1 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କା କା଼ଲା ଅ଼ଡ଼େ ତୀରି କିହାମାନି ବେ଼ଲାତି କାତା ମିଙ୍ଗେ ରା଼ଚାଲି ଲ଼ଡ଼ା ଆ଼ଏ, 2 ✝ଇଚିହିଁ ପ୍ରବୁ ୱା଼ନି ଦିନା ଲା଼ଆଁୟାଁ ଡଂଗେଏସି ୱା଼ନି ଲେହେଁ ୱା଼ନେ ଇଞ୍ଜିଁ ମୀରୁ ପୁଞ୍ଜାମାଞ୍ଜେରି । 3 ନୀଏଁ ବାରେୱାକି ହିତ୍‌ଡ଼ି ଇଞ୍ଜାଁ ଆଜି ହିଲେଏ ଇଞ୍ଜିଁ ଲ଼କୁ ୱେହ୍‌ନି ବେ଼ଲାତା ଦେବୁଣିଏ କକାରି ପ଼ଦା ଆ଼ନି ଇୟାନାକି ଲୁଞ୍ଜିନି ବୀସା ଲେହେଁ ଏ଼ୱାରାକି ନା଼ସା ୱା଼ନେ, ଅ଼ଡ଼େ ଏ଼ୱାରି ଏମ୍ବାଟି ଏ଼ନିଜିକେଏ ଗେଲ୍‌ପି ଆ଼ଅରି । 4 ସାମା ଏ଼ ତାୟିୟାଁତେରି ମୀରୁ ଆନ୍ଦେରିତା ହିଲଅତେରି, ଏ଼ ଦିନା ମୀରୁ ପୁନାଆରେ଼ଟୁ ଡଂଗେଏସି ୱା଼ନିଲେହେଁ ମୀରୁ କା଼ଚାହିଲାଆ ବେ଼ଲାତା ୱା଼ନେସି । 5 ମୀରୁ ବାରେଜା଼ଣା ଉଜେଡ଼ି ଅ଼ଡ଼େ ମାଦେନାତି ମୀର୍‌କା ଇଞ୍ଜାଁ ମା଼ସ୍‌କାତେରି, ମୀରୁ ଆନ୍ଦେରି ଅ଼ଡ଼େ ଲା଼ଆୟାଁତି ମୀର୍‌କା ମା଼ସ୍‌କାତେରି ଆ଼ଏ; 6 ଏ଼ଦାଆଁତାକି ୱା଼ଦୁ ମା଼ର ଏଟ୍‌କାତାରି ଲେହେଁ ଇଦା କିଆପ, ମା଼ର ଜାଗ୍ରାତା ଆ଼ହାଁ ସେତ୍‌ନା ତଲେ ଡ଼ୟିନ । 7 ଇଚିହିଁ ଆମ୍ବାଆରି ଇଦା କିନେରି, ଲା଼ଆଁୟାଁ ଇଦା କିନେରି, ଅ଼ଡ଼େ ଆମ୍ବାଆରି କା଼ଡ଼ୁ ହ଼ଚିନେରି ଲା଼ଆଁୟାଁ ହ଼ଚିନେରି, 8 ✝ସାମା ମା଼ର ମାଦେନାତି ମୀର୍‌କା ମା଼ସ୍‌କା ଆ଼ହାମାନାକି ଜୀୱୁ ନ଼ନି ଲେହେଁତି ନାମୁତି ବକ ପା଼ଟା ତୁର୍‌ହାଁ, ଗେଲ୍‌ପିଆ଼ନି ବା଼ର୍ସୁତି ଟ଼ପେରି ତା଼ର୍ୟୁଁତି ତୁର୍‌ହାଁ ଜାଗ୍ରାତା ତଲେ ଡ଼ୟିନ । 9 ମାହାପୂରୁ ମାଙ୍ଗେ ତାନି କାର୍‌ବି ତାକି ଡଣ୍ତ ହିୟାଲି ଆ଼ଏ, ସାମା ମା଼ ପ୍ରବୁ ଜୀସୁ କ୍ରୀସ୍ତ ତା଼ଣାଟି ଗେଲ୍‌ପିଆୟାଲି ଆ଼ଚାମାଞ୍ଜାନେସି । 10 ଏ଼ୱାସି ମା଼ ତାକି ହା଼ତେସି, ମା଼ର ହା଼ତିହିଁ କି ଜୀୱୁତଲେ ମାଚିହିଁ ମା଼ର ଏ଼ନିକିଁ ଏ଼ୱାଣିତଲେ ନୀଡିନାୟି । 11 ଏ଼ଦାଆଁତାକି ନୀଏଁ କିହିମାନି ଲେହେଁ, ମୀରୁ ରଅତେରି ରଅଣାଇଁ ସା଼ସା ଅ଼ଡ଼େ ସା଼ୟେମି କିୱିଆ଼ଦୁ ।

12 ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ ମିଙ୍ଗେ ବାତିମା଼ଲି ମାଞ୍ଜାନମି, ଆମ୍ବାଆରି ମୀ ତା଼ଣା ୱା଼ହୁତଲେ କାମା କିନେରି ଇଞ୍ଜାଁ ପ୍ରବୁତି କାମାତା ମୀ ସା଼ଲୱି କିନାରି ଲେହେଁ ମିଙ୍ଗେ ସେତ୍‌ନା ହିୟାନେରି, ଏ଼ୱାରାଇଁ ମା଼ନୱି ଆ଼ଦୁ, 13 ଅ଼ଡ଼େ ଏ଼ୱାରି ମୀ ତା଼ଣା କିହିମାନି କାମାତାକି ଏ଼ୱାରାଇଁ ହା଼ରେକା ଜୀୱୁନ଼ଦୁ । ମୀରୁ ମୀରୁଏ ହିତ୍‌ଡ଼ି ତଲେ ମାଞ୍ଜୁ ।

14 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମିଙ୍ଗେ ବାତିମା଼ଲି ମାଞ୍ଜାନମି ନିସ୍ତା ଗାଟାରାଇଁ ଜାଗ୍ରାତା କିଦୁ, ଆଜି ଗାଟାରାଇଁ ସା଼ସା ହୀଦୁ, ବା଼ଡ଼୍‌ୟୁ ହିଲାଆଗାଟାରାଇଁ ସା଼ୟେମି କିଦୁ, ଅ଼ଡ଼େ ବାରେଜା଼ଣା ତାକି ସୁଦୁ ଗାଟାତେରି ଆ଼ଦୁ, 15 ଜାଗ୍ରାତା ଆ଼ଦୁ ଲାଗେଏ କିୟାତାଣାଇଁ ୱେଣ୍ତେ ଲାଗେଏ କିଆଦୁ, ସାମା ବାରେବେ଼ଲା ମୀରୁ ମୀରୁଏ ରଅତେରି ରଅଣାକି ଅ଼ଡ଼େ ବାରେ ଲ଼କୁତାକି ନେହିଁ କିୟାଲି ଅଣ୍‌ପେମାଞ୍ଜୁ ।

16 ବାରେବେ଼ଲା ରା଼ହାଁ ଆ଼ଦୁ । 17 କା଼ଲେଏ ପ୍ରା଼ତାନା କିହେ ମାଞ୍ଜୁ । 18 ମୀରୁ ଏ଼ନିଆ଼ହିଁ ମାଚିହିଁ ଜିକେଏ ମାହାପୂରୁଇଁ ଜହରା କିଦୁ, ଇଚିହିଁ ମୀରୁ କ୍ରୀସ୍ତ ଜୀସୁ ତା଼ଣା ଆଣ୍ତାହାଁ ଏଲେକିହିଁଏ ନୀଡାନା ମାଞ୍ଜୁ ଇଞ୍ଜିଁ ମାହାପୂରୁତି ଅଣ୍‌ପୁ ।

19 ମାହାପୂରୁତି ଜୀୱୁଇଁ ଆ଼ଂଗାଆଦୁ; 20 ମାହାପୂରୁ ବ଼ଲୁ ୱେହ୍‌ନାଣି ଉଜେଏ ଇଞ୍ଜିଁ ଇନାଆଦୁ । 21 ବାରେ ତାୟିପାରି କିହାଁ ଏ଼ନାୟି ନେହାୟି ଏ଼ଦାଆଁ ଆହ୍‌ଦୁ । 22 ବାରେ ପ଼ଲ୍‌ଆ ତା଼ଣାଟି ଏଟ୍‌କା ଆ଼ଦୁ ।

23 ହିତ୍‌ଡ଼ି ହୀନି ମାହାପୂରୁ ମିଙ୍ଗେ ବାରେ ୱାକିଟି ସୁଦୁ ଗାଟାତେରି କିୟାପେସି, ମୀ ଜୀୱୁ, ପୂଣ୍ତା, ଅ଼ଡ଼େ ମୀ ଆଙ୍ଗା ବାରେତି ମା଼ ପ୍ରବୁ ଜୀସୁ କ୍ରୀସ୍ତ ୱା଼ନି ପାତେକା ଦ଼ହ ହିଲାଆଗାଟାୟି ଆ଼ହା ମାଞ୍ଜାଲି ହିୟାପେସି । 24 ଆମ୍ବାଆସି ମିଙ୍ଗେ ଆ଼ଚାମାଞ୍ଜାନେସି ଏ଼ୱାସି ଟିକାଣା ଗାଟାସି ଏ଼ୱାସି ଈ ବାରେ କିନେସି ।

25 ଏ଼ ତାୟିୟାଁ ମାଙ୍ଗେତାକି ପ୍ରା଼ତାନା କିଦୁ ।

26 ବାରେ ତାୟିୟାଁଇଁ ସୁଦୁଜୀୱୁଟି ନଣ୍ତିନି ଲେହେଁ ବାରେଜା଼ଣାତି ଜହରା କିଦୁ ।

27 ବାରେ ତାୟିୟାଁ ନ଼କିତା ଈ ଆ଼କୁ ପ଼ଡ଼ୱି ଆ଼ହାଲିତାକି ନା଼ନୁ ପ୍ରବୁତି ଦ଼ରୁତଲେ ମିଙ୍ଗେ ପାର୍‌ମାଣା କିହିମାଞ୍ଜାଇଁ । 28 ମା଼ ପ୍ରବୁ ଜୀସୁ କ୍ରୀସ୍ତତି କାର୍ମାମେହ୍‌ନାୟି ମିଙ୍ଗେ ଆୟାପେ ।