Hebreus 12

ମାହାପୂରୁ ମା଼ ଆ଼ବା

1 ଈଦାଆଁତାକି ଇଚେକା କାଜା ହା଼ଗୁଲେହେଁ ସା଼କି ହୀହାମାନାରି ମା଼ ସା଼ରିସୁଟୁ ମାନାକି, ୱା଼ଦୁ ମା଼ର ବାରେତି ବ଼ଜୁ ଅ଼ଡ଼େ ଆ଼ଙ୍ଗାମାଞ୍ଜାନି ପା଼ପୁ ପିସାହାଁ ନାମୁତା ନ଼କିନାସି ଅ଼ଡ଼େ ତୀରିକିନି ଜୀସୁଇଁ ସିନିକିହାଁ ସା଼ସାତଲେ ମା଼ ନ଼କିତା ତୀରିଆ଼ହାମାନି ଟା଼ୟୁତା ହଣ୍‌ନ । 2 ମା଼ ନାମୁ ତାକି ନ଼କିନାସି ଅ଼ଡ଼େ ନାମୁତା ବା଼ର୍ସୁକିନି ଜୀସୁଇଁ ମା଼ର ସିନିକିନ । ଏ଼ୱାସି ନ଼କିତା ମାନି ରା଼ହାଁ ବେଟାଆ଼ହାଲି ପା଼ସି ମୁଣ୍ତାତା ଲାଜା ବେଟାଆ଼ହାଁ ହା଼ନି ପାତେକା ଅ଼ର୍‌ହିତେସି ଇଞ୍ଜିଁ ଏ଼ୱାସି ନୀଏଁ ମାହାପୂରୁତି ସିଂଗାସାଣି ଟିଃନି ଟଟତା କୁଗାମାନେସି ।

3 ମୀରୁ ଏ଼ନିକିଁ ମୀ ମ଼ନତା ୱା଼ହୁ ୱା଼ହଅତେରି; ଈଦାଆଁତାକି ପା଼ପୁ ଗାଟାରି ତା଼ଣାଟି ତାନି କ଼ପାଟି ଏଚେକା କସ୍ତ ଅ଼ର୍‌ହିତେସି, ଏ଼ୱାଣି କାତା ମୀରୁ ଅଣ୍‌ପାଦୁ ।