2 Crônicas 15

Asa’ma mono’ma hu avu’avaza eri kasefa hu’nea naneke

1 Anumzamofo Avamumo’a Obeti nemofo Azariante emanigeno, 2 Asante vuno amanage huno ome asmi’ne, Asagane maka Judane Benzameni nagamotanena antahiho, Ra Anumzamo’a, Agri’enema mani’nazageno’a tamagrane mani’ne. Tamagrama Agriku’ma hakenutma Agrira haketa eri fore hugahaze. Hianagi tamagrama tamagenama humisageno’a, Agranena ana zanke huno amagena huramigahie. 3 Hagi za’za kna Israeli vahe’mo’za tamage Anumzanena omanizageno, pristi vahe’mo’za zamagri’enena manine’za rempia huozmizageno, kasegemo’a zamagri’enena omne’ne. 4 Hianagi knazampima unefre’za Ra Anumzana Israeli vahe Anumzamofonku rukrahe hu’za eme nehake’za, Agrira ke’za eri fore hu’naze. 5 Hagi ana knafina Israeli mopamofo agu’afina hazenke zamo’a avitegeno, kama vanoma hu’zamo’a amuho hige’za kana vanoa osu’naze. 6 Hagi mago kumamo’a otino mago kumara ha’rentegeno, ranra kumapi vahe’mo’za ha orente arente hu’za umani emani hu’naze. Na’ankure tusi hazenke maka kaziga Anumzamo’a atregeno hazenkemo kagi’ne. 7 Hianagi tamagra korora osuta hankavetitma eri’zana eriho. Na’ankure eri’zama erinesaza kante mizana erigahaze. 8 Hagi kasnampa ne' Odeti nemofo Azaria’ma hiankema Asa’ma nentahino’a, hankave e’nerino Judama, Benzamenima, Efraemi agona kokampima me’nea rankumapima ante’naza kaza osu havi anumzatmina maka eri netreno, Ra Anumzamofo kresramna vu ita Ra Anumzamofo mono nomofo avugama me’neana, eri so’e hu’ne. 9 Asa’a mika Juda vahe’ene Benzameni naga’enena zamavare atru nehuno, Efraemi naga’ma Manase naga’ma Simeoni naga’ma Juda mopafi nemaniza vahe’enena kehu atru hu’ne. Na’ankure Ra Anumzana Asa Anumzamo’a agri’ene mani’nege’za kazana hige’za, rama’a Israeli vahe’mo’za Asa’ene emani’naze. 10 Asa’ma kinima manino egeno 15nima hia kafumofo 3 ikantera, ana vahe’mo’za Jerusalemi kumate emeri atru hu’naze. 11 Hagi ha’ma hazafinti’ma zamavare’zama e’naza afutmimpintira 700'a bulimakao afutamine, 7tauseni’a sipisipi afutamine ahe’za Ra Anumzamofontega Kresramana vu’naze. 12 Ana nehu’za Ra Anumzana zamafahe’i Anumzamofona zamagu’zmenteti amage antegahune hu’za huhagerafi huvempagea hu’naze. 13 Hagi mago mofavremo’o, ra vahe’mo’o, vemo’o, a’mo’ma Ra Anumzamofoma ovararisiana ahe frigahune hu’za kea anaki’naze. 14 Ana maka vahe’mo’za ranke hu’za kezaneti’za, ufena nere’za Ra Anumzamofona avaririgahune hu’za huvempa kea hu’za eri hankaveti’naze. 15 Hagi Juda vahe’mo’za tusi muse hu’naze. Na’ankure zamagra hu’za tagu’areti huta amage antegahune hu’za huvempa nehu’za Anumzamofona antahigazageno, Ra Anumzamo’a kezmia antahi’ne. E’ina hazageno Ra Anumzamo’a mika kaziga ha’zana eri atrege’za, fru hu’za mani’naze. 16 Ma’aka’ma kuinima mani’neana kuini tra’aretira negeho Asa’a azeri netreno, havi anumza Asera amema’ama antreno tro’ma hunte’nea zafaramina antagino kitaginkotago huno Kidroni agupofi teve hanavazino kre fanane hu’ne. Na’ankure Ma’aka’a kasrino hi’mnage avu’ava huno, zafa antreno Asera havi anumzamofo amema’a tro hunte’negu anara hu’ne. 17 Hagi Asa’a maka havi anumzama mono’ma hunentaza kumatmina Israeli mopafintira eri havizana osune. Hianagi Asa’ma kinima mani’nea knafina tamage huno maka agu’areti huno Ra Anumzamofona amagera nenteno mago havizana osu’ne. 18 Hagi nefa’ene agranema Anumzamofo suzanema huke eri atru hu’na’a silvane goline mago’a zantaminena, erino Anumzamofo mono nompi ome ante’ne. 19 Hagi Asa’ma 35'a kafufima kinima mani’neno’ma kvama hu’nea knafina, ha’zana omane’ne.