Mateus 26

ଜିସୁନ୍ ବିରୁଦ୍‍ତେ ଚାଲାକି

1 ହି ସାରେ ଶିକ୍ଷାଇସ୍‌ ତେର୍‍ସ୍ପ୍‍ତେ ପେର୍କେ ଜିସୁ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍, 2 ମିଡ଼୍ ପୁତ୍‍ତିଡ଼୍, ନିସ୍ତାର୍ ପାଣ୍ଡୁମ୍ ଆଦ୍‍ଦାନ୍ ମାଇଦିଙ୍କ୍ ମେଣ୍ଡ୍‍ରେଣ୍ଡ୍ ଦିନା ମିନ୍ଦେ ଇଦ୍ ମିଡ଼୍ ପୁତ୍‍ତିଡ଼୍ । ଆସୁଟେ ନାରୁନ୍‍ପିଲେ କ୍ରୁଶତାଗ୍ ତାର୍‍ପ୍ସାନ୍ ଆଦ୍‍ଦାନ୍ ମାଇଦିଙ୍କ୍ ସମର୍‍ପିତ ଆଦ୍‍ତନ୍ ।"

3 ହି ସମୟ୍‍ତେ ମୁକ୍ୟ ଦାଇତ୍ୟତେ ମାନ୍ଦାନ୍ ନୁ ବାଗାତଡ଼୍‍ ଯିହୁଦିନେତାଲଡ଼୍ ବେଡ଼ିୟ୍‍ଯାଜକ୍ କୟାପାନ୍‍ ଲୋତେ ଦୁୱାଡ଼୍‍ତାଗେ ଅଣ୍ଡୟ୍‌‍ୟାଗେ ଗୁଡ଼୍‍ତଡ଼୍ । 4 ଜିସୁଙ୍କ୍ ବେନ ଚଲନାମାଡ଼ି ପୟ୍‍ସ୍ ରେହ୍‍ତାନ୍‍ ମାଇଦିଙ୍କ୍ ଚକ୍ରାନ୍ତ ମାଡ଼୍‍ତଡ଼୍ । 5 ବାତେଙ୍କ୍ ଇତ୍‍କେ ଅଡ଼୍‌ କେତ୍‍ତଡ଼୍ "ହି ପାଡ଼୍‍ୟି ମାମ୍ ମାଡ଼ାନାଦ୍ ଲେକାମ୍ ହିଲକଟ୍ ମାତ୍‍କେ । ଆସୁଟେ ନାରୁଡ଼୍ ଅଶାନ୍ତି ମାଡ଼୍‍ପାର୍‍ୱେଡ଼୍‍ ।"

ବେତନିୟାତାଗ୍ ଜିସୁଙ୍କ୍‌ ପୁନ୍ଦାନାଦ୍‌

6 ଅନ୍‌‍ଦିନେ ଜିସୁ ବେତନିତାଗେ ମୁନେଙ୍କ୍ କୁଷ୍ଟରଗ ଆସ୍‍ମାନ୍ଦାନ୍ ଶିମୋନ୍ ଲୋନ୍‌ ମାତ୍‍ତଣ୍ଡ୍ । 7 ✝୨୬:୭ ଲୁକ ୭:3୭,3୮.ଶିମୋନ୍‍ତେ ଲୋନ୍‌ ଜିସୁ ତିନ୍ଦାଙ୍କ୍ କୁଦାନ୍‍ୱେଲେ ୱେରଡ଼୍ ମୁତ୍‍ତେ ଅଣ୍ଡୟ୍‌ କାଲ୍‍ଦେ ତିଆର୍ ଆତ୍‍ତେ ଗିନେତାଗେ ମୁଲ୍ୟତାଦ୍ ସାୟ୍‍ତ୍‌ ଗାବ୍‍ତେ ନିୟ୍ ବର୍ତ୍ତି ମାଡ଼ି ଜିସୁନ୍ ତାଲେତ୍ ପର୍‍ର ତଶ୍‍ସିତ୍‍ତେ । 8 ଶିଷ୍ୟଡ଼୍ ଇଦ୍ ଉଡ଼ି କପାମ୍ ଆଦ୍‍ତଡ଼୍ । ଅଡ଼୍‌ ତାଙ୍କ୍ କେତ୍‍ତଡ଼୍, "ହିସର୍ ନଷ୍ଟ ମାଡ଼୍‍ତି ବାତେଙ୍କ୍ ? 9 ହି ଗାବ୍‍ ମାନ୍ଦାନ୍ ନିୟ୍‍ଦିଙ୍କ୍ ନାର୍‍ଗେ ଡାବ୍‍ତେ ୱାମାଙ୍କ୍ ପାର୍‍ୱେନି ନୁ ଆଦ୍ ଦନ୍‍ତିଙ୍କ୍ ଗରିବ୍‍ନଡ଼୍‍କ୍ ଦାନ ମାଡ଼ିଦ୍‍ ପାର୍‍ୱେନି ।"

10 ଅଡ଼୍‌ ବାତ୍‍ କେତୁତଡ଼୍, ଜିସୁ ପୁଞ୍ଜ୍‍ମେଣ୍ଡେ କେତ୍‍ତଣ୍ଡ୍, "ଆଦ୍ ମୁତେଙ୍କ୍ ବାତେଙ୍କ୍ ଅଇରାନ୍ ମାଡ଼ୁତିଡ଼୍ ? ନା ମାଇଦିଙ୍କ୍ ଆଦ୍ ଅଣ୍ଡୟ୍‌ ସାୟେତ୍ ନୁ ସୁନ୍ଦର୍ ପାଡ଼୍‍ୟି ମାଡ଼୍‍ତେ ।" 11 ଗରିବ୍‍ ନାରୁଡ଼୍‍କିଂଙ୍କ୍ ମିଡ଼୍ ସାରେଦାମ୍ ପାହେମ୍‍ ଆଦ୍‍ତିଡ଼୍ ବାତେଙ୍କ୍ ଇତ୍‍କେ ନାକିଂଙ୍କ୍ ସାରେଦାମ୍ ପାହେମ୍‍ ଆୟ୍‍ୱିଡ଼୍‍ । 12 ନା ତାଲ୍‍ତାଗ୍‍ ଗାବ୍‍ ମାନ୍ଦାନ୍ ନିୟ୍ ତଶ୍‍ସି ଆଦ୍ ନାକିଂଙ୍କ୍ ସମାଦି ଇଦାନଙ୍କ୍ ତିଆର୍ ମାଡ଼୍‍ତେ । 13 ନାନ୍‍ନେ ମିକିଂଙ୍କ୍ ନିଜାମ୍‍ କେତୁତାନ୍, ସାରେ ଜଗତ୍‍ତାଗେ ଯେ ବେନ୍‌ଆଇ ପଡ଼ିୟେତାଗ୍, ଇ ସୁସମାଚାର୍ ପ୍ରଚାର୍ ଆଦ୍‍ତେ, ଇ ମୁତ୍‍ତେ ବାତେଏ ମାଡ଼ିତେ, ତାଙ୍କ୍ ହେର୍କା ମାଡ଼ି ଆଦିଙ୍କ୍ ଆନ୍‌‍ତେ ଲେକେ ୱେୟିତିତ୍ ।

ଜିସୁଙ୍କ୍ ପସ୍ପିଦାନ୍‍ ମାଇଦିଙ୍କ୍ ଯିହୁଦାଲ୍‍ ରାଜି ଆଦ୍‍ତନ୍

14 ଜିସୁନ୍ ବାରଜାନ୍ ଶିଷ୍ୟଡ଼୍ ଲପ୍ ଇଷ୍କାରିୟ ଯିହୁଦା ପେଦେର୍ ତଣ୍ଡ୍ ୱେରଣ୍ଡ୍ ଶିଷ୍ୟ ମୁକ୍ୟ ଯାଜକିଡ଼୍‍ ଗାର୍‍ରେ ଆଞ୍ଜ୍ ପାଚ୍ରା ମାଡ଼୍‍ତଣ୍ଡ୍, 15 "ଜିସୁଙ୍କ୍ ପସ୍ପିତ୍‍କେ ନାକିଂଙ୍କ୍ ବାତେଏ ଇଦ୍‍ତିଡ଼୍ ?" ଅଡ଼୍‌ ଅଂକିଙ୍କ୍‌ ତିରିଶ୍‍ଟାନ୍ ରୁପାମୁଦ୍ରାଲେକି ଇତ୍‍ତଡ଼୍ । 16 ଆଦ୍ ଦିନ୍ କଞ୍ଜ୍ ଜିସୁଙ୍କ୍ ଅଡ଼୍‌ କାୟ୍‍ଦେ ପସ୍ପିଦାନ୍‍ ମାଇଦିଙ୍କ୍ ଯିହୁଦାଲ୍‍ ସୁଯଗ୍‍ ମେହ୍‍କ୍‍ ତଣ୍ଡ୍ ।

ଶିଷ୍ୟଡ଼୍ ତ ଜିସୁନ୍ ନିସ୍ତାର୍ ପାଣ୍ଡୁମ୍ ବଜି ପାଲନ୍

17 ତାଡ଼ି ଶୁନ୍ୟ ରୂଟି ପାଣ୍ଡୁମ୍‍ତେ ମୁନେତ୍ ଦିନେତେ ଶିଷ୍ୟଡ଼୍ ୱାସ୍ ଜିସୁଙ୍କ୍ ପାଚ୍ରା ମାଡ଼୍‍ତଡ଼୍, "ମାମ୍ ବେଗାକଞ୍ଚ୍ ନି ମଇଦିଙ୍କ୍ ନିସ୍ତାର୍ ପାଣ୍ଡୁମ୍ ବଜ ତିଆର୍ ମାଡ଼ିତମ୍ ?"

18 ଜିସୁ ଉତ୍ତର୍ ହିତ୍‍ତଣ୍ଡ୍, "ସହର୍‍ତାଗ୍ ଆଞ୍ଜ୍ ଆଦ୍ ବେନ୍‌ଆଇ ନାରୁଙ୍କ୍ କେତିତିଡ଼୍, ‘ଗୁରୁ କେତୁତଣ୍ଡ୍ ନାୟାଦ୍ ଦିନାମ୍ ଗାର୍‍ରେ ହେୱ୍‍ସ୍‍ ୱାସମିନ୍ଦେ । ତାନ୍ ଶିଷ୍ୟଡ଼୍ ତ ମିଇ ଲୋନ୍‌ ଅଣ୍ଡ୍‌ ନିସ୍ତାର୍ ପାଣ୍ଡୁମ୍ ପାଲନ୍ ମାଡ଼ିତନ୍ ।’"

19 ଜିସୁ କେତ୍‍ତାନ୍ ଲେକାମ୍ ଶିଷ୍ୟଡ଼୍ ନିସ୍ତାର୍ ପାଣ୍ଡୁମ୍ ବଜ୍ ମିଟିଙ୍କ୍ ମାଡ଼୍‍ତଡ଼୍ ।

20 ମୁଲ୍‍ପୁଟ୍ ଆତ୍‍ତାଙ୍କ୍ ଜିସୁ ନୁ ବାରଜାନ୍ ଶିଷ୍ୟଡ଼୍ ତିନ୍ଦାଙ୍କ୍ କୁଦ୍‍ତଡ଼୍ । 21 ତିନ୍ଦାନ୍ ୱେୟ୍ ଜିସୁ କେତ୍‍ତଣ୍ଡ୍, "ନାନ୍ ମିକିଂଙ୍କ୍ ସତ୍ କେତୁତାନ୍, ମିଇ ଲୋପେଙ୍କ୍ ୱେରଣ୍ଡ୍ ନାକିଂଙ୍କ୍ ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ିତନ୍ ।"

22 ଶିଷ୍ୟଡ଼୍ ଗାଟି ଦାନ୍ଦେ ଆଶେ ୱେରନ୍ ପେର୍କେ ୱେରନ୍ ଜିସୁଙ୍କ୍ ପାଚ୍ରା ମାଡ଼୍‍ତଡ଼୍, ନିମ୍‍ ନିଜାମ୍ ନାକିଂଙ୍କ୍ ଉଡ଼ି କେଲ୍‍ୱିନ୍‍ ।

23 ଜିସୁ କେତ୍‍ତଣ୍ଡ୍, "ବେନ ନା ତଡ଼୍ ୱେରଡ଼୍ ପାତ୍ରତାଗେ ରୂଟି ଲିହ୍‍ତିତଣ୍ଡ୍, ଅଣ୍ଡ୍‌ ନାକିଂଙ୍କ୍ ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ିତନ୍ । 24 ଶାସ୍ତ୍ରତାଗ୍ ଲେକ୍‍ତାଦ୍ ଲେକାମ୍‍ତେ ନାରୁନ୍‍ପିଲେ ଡଲିତଣ୍ଡ୍, ବାତେଙ୍କ୍ ଇତ୍‍କେ ନାରୁନ୍‍ପିଲେତିଙ୍କ୍ ବେନ ପସ୍ପିଦ୍‍ତଣ୍ଡ୍, ଅନାଦ୍‌ ଦଶା ବେସର୍ ବୟଙ୍କର୍ ଆଦ୍‍ତେ ! ବେସୁଙ୍କ୍‍ ଜନମ୍ ଆୟ୍‍ୟକଟ ମାତ୍‍କେ ଅନ୍‌ ମାଇଦିଙ୍କ୍ ସାୟ୍‍ ଆୟେଡ଼୍‍ ।"

25 ଶତ୍ରୁଡ଼୍ କାଇଦେ ସମର୍‍ପନ୍ ମାଡ଼ାନ୍ ଯିହୁଦାଲ୍‍ ତେଦି ପାଚ୍ରା ମାଡ଼୍‍ତଣ୍ଡ୍, "ଗୁରୁ, ନିମ୍‍ ନାକିଂଙ୍କ୍ ଉଡ଼ି କେଲ୍‍ୱିନ୍‍ ତ !" ଜିସୁ ଅଂକିଙ୍କ୍‌ ଉତ୍ତର୍ ହିତ୍‍ତଣ୍ଡ୍, "ନିମ୍‍ ଆଦ୍ କେତୁତିନ୍ ।"

ପ୍ରବୁ ବଜ

26 ଅଡ଼୍‌ ତନ୍ଦାନ୍‍ ସମୟ୍‍ତେ ଜିସୁ ୱେରଡ଼୍ ରୂଟି ଅସ୍ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିତ୍‍ତଣ୍ଡ୍ ନୁ ଆଦିଙ୍କ୍ ଉସ୍ ଶିଷ୍ୟଡ଼୍‍କିଂଙ୍କ୍ ଇସ୍‌ କେତ୍‍ତଣ୍ଡ୍, "ଆୟ୍‍ମୁଟ୍, ତିନୁଟ୍‍, ହିଦ୍ ନାୟାଦ୍ ମେନ୍ଦୁଲ୍ ।"

27 ତାନ୍‍ପେର୍କେ ଅଣ୍ଡ୍‌ ଦେବ୍‍ତିଙ୍କ୍ ଆସ୍ ଇଶ୍ୱରତିଙ୍କ୍‍ ଦନ୍ୟବାଦ୍ ଇତ୍‍ତଣ୍ଡ୍ ନୁ ଆଦ୍ ଶିଷ୍ୟଡ଼୍‍କିଂଙ୍କ୍ ଇସ୍‌ କେତ୍‍ତଣ୍ଡ୍, "ମିଡ଼୍ ସାରେ ଇଗାଙ୍କ୍ ଉନୁଟ୍‍ । 28 ଇଦ୍ ନାୟାଦ୍ ନେତୁର୍ । ନାରୁଡ଼ାଦ୍ ପାପ୍ କ୍ଷମାତେ ମାଇଦିଙ୍କ୍ ନାନ୍‍ନେ ନା ବେନ୍ ନେତୁର୍‍ ତଶ୍‍ସିଦାଙ୍କ୍ ଆଦୁତାନ୍, ବେଦ୍ ଇଶ୍ୱର୍‌ତେ ପୁନାଦ୍ ନିୟମ୍‍ତିଙ୍କ୍ ମୁଦ୍ରାଙ୍କିତ ମାଡ଼ିତ୍ ।