Êxodo 14

Fero’a Israeli vahe zamazerinaku zamarotago hu’nea naneke

1 Ra Anumzamo’a anage huno Mosesena asami’ne, 2 Zmasamige’za Israeli vahe’mo’za rukrehe hu’za vu’za, Pihahiroti kumamofo avuga Mikdoli kuma’ene hagerinke’namofo amu’noznifi, nona ome kinkeno mago kaziga Ba’al Sifoni kuma meno. 3 Na’ankure Fero’ma agesama antahi’niana, Israeli vahe’mo’za ka’ma kokana agatere’za vugara osu’za, hazagre’za vano nehaze huno antahigahie. 4 Nagrani’a Fero antahintahia eri hanaveti’nena, agri’ene sondia vahe’anena zamahe vagaresuge’za, Isipi vahe’mo’zama antahi’za ke’za hanazana, Nagrikura Ra Anumza mani’ne hu’za ra nagia namigahaze. Hige’za anante Israeli vahe’mo’za nona ki’za mani’naze.

5 Israeli vahe’mo’za hago atre’za vu’naze kema Isipi kini ne’mofoma eme asamizageno’a, Fero’ene eri’za vahe’amo’za antahi’zazmia ete rukrahe nehu’za, amazana naza hunke’za eri’zama erinerantaza zana zmatronke’za Israeli vahe’mo’za tatare’za vu’naze? hu’za hu’naze. 6 Anagema hute’za, kini ne’mo’a ha’ma hu’zana karisi’a retro nehuno, sondia vahe’a zamazeri retro, 7 nehuno 600'a knare’ma hu’nea karisiramina e’nerino, maka Isipi mopafima me’nea karesiramina erige’za, ana maka karisiramintera ugagota hu’naza sondia vahe’amo’za mareri’za manitere hu’naze. 8 Hagi Ra Anumzamo’a Isipi kini ne' Ferona antahintahia eri hanavetigeno zmarotago huno vu’neanagi, Israeli vahe’mo’za korera osu muse hu’za vu’naze. 9 Anantera maka Isipi vahe’mo’zane, Fero karisi ramine, hosiramina e’neri’za nevazageno, sondia vahe’mo’zanena zamarotago hu’za Pihahirotine Ba’ale Zefone avuga, koranke hageri ankenarega Israeli vahe’ma mani’nazare vu kofta hu’naze. 10 Hagi Israeli vahe’mo’za kazageno’ma, Fero’ene sondia vahe’amo’zama vu tava’oma nehige’za, zamagra tusi zamagogogu nehu’za, zamazama hanigu Ra Anumzamofonku kezanke hu’naze. 11 Anantera anage hu’za Mosesena asami’naze, Isipia matira omnegenka frisunegura ama ka’ma mopafina tavrenka e’nano? Nagafare tavrenka ama ka’ma kopina e’nane? 12 Isipima mani’neta ko kasamita anage hu’none, tataregeta Isipi vahe kazokzo eri’za e’nerita manimneno hu’none. Na’ankure Isipi vahe’mokizmi kazokzo eri’zama e’nerita manusina knare hisinagi, ama ka’ma mopafima fri’zamo’a knarera osu’ne.

Hagerimo rupapa huno vuno eno hu’nea naneke

13 Hianagi Mosese’a anage huno Israeli vahera zamasami’ne, Korora osuta Anumzamo’ma menima tamagu’ma vazisia zana oti hanavetineta keho! Na’ankure Isipi vahera menina nezmagazankita, mago’enena ozmagetfa hugahaze. 14 Hagi tamagra akoheta mani’nenkeno, Ra Anumzamo tamagritega anteno hara hugahie.

15 Anante Ra Anumzamo’a Mosesena anage huno asami’ne, Nahigenka Nagritega krafagea nehane? Zmasamige’za Israeli vahe’mo’za viho. 16 Hagi kagra azompaka’a erisga hunka, hagerintega kazana rusutegeno, hagerimo’a rupapa huno vuno eno hinkeno, hagege mopa fore hinke’za, Israeli vahe’mo’za viho. 17 Hagi Nagra Isipi vahe’mokizmi antahintahia eri hanavetisuge’za, tamarotago hu’za tamefi nevanage’na, Ferone maka sondia vahe’ane, hosima e’neri’za vahe’ene, karisizmine, zamahe refitesua zanteti, Nagra Ra nagia erigahue. 18 Ana’ma hu’na Ferone maka sondia vahe’ane, hosima e’neri’za vahe’ene, karisizmine, zamahe refitesuge’za Isipi vahe’mo’za nege’za, Nagrira Ra nagi namigahaze.

19 Anantera Anumzamofo ankeroma, Israeli vahe’ma ugagotama huzmanteno’ma nevia ankeromo’a zmagefi’ma evigeno’a, ana zanke huno ugagotama huno’ma nevia hampomo’a' zamagefi eme refite’ne. 20 Ana kenagera Israeli vahe’ene Isipi vahe’mokizmi amu’nompina ana hampomo’a me’neno, Isipi vahe’mokizmi kaziga rehani nehuno, Israeli vahe’mokizmi remsa huzmantege’za Isipi vahe’mo’za erava’o osu’naze.

21 Anante Mosese’a hagerintega azana rusutegeno, Ra Anumzamo’a zage hanatitegati zaho huntegeno, ana kenagera zaho erino hagerina eri rupapa huno vuno eno higeno, mopamo’a hagege hu’ne. 22 Ana higeno hagerimo’a kantigma hihi huno vihu gna huno mreri’nege’za, Israeli vahe’mo’za ana hagerimofo amu’nompi hagege hu’nea mopare vu’naze.

23 Anante Isipi vahe’ma, Fero hosima e’neriza vahe’ma, karisima e’neri’za vahe’ma, sondia nena, zamazeri naku zmagefi zmarotago hu’za hagerimofo amu’nompi vu’naze. 24 Kotu masama nehigeno, Ra Anumzamo’a hampompine, tevefine mani’neno kefenkateno Isipi sondia vahe’ma nezmageno, antahintahizmia zamazeri savri hu’ne. 25 Ra Anumzamo’a karisizmia zamazeri ge’za ruti’zama vuzankura mragu’zati’za nevu’za, Isipi vahe’mo’za anage hu’naze, atrenketa Israeli vahera zmatreta framneno. Na’ankure Anumzamo’a zamaza huno ha' hunerante. 26 Hagi Ra Anumzamo’a anage huno Mosesena asami’ne, Kazana hagerintega rusutegeno, hagerimo’a ete evuno Isipi vahe’ene karisizmine hosima eneri’za vahe’enana refitezmanteno. 27 Higeno Mosese’a ko’matigeno’a hagerintega azana rusutegeno, hagerimo’a evuno ru hamprigeno, Isipi vahe’mo’za ete rukrehe hu’za koro frenaku hazanagi hagerimofo agika frazageno, Ra Anumzamo’a hageri amu’nompi zmaheno refite’ne. 28 Hagi maka hosima e’neriza vahe’ene, maka Fero sondia vahe’ene karisi zminena hagerimo’a zmaherefitegeno, mago’mo’e huno omani’ne.

29 Hianagi Israeli vahe’mo’za hageri amu’nompina hagege hu’nea mopare vazageno hagerimo’a, kantigma kegina huzmanteankna hige’za amu’nompi vu’naze. 30 Ana zupa Israeli vahera Isipi vahe’mokizmi zamazampintira Ra Anumzamo’a zmagu’vazino zamaza hige’za, Isipi vahe’ma hagerinke’nafima fri’naza vahera Israeli vahe’mo’za zmage’naze. 31 Hagi Ra Anumzamo’ma havenentake zama tro’ma huno Isipi vahe’ma ha’ma huzmantea zama, Israeli vahe’mo’za nege’za, Ra Anumzamofona kore hunte’za zamentinti hunente’za, eri’za vahe’a Mosesenena zamentinti hunte’naze.