Jop 24

Jopu’ma Anumzamofo antahige’nea naneke

1 Nahigeno Hanavenentake Anumzamo’a keagama refko hukna huhampri onte’nesniane? Ana hu’nege’za Agri’ma amage’manentaza vahe’mo’za ana knama kesagura amnefina avega ante’za mani’nazageno amne zanknara nehie? 2 Kefo avu’ava’zama nehaza vahe’mo’za havige hu’za vahe mopa hanarenakura, kanagi kana eri kasi ogantu’a nente’za, sipisipi afutamina musufase’za zamagra afu kevufi eri havia nehaze. 3 Megusa mofavreramina rezmatga hu’za donki afuzamia nevre’za, nofi’ma hu’nazana vahe’mo’za eme neramita erisaze nehu’za, kento a’nemokizmi bulimakao afura avre’za nevaze. 4 Ana nehu’za zamunte omane vahera kama nevazafintira amanefi zamaretufe netraze. Ana hazage’za zamunte omne ana vahe’mokizmi zamagoro hu’za ome fra’nekize. 5 Ka’ma kokampi afi donki afu’mo hiaza hu’za, zamunte omane vahe’mo’za makazupa ne’zankura hakevava nehu’za, mofavre’zamimofoma zamisaza ne’zanku’enena nehakaze. 6 Vahe hozafinti ne’zana ome nehamre’za, havi avu’ava’ma nehaza vahe’mokizmi waini hozafinti waini raga neragi’za, mago’ama atre’nazama’a ome tagi vagare’naze. 7 Hagi zamavufagarera kukena omnege’za zasiku nehu’za kenagera mase’za vano nehu’za, mago’zana erigonofize. 8 Agonaregati’ma runo eanko’mo eme zamahe nefarige’za, noma manisaza zanku huge’za havegampi mani’za vano nehaze. 9 Kento a’nemokizmi zamasumpinti megusa mofavre nagara, eme zamavaresga hu’za nevu’za, nofi’ma hu’nazana ome paneseta ete ome zamavareta eho nehaze. 10 Hagi zamunte omne kukena zamavatera omnenege’za zamavapako vano nehu’za, vu’za hozafintira vahe ne’zana ome hamare’za eri nezamizanagi, zamagra’a zamagaku nehaze. 11 Zamagra olivimofo raga’ane, wainimofo raga’a regatiti hu’za tima’a e’nerizanagi, magore hu’za tima’a ne’za onkazageno zmanankemo’a tusiza huno hagage nehie. 12 Frinaku’ma karagi’ma neraza vahe’mokizmi zamageru’mo ran kumapintira ome ra hu’ne. Ana nehazage’za zamahe kuzafa’ma ante’naza vahe’mo’za zamazama hanaza vaheku zavira netaze. Hianagi Anumzamo’a zavi’ma netazazana antahizamino rukrahera huno nozamage.

13 Kefo zamavu zamava’ma nehaza vahe’mo’za masazamofona ha’renente’za, masazamofo kante’ma vu’zankura zamavesra nehige’za afete nemanize. 14 Nanterama zahufama masama osu’negeno’a, vahe’ma zamahe fri vahe’mo’za oti’za vu’za zamunte omne vahe’ene keonke zanku’ma atupa’ma nehaza vahera ome zamahe nefri’za, musufa vahekna hu’za kenagera vano nehu’za ke’onke’zana musufa nesaze. 15 Vere a’nanema zamazeri savari’ma nehaza vahe’mo’za avega ante’nazageno, zagemo’a tami nefarege’za amanage nehaze. Tavugosarera refite’nesnunke’za vahe’mo’za oragegahaze nehu’za, tavaravereti zamavugosarera ana’nekize. 16 Kumazafa vahe’mo’za kenage vano nehu’za, vahe’mokizmi nona anafe hu’za kumazafa nesaze. Ana nehu’za ferura zamavu nemase’za, masama hiama’a ke’za antahi’za nosaze. 17 Kenage’ma hanima kintrakoma hiana e’i zamagritera nantera nese. Ana nehige’za kenage’ma amanovazi’zama fore’ma huno vahe’ma zamazeri koro’ma nehia zana ke’za antahi’za hu’nazanki’za korora nosaze.

18 Hianagi timofo agremo’ma ame huno vagareaza hu’za fanane nehaze. Maka zama zamagrama ante’naza zamo’a kazusifi mesnige’za, zamagra’a ante’naza waini hozafinagi novaze. 19 Zagemo’ma aisima te ze’zema higeno kekokako’ma hu’nea mopafima ufreankna hu’za kumi’ma nehaza vahera fri vahe kuma’mo zamazeri nakrinige’za frigahaze. 20 Ana hina kasema zamante’naza vahera anta’zmimo’za antahi ozamigahaze. Ana nehanageno zamavufagamo’a haganentake hanige’za kanintamimo’za nenesage’za, vahe’mo’za mago’enena antahi ozamigahaze. Kumi’ma nehaza vahe’mo’za zahoko tuno zafa eri hantagiankna hu’za tami’za masegahaze. 21 Kumi’ma nehaza vahe’mo’za mofavrema kase onte’naza naravo a’nea rezmatga hu’za keonke’zazmia eneri’za, kento a’nenenema zamazama hu’zankura zamavesra nehaze. 22 Hianagi zago vahe’ma mani’za vahe’mo’za ra zamagima e’neri’za vahera Anumzamo’a Agra’a hankave’areti zamazeri netre. Ana vahe’mo’za maka zampina knare hu’za vugahazanagi, henka’a ome haviza hugahaze. 23 Anumzamo’a zamatrenigeno mago zamo’a hazenkea ozamisnige’za, knare hu’za manigahaze. Hianagi Anumzamo’a maka’zama hazazampina avua anteno nezamage. 24 Hagi zamagra atupa knafi ra zamagia eri’za mani so’e hute’za, ruga’a vahe’ma fri’za nevazaza hu’za frigahaze. Ana hugahazankino witi ragamo’ma afu re’nege’zama kazinteti rukafari zankna hu’za frigahaze. 25 Nagrama havigema nehanugeno’a, iza nagrikura huno havige nehane hunora nazeri kori’sigeno, nagri nanekemo’a amne zanknara hugahie?