ଜିସୁନ୍ ଜନମ୍
1 ଆଦ୍ ଦିନାମ୍ତେ ରୋମ୍ ରାଜ୍ୟ ସମ୍ରାଟ୍ ଅଗଷ୍ଟ କାଇସର୍ତେ ତଡ଼୍ ଦେଶ୍ତେ ସାରେ ନାରୁଡ଼୍ ପେଦେର୍ ଲେକାନ୍ ସେଙ୍ଗେ ଗଟ୍ କେତାନଙ୍କ୍ । 2 ସିରିଆତେ ଶାସନ୍ କର୍ତ୍ତାଲ୍ କ୍ୱିରୀଣିୟତେ ୱେଲେ ମୁନେ ଦାମ୍ଇଦ୍ ପେଦେର୍ ଲେକାନାଲ୍ଦ୍ ଆସ୍ ମାତ୍ତେ । 3 ଆଦିନ୍ ସେଙ୍ଗେ ସାରେତଡ଼୍ ପେଦେର୍ ଲେକାମାଡ଼ାନ୍ ସେଙ୍ଗେ ନିଜେ ନିଜେ ନଗର୍ତାଗ୍ ଆଦ୍ତଡ଼୍ ।
4 ମେଣ୍ଡ, ଯୋଷେପ୍ ମିକା ପେଦେର୍ ଲେକାମାଡ଼ାନ୍ ସେଙ୍ଗେ ମରୀୟମ୍ତଡ୍ ଗାଲିଲୀତେ ନାଜରିତିୟ ନଗର୍ ତାଗାଙ୍କ୍ ଯିହୁଦା ନାର୍ଦେ ବେତ୍ଲିହିମ୍ ପେଦେର୍ ଡ଼ାଦ୍ ଦାଉଦ୍ ତେ ନଗର୍ତାଗ୍ ଆତ୍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍ ଦାଉଦ୍ ତେ ବଂଶ ନୁ ନାର୍ଦେ ନାରୁଡ଼୍ ମାତ୍ତଣ୍ଡ୍; 5 ଅନ୍ ତଡ଼୍ ମରୀୟମ୍ ତେ ଯୱ ଆସ୍ ମାତ୍ତେ ନୁ ଆଦ୍ ଡଙ୍କେତ୍ ମାତ୍ତେ । 6 ଅଡ଼୍ ଆଦ୍ ପଡ଼ିୟେତାଗ୍ ମାନ୍ଦାନ୍ ୱେଲେ ତାନ୍ୱାଦ୍ ପିଲେ ଜନମ୍ ମାଡ଼ାନ୍ ଦିନାମ୍ ୱାସ୍ ହେୱେତେ, 7 ମେଣ୍ଡେ ଆଦ୍ ତାନ୍ ମୁନେ ଜନମ୍ତେ ମାର୍ ଜନମ୍ ମାଡ଼୍ତେ ନୁ ଅଂକିଙ୍କ୍ ସିଲେତଡ୍ ଉତ୍ତି ଗୋଡ୍ କଟାମ୍ ତାଗ୍ ପଡ଼୍ପ୍ତଡ଼୍, ବାତେଙ୍କ୍ ଇତ୍କେ ବାଡ଼ା ଲୋନ୍ତାଗ୍ ଅଡ଼୍ ସେଙ୍ଗେ ପଡ଼ିୟ୍ ଇଲ୍ୱେ ମାତ୍ତେ ।
ମେଣ୍ଢା ପଡ଼ପାନଡ୍ ଜିସୁନ୍ ଜନମ୍ ତେ କାବୁର୍ ଦର୍କ୍ତେ
8 ଆଦ୍ ପଡ଼ିୟେତାଗ୍ ବେସ୍କ୍ତୁଡ଼୍ ମେଣ୍ଢା ମେଇତାନଡ୍ ବାଇଦେ ମାଞ୍ଜ୍ ଇକାଡ଼୍ ତେ ତାମ୍ ମେଣ୍ଢାଙ୍କ୍ କେପ ମାତ୍ତଡ଼୍ । 9 ପ୍ରବୁନାଦ୍ ୱେର୍ଣ୍ଡ୍ ଦୂତ ଅଡ଼୍ ଗାର୍ରେ ତଅନ୍ତଣ୍ଡ୍, ମେଣ୍ଡେ ପ୍ରବୁନାଦ୍ ଗୌରବ୍ ୱେସ୍ ଅଡ଼୍ ସାର୍ରେପାକେ ତନ୍ଦ୍ତେ, ମେଣ୍ଡେ ଅଡ଼୍ ୱେର୍ତଡ଼୍ । 10 ଆଗେତିନ୍ସ୍ ଦୂତ ଅଡ଼୍କିଂଙ୍କ୍ କେତ୍ତେ, "ୱେର୍ମାଟ୍, ଉଡାଟ୍, ନାନ୍ ସାରେତଡ଼୍ ନାରୁଡ଼୍ ଡ଼ାଦ୍ ଗାଟି ୱେଡ଼୍କେ ତେ ସୁସମାଚାର୍ ମିକିଂଙ୍କ୍ କେତୁତାନ୍, 11 ବାତେଙ୍କ୍ ଇତ୍କେ ନେଣ୍ଡ୍ ଦାଉଦ୍ ତେ ନାର୍ ତାଗ୍ ମି ସେଙ୍ଗେ ତ୍ରାଣକର୍ତ୍ତାଲ୍ ଜନମ୍ ଆତ୍ତଣ୍ଡ୍, ଅଣ୍ଡ୍ କ୍ରିଷ୍ଟ ପ୍ରବୁ । 12 ମେଣ୍ଡେ, ମି ସେଙ୍ଗେ ଇଦ୍ ଚିହ୍ନେ ଲେକାମ୍ ଆଦ୍ତ୍ତେ, ମିଡ଼୍ ୱେର୍ଣ୍ଡ୍ ବାବୁଙ୍କ୍ ସିଲ୍ଲେ ତାଗ୍ ଉତ୍ତି ମିକା ଗୋଡ୍ କଟାମ୍ କୁଣ୍ଡତାଗ୍ ଉଞ୍ଜି ମାନ୍ଦାନାଦ୍ ଉଡ଼ିତିଡ଼୍ ।"
13 ମେଣ୍ଡେ, ତାନ୍ ପେର୍କେ ଆଦ୍ ଦୂତକିନ୍ ତଡ଼୍ ସ୍ୱର୍ଗକନ୍ସ୍ ଦୂତକିନ୍ ୱେରନ୍ ବେଡ଼୍ୟାଦ୍ ମାନ୍ଦେ ତହନ୍ଦି ଇଶ୍ୱର୍ତେ ପ୍ରସଂଶା ମାଡ଼ି କେତ୍ତା,
14 "ସ୍ୱର୍ଗତାଗ୍ ଇଶ୍ୱର୍ତେ ମହିମା, ମେଣ୍ଡେ ପୃତିବିତାଗ୍ ଅନ୍ ଶାନ୍ତି ନାରୁଡ଼୍ ତେ ସେଙ୍ଗେ ଶାନ୍ତି ଆୟି ।"