João 15

Ri Jesús xuqujeꞌ ri ucheꞌal ri uvas

1 In riꞌ ri qas in ucheꞌal ri uvas, ri nuTat are kachakun ri ulew.*15:1 Pa ri Ojer Tyoxalaj Wuj, jacha kubꞌij pa Isaías 5 ri winaq aꞌj Israel kejunumax rukꞌ ri ucheꞌal ri uva. Chi riꞌ kubꞌij chi ri uwach ri uva man utz taj xelik. Pa we jun kꞌulmatajik riꞌ kubꞌij chi we kujkꞌojiꞌ che areꞌ, kaqabꞌan riꞌ ri urayibꞌal ukꞌuꞌx ri Dios. 2 Ri uqꞌabꞌ ri ucheꞌal ri uvas we man kuya uwach, kasakꞌix bꞌik. Are kꞌu ri uqꞌabꞌ ri cheꞌ ri kuya uwach, kachꞌajchꞌobꞌexik rech kꞌi uwach kuyaꞌo. 3 Ri ix ixchꞌajchꞌoj chik rumal ri tzij ri xintzijoj chiꞌwe. 4 Chixkꞌol chwe in, rech in kinkꞌojiꞌ chiꞌwe ix. Jetaq ri uqꞌabꞌ ri cheꞌ man kakwin taj kawachinik xaq pa rech wi, xane rajawaxik kakꞌojiꞌ che ri ucheꞌal ri uvas, je xuqujeꞌ ix man kixkwin taj kixwachinik we man kixkꞌojiꞌ chwe in.

5 In riꞌ ri in ucheꞌal ri uvas, ix ix uqꞌabꞌ. Ri kakꞌojiꞌ chwe in, xuqujeꞌ in che areꞌ, sibꞌalaj kꞌi na uwach kuyaꞌo. Maj kixkwinik kibꞌano we man kixkꞌojiꞌ chwe.