1 ଏ଼ଦାଆଁତାକି ଏ଼ ନା଼ ଜୀୱୁତି ତାୟି ତାଙ୍ଗିସ୍କା । ମିଙ୍ଗେତାକି ନାଙ୍ଗେ ଏଚେକା ରା଼ହାଁତି ଟ଼ପେରି ଲେହେଁ । ନା଼ନୁ ଜା଼ପ୍‌ହାତି ଲେହେଁ ପ୍ରବୁ ତା଼ଣା ତୀରିଆ଼ହାଁ ନୀଡାବାତ୍‌କାଦୁ ।

2 ପ୍ରବୁ ତା଼ଣା ରଣ୍ତିଏ ଅଣ୍‌ପୁ ତଲେ ମାଞ୍ଜାଲି ଇୟଦିୟା ଅ଼ଡ଼େ ସୁନ୍ତୁକି ରିଣ୍ତାସିକାଣି ବାତିମା଼ଲିମାଇଁ । 3 ନା଼ କାମାତା ଆଣ୍ତାହାଁ ମା଼ନି ତଲେ କାମା କିନାତି, ନିଙ୍ଗେ ଜିକେଏ ବାତିମା଼ଲି ମାଞ୍ଜାଇଁ ଈ ରୀ ତାଙ୍ଗିସ୍କାଣି ସା଼ୟେମି କିମୁ, ଏ଼ନାଆଁତାକି ଇଚିହିଁ କ୍ଲେମେନ୍‌ସ୍‌ ଅ଼ଡ଼େ ନା଼ ତଲେ କାମାକିନାରି ତଲେ ନେହିଁ କାବ୍ରୁ ୱେ଼କ୍‌ହାଲି ନା଼ ତଲେ କାମା କିହାମାନୁ; ଇଞ୍ଜାଁ ନା଼ ତଲେ କାମା କିହାମାନାରି ଦ଼ର୍‌କା ଜୀୱୁତି ପତିତା ରା଼ସ୍‌କି ଆ଼ହାମାନୁ ।

4 ପ୍ରବୁ ତା଼ଣା ଆଣ୍ତାହାଁ କା଼ଲେଏ ରା଼ହାଁ କିଦୁ, ଅ଼ଡ଼େ ୱେଣ୍ତେ ୱେସିମାଞ୍ଜାଇଁ ରା଼ହାଁ କିଦୁ ।

5 ବାରେ ଲ଼କୁ ନ଼କିତା ମୀ ସୁଦୁ ସୁୱାଲା ଅଣ୍‌ପୁ ତ଼ଞ୍ଜା ଆ଼ପେ । ପ୍ରବୁ ୱା଼ନାୟି ଡାଗେ ୱା଼ତେୟିଏ । 6 ଏ଼ନାଆଁତାକି ଜିକେଏ ଅଣ୍‌ପାଆଦୁ, ସାମା ବାରେତାକି ପ୍ରା଼ତାନା ଇଞ୍ଜାଁ ଜହରା ତଲେ ମୀ ଲ଼ଡ଼ାମାନାଣି ମାହାପୂରୁ ନ଼କିତା ୱେହ୍‌ଦୁ । 7 ଏଚେଟିଏ ତେଲ୍‌ହାଲି ଆ଼ଡାଆଗାଟି ମାହାପୂରୁତି ହିତ୍‌ଡ଼ି ମୀ ହିୟାଁ ଅ଼ଡ଼େ ଅଣ୍‌ପୁତା କ୍ରୀସ୍ତ ଜୀସୁ ସା଼ୟେମି ତଲେ ଗେଲ୍‌ପାହାଁ ଇଟାନେସି ।

8 ଏ଼ ତାୟି ତାଙ୍ଗିସ୍କା, ଏ଼ନାୟି ନେହାୟି, ଏ଼ନାୟି ସାତା, ଏ଼ନାୟି ଲ଼ଡ଼ା ମାନାୟି, ଏ଼ନାୟି ଟିକାଣାତାୟି, ଏ଼ନା ଏ଼ନାୟି ଅଡିତାୟି, ଏ଼ନାୟି ଜୀୱୁନ଼ନାୟି, ଏ଼ନାୟି ମ଼ନ କିତି ରା଼ନ୍ଦା, ଏ଼ନାୟି ଜୀୱୁତା ନେହାୟି, ଏ଼ନାୟି ସାତା ଗୂଣୁ ମାନେ ଏ଼ ବାରେ କାତା ଅଣ୍‌ପେମାଞ୍ଜୁ । 9 ମୀରୁ ନା଼ ତା଼ଣାଟି ଏ଼ନାଆଁ ଜା଼ପାମାଞ୍ଜେରି, ୱେଞ୍ଜାମାଞ୍ଜେରି, ଇଞ୍ଜାଁ ନା଼ ତା଼ଣାଟି ମେସାମାଞ୍ଜେରି ଏ଼ ବାରେ କିଦୁ; ଏମ୍ବାଆଁ ହିତ୍‌ଡ଼ି ହିୟାନି ମାହାପୂରୁ ମୀ ତଲେ ସା଼ୟେମି ଆୟାନେସି ।

10 ବାରେତି ଡା଼ୟୁ ନା଼ ତାକି ମୀ ଅଣ୍‌ପୁ ତ଼ଞ୍ଜା ଆ଼ହାମାନେ, ଏ଼ଦାଆଁତାକି ପ୍ରବୁ ତା଼ଣା ରା଼ହାଁ କିହିମାଇଁ; ସାତେଏ ନା଼ ତାକି ମୀ ଅଣ୍‌ପୁ ମାଚେ, ସାମା ପାରୁ ମେ଼ଡ଼ା ଆ଼ହି ହିଲାଆତେରି । 11 ନାଙ୍ଗେ ଏ଼ନାୟି ଊଣା ମାନାକି ୱେସିମାଞ୍ଜଅଁ, ଏ଼ନାଆଁତାକି ଇଚିହିଁ ନା଼ନୁ ଏ଼ନିଆ଼ହିଁ ମାଚିହିଁ ଜିକେଏ ରା଼ହାଁତଲେ ମାଞ୍ଜାଲି ଜା଼ପାମାଇଁ । 12 ନା଼ନୁ ହିଲାଆ ବେ଼ଲାତା ବାତ୍‌କାଲି ଇଞ୍ଜାଁ ହା଼ରେପୂରେ ମାନି ବେ଼ଲାତା ଜିକେଏ ବାତ୍‌କାଲି ପୁଞ୍ଜାମାଇଁ, ବାରେବେ଼ଲା ବାରେୱାକି ରା଼ହାଁତଲେ ମାଞ୍ଜାଲି, ବାଣ୍ତି ପାଞ୍ଜେ ତିଞ୍ଜାହାଁ ଅ଼ଡ଼େ ହାକିଟି ଜିକେଏ ମାଞ୍ଜାଲି, ଇଞ୍ଜାଁ ହା଼ରେକା ବେଟାଆ଼ହାମାନାଣି ଲେ଼ମ୍ବାଲି ଇଞ୍ଜାଁ ହିଲାଆ ବେ଼ଲାତା ନୀଡାଲି ଜିକେଏ ଜା଼ପାମାଇଁ । 13 ନାଙ୍ଗେ ବା଼ଡ଼୍‌ୟୁ ହିୟାନି କ୍ରୀସ୍ତ ତା଼ଣାଟି ବାରେ କିହାଲି ଆ଼ଡିଇଁ ।

14 ଆ଼ତିଜିକେଏ ମୀରୁ ନା଼ କସ୍ତତା ଆଣ୍ତାମାନାକି ନେହିଁ କାମା କିହାମାଞ୍ଜେରି । 15 ପିଲିପିୟ ଲ଼କୁତେରି, ମୀରୁ ଜିକେଏ ପୁଞ୍ଜାମାଞ୍ଜେରି, ନେହିଁ କାବ୍ରୁ ୱେ଼କ୍‌ହାଲି ମା଼ଟ୍‌ହି ବେ଼ଲାତା ଏଚେ଼ତା ନା଼ନୁ ମାକିଦନିୟାଟି ହାଚାଟି ଏଚିବେ଼ଲା ମୀ ପିସ୍‌ପେ ଏମିନି କୁଲମି ନା଼ ତଲେ ଆଣ୍ତାହାଁ ନା଼ ତା଼ଣାଟି ହୀନାଣି ଅ଼ନାଣି ଲେକା ଇଟାହିଲାଆତେରି । 16 ✝✝ଇଚିହିଁ ନା଼ନୁ ତେସଲନିକିତା ମାଚିବେ଼ଲାତା ଜିକେଏ ମୀରୁ ନା଼ ଲ଼ଡ଼ା ମାଚାଣି ମେସାହାଁ ହା଼ରେକା ଦେବା ଦା଼ନା ପାଣ୍ତାତେରି । 17 ନା଼ନୁ ମୀ ତା଼ଣାଟି ଦା଼ନା ଅ଼ହାଲି ଅଣ୍‌ପି ହିଲଅଁ, ସାମା ଏମିନି ପା଼ଡ଼େୟିଟି ମୀ ଲେକା ହା଼ରେ ହା଼ରେକା ପାଡାଆ଼ହିମାନେ, ଏ଼ଦାଆଁତି ନା଼ନୁ ମେସାଲି ଅଣ୍‌ପିମାଇଁ । 18 ନା଼ନୁ ବାରେ ବେଟାଆ଼ହାମାଇଁ, ଇଞ୍ଜାଁ ନାଙ୍ଗେ ହା଼ରେପୂରେ ମାନେ; ମୀ ତା଼ଣାଟି ପାଣ୍ତାମାଞ୍ଜାନାଣି ବାରେ ଏପାପ୍ରଦିତ ତା଼ଣାଟି ବେଟାଆ଼ହାମାଇଁ, ଏ଼ ବାରେ ନାଙ୍ଗେତାକି ସାରି; ଏ଼ ବାରେ ମାହାପୂରୁ ନ଼କିତା ହେର୍‌ପାହାଁ ହୂଡିମାନି ଗାନ୍ଦାଗାଟି ଦୁପ୍‌ଣି ଲେହେଁତାୟି । 19 ଅ଼ଡ଼େ ନା଼ ମାହାପୂରୁ କ୍ରୀସ୍ତ ଜୀସୁ ତା଼ଣା ତାନି ଗା଼ୱୁରମି ଦ଼ନଟି ମୀ ଲ଼ଡ଼ାମାନାଣି ହିୟାନେସି । 20 ମା଼ ଆ଼ବା ମାହାପୂରୁକି କା଼ଲାକା଼ଲାତାକି ଗା଼ୱୁରମି ଆ଼ପେ । ଆ଼ମେନ୍‌ ।

21 କ୍ରୀସ୍ତ ଜୀସୁ ଦ଼ରୁତଲେ ବାରେ ମାହାପୂରୁ ଲ଼କୁଇଁ ଜହରା ୱେହ୍‌ଦୁ, ନା଼ ତଲେ ଈ ଟା଼ୟୁତା ମାନି ତାୟି ତାଙ୍ଗିସ୍କା ମିଙ୍ଗେ ଜହରା ପାଣ୍ତିମାଞ୍ଜାନେରି । 22 ବାରେ ମାହାପୂରୁ ଲ଼କୁ ଇଚିହିଁ ବାରେକିହାଁ କାୟିସର ଇଲୁତା ମାନାରି ଏ଼ୱାରି ମିଙ୍ଗେ ଜହରା ପାଣ୍ତିମାଞ୍ଜାନେରି ।

23 ପ୍ରବୁ ଜୀସୁ କ୍ରୀସ୍ତତି କାର୍ମାମେହ୍‌ନାୟି ମୀ ବାରେ ଜୀୱୁତା ମାଣ୍‌ମ୍ବେ ।