେ ହିଦ୍ ଜିସୁନ୍ ଦ୍ୱିତୀୟ ବାକ୍‌ୱାକାମ୍ ମାଡ଼୍‍ତଣ୍ଡ୍ ।