1 "ସ୍ୱର୍ଗରାଜ୍ୟ ବେଲାନ୍, ହିଦିନାଦ୍ ୱେରଡ଼୍ ୱେଷଡ଼୍ କେଞ୍ଜାଟ୍ । ୱେରଣ୍ଡ୍ ନାରୁନ୍ ଅନ୍‌‍ଦିନେ ନାର୍‍କୁକ୍ ତାନ୍ ଅଙ୍ଗୁର୍ ୱାୟେତା ପାଡ଼୍‍ୟି ମାଡ଼ାନ୍ ସେଙ୍ଗେ କୁଲିକିଙ୍କ୍ ତାତାଙ୍କ୍ ଆତ୍‍ତନ୍ । 2 ବେନଡ଼୍‍କ୍ ଦର୍ସକ୍‍ତନ୍, ସାରେତଡ଼୍‌କିଂଙ୍କ୍ ଦୈନିକ ୱେରଲାକା ରୁପାଡାବ୍‍କ୍ ହିଦାଙ୍କ୍ ଚୁକ୍ତି ମାଡ଼ି ଅଡ଼୍‌‍କିଂଙ୍କ୍ ଅନ୍‌ ୱାୟେତା ରହସିତ୍‍ତନ୍ । 3 ତାନ୍ ମେଣ୍ଡନ୍ ଦିନ୍ ନଅଟାତିଙ୍କ୍ ହାଟିନା ଆଞ୍ଜ୍ ଉଡ଼୍‍ତନ୍, ମାନ୍ଦେନାରୁଡ଼୍ ପାଡ଼୍‍ୟି ମାଡ଼୍‍ୱେ କନ୍‍ସ୍ ନିସ୍‍ମିନ୍ଦେଡ଼୍ ।" 4 ଅଡ଼୍‌‍କ୍ ଅଣ୍ଡ୍‌ କେତ୍‍ତାନ୍, ମିଡ଼୍‍ଆନ୍‌ନ୍ତେ ନା ୱାୟେତା ଆଞ୍ଜ୍ ପାଡ଼୍‍ୟି ମାଡ଼ାଟ୍, ମିକିଂଙ୍କ୍ ଟିକ୍ ମଜୁରି ହିଦ୍‍ତାନ୍ । 5 ଅଡ଼୍‌ ଆଞ୍ଜ ପାଡ଼୍‍ୟି ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ । ଅଣ୍ଡ୍‌ ଦିନ୍ ବାର୍‍ଟା ନୁ ତିନ୍‍ଟାତିଙ୍କ୍ ଟିକ୍ ଆଦେଲେକାମ୍ ମେଣ୍ଡେ ବେସ୍‌କ୍ କୁଲିଙ୍କ୍ ତାସ୍ ପାଡ଼ିୟିଦାଗ୍ କାଲ୍‍ପ୍‍ତନ୍ । 6 ପାୟାଲ୍ ଅଲ୍ ପାଞ୍ଚଟା ତିଙ୍କ୍ ମେଣ୍ଡନ୍ ଦାମ୍ ହାଟିନା ଆଞ୍ଜ୍ ଉଡ଼୍‍ତନ୍, ମେଣ୍ଡେ ବେସ୍‍କ୍‍ତୁଡ଼୍‍ ନିସ୍‍ମିନ୍ଦେଡ଼୍ । ଅଡ଼୍‌‍କ୍ କେତ୍‍ତାନ୍, ପାୟାଲ୍ ପଡ଼୍‍ଗିନ୍ ପାଡ଼୍‍ୟି ମାଡ଼କଟ୍ ବାତ୍‍ତିଙ୍କ୍ ଇଗେ ଦିନାମ୍ ନଷ୍ଟ ମାଡ଼ୁତିଡ଼୍ ? 7 ଅଡ଼୍‌ କେତ୍‍ତଡ଼୍, ବେନ ତ ମାକିଂଙ୍କ୍ ପାଡ଼୍‍ୟିଦିଙ୍କ୍ କାର୍‍ଙ୍ଗ୍‍ଗଡ଼୍ । ଅଣ୍ଡ୍‌ ଅଡ଼୍‌‍କିଂଙ୍କ୍ କେତ୍‍ତାନ୍, "ଆଲେକେ, ମିଡ଼୍ ସାରେତଡ଼ି ନା ୱାୟେତାଗ୍ ଆଞ୍ଜ୍ ପାଡ଼୍‍ୟି ମାଡ଼ାଟ୍ ।"

8 "ଆଦ୍‍ଦିନେ ମୁଲ୍‍ପୁଟ୍ ୱାୟେତାଗ୍ ମାଲିକ୍ ଗୁମାସ୍ତାଲ୍ କେତ୍‍ତାନ୍, ‘କୁଲିକିଙ୍କ୍ କାର୍‍ଙ୍ଗାଟ୍ । ବେନଡ଼୍ ସାରେତାଗାଙ୍କ୍ ପେର୍କେ ପାଡ଼୍‍ୟି ଦାଗ୍ ୱାତ୍‍ତଡ଼୍, ମୁନେ ଅଡ଼ାୱୁ ଡାବ୍‍କ୍ ଇମୁଟ୍ । 9 ବେନଡ଼୍ ସାରେତିଙ୍କ୍ ମୁନେ ପାଡ଼ିୟିମାଡ଼ାଙ୍କ୍ ୱାୟେତାଗ୍ ୱାତ୍‍ତଡ଼୍, ଅଡ଼ାୱୁ ଡାବ୍‍କ୍ ପେର୍କେ ଇମୁଟ୍ । ପର୍‍ରତ୍ ଅଲ୍ ପାଞ୍ଚଟା ତିଙ୍କ୍ ବେନଡ଼୍ ପାଡ଼୍‍ୟି ତାଗ୍ କାଇଲ୍‍ତଡ଼୍, ଅଡ଼୍‌‍କିଂଙ୍କ୍ ସାରେତଡ଼୍ ୱେର୍‍ର ଲାକା ରୁପା ମୁଦ୍ରା ହିମୁଟ୍ । 10 ବେନଡ଼୍ ମୁନେଙ୍କ୍ କଞ୍ଜ୍ ପାଡ଼୍‍ୟି ମାଡ଼ାନଡ଼୍‍କ୍, ଅଡ଼୍‌ ଆଲ୍‍ସ୍‍ତଡ଼୍, ଅଡ଼୍‌‍କିଂଙ୍କ୍ ଅଦିକ୍‌ ଡାବ୍‍କ୍ ଦର୍‍କିତ୍ । ବାତେଙ୍କ୍ ଇତ୍‍କେ ଅଡ଼୍‌‍କ୍ ଆନ୍‌‍ତେ ୱେରକେ ରୁପାଡ଼ାବ୍‍କ୍ ଦର୍‍କ୍‍ତା । 11 ବାତେଙ୍କ୍ ଇତ୍‍କେ ଅଡ଼୍‌ ସାରେତଡ଼୍ ଆଞ୍ଜ୍ ମାଲିକ୍ ବିରୁଦ୍ଦ୍‌ତେ ଗଟି କେତାନଙ୍କ୍ ପସ୍‍ପ୍‍ତ୍‍ତଡ଼୍, 12 ପରତ୍‍ଅଲ୍ ପାଞ୍ଚଟା ତିଙ୍କ୍ ପାଡ଼୍‍ୟି ଆରାମ୍ ମାଡ଼ିମାନ୍ଦାନ୍ କୁଲିକିଙ୍କ୍ ମାତର୍ ୱେରଡ଼୍ ଗାଣ୍ଟା ପାଡ଼୍‍ୟି ମାଡ଼୍‍ତଡ଼୍ । ମାମ୍‍ମେ ବେସର୍ ଏଦ୍‍ତେ ଦିନ୍‍ଯାକ କଷ୍ଟ ଆତ୍‍ତମ୍, ମଜୁରି ହିଦାନ୍ ୱେଲେ ଅଡ଼୍‌‍କିଂଙ୍କ୍ ମା ସାମାନ୍ ହିତ୍‍ତିନ୍ ।’ 13 ମାଲିକ୍ ଅଡ଼୍‌ ତାଗାଙ୍କ୍ ୱେରଙ୍କ୍ କେତ୍‍ତାନ୍, ନାନ୍ ମିକିଂଙ୍କ୍ ବୁସାମାଡ଼ନ୍ । ଅଣ୍ଡ୍‌ ଦିନ୍ ଯାକ ପାଡ଼୍‍ୟି ମାଡ଼୍‍କେ ୱେରଡ଼୍ ଡାବ୍ ଆସ୍ ପାଡ଼ିୟିମାଡ଼ାଙ୍କ୍ ମିଡ଼୍ ସାରେତଡ଼ି ତ ରାଜି ଆସ୍ ୱାତ୍‍ତିଡ଼୍ । 14 ମିଡ଼୍ ଆଉ ଡାବ୍‍କ୍ ଆସ୍ ଲନ୍ଆନୁଟ୍ । ମିକିଂଙ୍କ୍ ବାତ୍ ହିତ୍‍ତାନ୍, ଅନ୍‌ ଗାଣ୍ଟା ପାଡ଼୍‍ୟି ମାଡ଼୍‍ତେ ନାରିଙ୍କ୍ ଆସର୍ ହିଦାଙ୍କ୍ ନାୟାଦ୍ ଇଚ୍ଛା । 15 ନିଜେତ୍ ସମ୍ପତିତିଙ୍କ୍ ନିଜେତ୍ ଇଚ୍ଛାତେ ଲେକେତ୍‍ ମାଡ଼ାଙ୍କ୍ ବାତେଏ ନାୟାଦ୍ ଅଦିକାର୍‌ ଇଲ୍‍ଲେ ? ଇଲା ନାନ୍ ସୁଦୁଟ୍ ଦୟା ମାଡ଼ୁତାନ୍ ଇଞ୍ଜ୍ ମିଡ଼୍ ଆଂକାର୍ ଆଦୁତିଡ଼୍ ?"

16 ✝ ୨୦:୧୬ ମାତିଉ ୧୯:3୦; ମାର୍କ ୧୦:3୧; ଲୁକ ୧3:3୦. ଆଦ୍ ୱେଷଡ଼୍ ତେର୍‍ସ୍‍ପି ଜିସୁ କେତ୍‍ତାନ୍, "ବେନଡ଼୍ ଇଞ୍ଜେ ପେର୍କେ ମିନ୍ଦେ ଅଡ଼୍‌ ମୁନେ ୱାଦ୍‍ତଣ୍ଡ୍ ନୁ ବେନଡ଼୍ ମୁନେ ମିନ୍ଦେ, ଅଡ଼୍‌ ପେର୍କେ ଆଦ୍‍ତଡ଼୍ ।"

17 ଜିସୁ ଜିରୁଶାଲମ୍‍ତା ଆଦାନ୍ ଆର୍‍ଦାଗ୍ ବାରଜାନ୍ ଶିଷ୍ୟଡ଼୍‍କ୍ ଅଣ୍ଡୟାଗେ କାର୍‍ଙ୍ଗି ଅସ୍ ୱେରଡ଼୍ ଦାମ୍ କେତ୍‍ତନ୍, 18 "କେଞ୍ଜାଟ୍ ମାନାଡ଼୍ ଯିରୁଶାଲେମ୍ ତା ଆଦୁତାଡ଼୍ । ଆଗେ ମୁକ୍ୟ ଯାଜକ୍ ନୁ ଦର୍ମଗୁରୁନଡ଼୍ ଅଂକିଙ୍କ୍‌ ଡଲାନ୍ ଦଣ୍ଡ୍ ହିଦ୍‍ତଡ଼୍ । 19 ଅଡ଼୍‌ ନାକିଂଙ୍କ୍ ଡଲାନ୍ ଦଣ୍ଡ୍ ହିଦ୍‍ତଡ଼୍ ନୁ ବିଜାତିୟ ଅଣଯିହୁଦିଡ଼୍ କାଇଦେ ୱିଡ଼୍‍ସିଦ୍‍ତଡ଼୍ । ବିଜାତିଡ଼୍ ଅଂକିଙ୍କ୍‌ ପରିହାସ୍ ମାଡ଼ିତଡ଼୍, କରଡ଼ାତଡ଼୍ ରେହେତିତଡ଼୍ ନୁ କ୍ରୁଶତାଗ୍ ତାର୍ପିତଡ଼୍ । ବାତେଙ୍କ୍ ଇତ୍‍କେ ମୁଣ୍ଡ୍‍ଦିନାନ୍ ପେର୍କେ ପେର୍କେ ମେଣ୍ଡେ ଜିୱେ ଆଦ୍‍ତନ୍ ।"

20 ଆଦ୍ ସମୟ୍‍ତେ ଜେବଦିନ୍ ମୁତ୍‍ତେ ତାନ୍ ରେଣ୍ଡେ ପିଲାନ୍ ତଡ଼୍ ଜିସୁନ୍ ପାକେ ୱାତ୍‍ତେ । ଜିସୁଙ୍କ୍ ପ୍ରଣାମ୍ ମାଡ଼ି ଅଂକିଙ୍କ୍‌ ଅନୁଗ୍ରହ ତାଲ୍‍କ୍‍ତେ ।

21 ଜିସୁ ତାଙ୍କ୍ କେତ୍‍ତାନ୍, "ବାତେଏ ଇଚ୍ଛା ମାଡ଼ୁତିନ୍ ?" ଆଦ୍ କେଲ୍‌ଲା, "ନିମ୍‍ ବେସୁଙ୍କ୍‍ ରାଜାନି ଆଦ୍‍ତିଡ଼୍, ନା ଇ ରେଣ୍ଡ୍ ପିଲାଙ୍କ୍ ନି ଡେବେ ପାକେ ନୁ ତିନ୍ଦେ ପାକେ କୁସ୍‍ପାଙ୍କ୍ ନିମ୍‍ ନାକ୍ ଗଟ୍‍ଇମ୍ ।"

22 ଜିସୁ ଜେବଦିନ୍ ପିଲାଙ୍କ୍ ଉତ୍ତର୍ ଇସ୍ ତାଙ୍କ୍ କେତ୍‍ତାନ୍, "ନିମ୍‍ ବାତେଏ ତାଲ୍‍କୁତିନ୍, ନାନ୍ ବୁଜେମ୍ ଆୟନ୍ । ନାନ୍ ବେନ୍ ଦୁଃକାମ୍ ତେ ପାନପାତ୍ର ଉନ୍ଦାଙ୍କ୍ ଆଦୁତାନ୍, ମିଡ଼୍ ବାତେଏ ଆଦିଙ୍କ୍ ଉନ୍ଦେ ପାର୍‍ତିଡ଼୍ ?" ଅଡ଼୍‌ କେତ୍‍ତଡ଼୍, "ହୋ ପାର୍‍ତମ୍ ।"

23 ଜିସୁ ଅଡ଼୍‌‍କିଂଙ୍କ୍ କେତ୍‍ତାନ୍, "ବାସ୍ତବିକ ମିଡ଼୍ ନାୟାଦ୍ ଆଦ୍ ପାନପାତ୍ର ତାଗାଙ୍କ୍ ଉନ୍ଦ୍‍ତିଡ଼୍ । ବାତେଙ୍କ୍ ଇତ୍‍କେ ତିନ୍ଦେପାକେ ବା ଡେବେପାକେ କୁଦାନ୍ ସେଙ୍ଗେ ବେନଙ୍କ୍ ହେଞ୍ଚି ମାଡ଼ମାନ୍ଦାନ୍‌ ଅଦିକାର୍‌ ନାୟାଦ୍ ଇଲ୍‍ଲେ । ବେନଡ଼୍ ସେଙ୍ଗେ ନା ବାବାଲ୍ ଆଦ୍ ପଡ଼ିୟେ ତିଆର୍ ମାଡ଼୍‍ତଣ୍ଡ୍, ଆଦ୍ ମାତର୍ ଅଡ଼୍‌ ସେଙ୍ଗେ ।"

24 ବେସୁଙ୍କ୍‍ ବାଗାତଡ଼୍ ଶିଷ୍ୟଡ଼୍ ଇଦ୍ ଗଟ୍ କେଞ୍ଜ୍‍ତଡ଼୍, ଅଡ଼୍‌ ତାମୁଣ୍ଡ୍‌ ଇର୍‍ୱୁଡ଼୍ ପର୍‍ର କପାମ୍ ଆତ୍‌ତଡ଼୍‌ । 25 ✝୨୦:୨୫ ଲୁକ ୨୨:୨୫,୨୬.ଜିସୁ ଶିଷ୍ୟଡ଼୍‍କ୍ ଅଣ୍ଡୟାଗେ ମାଡ଼ି କେତ୍‍ତନ୍, "ମିଡ଼୍ ପୁତ୍‍ତିଡ଼୍, ଇ ଜଗତ୍‍ତେ ରାଜାନଡ଼୍ ବିଜାତିଡ଼୍ ପର୍‍ର ପ୍ରବୁନ୍‍ଲେକାମ୍ ବିଚାର୍ ମାଡ଼ମାନ୍‍ତଡ଼୍ ନୁ ବେଡ଼ିଇ ନେତ୍‍ତାନଡ଼୍ ମିକା ବାଗାତଡ଼୍ ପର୍‍ର ଶାସନ୍‍ ମାଡ଼ିତଡ଼୍ । 26 ✝୨୦:୨୬ ମାତିଉ ୨3:୧୧; ମାର୍କ ୯:3୫; ଲୁକ ୨୨:୨୬.ମିଇ ଲୋପେ ଆଦ୍‍ଲେକାମ୍ ଆୟ୍‍ୟ, ବାତେଙ୍କ୍ ଇତ୍‍କେ ମିଇ ଲୋପେ ବେନ ବେଡ଼ିୟନ୍ ଆତ୍‍ତାଙ୍କ୍ ଇଚ୍ଛା ମାଡ଼ୁତଣ୍ଡ୍, ଅଣ୍ଡ୍‌ ମିଇ ଦାସ ଲେକାମ୍ ଆୟିନ୍ । 27 ମିୟାଗାଙ୍କ୍ ୱେରନ୍ ବେଡ଼୍‍ୟନ୍ ଆତ୍‍ତାଙ୍କ୍ ଆଲ୍‍ସ୍‍କେ, ଅଣ୍ଡ୍‌ ବାଗାତଡ଼୍ ଦାସ ଆଦ୍‍ତନ୍ । ମିୟାଗାଙ୍କ୍ ବେନ ମହାନ୍ ଆତ୍‍ତାଙ୍କ୍ ଆଲ୍‍ସିତନ୍, ଅଣ୍ଡ୍‌ ମିଇ ଦାସ ଆୟ୍‍ୟଣ୍ଡ୍, 28 ବେଦ୍‍ଲେକାମ୍ ନାରିନ୍ ପିଲେ ସେବା ଆଦାନ୍ ସେଙ୍ଗେ ୱାଡ଼ଣ୍ଡ୍ ସେବାମାଡ଼ି ବାଗାତଡ଼ାଉ ମୁକ୍ତି ସେଙ୍ଗେ ନିଜେତ୍ ଜିୱୁନ୍‍ ହିଦାଙ୍କ୍ ୱାତ୍‍ତନ୍ ।"

29 ଅନ୍‌ ଦିନ୍ ଜିସୁ ଶିଷ୍ୟଡ଼୍‍ତଡ଼୍ ଯିରୀୟ ସହର୍‍ତିଙ୍କ୍ ୱିଡ଼୍‍ସି ଆଦାନ୍ ୱେଲେ ନାର୍‍ଗେ ନାରୁଡ଼୍ ଅନ୍‌ ପର୍କେ ପେର୍କେ ଆଦ୍‍ତଡ଼୍ । 30 ରଟ୍ ଆଞ୍ଚିନା କୁଦିମାନ୍ଦାନ୍ ଇର୍‍ୱୁଡ଼୍ କାନାଲଡ଼୍, ଜିସୁ ଆଦ୍‍ଆର୍ ୱାଦୁତନ୍ ଇଞ୍ଜ କାନାଲଡ଼୍ କେଞ୍ଜି ଗାଟି ଲେଙ୍ଗ୍‍ଦେ କାର୍‍ଙ୍ଗୁତଡ଼୍ "ହୋ ପ୍ରବୁ, ଦାଉଦ୍‍ ତେ ମାର୍‍; ମାକିଂଙ୍କ୍ ଦୟା ମାଡ଼େ ।"

31 ନାରୁଡ଼୍ ଅଡ଼୍‌‍କ୍ ଦମକ୍ ଇସ୍ କଟ ଆତ୍‍ତାଙ୍କ୍ କେତ୍‍ତଡ଼୍ । ବାତେଙ୍କ୍ ଇତ୍‍କେ ଅଡ଼୍‌ ମେଣ୍ଡେ ଗାଟି ଲେଙ୍ଗ୍‍ଦେ କାର୍‍ଙ୍କ୍ ତଡ଼୍, "ଦାଉଦ୍‍ତେ ମାର୍‍; ମାକିଂଙ୍କ୍ ଦୟାମାଡ଼େ ।"

32 ଜିସୁ ଆଗେନିସ୍‍ ଅଡ଼୍‌‍କିଂଙ୍କ୍ କାର୍‍ଙ୍ଗି କେତ୍‍ତାନ୍, "ନାନ୍ ମିଇ ସେଙ୍ଗେ ବାତେଏ ମାଡ଼ିତାନ୍ ଇଞ୍ଜ ଆଲ୍‍ସୁତିଡ଼୍ ?"

33 ଅଡ଼୍‌ କେତ୍‍ତଡ଼୍, "ପ୍ରବୁ ମାକିଂଙ୍କ୍ ଉଡ଼ାନ୍ ଶକ୍ତି ଇମ୍ ।"

34 ଜିସୁ ଦୟାତେ ବିଗଲିତ ଆସ୍ ଅଡ଼୍‌ କଣ୍ଡାଙ୍କ୍ ଇଟ୍‍ତଣ୍ଡ୍ । ସାଙ୍ଗେ ସାଙ୍ଗେ ଅଡ଼୍‌ ଉଡ଼୍‌ତଡ଼୍ ନୁ ଜିସୁନ୍ ପେର୍କେ ପେର୍କେ ଆଦ୍‍ତଡ଼୍ ।