1 ଅନ୍‌‍ଦାମ୍ ବିଶ୍ରାମ୍‍ଦିନାତେ ଜିସୁ ୱେରଣ୍ଡ୍ ପାରୂଶୀ ନାରୁଡ଼୍ ନେତାନ୍ ଲୋନ୍‌ ତିନ୍ଦାନ୍ ମାଇଦିଙ୍କ୍ ଆତ୍‍ତଣ୍ଡ୍, ମେଣ୍ଡେ ଅଡ଼୍‌‍ ଆଗେ ଜିସୁଙ୍କ୍ ସାୟ୍ ଲକ୍ଷ ମାଡ଼ି ଉଡ଼ମାତ୍‍ତଡ଼୍ । 2 ଆସୁଟେ ଉଡ଼େ, ଜିସୁନ୍ ମୁନେ ୱେରଣ୍ଡ୍ ଜଲଦର ରୋଗ୍‍ତେ ନାରୁନ୍‌ ମାତ୍‍ତଣ୍ଡ୍ । 3 ଜିସୁ ପାରୂଶୀନଡ଼କ୍ ନୁ ଦର୍ମଶାସ୍ତ୍ରୀନଡ଼କ୍ କେତ୍‍ତଣ୍ଡ୍, ବିଶ୍ରାମ୍‍ଦିନାତେ ସୁସ୍ଥ ମାଡ଼ାନାଦ୍ ଟିକ୍ ନିୟମ୍‍ ନା ଆୟ ? ବାତେଙ୍କ୍ ଇତ୍କେ ଅଡ଼୍‌‍ କଟ ଆଶେ ମାତ୍‍ତଡ଼୍ ।

4 ଆସୁଟେ, ଜିସୁ ଆଦ୍ ନାରୁଙ୍କ୍ ପୟିସ୍ ସୁସ୍ଥ ମାଡ଼୍‍ତଣ୍ଡ୍ ନୁ ରୟ୍‍ସିତ୍‍ ତଣ୍ଡ୍ । 5 ✝ଆସୁଟେ, ଜିସୁ ଅଡ଼୍‌‍କିଂଙ୍କ୍ ଉତ୍ତର୍‌ ଇସ୍‌ କେତ୍‍ତଣ୍ଡ୍, "ମି ଲୋପେଙ୍କ୍ ବେନନ୍ ମାର୍‍ କି ଗଡ୍‌କନ୍ଦ୍‌ ବିଶ୍ରାମ୍‍ଦିନ୍‍ ତେ ନୂୟ୍‍ଦାଗ୍‍ ରାଲ୍‍କେ, ମିଡ଼୍ ବାତେଏ ତାକିଂଙ୍କ୍ ସାଙ୍ଗେ ସାଙ୍ଗେ ତେୟ୍‍ସ୍ ତାଡ଼୍‍ୱିଡ଼୍ ?"

6 ମେଣ୍ଡେ ଅଡ଼୍‌‍ ଆଦ୍ ବିଷୟ ତେ ବାତ୍ ଉତ୍ତର୍ ଇଦ୍ ପାର୍‍ୱଡ଼୍ ।

7 ଜିସୁ ଉଡ଼୍‍ତଣ୍ଡ୍ ଯେ, ବେସ୍‍ତୁଡ଼୍ କୁଟ୍‍ମାମ୍‍ ତଡ଼୍ କୁଦାନ୍‍ ମାଇଦିଙ୍କ୍ ସାୟେତ୍ କେତ୍‌ ମେହ୍‍କ ମାତ୍‍ତଡ଼୍ । ଆସୁଟେ, ଜିସୁ ଅଡ଼୍‌‍କିଂଙ୍କ୍ ହି ୱେଷଡ଼୍ କେତ୍‍ତଣ୍ଡ୍, 8 "ଯଦି ୱେରଣ୍ଡ୍ ନାରୁଡ଼୍ ନିକିଂଙ୍କ୍ ପେଣ୍ଡୁଲ୍‍ତାଗ୍ କାର୍‍ଙ୍ଗୁତଣ୍ଡ୍, ଆଲାତ୍କେ ସାର୍‍ତିଙ୍କ୍ ମୁକ୍ୟ କୁର୍‍ସ୍‍ତାଗ୍‍ କୁଦ୍‍ମା । ବାତେଙ୍କ୍ ଇତ୍କେ ଆଦ୍ ନାରୁଡ଼୍ ନିକିଂଙ୍କ୍‌ ଆନ୍ତେ ଅଦିକ୍‌ ବେଡ଼୍‍ୟ୍ ନାରୁଡ଼୍ କାର୍‍ଙ୍ଗି ମାନ୍‍ତଣ୍ଡ୍ । 9 ନିମ୍‍ ଯଦି ସାର୍‍ତିଙ୍କ‍ ଅନ୍‌ ମୁକ୍ୟ ଆସନ୍ ତାଗ୍ କୁଦି ମାନ୍‍ତି, ଆଲାତ୍କେ ନିକିଂଙ୍କ୍ କାର୍‍ଙ୍ଗିମାନ୍ଦାନ୍ ନାରୁଡ଼୍ ୱାସ୍ କେତିତଣ୍ଡ୍, ହି ନାରୁଙ୍କ୍ ନିୟାଦ୍ ଆସନ୍ ହିମ୍ । ଆସୁଙ୍କ୍ ନିକିଂଙ୍କ୍ ଗାଟି ଅପ୍‍ମାନ୍ ଆଦ୍ ତେ । 10 ବେସୁଙ୍କ୍‍ ୱେରଣ୍ଡ୍ ନାରୁଡ଼୍ ନିକିଂଙ୍କ୍ ବଜିତାଗ୍ କାର୍‍ଙ୍ଗୁତଣ୍ଡ୍ ଆସୁଟେ, ନିମେ ୱେରଡ଼୍ ସୁଦୁରାଦ୍ ଆସନ୍ ତାଗ୍ କୁଦ୍ । ଆସୁଙ୍କ୍ ନିକିଂଙ୍କ୍ କାର୍‍ଙ୍ଗ୍‍ତେ ନାରୁଡ଼୍ ୱାସ୍ ନିକିଂଙ୍କ୍ କେତିତଣ୍ଡ୍, ହୋ ସାଙ୍ଗ, ନିମେ, ହିଗେ କୁଦକଟ ସୁଦୁର୍ ମୁନ୍‍ୱାସ୍ ହି ସାୟେତ୍ ଆସନ୍ ତାଗ୍ କୁଦ୍‍ । ଆସୁଙ୍କ୍ ବାଗାତଡ଼୍ ୱାସ୍‍ମାନ୍ଦାନ୍ କୁଟ୍‍ମାମ୍‍ ଆନ୍‌‍ତେ ନିକିଂଙ୍କ୍ ସମ୍ମାନ୍ ଇଦ୍‍ତଡ଼୍ । 11 ✝ବେନ୍ ନାରୁଡ଼୍ ନିଜ୍‍ତିଙ୍କ୍ ମହାନ୍ ଇଞ୍ଜ ଆଲ୍‍ସିତିଡ଼୍, ଅଂକିଙ୍କ୍‌ ହୀନ ମାଡ଼୍‍ୱେୟ୍‍ତିତ୍ । ବେନ୍ ନାରୁଡ଼୍ ନିଜ୍‍ତିଙ୍କ୍ ହୀନ ଇଞ୍ଜ ଆଲ୍‍ସିତିଡ଼୍, ଅଂକିଙ୍କ୍‌ ମହାନ୍ ମାଡ଼୍‍ୱେୟ୍‍ତିତ୍ ।"

12 ଜିସୁ ଅଂକିଙ୍କ୍‌ କାର୍‍ଙ୍ଗି ମାନ୍ଦାନ୍ ପାରୂଶୀ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, "ନିମେ ବେନଙ୍କ୍ ଆୟି ପାୟାଲ୍ ବା ନାର୍କାତେ ତିନ୍ଦାଙ୍କ୍ କାର୍‍ଙ୍ଗ୍‍ତେ ୱେୟ୍ ମାତର୍ ନି ଦାଦାଲ୍‌, ସାଙ୍ଗଙ୍କ୍, କୁଟୁମାମ୍‍ ସାଉକାର୍‍ରିଡ଼୍ ନୁ ଗାରେତଡ଼୍ ନାରୁଡ଼୍‍କିଂଙ୍କ୍ କାର୍‍ଙ୍ଗ୍‍ମାଟ୍, ବାତେଙ୍କ୍ ଇତ୍କେ ମେଣ୍ଡନ୍‍ଦାମ୍ ଦାମ୍ ଅଡ଼୍‌‍ ଆନ୍‌‍ତେ ନିକିଂଙ୍କ୍ ଅଡ଼୍‌‍ ତ ତିନ୍ଦାଙ୍କ୍ କାର୍‍ଙ୍ଗି ତଡ଼୍ । ଆସୁଙ୍କ୍ ନିମେ ନିୟାଦ୍ ସାରେଦାନ୍ ଦର୍‍ସ୍‍ତିନ୍ । 13 ବାତେଙ୍କ୍ ଇତ୍କେ ବୋଜି ହିଦାନ୍ ଦିନାମ୍ ତେ ଗୋରିବ୍, ପଙ୍ଗୁ, କୁଟାଲଡ଼୍‍କ୍ ନୁ କାନାଲଡ଼୍‍କିଙ୍କ୍ କାର୍‍ଙ୍ଗାଟ୍ । 14 ହି ନାରୁଡ଼୍‍କିଂଙ୍କ୍ ବାତା ହିଲ୍‍ୱାଙ୍କ୍ ସାରେବଦଲ୍‍ ତେ ବାତା ଇଦ୍ ପାର୍‍ୱଡ଼୍ । ଆଲାତ୍କେ ମି ମାଇଦିଙ୍କ୍ ଆର୍ଶିବାଦ୍ ଆଦ୍ ତେ । ବାତେଙ୍କ୍ ଇତ୍କେ ବେସୁଙ୍କ୍‍ ଦାର୍ମିକ୍ ନାରୁଡ଼୍ ଡଲ୍‍ତେ ନାରୁଡ଼୍ ଲୋପେଙ୍କ୍ ତେଦିତଡ଼୍, ଆଦ୍ ଦିନାମ୍ ତେ ମିଡ଼୍ ମିୟାଦ୍ ପୁରସ୍କାର୍ ଦର୍‍କିତ୍ ।"

15 ଜିସୁନ୍ ତ ତିନ୍ଦାଙ୍କ୍ କୁଦି ମାନ୍ଦାନ୍ ନାରୁଡ଼୍ ଲୋପେଙ୍କ୍ ୱେରନ୍ ନାରୁଡ଼୍ ହି ସାରେ ଗଟି କେଞ୍ଜି ଜିସୁଙ୍କ୍ କେତ୍‍ତଣ୍ଡ୍, "ପରମେଶ୍ୱର୍‍ତେ ରାଜ୍ୟତାଗ୍ ତିନ୍ଦାନ୍ ମାଡ଼ାନ୍ ନାରୁଡ଼୍ ଗାଟି କୁସି ବା ସାର୍‍ଦା ଆଦ୍‍ତନ୍ ।"

16 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, ୱେରଣ୍ଡ୍ ନାରୁଡ଼୍ ୱେରଡ଼୍ ବେଡ଼୍‍ୟାଦ୍‍ ବଜି ମାଡ଼୍‍ତଣ୍ଡ୍ ନୁ ନାର୍ଗେ ନାରୁଡ଼୍‍କିଂଙ୍କ୍ କାର୍‍ଙ୍ଗ୍ ତଣ୍ଡ୍ । 17 ତିନ୍ଦାନ୍ ଦିନାମ୍ ଆଦାଙ୍କ୍ ଅଣ୍ଡ୍‌ କୁଟ୍‍ମାମ୍ କାର୍‍ଙ୍ଗାନ୍ ମାଇଦିଙ୍କ୍ ନିଜର୍ ଚାକର୍‍ତିଙ୍କ୍ ରହ୍‍ତଣ୍ଡ୍, ୱାଡ଼ାଟ୍, ତିନ୍ଦାନାଦ୍ ସାରେ ତିଆର୍‍ତେ ଆତ୍‍ତେ । 18 ବାତେଙ୍କ୍ ଇତ୍କେ କାର୍‍ଙ୍ଗ୍‍ତେ ନାରୁଡ଼୍ କେତ୍‍ତଡ଼୍ ଯେ, ଅଡ଼୍‌‍ ଆଦେ ପାର୍‍ୱଡ଼୍ । ମୁନେ ନାରୁଡ଼୍ କେତ୍‍ତଣ୍ଡ୍, ନାନେ ଇଞ୍ଜେ ୱେରନ୍ ୱାୟା ଆସ୍‍ତାନ୍ । ଆଦ୍ ୱାୟାଙ୍କ୍ ଉଡ଼ାନ୍ ମାଇଦିଙ୍କ୍ ନାକିଂଙ୍କ୍ ଇଞ୍ଜ୍ ଆଦ୍ ୱେୟ୍‍ତିତ୍ । ଦୟା ମାଡ଼ି ନାକିଂଙ୍କ୍ କ୍ଷମା ହିମ୍ । 19 ମେଣ୍ଡେ ୱେରଣ୍ଡ୍ କେତ୍‍ତଣ୍ଡ୍, ନାନେ ଏଇଙ୍ଗ୍ ହେଣ୍ଡ୍‍କ୍ ଗଡ୍‌କନ୍ଦା ଆସିମିନ୍ଦେନ୍ । ନାନେ ଆୱିଙ୍କ୍ ପରିକ୍ଷା ମାଡ଼ାନ୍ ମାଇଦିଙ୍କ୍ ଆଦ୍‍ଦାନ୍ ମିନ୍ଦେ । ଦୟା ମାଡ଼ି ନାକିଂଙ୍କ୍ କ୍ଷମା ମାଡ଼ା । 20 ତୃତୀୟ ନାରୁଡ଼୍ କେତ୍‍ତଣ୍ଡ୍, ନାନେ ପୁଃନେ ପୁଃନେ ପେଣ୍ଡୁଲ୍ ଆତ୍‍ତାନ୍‍, ନାନ୍ ଆଦ୍‍ପାର୍‍ୱନ୍ ।

21 ଆସୁଟେ, "ଚାକର୍ ମାଲ୍‍ସ୍ ୱାସ୍, ମାଲିକ୍‍ତିଙ୍କ୍ ସାର୍‍ରେଗଟି କେସିତ୍‍ତଣ୍ଡ୍, ମାଲିକ୍ ଆଦ୍ ଗଟି କେଞ୍ଜି ଗାଟି କପାମ୍ ଆତ୍‍ତଣ୍ଡ୍ ବା, କେତ୍‍ତଣ୍ଡ୍, ସିଟ୍‍ପାଟ୍ ନାର୍ ଗଲିକିନାଗ୍ ଆଞ୍ଜ୍ ଦରିଦ୍ର, ପଙ୍ଗୁ, କାନାଲଡ଼କ୍ ନୁ କୁଟା ନାରୁଡ଼୍‍କିଂଙ୍କ୍ କାର୍‍ଙ୍ଗି ତାଡ଼ାଟ୍ । 22 ପେର୍‍କେ ଚାକର୍ ମାଲ୍‍ସ୍ ୱାସ୍ କେତ୍‍ତଣ୍ଡ୍, ମାଲିକ୍ ନିମେ ବାତ୍ କେତ୍‍ତିନ୍, ଆଦ୍ ନାନେ ମାଡ଼୍‍ତାନ୍ । ମେଣ୍ଡେ, ପେର୍କେ ନାରୁଡ଼୍ ମାଇଦିଙ୍କ୍ ପଡ଼ିୟେ ମାୟ୍‍ତା । 23 ମାଲିକ୍ ଚାକର୍‍ତିଙ୍କ୍ କେତ୍‍ତଣ୍ଡ୍, ରାଜଆର୍‍ତା ନୁ ନାର୍‍ଦେ ଆର୍‍ଦା ଆଞ୍ଜ୍ । ଆଗେ ମାନ୍ଦାନ୍ ନାରୁଡ଼୍‍କିଂଙ୍କ୍ ୱାଦାନ୍ ମାଇଦିଙ୍କ୍ କେଲ୍‍ମ୍ । ନାନେ ଆଲ୍‍ସୁତାନ୍, ନା ଲୋନ୍‌‍ ପୁରାପୁରି ନିଣ୍ଡି ଇଞ୍ଜ । 24 ନାନ୍ ମି ସାରେତଡ଼୍‌କିଂଙ୍କ୍ କେତୁତାନ୍, ବଜିତାଗ୍ କାର୍‍ଙ୍ଗ୍ ତେ ନାରୁଡ଼୍ ଲୋପେଙ୍କ୍ ବେନ ନାୱାଦ୍ ବଜି ତିନ୍ଦାଙ୍କ୍ ପାର୍‍ୱଡ଼୍ ।"

25 ଅନ୍‌‍ଦାମ୍ ନାର୍ଗେ ନାରୁଡ଼୍ ଜିସୁନ୍ ତ ଆଞ୍ଜ ମାତ୍‍ତଡ଼୍ । ଜିସୁ ନାରୁଡ଼୍‍କିଂଙ୍କ୍ କେତ୍‍ତଣ୍ଡ୍, 26 ✝ଯଦି ୱେରଣ୍ଡ୍ ନାରୁଡ଼୍ ନା ଗାର୍‍ରେ ୱାଦ୍‍ତଣ୍ଡ୍, ଯଦି ନାକିଂଙ୍କ୍‍ ୱିଡ଼୍‍ସି ତେ ୟାୟ୍‍ବାବାଙ୍କ୍, ମୁତ୍‍ତେ, ପିଲାଙ୍କ୍, ଏଲାଡ଼୍‍ ତାମୁଣ୍ଡ୍‌ତିଙ୍କ୍‌ ଜିୱୁଣ୍ଡ୍‍ତେ ପ୍ରେମ୍ ମାଡ଼ମାନ୍‍ତଣ୍ଡ୍, ଆସତ୍‍ ନାରୁଡ଼୍ ହିତ୍‍କେ ନା ଶିଷ୍ୟ ଆଦ୍ ପାର୍‍ୱଣ୍ଡ୍ । 27 ✝ୱେରଣ୍ଡ୍ ନାରୁଡ଼୍ ନିଜର୍ କ୍ରୁଶତିଙ୍କ୍ କାଞ୍ଜି ନା ପେର୍‍କେ ତାକକଟ୍‍ ମାତ୍‍କେ, ଆସତ୍‍ ନାରୁଡ଼୍ ନା ଶିଷ୍ୟ ଆଦ୍ ପାର୍‍ୱଣ୍ଡ୍ ।

28 ମିଡ଼୍ ଯଦି କେପାନ୍ ଲୋନ୍‌ ମାଡ଼ାଙ୍କ୍ ଇଚ୍ଛା ମାଡ଼ୁତିଡ଼୍, ଆଲାତ୍କେ ମିଡ଼୍ କୁଦି ମୁନେ ଚିହ୍ନେ ମାଡ଼ାନ୍ ମିନ୍ଦେ ଯେ, ଇଦିନ୍‍ ମାଇଦିଙ୍କ୍ ବେସର୍ କର୍ଚ୍ଚ ଆଦ୍‍ତେ । ମିଡ଼୍ ହିସାପ୍ ମାଡ଼ି ଉଡ଼ାନ୍ ମିନ୍ଦ୍ ଯେ, ପାଡ଼ିୟି ମାଡ଼ାନାଦ୍ ତେର୍‍ନା ଯାକ ମିୟାଗ୍ ଡାବ୍ ମିନ୍ଦେ କି ଇଲେ । 29 ବାତେଙ୍କ୍ ଇତ୍କେ ଅଣ୍ଡ୍‌ ଯଦି ମୁର୍ସ ମାଡ଼ି ଲୋନ୍‌‍ ତେର୍‍ସ୍‍ପେ ପାର୍‍ୱଣ୍ଡ୍, ସାର୍‍ତଡ଼୍ ଆଦିଙ୍କ୍ ଉଡ଼ାନ୍ ନାରୁଡ଼୍ ଅଂକିଙ୍କ୍‌ ପରିହାସ୍ ମାଡ଼ିତଡ଼୍, 30 ଅଡ଼୍‌‍ କେତିତଡ଼୍, ହି ନାରୁଣ୍ଡ୍ ତିଆର୍ ମାଡ଼୍‍ତଣ୍ଡ୍ ବାତେଙ୍କ୍ ଇତ୍କେ ତେର୍‍ସ୍‍ପାଙ୍କ୍ ପାର୍‍ୱଣ୍ଡ୍ ।

31 ୱେରଣ୍ଡ୍ ରାଜାଲ୍‍ ମେଣ୍ଡେଅର୍‍ତୁନ୍‍ ରାଜାନ୍ ବିରୁଦ୍ ତେ ଯୁଦ୍‌ ମାଡ଼ାଙ୍କ୍ ତିଆର୍ ଆଦ୍‍ତନ୍ । ତାମ୍ ବିରୁଦ୍ ତେ ନିଜର୍ କୁଡ଼ିଏ ହଜାର୍‍ ସୌନ୍ୟଡ଼୍‍କ୍ ପୟ୍‍ସ୍ ୱାଦାନ୍ ରାଜାନ୍ ତ ନିଜର୍ ୱେରନ୍ ରାଜା ଦଶ୍‍ହଜାର୍‍ ସୌନ୍ୟଡ଼୍ ଆସ୍ କୁଡ଼ିଏ ହଜାର୍‌ ସୈନିଡ଼୍ ପୟିସ୍ ୱାଦାନ୍ ରାଜାନ୍ ତଡ଼୍ ଯୁଦ୍‌ ମାଡ଼ାଙ୍କ୍ ପାର୍‍ଦ୍‍ତଡ଼୍ କି ଇଲେ, ଆଦ୍ ବାତେଏ ଅଣ୍ଡ୍‌ ମୁନେ କୁଦି ଆଦ୍ ବିଷୟତିଙ୍କ୍ ହେର୍କା ମାଡ଼ଣ୍ଡ୍ କି ? 32 ଯଦି ପାର୍‍ୱଡ଼୍, ଆଲାତ୍କେ ବିରଦି ରାଜାଲ୍‍ ଗାଟି ଯେକା ମାନ୍ଦାନ୍ ୱେୟେ କେ ଅନ୍‌‍ଗାରେ ବେସ୍‍ତୁଡ଼୍ ନାରୁଡ଼୍‍କିଂଙ୍କ୍ ରୟ୍‍ସ୍‍ ପାର୍‍ୱମ୍‍ ଇଞ୍ଜ କେସିଦ୍‍ ତଡ଼୍ । 33 ଆଦ୍ ପୁଟୁଙ୍କ୍ ମି ଲୋପେଙ୍କ୍ ବେନ ଯଦି ନିଜର୍ ବାତ୍‍ତେବା ୱିଡ଼୍‍ସଣ୍ଡ୍, ଆଲାତ୍କେ ଅଣ୍ଡ୍‌ ନା ଶିଷ୍ୟ ଆଦ୍ ପାର୍‍ୱଣ୍ଡ୍ ।

34 "ଅୱଡ଼୍‌ ତ ସାୟେ; ବାତେଙ୍କ୍ ଇତ୍କେ ଅୱଡ଼୍‌ ଯଦି ତାନ୍ କାର୍‌ଅ ହାରାମାଡ଼ିତ୍‍, ଆଲାତ୍କେ ତାକିଂଙ୍କ୍ ବେଦ୍‍ପୁଟୁଙ୍କ୍ ଅୱଡ଼୍‌ ମାଡ଼୍ ପାର୍‍ଦ୍‍ତାଡ଼୍ ? 35 ଆଦ୍ ବୁମ୍ ବା ମାଣ୍ଡୁଲ୍ ଦିବେତ୍‍ ମାଇଦିଙ୍କ୍ ଆନ୍‌‍ତେ ଲେକେତ୍ ଆୟ୍‍ୟ, ତାକିଂଙ୍କ୍ ବାୟିଦେ ହେସିଦ୍‍ତଡ଼୍ । ବେନଙ୍କ୍ କେଞ୍ଜାଙ୍କ୍ କେୱୁ ମିନ୍ଦେ, ଅଣ୍ଡ୍‌ କେଞ୍ଜିଣ୍ଡ୍ ।"