Luka 8

Ɔnɔ Ijairus kǝni erere sini apyii Igbɛ Iyesu

40 Ni sini Iyesu juri ba ʊwan ʊbya orokru ka yirha ngɛ ni ofofuru kii akaru shaa. 41 Ani aya ʊsirha kǝna opyo orokru sini ayirhi ʊtʊwa ngɛ ni Ijerus, arite owro utuno Ayaudiya kaba okpukporo bi ite Iyesu, asu sɔrhɔ ngɛ akya ʊdʊnaa, 42 kii ɔnɔ eying enere arʊ sini etekya ʊsa ɛnyɛɛ atarhi na apari etekya ukpo.

Ni sini Iyesu nibi ʊtira ushi orokru ko mumun ngɛ. 43 Opyo erere sini akʊ kung igara ni udumo ʊnira eyi ɛnyɛɛ atarhi na apari, ɔnuo burha. Eperi imi sini aniyoo ngɛ bi ʊkikie eberi avuwa ikang, ekɛne pen ngɛ ikrʊ. 44 Aka sara bidɔɔ orokru bau utumo Iyesu ka pya afri igbɛ ngɛ, ba kywakywa dang ʊnira eyi nge kating.

45 Iyesu ko gyurho a sani, "Iyaa apim?" Orokru kara amaa ngɛ, ikpara dang Ibitrus ka sani, "Avuwa akai orokru men ekǝkǝrinw a su tanw ivʊ bai ikwu ikinisha keba ni ɔnwɔ."

46 Iyesu ka sani ni, "Ararʊ pyam; ikung sini ikrʊ kuni yo ngɛ bidɔɔmi."

47 Ni sini ɛkǝri erere rii anasu braa ʊsɔ ngɛ, oko kuno ni ʊyawro aba okpukporo ni orung bi ite Iyesu. Aka tana nashisha imi sini isi ingɛɛ pie kǝni sini eyi ting na kyarh bakywakywa dang. 48 Iyesu ka sani ɛngɛɛ ni, "Ɔnɔm, ʊma ʊbrʊbrʊnw manw ikrʊ. Kyanw ni ofofuru."

49 Ni sini Iyesu ni aya ʊpya onuo, opyo orokru kaba ni itina bau ʊni Ijerus, arite ʊna utuno Ayahudiya. Kaba sani Ijerus ngɛ ni, "Ɔnɔnw kywɛrɛ ukpoo, bekya ojo ma avuwa ngɛ igara."

50 Ni sini Iyesu kʊng kǝna aka sani Ijerus ngɛ ni, "Bekya kung irung; yoro! Anu gya."

51 Sini afwi ʊna Ijerus, akya noyoro ngɛ ni araru raa kǝni ɛngɛɛ ngɛ. Ibitrus, kǝni Iyohana kǝni Iyakubu adarhi Akwa ɔnɔ kǝni ekperi ngɛ mo oyori ni araa kǝni ɛngɛɛ. 52 Orokru titiri ɛkǝri ʊna asu tei kǝni ʊwʊra ikywi ngɛ bekai ɛkǝri ɔnɔ. Iyesu kasani ɔmɔni, "Shere utei ngɛ ɛkǝri ɔnɔ se kpo ba, akʊ morowo."

53 Orokru ka sina ngɛ, sini ekperhi ngɛ asani ekywere ukpoo. 54 Iyesu ka kpin ngɛ bavu kasani,"Ɔnɔm, shinɛ!" 55 Ʊring ngɛ ko juro bawo idɔɔ ngɛ ekǝ shinɛ akiki bakywakywa dang. Iyesu ka sani ɔmɔni amaa ʊmʊra ara. 56 Arʊ byere ngɛ kǝjijire, Iyesu ka sani ɔmɔni ebekya tana araru imi sini isi.