Lucas 19

Iyesu rhii Urushelima kǝni ogumo ni

28 Akywa sini Iyesu kywɛrɛ ʊpɛrɛ ʊring men aka kpa itemo asu kyeng kirha ngɛ kyaa Urushelima. 29 Akywa sini afwi iyoyow ni Ibaitafeji kǝni Ibetani bi ikwo ukro sini a yirhi ni Izaitun aka tuma ɔnɔ ʊmɛr ngɛ arʊ apari asani moni, 30 "Inyi kya kidɔɔ apya sini ani ite nyi, inyi ba raa inyi nʊ darha eniri ani ijaki ami sini ba arʊ sini akirha ngɛ. Inyi shire ngɛ okɔba ben. 31 Arʊ sini obo gyurho inyi, ‘Ikisi inyi ku shire ngɛ?’ Inyi sani ɛngɛɛ ni, ‘Ete ngɛ ɛwɛi.’ "

32 Arʊ sini atumimo aka kyaa aya darha nɛmɛr kǝni sini Atanimo ni. 33 Akywa sini a ku shire ɛkɛri ani Ijaki, ɔkɔrɔ ko gyurhomo, "Ikisi inyi ku shire ɛkɛri ani Ijaki?"

34 Aka sani, "Ete ngɛ ɛwɛi."

35 Oko koo ba owro Iyesu, okɔ wuro ʊgbɛ ʊsɔmɔ mo kɔ sɔrɔ ani Ijaki ekǝ she Iyesu ngɛ akirha bayaa. 36 Sini a kpin ʊtʊra orokru kasu ta ʊʊma ʊsɔmɔmɔ bi ʊtira.

37 Akywa sini afwa bi iyoyow ni Urushelima owro sini ʊtira shuri kyawo ukro Izaitun, ɔnɔ ʊmɛr ngɛ napany ka kpin ʊbrir Ʊnʊng ngɛ ayaya bekai ʊʊma ujijire sini erii.

38 Aka su ta akpa kasu sani,

"Ʊnʊng ta onuo adaduma baya ogumo sini abii bidɔɔ ʊtʊwa Ete!"✝19:38 Ɛtɛ Ub 118:26

"Ʊyari ikywi kya ayaya, kǝni ʊdɔ kyekya owro Ʊnʊng kya ayaya!"

39 Opyoo Afarisi sini ani idɔɔ orokru ka sani Iyesu ngɛ ni, "Avʊwa, tana ɔnɔ ʊmɛr nwu ni ashywi!"

40 Iyesu ko yoromo,"Iku tanany arʊ men ba shywimo ngɛ, atari yen nʊ shoo akpa."