19 ୬:୧୯ ଯାକୁବ ୫:୨,3. "ହି ପୃତିବିତାଗ୍ ନିଜେତ୍ ସେଙ୍ଗେ ଦନ୍ ଗୁଡ଼୍ପାଟ୍ । ଇଗେତ୍ ସେଙ୍ଗେ, କାର୍କେ ପଇସ୍ ଗୁଡ଼୍ପାନ୍ ଦନ୍ କାରାପ୍ ଆଦ୍ତେ, ବା ମାଡ଼୍ଡ଼ା ସିନ୍ଦିମାଡ଼ି ଡଙ୍ଗି ଆଦ୍ତା ।" 20 ମାତର୍ ବେଗେ ପୁଡ଼୍ୟୁ ନୁ କାର୍କେ ପୟ ମେଣ୍ଡେ ଡଙ୍ଗାଲଡ଼୍ ଡଙ୍ଗି ଅଦ୍ ପାର୍ୱଡ଼୍, ଇଦ୍ ରକମ୍ ସ୍ୱର୍ଗତାଗ୍ ନିଜର୍ ନିଜର୍ ସେଙ୍ଗେ ଦନ୍ ଗୁଡ଼୍ପାଟ୍ । 21 ବାତେଙ୍କ୍ ଇତ୍କେ ବେଗେ ମିୱାଦ୍ ଦନ୍ସମ୍ପତ୍ତି, ଆଗେ ମିକା ମିୱାଦ୍ ମନ୍ ।
ମେନ୍ଦୁଲ୍ତାଦ୍ ୱେଇସ୍
(ଲୁକ ୧୧:୩୪-୩୬)
22 "କଣ୍ଡା ମେନ୍ଦୁଲ୍ତେ କୁପି ରକମ୍ । କଣ୍ଡା ୱେଇସ୍ ମାତ୍କେ, ମେନ୍ଦୁଲ୍ ୱେଇସ୍ତଡ଼୍ ବର୍ତ୍ତି ଆଦ୍ତେ ।" 23 ବାତେଙ୍କ୍ ଇତ୍କେ କଣ୍ଡା ଯଦି ଦୁର୍ବଲ୍ ଆଦ୍ତେ, ମେନ୍ଦୁଲ୍ ଇକାଡ଼୍ତେ ବର୍ତ୍ତି ଆଦ୍ତେ । ମିଇ ଜିୱୁତେ ୱେଇସ୍ ଯଦି ଇକାଡ଼୍ ତଡ଼୍ ମିଶିଆଦ୍ତେ, ଆସୁଟେ ଆଦ୍ ଇକାଡ଼୍ ବେସର୍ ବୟଙ୍କର୍ ହିକାଡ଼୍ ଆୟ୍ୟ !
ଇଶ୍ୱର୍ ନୁ ଦନ୍ ସମ୍ପତି
(ଲୁକ ୧୬:୧୩; ୧୨:୨୨-୩୧)
24 "ୱେରଣ୍ଡ୍ ନାରୁଡ଼୍ ଇର୍ୱୁଡ଼୍ ମାଲିକ୍ତେ ସେବା ପାଡ଼ିୟିମାଡ଼େ ପାର୍ୱଡ଼୍ । ଅଣ୍ଡ୍ ଅଡ଼୍କିଂଙ୍କ୍ ପ୍ରେମ ମାଡ଼୍କେ ମେଣ୍ଡେ ଅଡ଼୍କିଂଙ୍କ୍ ପାସ୍କି ମାଡ଼ିତନ୍, ଅଡ଼୍କିଂଙ୍କ୍ ସମ୍ମାନ୍ ମାଡ଼ିତନ୍ ମେଣ୍ଡେ ଅଡ଼୍କିଂଙ୍କ୍ ସମ୍ମାନ୍ ମାଡ଼ଣ୍ଡ୍ । ଇଶ୍ୱର୍ ଇତ୍ତେ ଦନ୍ ସମ୍ପତି ଇର୍ୱୁଡ଼ାଦ୍ ଦାସ ଆତ୍ତାଙ୍କ୍ ପାର୍ୱିଡ଼୍ ।"