Eclesiastes 9

Ana maka vahera fri vaheke mani’none hu’nea naneke

1 Ana hige’na ama ana maka zama rezaganena koana, fatgo avu’ava’ma nehia vahe’mo’ene knare antahi’zane vahe’mo’enema, maka zama neha’a zamo’a Anumzamofo azampi me’ne. E’ina hu’neankino mago vahe’ma avesintege avesra huntege’ma hu’zana vahe’mo’a keno antahinora osu’ne. 2 Maka fatgo avu’ava’ene vahero, kefo avu’ava’ene vahero, knare vahero, havi vahero, agruhu vahero, agru osu vahero, mono vahero, mono ontahi vahera, ana maka vahe’mo’a mago’zahu kanteke vugahie. Hagi Anumzamofonte’ma huvempama nehaza vahete’ene Anumzamofonte’ma huvempama huzankuma koroma nehaza vahete’enena mago zahu zanke fore hugahie. 3 Ana maka vahe’motare’ma mago zahu’zama fore’ma nehia zamo’a knarera nosie. E’ina hu’negu vahe’mo’za zamagra’a kegava hu’neza knare avu’avara nosazanki’za zamagra’a zamavesi’zamofo amage’nente’za, ome havizana nehaze. Hagi ana amefira mago’zana omane’neanki, fri’za nevaze. 4 Hianagi kasefa’ma hu’za mani’naza vahe’mokizmia amuha zazmia me’ne. Na’ankure zamagra amanage hu’za nehaze, kasefa huno mani’nea kramo’a fri’nea laionia agatere’ne hu’za nehaze. 5 Hagi kasefa’ma huta mani’nona vahe’mota, frigahune huta antahi’none. Hianagi fri’naza vahe’mo’za magozankura zamagesa ontahige, mago zamofo antahintahimo’a antahintahi zamifina nomanege’za, vahe’mo’zanena antahi nozamize. 6 Ana vahe’ma fri’zageno’a vahe’ma zamavesi nezmante’za, zamavaresrama hunezmante’za, kezmanunuma nehaza antahintahi zamo’enena ana maka fanene nehie. Ana hu’neankiza ete ru’enena ama mopafima fore’ma nehia zantamina nege’za, antahintahia osugahaze. 7 E’ina hu’negu muse nehunka vunka nezanka’a ome nenenka, waini tinka’a ome no, na’ankure Anumzamo’a ko e’inahuzana hugahane huno hu izo hugante’ne. 8 Maka zupa knare’nare kukena nehunka, masavena kanuntera fre vava huo. 9 Ama mopafima agafa’a omne knama maninka vanana kna’afina, Anumzamo’ma kamigenka avesima nentana a’ka’anena muse hunka manio. Na’ankure ama mopafima amuhoma hunka maninka vanana zamofo mizama’a kami’ne. 10 Inanknahu eri’zama ama mopafima erisanana maka hankaveka’reti hunka erio. Na’ankure frinka matitega vananana eri’zana ome e’orige, eri’za antahintahia ome retro huge, antahi’zana erige knare antahi’zanena erigera osugahie. 11 Hagi ete mago zama ama mopafima koana, tusi zama huno agama nerea vahe’mo’a agare zokago’ma reana, vahera zamagaterekera nosigeno, hankave ha' vahe’mo’za hara huzmagateregara nosaze. Anahukna huno knare antahi’zane vahe’mo’a agakura nehigeno, maka zama knare huno tro’ma nehia vahe’mo’a feno vahera nomanigeno, knare huno avonoma huno antahi’zama eria vahe’mofo nomani' zama’amo’a knarera nosie. Hianagi knare kankamunte’ma ruhiza’ma huterema nehaza vahe’mo’za knarera nehaze. 12 Na’ankure mago vahe’mo’a knazama avate’ma esiankna antahino keno osu’neankino, kukomo nozame azerigeno antri nehiaza huge, krifumo nama azerigeno antri nehiankna huno hazenke zamo’a vahetera ame huno ne-e.

Knare antahi’zamo’a neginagi antahi’zana agatere’nea naneke

13 Hagi ama mopafima fore’ma nehia zantmima negogeno’ma, mago knare antahintahima nenamino nazeri musema hiana ama’ne, 14 mago osi kumapina osi’a vahe mani’nazageno, hihamu’ane kini ne’mo’a sondia vahe’ane eno kuma keginamofo tavaonte mopa kateno ante hihi huno marerino hara huzmante’za hu’ne. 15 Hagi ana kumapina mago amunte omne ne' nemania ne’mo’a, knare antahizama’areti ana kumara agu’vazi’ne. Hianagi mago vahe’mo’e huno ana’ma hu’nea zankura antahi omi’naze. 16 Ana higeno knare antahi’zamo’a hankavea agatere’neanagi, amunte omane ne’mofo knare antahizankura vahe’mo’za antahimi’za zazatera novaze. 17 Knare antahi’zane ne’mo’ma akoheno’ma hania ke’ma antahi’zamo’a, neginagi kini ne’mo’ma ranke’ma huno kema nehigeno’ma antahi’zana agatere’ne. 18 Knare antahi zama eri’zamo ha’zama ante zana agatere’ne. Hianagi kumike ne’mo’a rama’a knare’zantamina eri haviza hugahie.