Mateus 14

ବାପ୍ତିଜିକ ଯୋହନ୍‌ ତେ ଡଲ୍‍ତାଦ୍

1 ଆଦ୍ ସମୟ୍‍ତେ ଗାଲିଲୀତେ ଶାସକ ହେରଦ୍ ଜିସୁନ୍ ବିଷୟ୍‍ତେ କେଞ୍ଜ୍‍ତନ୍‍ । 2 ଅଣ୍ଡ୍‌ ତାନ୍ ଚାକରିଡ଼୍‍କ୍ କେତ୍‍ତାନ୍, "ହିଣ୍ଡ୍ ନିଜାମ୍ ବାପ୍ତିସ୍ମ ଯୋହନ୍‌, ମେଣ୍ଡନ୍‍ନ୍ଦାମ୍ ଜନମ୍ ଆସ୍ ମାଲ୍‍ସ୍ ୱାତ୍‍ତନ୍ । ଅଦିନ୍‌ ସେଙ୍ଗେ ଅଂକିଙ୍କ୍‌ ବାକ୍‍ୱା ପାଡ଼୍‍ୟି ମାଡ଼ାନଙ୍କ୍ ଶକ୍ତି ମିନ୍ଦେ ।"

3 ✝ ୧୪:୩ ଲୁକ ୩:୧୯,୨୦. ଇଦିନ୍ ମୁନେଙ୍କ୍ ହେରଦ୍ ଯୋହନ୍‌ତିଙ୍କ୍ ଗିରାପ୍ ମାଡ଼ାନ୍ ସେଙ୍ଗେ କେସ୍‍ମାତ୍‍ତନ୍ ନୁ ଅଂକିଙ୍କ୍‌ ହିକ୍‍ଲେତଡ଼୍ ତହସ୍ ତାନାତାଗ୍ ନେହେସ୍ ମାତ୍‍ତନ୍ । ତାନ୍ ତାମୁଣ୍ଡ୍‌ ପିଲିପ୍ ତେ ମୁତ୍‍ତେ ହେରଦିଆତ୍ ସେଙ୍ଗେ ଅଣ୍ଡ୍‌ ହିଦ୍‍ଲେକାମ୍ ମାଡ଼ିମାତ୍‍ତନ୍ । 4 ବାପ୍ତିଜିକ ଯୋହନ୍‌ ଅଂକିଙ୍କ୍‌ କେସ୍‍ମାତ୍‍ତନ୍, "ହେରଦିଆତିଙ୍କ୍ ପେଣ୍ଡୁଲ୍ ମାଡ଼୍‍ତାଦ୍ ନିୟାଦ୍ ଟିକ୍ ନିୟମ୍‍ ଆୟ୍‍ୟ ।" 5 ଆଦିନ୍ ସେଙ୍ଗେ ହେରଦ୍ ଯୋହନ୍‌ତିଙ୍କ୍ ହାଉକାନ୍ ସେଙ୍ଗେ ଆଲ୍‍ସି ମାତ୍‍ତନ୍, ବାତେଙ୍କ୍ ଇତ୍‍କେ ଇହୁଦୀ ନାରୁଡ଼୍‍କ୍ ଅଣ୍ଡ୍‌ ୱେର୍‍ସ ମାତ୍‍ତନ୍ । ବାତେଙ୍କ୍ ଇତ୍‍କେ ଅଡ଼୍‌ ଯୋହନ୍‌ ୱେରନ୍ ବାବବାଦୀ ଇଞ୍ଜ୍ ହେର୍କ ମାଡ଼ମାତ୍‍ତଡ଼୍ ।

6 ହେରୋଦ୍‍ତେ ଜନମ୍‍ଦିନେ ହେରୋଦିଆତେ ମାୟାଡ଼୍ ଅତିତିଡ଼୍‍ ମୁନେ ଏକ୍‍ସନ୍ ମାଡ଼ିମାତ୍‍ତେ । 7 ଆଦିନ୍ ପର୍‍ର ପ୍ରୀତ ଆସ୍ ହେରୋଦ୍ ପ୍ରତିଜ୍ଞା ମାଡ଼ି କେତ୍‍ତାନ୍, "ନାନ୍ ଶପତ୍ ମାଡ଼ିକେତୁତାନ୍, ନିମ୍‍ ବାତ୍ ତାଲ୍‍କିତିନ୍, ନାନେନିକ୍ ଇଦ୍‍ତାନ୍ ।"

8 ତାନ୍ ୟାୟାନ୍ ମନ୍ତ୍ରନା ଲେକାମ୍ ପିକିଡ଼୍ କେତ୍‍ତେ, "ବାପ୍ତିଜିକ ଯୋହନ୍‌ ତେ ତାଲ୍‍ଲେ ହିଞ୍ଜେ ୱେରଡ଼୍ ତାଲିତାଗ୍ ୱାଟି ନାକିଂଙ୍କ୍ ଇମୁଟ୍ ।"

9 ଆଦେକେଞ୍ଜି ରାଜାଲ୍ ଦୁଃକାମ୍ ଆତ୍‍ତନ୍ । ବାତେଙ୍କ୍ ଇତ୍‍କେ ସାରେତଡ଼୍ ମୁନେ ପ୍ରତିଜ୍ଞା ମାଡ଼ିମାନ୍‍ନାଙ୍କ୍ ପିକ୍‍ତେ ଗଟ୍ ସାରେ ମାଡ଼ାନ୍ ସେଙ୍ଗେ ଗଟ୍ ହିତ୍‍ତେ । 10 ଆଦିଙ୍କ୍ ତାନାତାଗ୍ ଯୋହନ୍‌ ତେ ତାଲେତିଙ୍କ୍ କୟିତଡ଼୍ ନୁ 11 ତାଲିତାଗ୍ ଅନ୍‌ ତାଲ୍‍ଲେ ୱାଟି ଆଦ୍ ପିକ୍‍ତିଙ୍କ୍ ଇତ୍‍ତଡ଼୍ । ଆଦ୍ ଆସ୍ ତାନ୍ ୟାୟାଙ୍କ୍ ଇତ୍‍ତେ । 12 ତାନ୍ ପେର୍କେ ଯୋହନ୍‌ତେ ଶିଷ୍ୟନଡ଼୍ ୱାସ୍ କବର୍ ହିଦାଙ୍କ୍ ଅନାଦ୍‌ ଡଲ୍‍ତେ ମେନ୍ଦୁଲ୍‍ତିଙ୍କ୍ ଆତ୍‍ତଡ଼୍ । ଅଡ଼୍‌ ଆଞ୍ଜ୍ ଜିସୁଙ୍କ୍ ଇଦୁଃକାମ୍ କାବୁର୍ କେତ୍‍ତଡ଼୍ ।

ଜିସୁ ଏଇଙ୍ଗ୍‌ହଜାର୍‌ ନାରୁଡ଼୍‍କ୍ ତିନ୍ଦାଙ୍କ୍ ହିତ୍‍ତନ୍

13 ଯୋହନ୍‌ତେ କବର୍ କେଞ୍ଜ୍‍ତେ ୱେଲେ ଓଡତାରି ୱେରଡ଼୍ ସିମ୍‍ସାମ୍ ପଡ଼ିୟେତାଗ୍ ଆତ୍‍ତନ୍ । ଜିସୁ ଆଗେ ଆଦାନାଦ୍ ପୁଞ୍ଜ୍‍ମିକା ଗାର୍‍ରେମାନ୍ଦାନ୍ ସହର୍‍ନାଗାଙ୍କ୍ ନାର୍‍ଗେ ନାରୁଡ଼୍ ଆଞ୍ଚ୍ ଆଞ୍ଚ୍ ଆଞ୍ଜ୍ ଜିସୁନ୍ ପେର୍କେ ଆଦ୍‍ତଡ଼୍ । 14 ଜିସୁ ବେସୁଙ୍କ୍‍ ଓଡ୍‍ତାଗାଙ୍କ୍ ଡିଗ୍‍ତନ୍ ହିଦ୍ ବେଡ଼ିୟାଦ୍ ମାନ୍ଦେ ଉଡ଼୍‍ତନ୍, ଅନ୍‌ ହୃଦୟ୍ ଦୟାତେ ବିଗଲିତ ଆତ୍‍ତେ । ନାର୍‍ଗେ ରୋଗିଡ଼୍‍କ୍ ଅଣ୍ଡ୍‌ ସୁସ୍ଥ ମାଡ଼୍‍ତଣ୍ଡ୍ ।

15 ଆଦ୍ ଦିନ୍ ମୁଲ୍‍ପୁଟ୍ ଶିଷ୍ୟନଡ଼୍ ୱାସ୍ କେତ୍‍ତଡ଼୍, "ଗାଟି ଡେରିଆଦୁତ୍, ମେଣ୍ଡେ ହିଦ୍ ପଡ଼ିୟେ ନିଚାଟିଆ, ନାରୁଡ଼୍‍କ୍ ଆତ୍‍ତାଙ୍କ୍ କେଲେମ୍ । ଅଡ଼୍‌ ନାକିନାଗ୍ ଆଞ୍ଜ୍ କାଦି ଜାଗାଡ଼୍‍ ମାଡ଼ିତଡ଼୍ ।"

16 ଜିସୁ ଅଡ଼୍‌‍କ୍ କେତ୍‍ତନ୍, "ଅଡ଼୍‌ ହିଗାଙ୍କ୍ ଆଦାନ୍ ଦର୍‍କାଡ଼୍ ଆୟ୍‍ୟ । ମିଡ଼୍ ଅଡ଼୍‌‍କ୍ ବାତ୍ ସୁଦୁଟ୍ ତିନ୍ଦାଙ୍କ୍ ହିମୁଟ୍ ।"

17 ଶିଷ୍ୟନଡ଼୍ ଉତ୍ତର୍ କେତ୍‍ତଡ଼୍, "ହିଗେ ମାହାପାକେ ମାତର୍ ହେଇଙ୍କ୍ ରୂଟି ନୁ ରେଣ୍ଡ୍ କିକେ ମିନ୍ଦେ ।"

18 ଜିସୁ କେତ୍‍ତାନ୍, "ଆସ୍‍କ୍ ନା ପାକେ ତାଡ଼ାଟ୍ ।" 19 ନାରୁଡ଼୍‍କ୍ ଗାଡ଼୍ ପର୍‍ର କୁଦାଙ୍କ୍ କେସ୍ ଜିସୁ ଆଉ ହେଇଙ୍କ୍ ରୂଟି ନୁ ରେଣ୍ଡେ କିକେଙ୍କ୍ ଆତ୍‍ତନ୍ ନୁ ସ୍ୱର୍ଗତ୍‍ ପାକେ ଉଡ଼ି ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତନ୍ । ମେଣ୍ଡେ ଆଉ ରୂଟିଙ୍କ୍ ଦୁଡ଼ା ଦୁଡ଼ା ମାଡ଼ି ଶିଷ୍ୟଡ଼୍ କାଇଦାଗ୍ ହିତ୍‍ତନ୍ । ଶିଷ୍ୟଡ଼୍ ଆଉହାସ୍ ନାରୁଡ଼୍‍କିଂଙ୍କ୍ ତୁଉସିତ୍‍ତଡ଼୍ । 20 ସାରେତଡ଼୍ ତିଞ୍ଜ୍ ପଟ୍‍ ନିଇତ୍‍ତଡ଼୍ । ତାନ୍ ପେର୍କେ ଶିଷ୍ୟଡ଼୍ ମିଗ୍ଲୀମାନ୍ଦାନ୍ ରୂଟି ନୁ କିକେ ଦୁଡ଼ାକିଂଙ୍କ୍ ପେହେକି ୱାଟ୍‍ଟାନ୍ ଜୁଡ଼ିନାଗ୍ ନିହିତଡ଼୍ । 21 ନାଟାଙ୍କ୍ ନୁ ପିଲାଙ୍କ୍ ୱିଡ଼୍‍ସି ଏଇଙ୍କ୍ ହଜାର୍‌ ନାରୁଡ଼୍ ଆଦ୍ କାଦି ତିତ୍‍ତଡ଼୍ ।

ଜିସୁ ଏର୍‍ଦେ ପର୍‍ର ତାକ୍‍ତନ୍

22 ତାନ୍ ପେର୍‍କେ ଜିସୁ ଶିଷ୍ୟଡ଼୍‍କିଂଙ୍କ୍ ଓଡେତେ ସମୁଦ୍ର ଆପାକେ ଆତ୍‍ତାଙ୍କ୍ କେତ୍‍ତାନ୍ । ମେଣ୍ଡେ ଅଣ୍ଡ୍‌ ନିଜେ ପେର୍କେ ମାଞ୍ଜ୍ ନାରୁଡ଼୍‍କ୍ ଆତ୍‍ତାଙ୍କ୍ କେତ୍‍ତଣ୍ଡ୍ । 23 ଅଣ୍ଡ୍‌ ୱେରନ୍ ପ୍ରାର୍ତନା ମାଡ଼ାନ୍‍ସେଙ୍ଗେ ମେଟେତ୍‍ ପର୍‍ର ଆତ୍‍ତନ୍ । 24 ମୁଲ୍‍ପୁଟ୍ ଆଦାନ୍ ୱେଲେ ଜିସୁ ଆଗେ ୱେରଣ୍ଡ୍ ମାତ୍‍ତନ୍ । ଆଦ୍ ଦିନାମ୍ ତେ ଜିସୁ ଉଡ଼୍‍ତନ୍ ଯେ ଅଡ଼୍‌ ବୂମ୍‌ତାଗାଙ୍କ୍ ପିନା ଜେକାଆଞ୍ଜ୍ ମାତ୍‍ତେ ନୁ ଗାଟି ଗାଲ୍ ୱାସମାନାଙ୍କ୍ ଗାଙ୍କ୍‍କୁଡ଼୍‍ତେ ଓଡ୍‌ ଉଙ୍ଗମାତ୍‍ତେ ।

25 ନାର୍‍କେତ୍ ୱିୟ୍‍ଦାନ୍ ୱେଲେ ଜିସୁ ହେର୍‍ଦେ ପର୍‍ର ତାଆକି ଶିଷ୍ୟଡ଼୍ ଗାର୍‍ରେ ୱାତ୍‍ତନ୍ । 26 ଶିଷ୍ୟ ଅଂକିଙ୍କ୍‌ ଉଡ଼ି ୱେର୍‍ସ୍‍ ମାତ୍‍ତଡ଼୍, "ବୁତ୍ ବୁତ୍" ଇଞ୍ଜ ମର୍‍ପହିତ୍‍ତଡ଼୍ ।

27 ସାଙ୍ଗେ ସାଙ୍ଗେ ଜିସୁ ଅଡ଼୍‌‍କିଂଙ୍କ୍ ସାହାସ୍ ଇସ୍‌ କେତ୍‍ତାନ୍, "ନାନ୍ ବାନେ ! ୱେର୍‍ମାଟ୍ ।"

28 ଆଦ୍ କେଞ୍ଜି ପିତର୍ କେତ୍‍ତାନ୍, "ପ୍ରବୁ, ଯଦି ନିମ୍‍ ସତ୍ ଆସ୍ ମାନ୍‍ତିଡ଼୍, ହେର୍‍ଦେ ପର୍‍ର ତାଆକି ନିୟ୍ ଗାର୍‍ରେ ଆଦାନଙ୍କ୍ ଗଟ୍ ହିମ୍ ।"

29 ଜିସୁ କେତ୍‍ତାନ୍, "ତାଆକି ୱାଡ଼ା ।" ପିତର୍ ଓଡେତାଗଙ୍ଗା ଡିଗି ଜିସୁନ୍ ପାକେ ଏର୍‍ଦେ ପର୍‍ର ତାକାନଙ୍କ୍ ପସ୍ପ୍‍ତନ୍ । 30 ବାତେଙ୍କ୍ ଇତ୍‍କେ ଗାଲ୍‍ପିନା ୱାଦାନାଦ୍ ଉଡ଼ି ୱେର୍‍ତନ୍ ନୁ ହେର୍‍ଦାଗ୍ ମୁଡ଼୍‍ନ୍ଦାନଙ୍କ୍ ପସ୍ପ୍‍ତନ୍ । ଆସୁଙ୍କ୍ ଅଣ୍ଡ୍‌ ମର୍‍ରେତେ କାର୍‍ଙ୍ଗ୍‍ତନ୍, "ପ୍ରବୁ ନାକିଂଙ୍କ୍ ରକ୍ଷା ମାଡ଼େ ।"

31 ହଟାତ୍ ଜିସୁ କାୟ୍ ଆସ୍ ପିତର୍‍ତିଙ୍କ୍ ପଇସ୍‌ କେତ୍‍ତାନ୍, "ବେସତ୍ ବିଶ୍ୱାସ୍ ଇଲ୍‍ୱେନନୀ ନିମ୍‍ ! ଏର୍କା ମାଡ଼୍‍ତିନ୍ ବାତ୍‍ତିଙ୍କ୍ ?"

32 ଅଡ଼୍‌ ଇର୍‍ୱୁଡ଼୍‍କ୍ ଓଡେତ୍ ପର୍‍ର ତାର୍‍ତଡ଼୍ ନୁ ଆସୁଟେ ସାଙ୍ଗେ ସାଙ୍ଗେ ଗାଲ୍ ମାଦ୍‍ତେ । 33 ଶିଷ୍ୟଡ଼୍ ଜିସୁଙ୍କ୍ ଆରାଦାନା ମାଡ଼ି କେତ୍‍ତଡ଼୍ "ନିମ୍‍ ନିଜାମ୍ ଇଶ୍ୱର୍‌ତେ ମାର୍‍ ।"

ଗିନେସର୍‍ତାଗ୍ ଜିସୁ ରୋଗିଡ଼୍‍କିଙ୍କ୍ ସୁସ୍ଥ ମାଡ଼୍‍ତଣ୍ଡ୍

34 ଅଡ଼୍‌ ସମୁଦ୍ରତିଙ୍କ୍ ୱେଇସ୍ ଗିନେସର୍‍ ବୁମ୍‌ତାଗା ହେୱ୍‍ତଡ଼୍ । 35 ଆଗେ ନାରୁଡ଼୍ ଜିସୁଙ୍କ୍ ପୁଞ୍ଜ୍‍ମେଣ୍ଡେ ଗାର୍ରେ ନାର୍‍ଦେ ମାନ୍ଦାନ୍ ରୋଗିଡ଼୍‍କିଙ୍କ୍ ଜିସୁନ୍ ଗାର୍‍ରେ କାର୍‍ଙ୍ଗି ତାତ୍‍ତଡ଼୍ । 36 ପିଡ଼ିତ୍ ନାରୁଡ଼୍‍କିଂଙ୍କ୍ ସୁଦୁଟ୍ ଅନାଦ୍‌ ସିଲେତ୍ କଙ୍ଗିଙ୍କ୍‌ ଇଟାନଙ୍କ୍ ଗଟ୍ ହିୱୀଣ୍ଡ୍ ଇଞ୍ଜ, ଅଡ଼୍‌ ଜିସୁଙ୍କ୍ ଅନୁରଦ୍‌ ମାଡ଼୍‍ତଡ଼୍ । ବେନଡ଼୍ ଆଦ୍ ମାଡ଼୍‍ତଡ଼୍, ଅଡ଼୍‌ ସୁସ୍ଥ ଆଦ୍‍ତଡ଼୍ ।