1 ତାନ୍‍ପେର୍କେ ଯିହୂଦୀଡ଼ାଦ୍‍ ୱେରଡ଼୍ ପାଣ୍ଡୁମ୍ ଦିନ୍ ଆତ୍‍ତେ, ମେଣ୍ଡେ ଜିସୁ ଯିରୁଶାଲେମ୍‌‍ତା ଆତ୍‍ତଣ୍ଡ୍ । 2 ଯିରୁଶାଲେମ୍‍ତେ ମେଣ୍ଢାନ୍ ଆର୍‍ଦେ ଗାର୍‍ରେ ୱେରଡ଼୍ ହେର୍‍ୱ୍‍ ମିନ୍ଦେ; ଏବ୍ରି ଗଟ୍‍ତେ ତାଆକିଂଙ୍କ୍‍ ବେତେସ୍‍ଦା ଇଞ୍ଜ କେତିତଡ଼୍‍, ତାନାଦ୍ ଏଇଙ୍ଗ୍ ମଣ୍ଡପ୍‍ ମାତ୍‍ତା । 3 ଗୁଡ଼୍‍ସାତେ ପର୍‍ର ନାର୍ଗେ ନାର୍ଗେ ରଗିନାରୁଡ଼୍‍, କାନାଲଡ଼୍, କୁଟାଲଡ଼୍ ନୁ ଶୁଷ୍କାଙ୍ଗ ନାରୁଡ଼୍ ଆଗେ ମାତ୍‍ତଡ଼୍ । ଅଡ଼୍‌ ଏର୍‍ ଉଙ୍ଗାନାଦିନ୍‍ କେପି ମାତ୍‍ତଡ଼୍; 4 ବାତେଙ୍କ୍ ଇତ୍‍କେ ବେନ୍ ସମୟ୍‍ତେ ପ୍ରବୁନାଦ୍ ୱେରଡ଼୍ ଦୂତ୍ ଏର୍‍ୱିନାଗ୍ ଡିଗି ଏର୍‍ଦିଙ୍କ୍ ହୁୟ୍‍ସ ମାତ୍‍ତେ, ମେଣ୍ଡେ ଏର୍‍ ଉଙ୍ଗାନ୍‍ ପେର୍‍କେ ବେନଆଇ ମୁନେଙ୍କ୍ ଆଦିନାଗେ ମୁଡ଼୍‍ନ୍ଦ ମାତ୍‍ତଣ୍ଡ୍, ଅଣ୍ଡ୍‌ ବେନେମେଣ୍ଡେ ରଗ୍‍ତେ ଆସ୍ ମାତ୍‍କେ ବାଡ଼େ ସୁସ୍ଥ ଆସ୍‍ସ ମାତ୍‍ତଡ଼୍ । 5 ଆଗେ ଅଟ୍‍ତିରିଶ୍‍ ହେଣ୍ଡ୍‍ ରୋଗତେ ପିଡ଼ିତ୍ ୱେରଣ୍ଡ୍ ନାରୁଣ୍ଡ୍‌ ମାତ୍‍ତଣ୍ଡ୍ । 6 ଜିସୁ ଅଂକିଙ୍କ୍‌ ପାଟି ମାନ୍ଦାନାଦ୍ ଉଡ଼ି ନାର୍‍ଗେ ହେଣ୍ଡେତ୍ ରୋଗି ଇଞ୍ଜ ପୁଞ୍ଜ୍ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, "ନିମ୍‍ ବାତେଏ ସୁସ୍ଥ ଆଦାଙ୍କ୍ ଇଚ୍ଛା ଅଦୁତିନ୍ ?"

7 ରଗି ନାରୁଣ୍ଡ୍‌ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, "ପାୟ୍‍କା ଏର୍‍ ଉଙ୍ଗାନ୍‍ ୱେୟ୍ ନାକିଂଙ୍କ୍ ଏର୍‍ୱିନ୍‍ ଲୋପେ ଆଦାନ୍ ମାଇଦିଙ୍କ୍ ନାକିଂଙ୍କ୍ ବେନ ହିଲ୍‍ଲେଡ଼୍; ମେଣ୍ଡେ, ନାନ୍ ଆଦାନ୍ ମୁନେଙ୍କ୍ ମେଣ୍ଡେ ୱେରଣ୍ଡ୍ ନା ମୁନ୍‍ଆଞ୍ଜ୍ ନେଙ୍ଗି ଆଦୁତଡ଼୍‍ ।"

8 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, "ତେଦ୍‍ଦେ, ନିୟାଦ୍ କେତ୍ ପୟ୍‍ସ୍ ତାକା ।" 9 ଆସୁଙ୍କେ ଆ ନାରୁଣ୍ଡ୍‌ ସୁସ୍ଥ ଆତ୍‍ତଣ୍ଡ୍ ନୁ ନିଜେତ୍ କେତ୍ ପୟ୍‍ସ୍ ତାକାଙ୍କ୍ ପସ୍‍ପ୍‍ତଣ୍ଡ୍ । ଆଦ୍ ଦିନ୍ ବିଶ୍ରାମ୍‍ଦିନେ ମାତ୍‍ତେ । 10 ଆଦିନ୍ ମାଇଦିଙ୍କ୍ ଯିହୂଦିଡ଼୍ ସୁସ୍ଥ ଆଶେ ମାନ୍ଦାନ୍ ନାରୁଙ୍କ୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, "ନେଣ୍ଡ୍ ବିଶ୍ରାମ୍‍ଦିନ୍, କେତ୍ କାଞ୍ଜି ଆଦାନାଦ୍ ନିୟାଦ୍ ମା ନିୟମ୍‍ ବିରୁଦ୍‍ତେ ପାଡ଼୍‍ୟି ।"

11 ବାତେଙ୍କ୍ ଇତ୍‍କେ, ଅଣ୍ଡ୍‌ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, "ବେନ ନାକିଂଙ୍କ୍ ସୁସ୍ଥ ମାଡ଼୍‍ତଣ୍ଡ୍, ଅଣ୍ଡ୍‌ ନାକିଂଙ୍କ୍ କେତ୍‍ତଣ୍ଡ୍, ନି କେତ୍ ପୟ୍‍ସ୍ ତାକା ।"

12 ଅଡ଼୍‌ ଅଂକିଙ୍କ୍‌ ପାଚ୍ରାମାଡ଼୍‍ତଡ଼୍, "ନି କେତ୍ ପୟ୍‍ସ୍ ତାକା ଇଞ୍ଜ ବେନ ନିକିଂଙ୍କ୍ କେତ୍‍ତଣ୍ଡ୍, ଆ ନାରୁଣ୍ଡ୍‌ ବେନ ?"

13 ବାତେଙ୍କ୍ ଇତ୍‍କେ ଅଣ୍ଡ୍‌ ବେନ, ଆଦ୍ ସୁସ୍ଥ ଆଶେ ମାନ୍ଦାନ୍ ନାରୁଡ଼୍ ପୁନକଟ୍ ମାତ୍‍ତଣ୍ଡ୍, ବାତେଙ୍କ୍‍ଇତ୍କେ ଆ ପଡ଼ିୟେତାଗ୍ ନାର୍‍ଗେ ନାରୁଡ଼୍ ମାନ୍ଦାନ୍ ମାଇଦିଙ୍କ୍ ଜିସୁ ତନ୍ଦକଟ ଆଞ୍ଜ୍ ମାତ୍‍ତଣ୍ଡ୍ ।

14 ଆଦିନ୍ ପେର୍‍କେ ଜିସୁ ମନ୍ଦିର୍‍ତାଗ୍ ଅଂକିଙ୍କ୍‌ ଉଡ଼ି ଅଂକିଙ୍କ୍‌ କେତ୍‍ତଣ୍ଡ୍, "ଉଡ଼େ ନିମ୍‍ ସୁସ୍ଥ ଆଶେ ମିନ୍ଦେନି, ମେଣ୍ଡେ ପାପ୍ ମାଡ଼୍‍ମା, ଇଲୁକ୍ ନି ସେଙ୍ଗେ ଗାଟି ଅନିଷ୍ଟ ଗଟେମ୍‍ଆଦ୍‍ତେ ।"

15 ଆ ନାରୁଡ଼୍ ମାଲ୍‍ସ୍ ଆଞ୍ଜ୍, ବେନ ଅଂକିଙ୍କ୍‌ ସୁସ୍ଥ ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ଜିସୁ ଇଞ୍ଜ ଯିହୁଦୀ ନେତାଲଡ଼୍‍କିଙ୍କ୍ କେତ୍‍ତଣ୍ଡ୍ । 16 ଆଦିଙ୍କ୍ ଜିସୁ ବିଶ୍ରାମ୍‍ଦିନେତାଗ୍ ଇଲା ମାଡ଼ାନ୍ ମାଇଦିଙ୍କ୍ ଯିହୁଦୀଡ଼୍‍ ଅଂକିଙ୍କ୍‌ ତାଡ଼ନା ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ । 17 ମାତର୍ ଅଣ୍ଡ୍‌ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, "ନା ବାବାଲ୍ ସାରେଦାମ୍ ପାଡ଼୍‍ୟି ମାଡ଼ମିନ୍ଦେନ୍, ମେଣ୍ଡେ ନାନ୍ ଆନ୍‌‍ତେ ମାଡ଼ମିନ୍ଦେନ୍ ।"

18 ହିଦିନ୍ ସେଙ୍ଗେ ଯିହୁଦୀଡ଼୍‍ ଅଂକିଙ୍କ୍‌ ଆୱ୍‍କାନ୍ ମାଇଦିଙ୍କ୍ ମେଣ୍ଡେ ଅଦିକ୍‌ ଚେଷ୍ଟା ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ଯେ ବିଶ୍ରାମ୍‍ଦିନେତେ ନିୟମ୍ ମାନେମ୍‍ ଆୟ୍‍ୟକଟ ମାତ୍‍ତଣ୍ଡ୍, ମାତର୍ ଆଦ୍ ଆୟ୍‍ୟ, ମାତର୍ ଇଶ୍ୱର୍‌ତିଙ୍କ୍ ନିଜେତ୍ ବାବାଲ୍ ଇଞ୍ଜ କେସ୍ ନିଜ୍‍ତିଙ୍କ୍ ଇଶ୍ୱର୍‌ତେ ତଡ଼୍ ସମାନ ମାଡ଼ମାତ୍‍ତଣ୍ଡ୍ ।

19 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, "ସତ୍ ନାନେ ମିକିଂଙ୍କ୍ କେସମିନ୍ଦେନ୍, ମାର୍‍ ନିଜେ ବାତେମିକା ମାଡ଼େ ପାର୍‍ୱଣ୍ଡ୍ । ମାର୍‍ ବାବଙ୍କ୍ ବାତେଏ ମାଡ଼ାନାଦ୍ ଉଡ଼ିତଣ୍ଡ୍, ଅଣ୍ଡ୍‌ ଆନ୍‌‍ତେ ଆଦେ ମାଡ଼ିତନ୍ । ବାତେଙ୍କ୍ ଇତ୍‍କେ ବାବାଲ୍ ବାତେଏ ମାଡ଼ିତନ୍ ମାର୍‍ ଆନ୍‌‍ତେ ଆଦେ ମାଡ଼ିତନ୍ । 20 ବାତେଙ୍କ୍ ଇତ୍‍କେ ବାବାଲ୍ ମାର୍‍ଦିଙ୍କ୍ ପ୍ରେମ ମାଡ଼ିତନ୍, ମେଣ୍ଡେ ନିଜେ ବାତା ମାଡ଼ିତନ୍, ହାଉସାରେ ଅଂକିଙ୍କ୍‌ ତଅତିତଣ୍ଡ୍, ମେଣ୍ଡେ ମିଡ଼୍ ବେଦ୍‍ପୁଟୁଙ୍କ୍ ବାକ୍‍ୱା ଆଦ୍‍ତିଡ଼୍, ଅଦିନ୍‌ ମାଇଦିଙ୍କ୍ ଅଣ୍ଡ୍‌ ଅଂକିଙ୍କ୍‌ ହିଗାଙ୍କ୍ ମେଣ୍ଡେ ବେଡ଼୍‍ୟା ପାଡ଼ିୟ୍‍ ତତିତଣ୍ଡ୍ । 21 ବାବାଲ୍ ବେଦ୍‍ପୁଟୁଙ୍କ୍ ଡଲି ମାନ୍ଦାନଡ଼୍‍କିଙ୍କ୍ ତେୟ୍‍ସ୍‍ମେଣ୍ଡେ ଜିୱୁ ମାଡ଼ିତନ୍, ଆଦେ ରକମ୍ ମାର୍‍ଆନ୍‌ତେ ବେନ୍ ବେନଙ୍କ୍ ଇଚ୍ଛା ମାଡ଼ିତନ୍, ଅଡ଼୍‌‍କିଂଙ୍କ୍ ଜିୱୁ ମାଡ଼ିତନ୍ । 22 ମେଣ୍ଡେ, ବାବାଲ୍ ଆନ୍‌‍ତେ ବେନନାଦ୍ ବିଚାର୍ ମାଡ଼ଣ୍ଡ୍, ବିଚାର୍ ମାଡ଼ାନ୍ ମାଇଦିଙ୍କ୍ ଅଣ୍ଡ୍‌ ମାର୍‍ଦିଙ୍କ୍ ସାରେ ଅଦିକାର୍‌ ହିଦ୍‍ତଣ୍ଡ୍, ବେଲା ମାର୍‍ଦିଙ୍କ୍ ସନ୍‍ମାନ୍ ମାଡ଼ିତଡ଼୍ । 23 ବେନ ମାର୍‍ଦିଙ୍କ୍ ସମ୍ମାନ୍ ମାଡ଼ଣ୍ଡ୍, ଅଣ୍ଡ୍‌ ଅନ୍‌‍ୱାଦ୍ ମାଲ୍‍ସ୍‍ୱାଦାନ୍ ବାବାଙ୍କ୍ ଆନ୍‌‍ତେ ସମ୍ମାନ୍ ମାଡ଼ଣ୍ଡ୍ ।"

24 "ସତ୍ ନାନ୍ ମିକିଂଙ୍କ୍ କେତୁତାନ୍, ବେନ ନା ବାକ୍ୟ କେଞ୍ଜି ନା ପ୍ରେରଣାକର୍ତ୍ତାଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ସାରେଦିନାତ୍ ଜିୱୁନ୍‍ ଦର୍ସିକି ମିନ୍ଦେଣ୍ଡ୍, ମେଣ୍ଡେ ଅଣ୍ଡ୍‌ ବିଚାରିତ ଆୟ୍‍ୟକଟ ବେଲାନ୍ ଡଲାନାଦିଙ୍କ୍ ମେଣ୍ଡନ୍‍ରକମ୍‌ ଆସ୍‌ ଜିୱୁନ୍‍ତାଗ୍‍ ନେଙ୍ଗି ମିନ୍ଦେଣ୍ଡ୍ । 25 ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ହିସତ୍ ଦିନାମ୍ ୱାସମିନ୍ଦେ, ମେଣ୍ଡେ ଇଞ୍ଜେକ୍ ମିକା ହେୱ୍‍ସ୍‍ ମିନ୍ଦେ, ବେନ୍ ଦିନାମ୍ ତେ ଡଲ୍‍ତେନଡ଼୍ ଇଶ୍ୱର୍‌ତେ ମାର୍‍ଦେ ଲେଙ୍ଗ୍ କେଞ୍ଜିତଡ଼୍ ନୁ ବେନଡ଼୍ କେଞ୍ଜିତଡ଼୍, ଅଡ଼୍‌ ଜିୱୁନ୍‍ ଆଦ୍‍ତଡ଼୍ । 26 ବାତେଙ୍କ୍ ଇତ୍‍କେ ବାବାଲ୍ ବେଦ୍‍ପୁଟୁଙ୍କ୍ ଜିୱୁଣ୍ଡ୍‍ତାଦ୍ ୱେଡ଼୍‍କେ, ଆଦେପୁଟୁଙ୍କ୍ ମାର୍‍ଦିଙ୍କ୍ ଆନ୍‌‍ତେ ଜିୱୁଣ୍ଡ୍‍ତାଦ୍ ୱେଡ଼୍‍କେ ଆତ୍‍ତାଙ୍କ୍ ହିଦ୍‍ତଣ୍ଡ୍ । 27 ମେଣ୍ଡେ, ଅଣ୍ଡ୍‌ ନାରୁନ୍‍ପିଲେ ଆତ୍‍ତାଙ୍କ୍ ଅଣ୍ଡ୍‌ ଅଂକିଙ୍କ୍‌ ବିଚାର୍ ମାଡ଼ାନ୍ ଅଦିକାର୍‌‍ ହିତ୍‍ତଣ୍ଡ୍ । 28 ହିସର୍‍ତେ ଦାଦ୍‍ରେଲ୍‍ମାଟ୍, ବାତେଙ୍କ୍ ଇତ୍‍କେ ଦିନାମ୍ ୱାଦୁତେ ବେସୁଟ୍‌ ଡଲ୍‍ତେନଡ଼୍‍ ସାରେତଡ଼୍ ଅନ୍‌‍ୱାଦ୍ ଲେଙ୍ଗ୍ କେଞ୍ଜିତଡ଼୍, 29 ମେଣ୍ଡେ ଅଡ଼୍‌ ସମାଦିକନ୍‍ସ୍ ତେଦିତଡ଼୍, ବେନଡ଼୍ ଲେକେତ୍‍ ପାଡ଼୍‍ୟି ମାଡ଼ିମିନ୍ଦେଡ଼୍ ଅଡ଼୍‌ ମେଣ୍ଡଅନ୍‌‍ଦାମ୍ ତେଦି ଜିୱୁଣ୍ଡ୍ ଆଦ୍‍ତଡ଼୍ । କାରାପ୍ ପାଡ଼୍‍ୟି ମାଡ଼୍‍ତେନଡ଼୍ ମେଣ୍ଡନ୍‍ନ୍ଦାମ୍ ତେଦିତଡ଼୍ ନୁ ଦଣ୍ଡ୍ ଦର୍‍କିତ୍ ।"

30 "ନାନ୍ ନିଜେ କ୍ଷମତାତାଗାଙ୍କ୍‍ ବାତେଏ ମାଡ଼େପାର୍‍ୱଣ୍ଡ୍; ମାତର୍ ଇଶ୍ୱର୍‌ତେ ଗଟ୍ ଲେକାମ୍‍ତେ ନାନ୍ ବିଚାର୍ ମାଡ଼ିତାନ୍, ମେଣ୍ଡେ ନାୟାଦ୍ ବିଚାର୍ ଟିକ୍, ବାତେଙ୍କ୍ ଇତ୍‍କେ ନାନ୍ ନିଜ୍‍ତେ ଇଚ୍ଛା ସାଦନ୍ ମାଡ଼ାଙ୍କ୍ ଚେଷ୍ଟା ମାଡ଼କଟ୍ ନା ପ୍ରେରଣାକର୍ତ୍ତାନ୍ ଇଚ୍ଛା ସାଦନ୍ ମାଡ଼ାଙ୍କ୍ ଆଲ୍‍ସି ମାଡ଼ିତାନ୍ ।"

31 "ଯଦି ନାନ୍ ନିଜର୍ ବିଷୟ୍‍ତେ ନିଜେ ସାକ୍ଷ୍ୟ ହିଦ୍‍ତାନ୍, ଆଲାଇତ୍‍କେ ନା ସାକ୍ଷ୍ୟ ସତ୍ ପ୍ରମାନିତ୍ ଆୟ୍‍ୟ । 32 ବାତେଙ୍କ୍ ଇତ୍‍କେ ମେଣ୍ଡେ ୱେରଣ୍ଡ୍ ନା ବିଷୟ୍‍ତେ ସାକ୍ଷ୍ୟ ହିଦ୍‍ତଣ୍ଡ୍, ମେଣ୍ଡେ, ନା ବିଷୟ୍‍ତେ ଅନ୍‌‍ୱାଦ୍ ସାକ୍ଷ୍ୟ ସତ୍, ଆଦ୍ ନାନ୍ ପୁତ୍‍ତାନ୍ । 33 ✝୫:33 ଯୋହନ୍‌ ୧:୧୯-୨୭; 3:୨୭-3୦.ମିଡ଼୍ ଯୋହନ୍‌ତେ ଗାର୍‍ରେ କବର୍ ଆଦାନ୍ ନାରୁଙ୍କ୍ ରୟ୍‍ସ୍ ମିନ୍ଦେନି ନୁ ଅଣ୍ଡ୍‌ ସତ୍ ପାକେଙ୍କ୍ ସାକ୍ଷ୍ୟ ହିସମିନ୍ଦେଣ୍ଡ୍; 34 ବାତେଙ୍କ୍ ଇତ୍‍କେ ନାନ୍ ନାରୁଡ଼ାଗାଙ୍କ୍ ସାକ୍ଷ୍ୟ ଗ୍ରହନ୍ ମାଡ଼ନ୍, ମିକ୍‍ ବେଦ୍‍ପୁଟୁଙ୍କ୍ ପରିତ୍ରାଣ୍ ଦର୍‍କିତ୍‍ତେ, ଆଦିନ୍ ମାଇଦିଙ୍କ୍ ହିଦ୍ ସାରେ କେସମିନ୍ଦେନ୍ । 35 ଯୋହନ୍‌ ୱେରଣ୍ଡ୍ ନିଡ଼୍‍ତାନାଦ୍ ନୁ ଗାଟି ୱେୟ୍‍ସ୍‍ତେ କୁପି ରକମ୍ ମାତ୍‍ତଣ୍ଡ୍, ମେଣ୍ଡେ ମିଡ଼୍ ସୁଦୁଟ୍ ସମୟ୍‍ତେ ଅନ୍‌ ୱେୟ୍‍ସିନେ ସାର୍‍ଦେ ମାଡ଼ାନ୍ ମାଇଦିଙ୍କ୍ ଇଚ୍ଛା ମାଡ଼୍‍ତିଡ଼୍ । 36 ବାତେଙ୍କ୍ ଇତ୍‍କେ ଯୋହନ୍‌ତେ ସାକ୍ଷ୍ୟ ୱିଡ଼୍‍ସି ନାୟାଦ୍ ଇସରେ ସାକ୍ଷ୍ୟ ମିନ୍ଦେ, ବାତେଙ୍କ୍ ଇତ୍‍କେ ବାବାଲ୍ ନାକିଂଙ୍କ୍ ବେନ୍ ପାଡ଼ିୟି ତେର୍‍ସ୍‍ପାଙ୍କ୍ ହିସମିନ୍ଦେଣ୍ଡ୍, ବେନ୍‍ସାରେ ପାଡ଼ିୟି ନାନ୍ ମାଡ଼ମିନ୍ଦେନ୍, ବାବାଲ୍ ନାକିଂଙ୍କ୍ ରୟ୍‍ସ୍ ମିନ୍ଦେଣ୍ଡ୍ ଇଞ୍ଜ ହାଉସାରେ ନା ବିଷୟ୍‍ତେ ସାକ୍ଷ୍ୟ ହିସମିନ୍ଦେ । 37 ✝୫:3୭ ମାତିଉ 3:୧୭; ମାର୍କ ୧:୧୧; ଲୁକ 3:୨୨.ମେଣ୍ଡେ, ବେନ ବାବାଲ୍ ନାକିଂଙ୍କ୍ ରୟ୍‍ସ୍ ମିନ୍ଦେଣ୍ଡ୍, ଅଣ୍ଡ୍‌ ନା ବିଷୟ୍‍ତେ ସାକ୍ଷ୍ୟ ଇସ୍‌‍ମିନ୍ଦେନ୍ । ମିଡ଼୍ ବେସୁଙ୍କ୍‍କେ ବା ଅନ୍‌‍ୱାଦ୍ ଲେଙ୍ଗ୍ କେଞ୍ଜ୍‍ୱିଡ଼୍ ବା ଅନ୍‌‍ୱାଦ୍ ମକମ୍ ଉଡ଼୍‍ୱିଡ଼୍‍ । 38 ମେଣ୍ଡେ ଅନ୍‌‍ୱାଦ୍ ବାକ୍ୟତିଙ୍କ୍‌ ମିଇ ହୃଦୟ୍‍ତାଗ୍ ପଡ଼ିୟ୍ ହିୱିଡ଼୍‍, ବାତେଙ୍କ୍ ଇତ୍‍କେ ଅଣ୍ଡ୍‌ ବେନଙ୍କ୍ ରହତଣ୍ଡ୍, ଅଂକିଙ୍କ୍‌ ମିଡ଼୍ ବିଶ୍ୱାସ୍ ମାଡ଼୍‍ୱିଡ଼୍ । 39 ମିଡ଼୍ ଦର୍ମଶାସ୍ତ୍ରତିଙ୍କ୍ ମେହେକ ମିନ୍ଦେଡ଼ି, ବାତେଙ୍କ୍ ଇତ୍‍କେ ଆଗାଙ୍କ୍ ସାରେଦିନାତ୍ ଜିୱୁନ୍‍ ଦର୍‍କିତ୍‍ତେ ଇଞ୍ଜ ହେର୍କା ମାଡ଼ମିନ୍ଦେଡ଼ି, ମେଣ୍ଡେ, ଆଦ୍ ଦର୍ମଶାସ୍ତ୍ର ନା ବିଷୟ୍‍ତେ ସାକ୍ଷ୍ୟ ହିସମିନ୍ଦେ । 40 ବାତେଙ୍କ୍ ଇତ୍‍କେ ମିଡ଼୍ ଜିୱୁନ୍‍ ଦର୍‍କାନ୍ ମାଇଦିଙ୍କ୍ ନା ଗାର୍‍ରେ ୱାଦାଙ୍କ୍ ଇଚ୍ଛା ମାଡ଼୍‍ୱିଡ଼୍ ।"

41 "ନାନ୍ ନାରୁଡ଼ାଗାଙ୍କ୍ ଗୌରବ୍ ଆଦାନଙ୍କ୍ ଇଚ୍ଛା ମାଡ଼ନ୍‌, 42 ମାତର୍ ନାନ୍ ମିକିଂଙ୍କ୍ ପୁଞ୍ଜ୍ ମିନ୍ଦେନ୍, ମିଡ଼୍ ବେଦ୍ ରକମ୍ ନାରୁଡ଼ି, ମିଇ ଜିୱୁତେ ଲୋପେ ଇଶ୍ୱର୍‌ତେ ସେଙ୍ଗେ ପ୍ରେମ ଇଲା । 43 ନାନ୍ ନା ବାବାନ୍ ପେଦେର୍‍ତେ ୱାସ୍‍ମିନ୍ଦେନ୍‍, ମେଣ୍ଡେ ମିଡ଼୍ ନାକିଂଙ୍କ୍ ଗ୍ରହନ୍ ମାଡ଼୍‍ୱିଡ଼୍; ମେଣ୍ଡେଅର୍‍ତୁନ୍ ଯଦି ନିଜେତ୍ ପେଦେର୍‍ତେ ୱାଦ୍‍ତଣ୍ଡ୍, ଆଲାଇତ୍‍କେ ମିଡ଼୍ ଅଂକିଙ୍କ୍‌ ଗ୍ରହନ୍ ମାଡ଼ୁତିଡ଼୍ । 44 ମିଡ଼୍ ବେଦ୍‍ପୁଟୁଙ୍କ୍ ନାକିଂଙ୍କ୍ ବିଶ୍ୱାସ୍ ମାଡ଼୍‍ପାର୍‍ଦ୍‍ତିଡ଼୍‍ ? ମିଡ଼୍ ନିଜେ ନିଜେତାଗାଙ୍କ୍ ଗୌରବ୍ ଗ୍ରହନ୍ ମାଡ଼ମିନ୍ଦେଡ଼ି, ମେଣ୍ଡେ ୱେରଡ଼୍ ମାତର୍ ଇଶ୍ୱର୍‍ତାଗାଙ୍କ୍‍ ବେନ୍ ଗୌରବ୍, ଆଦ୍ ଦର୍‍ସ୍କାଙ୍କ୍ ଚେଷ୍ଟା ମାଡ଼୍‍ୱିଡ଼୍ । 45 ନାନ୍ ଯେ ବାବାନ୍ ମୁନେ ମିଇ ବିରୁଦ୍‍ତେ ଅବିଯଗ୍‍ ମାଡ଼ିତାନ୍, ଇଦ୍ ହେର୍କା ମାଡ଼୍‍ମାଟ୍; ବେନ୍ ମୋଶାନାଗ୍‍ ମିଡ଼୍ ଆଶେ ନେହେସ୍ ମିନ୍ଦେଡ଼ି, ଅଣ୍ଡ୍‌ ମିଇ ବିରୁଦ୍ଦ୍‌ତେ ଅବିଯଗ୍ ମାଡ଼ମିନ୍ଦେଣ୍ଡ୍ । 46 ମିଡ଼୍ ଯଦି ମୋଶାଙ୍କ୍ ବିଶ୍ୱାସ୍ ମାଡ଼େଡ଼ି, ଆଲାଇତ୍‍କେ ନାକିଂଙ୍କ୍ ବିଶ୍ୱାସ୍ ମାଡ଼େଡ଼ି, ବାତେଙ୍କ୍ ଇତ୍‍କେ ଅଣ୍ଡ୍‌ ନା ବିଷୟ୍‍ତେ ଲେକିମିନ୍ଦେଣ୍ଡ୍ । 47 ବାତେଙ୍କ୍ ଇତ୍‍କେ ମିଡ଼୍ ଯଦି ମୋଶାଲ୍ ଲେକ୍‍ତାଦ୍‍ ବାକ୍ୟତିଙ୍କ୍ ବିଶ୍ୱାସ୍ ମାଡ଼୍‍ୱିଡ଼୍, ଆଲାଇତ୍‍କେ ବେଦ୍‍ପୁଟୁଙ୍କ୍ ନାୟାଦ୍ ବାକ୍ୟ ବିଶ୍ୱାସ୍ ମାଡ଼ିତିଡ଼୍ ?"