1 Tessalonicenses 3

1 ✝ ୩:୧ କାମା ୧୭:୧୫ ଏ଼ଦାଆଁତାକି ମା଼ମ୍ବୁ ଅ଼ର୍‌ହାଲି ଆ଼ଡାଆନା ଆତିନି ଗା଼ଡ଼ାତା ରଅତମି ଡ଼ୟାଲି ତୀରି କିତମି*୩:୧ କାମା ୧୭:୧ । 2 ଇଞ୍ଜାଁ ମିଙ୍ଗେ ସୁସ୍ତି କିହାଲି ଅ଼ଡ଼େ ମୀ ନାମୁତା ମିଙ୍ଗେ ରା଼ହାଁ ହୀହାଲି କ୍ରୀସ୍ତତି ନେହିଁ କାବ୍ରୁତି କାମାତା ମାହାପୂରୁ ତଲେ ଆଣ୍ତାହାଁ କାମା କିନି ମା଼ ତାୟି ତିମତିଇଁ ପାଣ୍ତାତମି । 3 ଏ଼ନିକିଁ ଆମ୍ବାଆରି ଈ ବାରେ କସ୍ତ ତାକି କିଲିବିଲି ଆ଼ଅରି, ମା଼ମ୍ବୁ ଏ଼ଦାଆଁତାକି ହେର୍‌ପି ଆ଼ହାମାଚମି ଇଞ୍ଜିଁ ମୀରୁଏ ପୁଞ୍ଜାମାଚେରି । 4 ଇଚିହିଁ ମାଙ୍ଗେ ନିନ୍ଦା କସ୍ତ ବେଟାଆ଼ହାଲି ଆ଼ନେ, ଈଦାଆଁ ମା଼ମ୍ବୁ ମୀ ତା଼ଣା ମାଚି ବେ଼ଲାତେଏ ମିଙ୍ଗେ ନ଼କେଏ ଏଚର ପା଼ଲି ୱେସାମାଞ୍ଜାତମି, ଇଞ୍ଜାଁ ସାତେଏ ଏଲେ ଆ଼ହାମାନେ, ଇଞ୍ଜିଁ ମୀରୁ ଏ଼ଦାଆଁ ପୁଞ୍ଜିମାଞ୍ଜେରି । 5 ଏ଼ଦାଆଁତାକି ଏଚେ଼ତା ତାୟିପାରି କିନାସି ମିଙ୍ଗେ ତାୟିପାରି କିୟାନେସି ଅ଼ଡ଼େ ମା଼ ୱା଼ହୁତି କାମା ଉଜେଏତାୟି ଆ଼ହାଡ଼ୟିନେ, ଈଦାଆଁ ଅଣ୍‌ପାହାଁ ନା଼ନୁ ଜିକେଏ ଅ଼ର୍‌ହାଲି ଆ଼ଡାଆନା, ମୀ ନାମୁ ଏଚେକା ମାନେ ଇଞ୍ଜିଁ ପୁଞ୍ଜାଲି ତିମତିଇଁ ମୀ ତା଼ଣା ପାଣ୍ତାତେଏଁ । 6 ✝୩:୬ କାମା ୧୮:୫ସାମା ନୀଏଁ ତିମତି ମୀ ତା଼ଣାଟି ମା଼ ତା଼ଣା ୱେଣ୍ତା ୱା଼ହାଁ ମୀ ନାମୁ ଅ଼ଡ଼େ ଜୀୱୁ ନ଼ନାଣି ରା଼ହାଁତି କାବ୍ରୁ ମାଙ୍ଗେ ୱେସାମାଞ୍ଜାନେସି, ମୀରୁ ମାଙ୍ଗେ ନେହିକିଁ ଅଣ୍‌ପିମାଞ୍ଜାଦେରି, ଅ଼ଡ଼େ ମା଼ମ୍ବୁ ମିଙ୍ଗ ଏଚେକା ମେସାଲି ଅଣ୍‌ପି ମାନମି, ମୀରୁ ଜିକେଏ ମାଙ୍ଗ ମେସାଲି ଏଚେକା ଅଣ୍‌ପି ମାଞ୍ଜାଦେରି, ଏଲେକିଁ ମାଙ୍ଗେ ନେହିଁ କାବ୍ରୁ ୱେସାମାଞ୍ଜାନେସି । 7 ଏ଼ଦାଆଁତାକି ଏ଼ ତାୟିୟାଁ ଅ଼ଡ଼େ ତାଙ୍ଗିସିକା, ମୀ ନାମୁଟି ମା଼ମ୍ବୁ ମା଼ ବାରେ ଦୁକୁ ଅ଼ଡ଼େ କସ୍ତତା ମୀ ତାକି ସା଼ସା ବେଟା ଆ଼ହାମାନମି । 8 ମା଼ମ୍ବୁ ନୀଏଁ ନୀଡାମାନମି ଆତିହିଁ ମୀରୁ ପ୍ରବୁ ତା଼ଣା ତୀରିଆ଼ହାଁ ମାଞ୍ଜୁ । 9 ହାଅ, ମା଼ମ୍ବୁ ମାହାପୂରୁ ନ଼କିତା ମୀ ତାକି ବେଟାଆ଼ହାମାନି ରା଼ହାଁତାକି ରା଼ହାଁ ଆ଼ହାମାନମି, ମା଼ମ୍ବୁ ଏ଼ନିକିଁ ୱେଣ୍ତେ ହୀନି ଦା଼ନା ଲେହେଁ, ମୀ ତାକି ମାହାପୂରୁଇଁ ଏ଼ନିକିଁ ଜହରା କିହାଲି ଆ଼ଡିନମି । 10 ମୀ ନାମୁତା ଏ଼ନାୟି ଲ଼ଡ଼ାମାନେ, ଏ଼ଦାଆଁ ମିଙ୍ଗେ କିହାଲି ଅ଼ଡ଼େ ମୀ ମୂମ୍ବୁ ମେସାଲି ଆ଼ଡିନମି ଏ଼ଦାଆଁତାକି ଲା଼ଆଁ ମାଦେନା ବାରେ ହିୟାଁ ତଲେ ବାତିମା଼ଲି ରୀସି ମାନମି ।

11 ମା଼ ଆ଼ବା ମାହାପୂରୁ ତା଼ନୁଏ ଅ଼ଡ଼େ ପ୍ରବୁ ଜୀସୁ ମାଙ୍ଗେ ମୀ ତା଼ଣା ୱାୟାଲି ତବେ ଜିରୁ ତ଼ସ୍ତାପେସି । 12 ଅ଼ଡ଼େ, ମା଼ମ୍ବୁ ମିଙ୍ଗେ ଜୀୱୁନ଼ହିଁ ମାଞ୍ଜାନି ଲେହେଁ ମୀରୁ ରଅତେରି ରଅଣାଇଁ ଜୀୱୁ ନ଼ୱିଆହିଁ ବାରେ ଲ଼କୁଇଁ ଜୀୱୁ ନ଼ୟାଁଲି ପ୍ରବୁ ମୀ ଜୀୱୁ ନ଼ନାଣି ଦିନାତାକି ଦିନା ପାଡି କିୟାପେସି । 13 ଏ଼ୱାସି ମୀ ହିୟାଁତି ସୁସ୍ତି କିୟାପେସି ଏଚିବେ଼ଲା ମା଼ ପ୍ରବୁ ଜୀସୁ ତାନି ଲ଼କୁତଲେ ୱେଣ୍ତା ୱା଼ନାଟି ମୀରୁ ମା଼ ଆ଼ବା ମାହାପୂରୁ ନ଼କିତା ଦ଼ହ ହିଲାଆନା ସୁଦୁ ଗାଟାତେରି ତ଼ଞ୍ଜା ଆ଼ଦେରି ।