Chongmalar 19

Sakor Kabang Kaseppa

11 Hiwa thengli marwaan inlong kha kei’n kaleimu, khawa khan sakor kabang inkhat aleiom, sakor kaseppa raming kha Ngamna kaom khat-um Akadik inti; akatuun khan ama’n chong itanle inruoiya ama’n raal atho.

12 Ama mit kha meimachuon ang, halli reng lukhu katamtak alu khan alei-inkhu. Ama pumkhan raming inkhat injia, takkha tuteii innum ramingkha jetmu ama bit-eii akajet.

13 Ama inluk puon inchuol kha thisen in asip. Ama raming kha "Pathian Chong inti."” 14 Marwaan raalmi ngai’n sakor kabang ngai inchuongnga khat-um inthiang linen puondiar kabang inluk-ah ama nukkha inleijui.

15 Amurra inphut chempui ka-ngei aheisuok, khawa chempui khan ama’n phungli zaat ngaikha amatorsik eii. Ama’n phungli zaat chungnga thirramol choita wai aroonsik eii, halli Akaraatkhet Pathian raangna khan thota theibomju kha theibomtui soomna khan akeiiya atousik eii.

16 Ama puon inchuol khat-um ama ketor khan raming kha injia: "Reng rakip Reng, Pumi rakip Pumi."”

17 Hiwa thengli marwaan tirton inkhat kani chungnga ngirra i-om kha kei’n kaleimu. Marwaan tirton khan rasa inringnga lairalak ah kawuong wa ngaidiang aleiti: "Pathian bubakna kalok khan heiwa inlang juo-intuupru!

18 Reng ngai, raalmi kalok ngai, raalmi ngai, sakor ngai khat-um sakor kasep ngai, mi ngai, suok khat-um suok ka-emak ngai, kalok khat-um kasiin ngai kaluong hi heiwa inlang juo-eiru!"”

19 Hiwa thengli ramsa khat-um nuoipilchung reng ngai’n inmani raalmi ngaikhale inchunna sakor kabang kaseppa khat-um ama raalmi ngai chungnga raal kathosik-ah inkoituup kha kei’n kaleimu.

20 Ramsa kha akadikmak Pathian chongkachoipa le inruoiya insurra inleiruoi. Akadikmak Pathian chongkachoipa khan ramsa maikuungnga chuon-inlak athoa inpumma ramsa ramil indeeng khat-um ramsa ramil diang chubei katho mi ngaikha maleisei tho-ah aleikeiruoi. Ramsa li Akadikmak Pathian chongkachoipa kha inring pumma sulfur le inruoiya kakaang meikhur khan indeengluut jei.

21 Inmani raalmi ngaikha sakor kabang kaseppa mur makheiya kaheisuok chempui ka-ngei khan aleithat; halli wa ngaikhan inmani kaluong ngaikha inkhop maklaiseng inlei-ei.