Jó 28

Jopu’a ama mopafi feno zanku keaga hu’nea naneke

1 Vahe’mo’za mopafinti silva kafi’za e’neri’za, golia tevefi kre’za erigru hu’za e’nerize. 2 Ainia mopafinti kafi’za eneri’za, have krefrage’za kopa e’nerize. 3 Mopa agu’ama golima me’nea havegu’ma nehakaza vahe’mo’za ofenkame hanintirima hu’neama’afi tavi tagizageno remasa hu’nege’za, tavi masare ana haveramina hake’za e’nerize. 4 Ana vahe’mo’za mopa agu’afina vahe’ma ovu’are keria kafi’za ufrete’za, ana kerifina nofite urami’za ihimareaza hu’za vute ete nehu’za eri’zana e’nerize. 5 Hagi mopamofo agofetura vahe’mo’za hoza eri’za nentaze. Hianagi mopamofo agu’afina goligu’ma nehakraza, tusi teve hanavazi’za haveramina kre nefragazageno tevemo’a tusi amuho huno mopa temara’mra nehie. 6 Anampinti’ma e’nerizana zago’amo’ma marerisa havema safaema nehaza have e’neri’za, golima me’nea mopanena kafi’za e’nerize. 7 Goligu’ma nehakraza vahe’mo’zama ana kerifima unefraza kana oku’a me’nege’za, namamo’zane tumpamo’zanena zamavua onke’naze. 8 Ana nehazage’za zamavufaga rama nehaza afi zaga kfamo’za anankerifina zamagia rente’za vano nosazage’za, laioni mo’zanena anankerifina zamagaka renontaze. 9 Goli eri’zama e’neriza vahe’mo’za kazinkazima hu’nea haveramina ru frage mafrage hunetre’za, agona kafi’za eri ankrinesaze. 10 Ana vahe’mo’za haveramimpina kafi’za ufre’za, zago’amo’ma marerisa haveramina ke’za e’nerize. 11 Anama nehu’za ana vahe’mo’za mopa kafi’za tima agafama huno’ma ne-eama’a renkaninere’za marerisa zantamima oku’ama fraki’nea zana erinte ama' nehaze.

Knare antahi’zama hakeno eri’zanku hu’nea naneke

12 Hianagi vahe’mo’za knare antahi’zana igati ome e’neri’za, ama' antahi’zana igati ome e’nerize? 13 Mago vahe’mo’e huno knare antahi’zane, ama' antahi’zama eri kumara keno antahinora osu’ne. Na’ankure ama mopafima nemaniza vahe amu’nompina knare antahi’zane, ama' antahi’zana onketfa hugahane. 14 Ra hagerimo’a huno, nagranena omani’ne nehanigeno, amefenkame mopa agu’afima me’nea tirumo’enena huno nagranena omani’ne huno hugahie 15 Knare antahi’zane, ama' antahi’zamofo mizama’amo’a rugatere’neankita, golireti’ene silvaretira miza osugahune. 16 Ofiri mopafinti’ma eri’naza golimofo mizama’ane, zago’amo’ma marerisa haverarena, Oniksine Safaema nehaza havemofo mizama’a agatere’ne. 17 Knare antahi’zamo’a golimofo mizane kritoraisie nehaza havemofo mizama’a agatere’ne. Ana hu’neankino goliretike’ma tro’ma hu’nesnia zanteti’enena, knare antahi’zana miza osegahie. 18 Hagi hagerimpima kororiema nehaza zama me’nea zanteti’ene, zago’amo’ma marerisa havema Jaspema nehaza haveretira miza osegahane. E’ina hu’neankino knare antahi’zamo’a periema nehaza zamofo mizanena agatere’ne. 19 Hagi zago’amo’ma marerisa havema topasiema nehaza havema Itiopia mopareti’ma eri’naza havemofona, knare antahi’zamo’a agatere’ne. E’ina hu’neankino knare antahi’zamo’a hentofaza huno agruma hu’nea golia agatere’ne. 20 E’ina hu’neankita, knare antahi’zamo’a igati ne-e? Hagi ama' antahi’zana inantega me’nesnigeta kegahune? 21 Mika zagamofo avurera knare antahi’zamo’a frakino me’neankino, knare avurgama hunte’negenoma anamifima hareno vanoma nehania namamo’enena onkegahie. 22 Fri vahe kumamo’ene vahe’ma zamazeri havizama hu kumamokea huke, knare antahi’zama hakeno ke kumara me’ne hazageta zaho kea antahino’e. 23 Knare antahi’zama eri kana Anumzamo Agrake keno antahino hu’ne. Ana hu’neankinka igati knare antahi’zana erighane. Anumzamo agrake antahi’ne. 24 Na’ankure maka zama ama mopamofo agofetu’ma me’nea zantamina Anumzamo’a keharu huno negeno, monamofo fenka kazigama me’nea zantamina nege. 25 Anumzamo’a zaho’mofona zaho’ma erisnia hankave’a avamente refko huno nemino, hampompima me’neno ko’ma arania zana tina, avamente refko huno Anumzamo’a ante’ne. 26 Ko’ene kopsi’nanena e’ikante megaha’e huno Anumzamo’a kasege retro hunte’negene ana kante amage nenta’e. 27 Hagi ana’ma huteno’a Anumzamo’a knare antahi’zama rezagane so’e huno keno erinte fatgo nehuno, knare huno me’ne huno nehie. 28 Ana nehuno Anumzamo’a amanage huno vahe’motagura hu’ne, Ra Anumzamofoma koro’ma huntezana, knare antahi’zana megeno, havi avu’ava zamofoma amefi’ma humisnanana, ama' antahi’zana erigahane hu’ne.