Provérbios 12

Fatgo vahe’ene kefo avu’ava nehaza vahe’mofo naneke

1 Azerinte fatgohu kegu’ma avesintemo’a, ama' antahi’zamofonku avesinente. Hianagi azeri ante fatgohu kegu’ma avesrama hunte’mo’a, neginagi vahe mani’ne. 2 Knare zamavu’zamava’ma nehaza vahera, Ra Anumzamo’a avesi nezamanteanagi, havi zamavu’zmava’ma hunaku’ma retroma nehaza vahera, Ra Anumzamo’a haviza hu’naze huno huzmantegahie. 3 Kefozama hanaza zantetira mani’zazmia retrora osugahaze. Hianagi fatgo zamavu’zmavaza’ma hanazana, rafunare’za mani’nageno, vahe’mo’za eri tasagira osugahaze. 4 Hentofa avu’ava’ene a’mo’a, nevena knare agi nemie. Hianagi knare avu’ava osania a’mo’a, nevena zaferinafi namureno kasriankna hugahie. 5 Fatgo vahe’mo’ma antahi’zama retroma hania antahi’zamo’a, knare huno fatgo hu’ne. Hianagi havi zamavu’zamava nehanaza vahe’mo’zama, tami’naza antahi’zana, regavatga hugahaze. 6 Kefo zamavu’zamava’ma nehaza vahe’mokizmi ke’mo’a, vahe zamahe nefria vahe’mokizmi zamazankna hu’ne. Hianagi fatgo vahe’mofo kemo’a, vahe’mokizmia zamagu’nevazie. 7 Kefo zamavu zamava’ma nehaza vahe’mo’za, haviza hu’za fanane nehaze. Hianagi fatgo vahe’mokizmi naga’mo’za, oti hanavenetize. 8 Antahi’zama’amo’ma knare’ma hu’nesia nera, vahe’mo’za husga huntegahaze. Hianagi antahi’za zmimo’ma fatgoma osu vahera, vahe’mo’za zamavesra huzmantegahaze. 9 Eri’za vahe’ama mani’ne’nia vahe’mo’ma, anteramino amane vahe maniazama hanimo’a, zamunte omane vahe’mo’za zamagra’a zamavufaga erisga nehazageno ne’zazmia omane vahera zamagatere’naze. 10 Fatgo vahe’mo’a zagagafa’amofona kegavagriso’e hunezamante. Hianagi kefo zamavu’zamava’ma nehaza vahe’mo’za zagagafa zamia kegava hugahazanagi, kanonkeve zamigahaze. 11 Amuho hu’za hozama antaza vahe’mo’za, rama’a ne’za me’nenige’za negahaze. Hianagi neginagi vahe’mo’za, nena raga’a omne’zante knazmia ahe fri’za eri’zana e’nerize. 12 Kefo zamavu’zamava’ma nehaza vahe’mo’za kefo zamavu’zamava hu’za eri’za vahe’mokizmi zante ke zmanunu nehaze. Hianagi fatgo vahe’mo’za, arafuna rene’za raga rentegahaze. 13 Kefo zamavu’zamava’ma nehaza vahe’mo’za, havigema nehaza kezamifinti, krifu ahazankna nehaze. Hianagi fatgo vahe’mo’za ana krifufina ohe’za agateneraze. 14 Knare zamageru’ene vahe’mo’za, kezmireti knare’zana e’nerize. Hagi eri’za vahe’mo’za, anahu kna hu’za erizazmireti mizazmia e’nerize. 15 Neginagi vahe’mo’zama zamagesama antahi’zana, zamagrama nehaza zamo’a fatgo hu’ne hugahazanagi, ama' antahi’zane vahe’mo’za rumo’zama antahintahima zamizankea nentahize. 16 Neginagi vahe’mokizmia zamarimpa he’zamo’a ame huno amate eama hanigenka kegahananagi, ama' antahi’zane vahe’mo’a azeri havizama nehinkeno’a, rimpa he’zamo’a eama hanigenka onkegahane. 17 Tamagema hu vahe’mo’a, keagare’ma otisimofona tamage huno hufore huntegahie. Hianagi havigema hu vahe’mo’a, keagare’ma otisimofona havige huno hu frakintegahie. 18 Antahintahima osuno ame’ama huno hu ke’mo’a, kazimo vahe avufafi reankna nehie. Hianagi antahintahima huteno, keagagama hu vahe’mofo kemo’a, zamaza huno zamazeri neganamare. 19 Tamage ke’mo’a mevava hugahie. Hianagi havigema hu kemo’a, za’zatera omanegahie. 20 Kefo antahintahine vahe’mokizmi zamagu’afina vahe’ma rezmavataga hu antahi’zamo avite’ne. Hianagi rimpa fru zanku’ma nehaza vahe’mo’za muse hugahaze. 21 Fatgo vahe’mokizmirera hazenke zana omegahie. Hianagi havi zamavu’zamava’ene vahe’mokizmirera, hazenke zamo’a avitegahie. 22 Ra Anumzamo’a havigema nehaza vahekura, tusiza huno agotezmanteno avesra hunezamante. Hianagi, tamagema nehaza vahekura, tusi muse nehie. 23 Ama' antahi’zane vahe’mo’za ame hu’za antahintahi zazmia eri ante ama nosaze. Hianagi neginagi vahe’mo’za neginagi antahintahizamia ame hu’za huama nehaze. 24 Hanavetinka eri’zama erisanana, kva vahe fore hugahane. Hianagi feru vahe’ma manisanana, kazokzo eri’za vahe manigahane. 25 Antahintahi hakarema hu’zamo’a, vahe’mofona azeri antepri nehie. Hianagi zamazeri hanaveti ke’ma vahe’ma huzami zamo’a, zamazeri antesga nehige’za muse nehaze. 26 Fatgo vahe’mo’za tava’ozamire’ma nemaniza vahe’mokizmia, knare antahi’za zami’za knare kante zamavare’za nevaze. Hianagi kefo zamavu’zamava’ma nehaza vahe’mo’za zamavare’za havifi nevaze. 27 Feru vahe’mo’zama zagagafama ahesazana onkregahaze. Hianagi kazigazi huno eri’zama eri’zamo’a, vahe’mofona marerisa feno zama’e. 28 Fatgo avu’ava’ma huno mani’zamo’a, knare nomanizamofo ka me’ne. Hagi ana fatgo avu’ava’ma avaririzamo’a, fri’zana omane’ne.