1 Coríntios 16

Anumzamofo amage nentaza vahe’mokizmi zago hage’zamisnaza naneke

1 Hagi Jerusalemi kumate mani’naza mono naga’mokizmi zagoma eri atruma nehaza zanku hu’za hue, Galesia kaziga mani’naza mono naga’ma hiho hu’na huzmante’noaza hiho. 2 Hakare Sontamofona ese knare, tamagra mago mago’mota zago’ma erisafintira, erisnaza avamente refko hutma eri atru hu’nenke’na, nagrama esua knafina eri tru huzankura amuhoa osaneno. 3 Nagrama uhanatisu’na huhampri' zmante’nesamokizmia, huzmanta’nena, ana musezamofo agofetura avonkrenta’nena eri’za Jerusalemi kumate vugahaze. 4 Hagi nagrama vuga’ma hanugeno’a, zamagra nagrane vugahaze.

5 Hu’neanagi nagra Masetonia vute’na, henka tamagritega egahue. Na’ankure Masetoniati ru kitagi’na vugahue. 6 Tamagrane osi’agna umanisuo, ete zasi ko’ma atu ikampina tamagrane mani vagaresugeta, inantegama vunaku’ma hanurega naza hu’tma hunante’nage’na vugahue. 7 Na’ankure nagri’ma navenesiana menima vanu’na tamageme vuku nosuanki, Anumzamofo avesima me’nenke’na mago’a zaza kna tamagrane umani’ne’na vanuegu nehue. 8 Hu’neanagi Efesasi kumate mani’nesugeno, Pentikos kna efore hugahie. 9 Na’ankure eri’zamo’ma knare huno vuga kana rama’a efore nehigeno, rama’a vahe’mo’zanena ha' renenantaze.

10 Hanki Timoti’ma esigeta, nagra Ramofo eri’za e’neruankna huno e’neria neki, ke’amofona antahinemita azeri so’e hiho. 11 Kva hunenteta agia eri haviza osiho. Hanki ana nehuta aza nehnageno mani’neno, fru huno nagra mani’ne’nurega ehanatisnie. Timoti’ene mago’a nafu naganahe’zane ete esnagu zamavega ante’na mani’noe.

12 Hu’neanagi Apolosi, nerafu kazigagu hu’za hue. Tamagritegama nerafuzanema esia kazigatira, nagra razampi azeri hanaveti kea nesamue. Hagi menima esiana agri’a avesi omne’neanagi, kankamuma me’nenkeno’a agra egahie.

Huvagare ke zamazeri hanavetinaku zamasmi’nea naneke

13 Hagi kava huta nemanita, tamentinti zampi oti hanavenetita, korera osu hanavetita maniho. 14 Maka’zama hanaza’zampina tamavesinte avu’ava zampinti hiho.

15 Nenfugta nensarogta tamagra antahi’naze, (Stefanisi ene noma’afi mani’nazana, ese’ma Akaia kumateti zmagu’a rukrehe hu’naza nagare. Ana hute’za zamagra zamagu’a mono eri’zampi ami vaganere’za mono eri’za e’neri’za nagare). 16 Hanki tamagranena e’inahukna vahe’mofo avu’ava avaririta mani’neta, hagi anahukna eri’zama zamaza hu’za erisazamokizmine, nezmavariritma zmagorga’a manihogu neramasamue. 17 Stefanasi ene Fotunatusi’ene Akiakusizama aza zankura nagra muse hu’no’e. Na’ankure tamagrama huga’zana osazage’za zamagra eme naza hu’naze. 18 Na’ankure knare antahintahi nami’za avamu’nifina nazeri fru nehu’za, tamagri’ene ana hu’naze. E’inahukna vahetmina zamege so’e hiho.

19 Esia kaziga mani’naza mono naga’mo’za musenke atreramantaze. Akuira’ene Prisila’ene noznifima nemaniza mono naga’mo’zanena anahukna hu’za zamagu’areti musenkea atrenermantaze. 20 Maka Anumzamofo naga’mo’za musenkezmia atreramantaze. Hanki tamagranena ana zanke huta mono naga’mota muse ohunte ahunte hiho.

21 Poli’na nagra, ama musenkea, nagra nazampinti kre neramue. 22 Hanki Ramofoma avesi ontesnimo’a, sifnafi manino haviza hugahie. Rantimoka eno! 23 Hanki Ramofo Jisasi asunku zamo’a tamagrane mesanie. 24 Nagri nevesi’zamo’a maka Krais Jisasimpima mani’naza naga’motarega mesanie. Tamage.