1 ବିଶ୍ରାମ୍‍ଦିନେ ମେଣ୍ଡ୍‍ନ୍ଆତ୍‍ତେ ଦିନ୍ ରବିବାର୍‍ ଦିନ୍ ନାର୍‍କେତ୍ ମଗ୍‍ଦଲୀନି ମରୀୟମ୍ ନୁ ମେଣ୍ଡନ୍ ମରୀୟମ୍ ସମାଦି ଉଡାଙ୍କ୍ ଆଦ୍‍ତେ । 2 ଆସୁଟେ ହଟାତ୍ ୱେରଡ଼୍ ବୁମିକମ୍ପ ଆତ୍‍ତେ । ପ୍ରବୁନ୍ ୱେରଡ଼୍ ଦୂତ ପର୍‍ରକଞ୍ଚ୍ ଡିଗି ୱାସ୍, ସମାଦି ୱାଟିମାନ୍ଦାନ୍ କାଲ୍‍ଦିଙ୍କ୍ ଗୁସ୍‍ପି ଆଦ୍ କାଲ୍‍ଦେ ପର୍‍ର କୁଦ୍‍ତନ୍ । 3 ତାନାଦ୍ ମକମ୍ ପିଡ଼୍‍ଗ୍‍ହିନା ୱେସ୍‍ମାତ୍‍ତେ ନୁ ତାନାଦ୍ ଚକା ଇମ୍ ଲେକାମ୍ ପାଣ୍ଡେ ମାତ୍‍ତେ । 4 ସୈନ୍ୟଡ଼୍ ୱେର୍‍ସ୍‍ ୱାଡ଼୍‍କ୍‍ତଡ଼୍‍ ନୁ ଡଲ୍‍ତେ ଲେକାମ୍ ଆସ୍‌ ମାତ୍‍ତଡ଼୍ ।

5 ଦୂତ ଆଦ୍ ନାଟାଙ୍କ୍ କେତ୍‍ତେ, "ୱେର୍‍ମାଟ୍ ।" ନାନ୍ ୱେରନ୍, ମିଡ଼୍ କ୍ରୁଶତାଗ୍ ତାର୍ପିମ୍‍ନ୍ଦାନ୍ ଜିସୁଙ୍କ୍ ଉଡାଙ୍କ୍ ୱାତ୍‍ତିଡ଼୍ । 6 ଅଣ୍ଡ୍‌ ହିଗେ ଇଲେଣ୍ଡ୍ । ଅଣ୍ଡ୍‌ କେତ୍‍ତେ ଲେକାମ୍ ଅଣ୍ଡ୍‌ ପୁନରୁତ୍‍ତାନ୍ ଆଶେ ମିନ୍ଦେଣ୍ଡ୍ । ହିଗ୍ ୱାସ୍ ଉଡ଼ାଟ୍, ହିଗେ ଅଂକିଙ୍କ୍‌ ୱାଟିସ୍‍ ମାତ୍‍ତଡ଼୍ । 7 ଶିଟ୍‍ପାଟ୍‍ ଆଞ୍ଜ୍ ନା ଶିଷ୍ୟଡ଼୍‍କିଂଙ୍କ୍ କେଲ୍‍ମୁଟ୍, "ଅଣ୍ଡ୍‌ ମେଣ୍ଡନ୍ ଦାମ୍ ଜିୱୁନ୍ ଆତ୍‍ତଣ୍ଡ୍ ନୁ ମିଇ ମୁନେ ମୁନେ ଅଣ୍ଡ୍‌ ଗାଲିଲୀତା ଆଦୁତନ୍ । ଆଗେ ମିଡ଼୍ ଅଂକିଙ୍କ୍‌ ଉଡ଼ିତିଡ଼୍ । ନାନ୍‍ନେ ବାତ୍ କେତ୍‍ତାନ୍, ହେର୍କା ନେହେମୁଟ୍ ।"

8 ଇଦ୍ କେଞ୍ଜି ଆୱ୍ ସିଟ୍‍ପାଟ୍ କବର୍ ୱିଡ଼୍‍ସି ଶିଷ୍ୟଡ଼୍ ଗାର୍‍ରେ ମିର୍‍ତା । ୱେର୍‍ସ୍‍ ମାତ୍‍କେ ବା ଆୱିନ୍ ମନ୍‍ଦାଗ୍ ଗାଟି ସାର୍‍ଦେ ନୁ ୱେଡ଼୍‍କେତେ ମାତ୍‍ତା ।

9 ଜିସୁ ଆୱିଙ୍କ୍ କାୟ୍‍ଲି କେତ୍‍ତଣ୍ଡ୍ "ମିୟାଦ୍ ଶାନ୍ତି ଆୟି !" ଆୱ୍ ଅନ୍‌‍ଗାରେ ଆଞ୍ଜ୍ ଅନ୍‌ ଡେକାଙ୍କ୍ ପୟ୍‍ସ୍ ମଡ଼୍‍କ୍‍ତଡ଼୍ । 10 ଜିସୁ ଆୱିଙ୍କ୍ କେତ୍‍ତଣ୍ଡ୍, ୱେର୍‍ମାଟ୍ ନା, ଦାଦାଲଡ଼୍‍କିଙ୍କ୍ କେଲ୍‍ମୁଟ୍, ଅଡ଼୍‌ ଗାଲିଲୀତାଗ୍ ଆଦ୍‍ତଡ଼୍ । ଆଗେ ଅଡ଼୍‌ ୱାସ୍ ନାକିଂଙ୍କ୍ ଉଡ଼ିତିଡ଼୍ ।

11 ନାଟାଙ୍କ୍ ଆଗାଙ୍କ୍ ଆଦାନ୍‍ ୱେଲେ ସମାଦିତିଙ୍କ୍ କେପିମାତ୍‍ତେ ସୈନିକିଡ଼୍ ସହର୍‍ତାଗ୍ ମାଲ୍‍ସ୍ ଆଞ୍ଜ୍ ବେଡ଼୍‍ୟାଦ୍‍ ଯାଜକ୍‍ନଡ଼୍ ହି ସାରେ ଗଟ୍‍ନା କେତ୍‍ତଡ଼୍ । 12 ମୁକ୍ୟ ବେଡ଼ିୟ୍ ଯାଜକ୍‍ନଡ଼୍ ଦର୍ମନେତାଲଡ଼୍‍ ତ ମନ୍ତ୍ରନା ମାଡ଼ି, ଆଦ୍ ସୈନ୍ୟକିଡ଼୍‍କ୍‍ ନାର୍‍ଗେ ଡାବ୍‍ଲାଞ୍ଚ୍‍ ଇସ୍‌ ଅଡ଼୍‌‍କିଂଙ୍କ୍ 13 କେତ୍‍ତଡ଼୍, "ମିଡ଼୍ କେଲ୍‍ମୁଟ୍ ଯେ ନାର୍‍କେତ୍ ମାମ୍ ହୁଞ୍ଜିମାତ୍‍ ୱେୟ୍ ତାନ୍ ଶିଷ୍ୟଡ଼୍ ୱାସ୍ ଅନ୍‌ ମେନ୍ଦୁଲ୍‍ତିଙ୍କ୍ ଡଙ୍ଗିମେଣ୍ଡେ ଆତ୍‍ତଡ଼୍ ।" 14 ଯଦି ଶାସକ ହି ଗଟ୍ କେଞ୍ଜ୍‍କେ ମାମ୍ ଅଂକିଙ୍କ୍‌ ବୁଜାମାଡ଼ିଦ୍‍ ତମ୍‍ ଯେ ମିଡ଼୍ ଦଷି । ହି ବିଷୟ୍‍ତେ ମିଡ଼୍ ଦାନ୍ଦେ ଆୟ୍‍ମାଟ୍‍ ।

15 ସୈନିନଡ଼୍ ଡାବ୍ ଆସ୍ ଅଡ଼୍‌‍କିଂଙ୍କ୍ କେସ୍ ମାନ୍ଦାନ୍ ଲେକାମ୍ ପାଡ଼୍‍ୟି ମାଡ଼୍‍ତଡ଼୍ । ଅଡ଼୍‌ ଆସୁଙ୍କ୍ ବାତ୍ କେତ୍‍ତଡ଼୍, ଯିହୁଦିଡ଼୍ ନେଣ୍ଡ୍ ଯାକ ଆଦ୍ ଗଟ୍ ପ୍ରଚାର୍ ମାଡ଼ୁତଡ଼୍ ।

16 ✝ ୨୮:୧୬ ମାତିଉ ୨୬:3୨; ମାର୍କ ୧୪:୨୮. ଜିସୁ କେସ୍‍ମାତ୍‍ତେ ଲେକାମ୍ ତାନ୍ ଏଗାର୍‍ଜାନ୍ ଶିଷ୍ୟଡ଼୍ ଗାଲିଲୀତେ ୱେରଡ଼୍ ମେଟେତ୍‍ ପର୍‍ର ଆଦ୍‍ତଡ଼୍ । 17 ଆଗେ ଜିସୁଙ୍କ୍ ଉଡ଼ି ଅଡ଼୍‌ ଅଂକିଙ୍କ୍‌ ମଡ଼୍‍କ୍‍ତଡ଼୍ ନୁ ବେନଡ଼୍‍ ଡାଉଟ୍ ମାଡ଼୍‍ତଡ଼୍ । 18 ଜିସୁ ଅଡ଼୍‌ ଗାର୍‍ରେ ୱାସ୍ କେତ୍‍ତଣ୍ଡ୍, "ସ୍ୱର୍ଗ ନୁ ପୃତିବି ସାରେ ଅଦିକାର୍‌ ନାକିଂଙ୍କ୍ ଇସ୍‌‍ମିନ୍ଦେନ୍ । 19 ✝୨୮:୧୯ ପ୍ରେରିତ ୧:୮.ମେଣ୍ଡେ ମିଡ଼୍‍ଆଞ୍ଜ୍ ସାରେ ଜାତିତ୍‍ ନାରୁଡ଼୍ ଆଞ୍ଜ୍ ଅଡ଼୍‌‍କିଂଙ୍କ୍ ନା ଶିଷ୍ୟ ମାଡ଼ାଟ୍ । ବାବାଲ୍, ମାର୍‍ ନୁ ପବିତ୍ର ଆତ୍ମା ପେଦେର୍‍ତେ ଅଡ଼୍‌‍କିଂଙ୍କ୍ ବାପ୍ତିସ୍ମ ହିମୁଟ୍ 20 ମେଣ୍ଡେ ନାନ୍‍ନେ ବେନ୍‍ସାରେ ଶିକ୍ଷା ଇସ୍‌‍ମିନ୍ଦେନ୍, ଆଦ୍ ପାଲନ୍ ମାଡ଼ାଙ୍କ୍ ଅଡ଼୍‌‍କିଂଙ୍କ୍ ଶିକ୍ଷା ହିମୁଟ୍ । ମେଣ୍ଡେ ହେର୍କା ନେହେମୁଟ୍, ତେରାନ୍‌ ଯାକ ନାନ୍ ସାରେ ଦିନା ମିଇ ତଡ଼୍ ମାନ୍‍ତାନ୍ ।"