Mateus 2

Kasolix ri Jesús kumal ri achyabꞌ ri kꞌo ketaꞌmabꞌal

1 Alaxinaq chi ri Jesús pa ri tinimit Belén rech Judea, pa taq ri qꞌij are kataqan ri taqanel Herodes. Xoꞌpan pa Jerusalén nikꞌaj achyabꞌ kꞌo ketaꞌmabꞌal, kipetik pa ri relibꞌal qꞌij.*2:1 We winaq riꞌ iꞌlol taq chꞌumil kibꞌiꞌ, ri jun kibꞌiꞌ chik are aꞌjqꞌijabꞌ. We winaq riꞌ iꞌlol taq chꞌumil xuqujeꞌ kekwinik kakil ri uwo kaj rech jeriꞌ kakibꞌij jas ri kakꞌulmataj pa ri qꞌij junabꞌ ri petinaq.

2 Xkitatabꞌelaꞌ xkibꞌij: ¿Jawjeꞌ xalax wi ri kirey ri winaq aꞌj Israel? Xqil ri uchꞌumil rumal riꞌ xujpe chuqꞌijilaꞌxik.

3 Ri taqanel Herodes are xutabꞌej rech we riꞌ, xkꞌaxir ranimaꞌ, xkꞌaxir xuqujeꞌ kanimaꞌ ri winaq rech ri tinimit Jerusalén. 4 Xaq jeriꞌ xtaqan che kisikꞌixik konojel ri e kꞌamal taq bꞌe ke ri chꞌawenelabꞌ cho ri Dios pa kiwiꞌ ri winaq, xuqujeꞌ ri aꞌjtijabꞌ rech ri taqanik, xuta chike jas leꞌaj kalax wi ri Cristo.

5 Pa ri tinimit Belén rech Judea, xecha che, rumal cher jeriꞌ utzꞌibꞌam loq ri qꞌalajisal utzij ri Dios:

6 Ri at tinimit Belén, ri at kꞌo pa ri rulew ri Judea,

Pune nitzꞌ aqꞌij chikiwach ri e nikꞌaj leꞌaj chik rech ri Judea,

Chawe kꞌut kakꞌiy wi na loq jun qꞌatal tzij,

Ri kuꞌyuqꞌuj na ri nutinimit Israel. ✝ 2:6 Miqueas 5:2.

7 Kꞌa te riꞌ ri Herodes cheleqꞌal xuꞌsikꞌij ri achyabꞌ ri kꞌo ketaꞌmabꞌal, xuta chike jampaꞌ xukꞌut ribꞌ ri chꞌumil. 8 Kꞌa te riꞌ xuꞌtaq bꞌik pa Belén, xubꞌij chike: Jix chitatabꞌelaꞌ jawjeꞌ xalax wi ri akꞌal. Are kiriqo, jilibꞌij chwe jeriꞌ kineꞌ xuqujeꞌ in chuqꞌijilaꞌxik.

9 Are xtataj ri xubꞌij ri taqanel chike, xkitaqej ri kibꞌe, kꞌa te xkilo xnabꞌej ri chꞌumil chkiwach, te xeꞌtakꞌal puꞌwiꞌ ri leꞌaj ri kꞌo wi ri akꞌal. 10 Are xkil ri chꞌumil, sibꞌalaj xekiꞌkotik. 11 Xoꞌk bꞌik pa ri ja, xkil ri akꞌal kꞌo rukꞌ ri unan María, xexukiꞌk xkiqꞌijilaꞌj ri Jesús. Kꞌa te riꞌ xkijaq ri kikꞌolibꞌal, xkisipaj qꞌana pwaq che, uqꞌolal cheꞌ,*2:11 Ri uqꞌolal cheꞌ are waꞌ ri kaporox pa ri templo, jun sipanik cho ri Dios. xuqujeꞌ kꞌokꞌ taq kunabꞌal ubꞌiꞌ mirra.*2:11 Ri mirra jun qꞌayes, are kachaqiꞌjarik kakoj che jun kꞌokꞌ laj kok kunabꞌal. 12 Xechꞌabꞌex kꞌu we achyabꞌ riꞌ pa ri kiwaram xbꞌix chike chi man ketzalij ta chi rukꞌ ri Herodes, rumal riꞌ pa jun bꞌe chik xetzalij wi.