1 ତ ବେନଡ଼୍ କ୍ରିଷ୍ଟ ଜିସୁନାଗ୍ ମିନ୍ଦେଡ଼୍‍, ଅଡ଼୍‌ ସେଙ୍ଗେ ବାତ୍ ତିପାଲ୍ ଇଲ୍‍ଲେ । 2 ଇତ୍‍କେ ଜିୱୁଣ୍ଡ୍‍ତାଦ୍ ଆତ୍ମାତେ ନିୟମ୍ କ୍ରିଷ୍ଟ ଜିସୁନ୍ ପେଦେର୍‍ତେ ମିକିଂଙ୍କ୍ ପାପ୍‌ ନୁ ଡଲ୍‍ନାଦ୍ ନିୟମ୍‍ତାଗାଙ୍କ୍ ମୁକ୍ତି ମାଡ଼୍‍ତେ । 3 ଆଦିଙ୍କ୍ ମେନ୍ଦୁଲ୍ ମାୟ୍‍ଦିଙ୍କ୍ ରୋଗାମ୍ ଆତ୍‍ତାଙ୍କ୍ ନିୟମ୍ ବାତ୍ ମାଡ଼ାନଙ୍କ୍ ପାର୍‍ୱ, ଆଦ୍ ଇଶ୍ୱର୍ ତାନ୍ ମାରିଙ୍କ୍ ପାପ୍‌ତାଦ୍ ମେନ୍ଦୁଲ୍ ଇସାପ୍‍ତେ ପାପାମ୍ ଦଂସ ମାଡ଼ାନଙ୍କ୍ ରହସ୍ ମେନ୍ଦୁଲ୍‍ତାଗ୍ ପାପାମ୍‍ତିଙ୍କ୍ ଦଣ୍ଡ୍ ଇଦାନ୍ ନିୟମ୍ ମାଡ଼୍‍ତଣ୍ଡ୍, 4 ବେଲାକି ମେନ୍ଦୁଲ୍ ଆଲ୍‍ସାନ୍‍ ଇସାପ୍‍ତେ ବ୍ୟବହାର୍‌ ମାଡ଼କଟ୍ ଆତ୍ମାତାଦ୍ ଆଲ୍‍ସାନ୍ ଇସାପ୍‍ତେ ମାନାଡ଼୍ ବ୍ୟବହାର୍‌ ମାଡ଼ିତାଡ଼୍, ମାୟାଗେନେ ନିୟମ୍‍ତାଦ୍ ଦାର୍ମାମ୍‌ନିତି ତିୟାର୍ ଆଦ୍‍ତେ । 5 ବେନଡ଼୍ ମାନେୟ୍‍ତେ ଲେକାମ୍ ପାଡ଼୍‍ୟି ମାଡ଼ୁତଡ଼୍, ଅଡ଼ାଦ୍‌ ମାନ୍‍ ଆଦ୍ ଲେକାମ୍ ଆଦ୍‍ତେ । ଇତ୍‍କେ ବେନଡ଼୍ ପବିତ୍ର ଆତ୍ମାତେ କେତ୍‍ତାନ୍ ଲେକାମ୍ ପାଡ଼୍‍ୟି ମାଡ଼ିତଡ଼୍, ଅଡ଼ାଦ୍‌ ମାନ୍‍ ପବିତ୍ର ଆତ୍ମାତେ ତଡ଼୍ ଚାଲେମ୍ ଆଦ୍‍ତେ । 6 ମାନେୟ୍‍ ଲେକାମ୍ ଆତ୍‍କେ, ଆଦିନାଦ୍ ପରିଣାମ୍ ଆଦ୍‍ତେ ଡଲ୍‍ନାଦ୍; ପବିତ୍ର ଆତ୍ମାନ୍‍ ତଡ଼୍ ଚାଲେମ୍ ଆତ୍‍କେ ଜିୱୁଣ୍ଡ୍ ନୁ ଶାନ୍ତି ଦର୍‍କିତ୍ । 7 ମାନେୟ୍‍ତେ ଲେକାମ୍ ଆତ୍‍କେ ନାରୁଡ଼୍ ଇଶ୍ୱର୍‌ତାଦ୍ ଶତ୍ରୁଡ଼୍ ଆଦ୍‍ତନ୍; ବାତେଙ୍କ୍ଇତ୍‍କେ ଅଣ୍ଡ୍‌ ଇଶ୍ୱର୍‌ତାଦ୍ ନିୟମ୍ ପାଲନ୍ ମାଡ଼ଣ୍ଡ୍, ଅଣ୍ଡ୍‌ ଆଦ୍ ମାଡ଼ାନଙ୍କ୍ ପାର୍‍ୱଣ୍ଡ୍ । 8 ବେନଡ଼୍ ମାନେୟ୍‍ତେ ଲେକାମ୍ ପାଡ଼୍‍ୟି ମାଡ଼ିତଡ଼୍, ଅଡ଼୍‌ ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନଙ୍କ୍ ପାର୍‍ୱଡ଼୍ ।

9 ଯଦି ନିଜାମ୍ ଇଶ୍ୱର୍‌ତାଦ୍ ପବିତ୍ର ଆତ୍ମା ମିୟାଗେ ମିନ୍ଦେ, ମିଡ଼୍ ମେଣ୍ଡେ ମାନେୟ୍‍ ଲେକାମ୍ ଜିୱୁଣ୍ଡ୍ ବାଦ୍‍କ୍‍ୱିଡ଼୍, ଇତ୍‍କେ ଜିୱୁଣ୍ଡ୍‍ତାଗ୍ ପବିତ୍ର ଆତ୍ମାତେ ଗଟ୍ ପାଲନ୍ ମାଡ଼ୁତିଡ଼୍ । କ୍ରିଷ୍ଟନାଦ୍ ଆତ୍ମା ବେନନ୍ ଗାର୍‍ରେ ଇଲ୍‍ଲେ, ଅଣ୍ଡ୍‌ ବେସୁଟ୍‌ ଅନ୍‌ ନାରୁଣ୍ଡ୍‍ ଆଦାନଙ୍କ୍ ପାର୍‍ୱଣ୍ଡ୍ । 10 ଇତ୍‍କେ କ୍ରିଷ୍ଟ ଯଦି ମିଇ ଗାର୍‍ରେ ମିନ୍ଦେଣ୍ଡ୍, ମିୟାଦ୍ ମେନ୍ଦୁଲ୍ ପାପ୍‌ ତଡ଼୍ ନଷ୍ଟ ଆଦାନଙ୍କ୍ ଆଞ୍ଜମାତ୍‍କେ ଗାଲା, ପବିତ୍ର ଆତ୍ମା ମିକିଂଙ୍କ୍ ଜିୱୁଣ୍ଡ୍ ଇଦ୍‍ତେ, ବାତେଙ୍କ୍ଇତ୍‍କେ ଇଶ୍ୱର୍‌ତେ କଣ୍ଡେତାଗ୍ ମିଡ଼୍ ଦାର୍ମାମ୍ ଇଞ୍ଜ ଲେକା ଆତ୍‍ତିଡ଼୍ । 11 ✝ଯଦି କ୍ରିଷ୍ଟଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ମାଡ଼୍‍ତେ ଇଶ୍ୱର୍‌ତାଦ୍ ଆତ୍ମା ମିୟାଗ୍ ମିନ୍ଦେ, ଆଲେକେ ଆଦ୍ ଆତ୍ମାତେ ସାହାଯ୍ୟତେ ଇଶ୍ୱର୍ ମିୟାଦ୍ ଡଲ୍‍ତାଦ୍ ମେନ୍ଦୁଲ୍‍ତିଙ୍କ୍ ଗାଲା ଜିୱେ ମାଡ଼ିତନ୍ ।

12 ଆଦିଙ୍କ୍ ହୋ ଦାଦାଲଡ଼ି ନୁ ଏଲାସ୍କ୍‍, ମାନ୍‍ ଦାୟିତ୍ୱ ଆଦୁତ୍‍ତେ, ମାନେୟ୍‍ତେ ଲେକାମ୍ ଜିୱୁଣ୍ଡ୍ ବାଦ୍‍କାନଡ଼ାଦ୍ ଆୟ୍‍ୟ । 13 ବାତେଙ୍କ୍ଇତ୍‍କେ ମିଡ଼୍‍ ମାନେୟ୍‍ ଲେକାମ୍‍ ଜିୱୁଣ୍ଡ୍‍ ବାଦ୍‍କିତିଡ଼୍‍, ଆଲେକେ ମିଡ଼୍‍ ଡଲିତିଡ଼୍‍, ଇତ୍‍କେ ଯଦି ପବିତ୍ର ଆତ୍ମାତେ ସାହାଯ୍ୟତେ ନିଜେତ୍ ପାପାମ୍‍ତିଙ୍କ୍ ଆୱ୍‍କି, ମେଣ୍ଡେ ପାପାମ୍ ପାଡ଼୍‍ୟି ମାଡ଼୍‍ୱେମାତ୍‍କେ, ଆଲେକେ ମିଡ଼୍ ଗେଲ୍‍ସିତିଡ଼୍ । 14 ବେନଡ଼୍ ଇଶ୍ୱର୍‌ତେ ଆତ୍ମା ତଡ଼୍ ଚାଲେମ୍ ଆଦ୍‍ତଡ଼୍, ଅଡ଼୍‌ ଇଶ୍ୱର୍‌ତେ ମାର୍‍ ମାୟାସ୍କ୍ ।

15 ✝ ✝ବାତେଙ୍କ୍ଇତ୍‍କେ ଇଶ୍ୱର୍ ଇତ୍‍ତେ ଆଦ୍ ଆତ୍ମା ମିକିଂଙ୍କ୍ ଦାସତାଗାଙ୍କ୍ ମୁକ୍ତି ମାଡ଼୍‍ତେ, ମିଡ଼୍ ମେଣ୍ଡେ ୱେର୍ର୍ ଆଦାନାଦ୍ ବାତ୍ ଇଲ୍‍ଲେ । ଇତ୍‍କେ ପବିତ୍ର ଆତ୍ମା ମିକିଂଙ୍କ୍ ଇଶ୍ୱର୍‌ତେ ମାର୍‌ ଆଦାନଙ୍କ୍ ସୁଜଗ୍ ଇତ୍‍ତନ୍ । ଅନ୍‌ ଶାତ୍‍ୱାମ୍ ପାଏମ୍ ଆସ୍ ମାନାଡ଼୍ ଇଞ୍ଜେ ଇଶ୍ୱର୍‌ତିଙ୍କ୍ "ବାବାଲ୍," ଇଞ୍ଜ କେତୁତାଡ଼୍ । 16 ଇଶ୍ୱର୍‌ତାଦ୍ ଆତ୍ମା ମାନ୍‍ ଲୋପେତ୍ ଆତ୍ମା ତଡ଼୍ କାୟ୍‍ଲି ମାନାଙ୍କ୍‍ ଇଶ୍ୱର୍‌ତେ ମାର୍‌ ଇଞ୍ଜ କେତୁତେ । 17 ବେଲାବା ମାନାଡ଼୍ ଇଶ୍ୱର୍‌ତେ ମାର୍‍କ୍, ଅନ୍‌ ନାରୁଡ଼୍ ସେଙ୍ଗେ ଇଦାନ୍ ଆର୍ଶିବାଦ୍‍ତାଗ୍ ମାନାଡ଼୍ ବାଗିଦାର୍ ଆଦ୍‍ତାଡ଼୍ । ମେଣ୍ଡେ କ୍ରିଷ୍ଟନ୍ ସେଙ୍ଗେ ଇଶ୍ୱର୍ ବାତ୍ ନେଃଏସ୍ ମିନ୍ଦେଣ୍ଡ୍, ଆଗେ ଗାଲା ମାନାଦ୍‍ ବାଗ୍ ମିନ୍ଦେ । ଯଦି ମାନାଡ଼୍ ଜିସୁନାଦ୍ ଦୁଃକାମ୍‍ତାଗ୍ ବାଗିଦାର୍ ଆତ୍‍ତାଡ଼୍, ଆଲେକେ ଅନ୍‌ ଗୌରବ୍‍ତାଗ୍ ଗାଲା ବାଗିଦାର୍ ଆଦ୍‍ତାଡ଼୍ ।

18 ବେନ୍ ଗୌରବ୍‍ତାଦ୍ ବବିଷ୍ୟତ୍‌ତାଗ୍ ମାନାଡ଼୍ ଆସିତାଡ଼୍, ଆଦ୍ ଇସାପ୍‍ତେ ଇଞ୍ଜେ ଦୁଃକାମ୍‍ ଆଦାନାଦ୍ ବାତେବା ଆୟ୍‍ୟ । ଆଦ୍ ସମୟ୍‍ତେ ଇଶ୍ୱର୍ ତାନ୍ ମାର୍‍କିଡ଼୍‍କ୍ ତଅତିତଣ୍ଡ୍ । 19 ସାର୍‍ରେ ସୃଷ୍ଟି ଆଦ୍ ଦିନାମ୍‍ତିଙ୍କ୍ ଆଗ୍ରହ ଆସ୍‍ କେପି ମିନ୍ଦେ, 20 ବାତେଙ୍କ୍ଇତ୍‍କେ ସାର୍‍ରେ ସୃଷ୍ଟି ଇଶ୍ୱର୍ ତଡ଼୍ ଅବିଶାପ୍‌ ଆସ୍ ତାନ୍ କାମ୍‌ତାଗାଙ୍କ୍ ୱେଏରେ ଆତ୍‍ତେ । ଇତ୍‍କେ ଆଗେକ୍‍ବା ଆଦିନାଦ୍ ଆଶେ ମିନ୍ଦେ, 21 ଅନ୍‌‍ଦିନେ ଇଶ୍ୱର୍‌ତେ ମାର୍‍କିଡ଼୍ ଗୌରବ୍‍ତାଗ୍ ବାଗିଦାର୍ ଆସ୍ ଆଦ୍ ଗାଲା ତାନ୍ ଦାସତ୍ୱ ନଷ୍ଟ ଆଦାନାଗାଙ୍କ୍ ମୁକ୍ତି ପାଏମ୍ ଆଦ୍‍ତେ । 22 ଇତ୍‍କେ ଇଞ୍ଜେକ୍ ଗାଲା ସାର୍‍ରେ ସୃଷ୍ଟି ପିଲା ପୁଟ୍‍ସ୍ପାନ୍ ନପ୍ ଲେକାମ୍ କଷ୍ଟ ପାଏମ୍ ଆସ୍ ଦୁଃକାମ୍‍ତେ କିଡ଼୍‍କୁତେ । 23 ✝ମେଣ୍ଡେ ଆଦ୍‍ ମାତର୍‍ ଆୟ, ମାନାଡ଼୍ ଇଶ୍ୱର୍‌ତେ ମୁନେନ୍ ଇତ୍‍ତାଦ୍ ଦାନ ଲେକାମ୍ ପବିତ୍ର ଆତ୍ମାତିଙ୍କ୍ ପାଏମ୍ ଆତ୍‍ତାଡ଼୍; ଆଗେକ୍‍ବା ଇଶ୍ୱର୍‌ତେ କୁଟ୍‍ମାମ୍ ଆସ୍ ସାର୍ରେତଡ଼୍ ଲେକାମ୍ ମୁକ୍ତି ଆଦାନ୍ ସେଙ୍ଗେ ମାମ୍‍ମେ ଗାଲା କେପି ଜିୱୁଣ୍ଡ୍ ଲୋପେ ଦୁଃକା ମାଡ଼ୁତମ୍ । 24 ବାତେଙ୍କ୍ଇତ୍‍କେ ଆଶା ମାଡ଼୍‍କେନେ କେ ମାନାଙ୍କ୍‍ ମୁକ୍ତି ଦର୍‍କିତ୍ । ଇତ୍‍କେ ବାତ୍ ତଅନ୍‌ଦିତ୍, ଆଦିନ୍ ସେଙ୍ଗେ ଆଶା ମାଡ଼ାନାଦ୍ ନିଜାତେ ଆଶା ଆୟ୍‍ୟ । ବେନ ବାତ୍ ତଅନ୍‌ଦାନାଦ୍ ଜିନିଷ୍ ସାର୍‍ରେ ସେଙ୍ଗେ ଆଶା ମାଡ଼ିତନ୍ ? 25 ଇତ୍‍କେ ମାନାଡ଼୍ ଯଦି ତଅନ୍‌ଦ୍‍ୱାଦ୍ ବିଷୟ୍ ସେଙ୍ଗେ ଆଶେ ମାଡ଼ିତାଡ଼୍, ଆଲେକେ ମାନାଙ୍କ୍‍ ଗାଡ଼୍‍ସ୍ ପୟ୍‍ସ୍ କେପି ମାନ୍ଦାନଙ୍କ୍ ୱେୟ୍‍ତିତ୍ ।

26 ଆଦେରକମ୍‍ ମାନାଙ୍କ୍‍ ଶାତ୍‍ୱାମ୍ ଇଲ୍‍ଲେ, ପବିତ୍ର ଆତ୍ମା ମାନାଙ୍କ୍‍ ସାଆଯ୍ୟ ମାଡ଼ିତନ୍ । ବେଲା ପ୍ରାର୍ତନା ମାଡ଼ାନଙ୍କ୍ ଆଦ୍‍ତେ, ଆଦ୍ ମାନାଡ଼୍ ପୁନ୍‍ୱାଡ଼୍ । ଆଦିଙ୍କ୍ ପବିତ୍ର ଆତ୍ମା ଲେଙ୍ଗ୍ ଇଲ୍‍ୱାଦ୍ ଗଟ୍ ତଡ଼୍ ମାନ୍‍ ସେଙ୍ଗେ ଇଶ୍ୱର୍‌ତିଙ୍କ୍ କେତିତ୍‍ । 27 ଇଶ୍ୱର୍ ଆଦ୍ ବୁଜେମ୍ ଆଦ୍‍ତନ୍, ବାତେଙ୍କ୍ଇତ୍‍କେ ଅଣ୍ଡ୍‌ ଲୋପେତ୍ ଗଟ୍ ପୁତ୍‍ତଣ୍ଡ୍ ନୁ ପବିତ୍ର ଆତ୍ମା ଇଶ୍ୱର୍‌ତେ ଇଚ୍ଛା ଲେକାମ୍ ତାମ୍ ନାରୁଡ଼୍ ସେଙ୍ଗେ କେତିତଣ୍ଡ୍ ।

28 ମାନାଡ଼୍‍ ପୁତ୍‍ତାଡ଼୍‍ ଯେ, ବେନଡ଼୍ ଇଶ୍ୱର୍‌ତେ ଉଦ୍ଦେଶ୍ୟତିଙ୍କ୍ ତିୟାର୍ ମାଡ଼ାନଙ୍କ୍ ୱାଦ୍‍ତଣ୍ଡ୍ ନୁ ଇଶ୍ୱର୍‌ତିଙ୍କ୍ ପ୍ରେମ ମାଡ଼ିତଡ଼୍, ଅଡ଼୍‌ ସେଙ୍ଗେ ସାର୍‍ରେ ବିଷୟ୍ ଲେକେତ୍‍ ଆଦ୍‍ତେ । 29 ବେନଡ଼୍‍କିଂଙ୍କ୍ ଇଶ୍ୱର୍ ଏଞ୍ଚିମିନ୍ଦେଣ୍ଡ୍, ଅଡ଼୍‌‍କିଂଙ୍କ୍ ତାମ୍ ମାର୍‍କିନ୍ ଲେକାମ୍ ଆଦାନଙ୍କ୍ ମୁନେତ୍‍କେ ତିୟାର୍ ମାଡ଼ିମିନ୍ଦେଣ୍ଡ୍ । ଆଲେକେ ଇଶ୍ୱର୍‌ତେ ମାର୍‍କ୍ ଅଡ଼୍‌‍କିଂଙ୍କ୍ ମୁନେଙ୍କ୍‍ ପୁଟ୍‍ତେନଡ଼୍‍ ଆଦ୍‍ତଡ଼୍‍ । 30 ବେନଡ଼୍ ଇଦ୍‍ରକମ୍ ଏଞ୍ଚି ୱାସ୍‍ମିନ୍ଦେଡ଼୍, ଅଡ଼୍‌ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ଆସ୍ ଗୌରବ୍‍ ପାଏମ୍ ଆଦ୍‍ତଡ଼୍ ।

31 ଆଲେକେ ଇୱୁ ସାର୍‍ରେ ଉଡ଼୍‍କେ ମେଣ୍ଡେ ବାତ୍ କେତିତାଡ଼୍‍ ? ଇଶ୍ୱର୍ ଯଦି ମାନ୍‍ ସପଟ୍ ମାଡ଼ିତନ୍, ବେନ ମାନ୍‍ ବିରୁଦ୍ ଆଦ୍‍ପାର୍‍ଦ୍‍ତଣ୍ଡ୍ ? 32 ଇଶ୍ୱର୍ ବେସୁଟ୍‍ବା ମାନ୍‍ ବିରୁଦ୍ ଆୟ୍‍ୟଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ନିଜେତ୍ ମାରିଙ୍କ୍ ମିକା ରକ୍ଷା ମାଡ଼କଟ୍ ମାନ୍‍ ସେଙ୍ଗେ ଦାନ ମାଡ଼୍‍ତଣ୍ଡ୍ । ଆଲାଇତ୍‍କେ, ଅଣ୍ଡ୍‌ ବାତ୍ ମାନାଙ୍କ୍‍ ସାର୍‍ରେ ବିଷୟ୍ ଦାନ ମାଡ଼ଣ୍ଡ୍ ? 33 ଇଶ୍ୱର୍ ଏଞ୍ଚ୍‍ତେ ନାରୁଡ଼୍ ବିରୁଦ୍‍ତେ ବେନଡ଼୍ ଅବିଯଗ୍ ମାଡ଼୍‍ପାର୍‍ଦ୍‍ତଡ଼୍ ? ଇଶ୍ୱର୍ ନିଜେ ଅଡ଼୍‌‍କିଂଙ୍କ୍ ନିର୍ଦୋଷ୍ ଇଞ୍ଜ କେସ୍‍ମିନ୍ଦେଣ୍ଡ୍ । 34 ଆଲେକେ ବେନ ଅଡ଼୍‌‍କିଂଙ୍କ୍ ମେଣ୍ଡେ ଦଷି ମାଡ଼େପାର୍‍ଦ୍‍ତଣ୍ଡ୍ ? କ୍ରିଷ୍ଟ ଜିସୁ ଆଦ୍ ବେସୁଟ୍‌ ମାଡ଼ଣ୍ଡ୍, ବାତେଙ୍କ୍ଇତ୍‍କେ ଅଣ୍ଡ୍‌ ଡଲ୍‍ତାଗାଙ୍କ୍ ମେଣ୍ଡନ୍‍ନ୍ଦାମ୍ ଜିୱେ ଆସ୍ ଇଶ୍ୱର୍‌ତେ ତିନ୍ଦେପାକ୍ କୁଦିମିନ୍ଦେଣ୍ଡ୍ । ଅଣ୍ଡ୍‌‍ ଆନ୍‌ତେ ମାନ୍‍ ସେଙ୍ଗେ ନାଡ଼୍‍ମେ ପ୍ରାର୍ତନା ମାଡ଼ୁତଣ୍ଡ୍‍ । 35 ଆଲେକେ ବେନ ମାନାଙ୍କ୍‍ କ୍ରିଷ୍ଟନ୍ ପ୍ରେମତାଗାଙ୍କ୍ ୱେର୍ରେ ମାଡ଼େପାର୍‍ଦ୍‍ତଣ୍ଡ୍ ? ଦୁଃକାମ୍, ତିପାଲ୍, ନପ୍, ଗରିବ୍, କାର୍‍ୱ୍, ବିପଦ୍ ବା ଡଲ୍‍ନାଦ୍ ଆଶେ, ବାଆତେବା ଆଦ୍ ମାଡ଼ାନଙ୍କ୍ ପାର୍‍ୱ । 36 ଶାସ୍ତ୍ରତାଗ୍ ଲେକାମିନ୍ଦେ, "ମିଇ ସେଙ୍ଗେ ମାକିଂଙ୍କ୍ ସାରେୱେଲେ ଡଲ୍‍ନାଦ୍ ବିପଦ୍ ୱାଦୁତ୍, ଆୱୁକାନଙ୍କ୍ ଆଦାନ୍ ମେଣ୍ଢା ଲେକାମ୍ ମାନାଡ଼୍ ଏଞ୍ଚିମିନ୍ଦେଡ଼୍ ।" 37 ବେନ ମାନାଙ୍କ୍‍ ପ୍ରେମ ମାଡ଼ୁତଣ୍ଡ୍, ଅନ୍‌ ସାଆଯ୍ୟତେ ମାନାଡ଼୍ ଇୱୁ ସାର୍ରେତିଙ୍କ୍ ଜିଡ଼୍‍ତାଡ଼୍ । 38 ନାନ୍ ନିଜାମ୍ ପୁତ୍‍ତାନ୍ ଜେ ଅନ୍‌ ପ୍ରେମତାଗାଙ୍କ୍ ମାନାଡ଼୍ ବେସୁଟ୍‍ବା ୱେରେ ଆୟ୍‍ୱାଡ଼୍ । ଡଲ୍‍ନାଦ୍ ବା ଜିୱୁଣ୍ଡ୍, ଦୂତ ବା ମୟଲ୍‍ତାଗ୍‍ ମାନ୍ଦାନ୍ ବେନ୍ ରାଜାଲ୍ ବା ଶାତ୍‍ୱାମ୍‍, ଇଞ୍ଜେ ବା ୱାଦାନ୍ ଦିନାତେ, 39 ପରତାଦ୍ ଆୟି ବା ମଦଲ୍‍ତାଦ୍ ଆୟି ବାତ୍ ବିଷୟ୍, ସାର୍‍ରେ ସୃଷ୍ଟିତାଗ୍ ଇଦ୍‍ରକମ୍ ବାତ୍ ବିଷୟ୍ ଇଲ୍‍ଲେ, ବାତ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ତଅନ୍‌ଦ୍‍ତାଦ୍ ଇଶ୍ୱର୍‌ତେ ଆଦ୍ ପ୍ରେମ୍‍ତାଗାଙ୍କ୍ ମାନାଙ୍କ୍‍ ୱେରେ ମାଡ଼ାନଙ୍କ୍‍ ପାର୍‍ଦ୍‍ତେ ।