17 ଏଚେଟିଏ ଏ଼ୱାରି ଜୀସୁଇଁ ଅ଼ତେରି; ଅ଼ଡ଼େ ଜୀସୁ ଜାହାରା ପା଼ସିମୁଣ୍ତା ଡେ଼କାହାଁ "ତା଼ର୍ୟୁଁଗିର୍ପା" ଇନି ଟା଼ୟୁତା, ଇଚିହିଁ ଏମିନାଣି ଏବ୍ରି ହା଼ଡାତଲେ "ଗଲ୍ଗତା" ଇଞ୍ଜିଁ ଇନେରି ଏମ୍ବାଆଁ ହାଚେସି । 18 ଏମ୍ବାଆଁ ଏ଼ୱାରି ଜୀସୁଇଁ ପା଼ସି ମୁଣ୍ତାତା ଏକ୍ହେରି, ଏ଼ୱାଣିତଲେ ଅ଼ଡ଼େ ରିଆରାଇଁ ପା଼ସି ମୁଣ୍ତାତା ଏକ୍ହେରି, ରିକୱାକି ରିଆରି ଅ଼ଡ଼େ ମାଦିଏ ଜୀସୁ । 19 ଅ଼ଡ଼େ ପିଲାତ ର଼ ଆ଼କୁତା ରା଼ଚାହାଁ ପା଼ସିମୁଣ୍ତା ଲାକ ଆଟିକିତେସି, ଏମ୍ବାଆଁ ରା଼ସ୍କି ଆ଼ହାମାଚେ, "ନା଼ଜରିତତି ଜୀସୁ ଜୀହୁଦିୟାଁ ରାଜା ।"
23 ରିଜାରି କ଼ସ୍କା ଜୀସୁଇଁ ପା଼ସିତା ଏକ୍ହି ଜେ଼ଚ ଏ଼ୱାଣି ହିମ୍ବରିକା ଅ଼ହାଁ ସା଼ରି ବା଼ଗା କିତେରି, ର଼ ର଼ କ଼ହ୍ଏଁଣାକି ରଣ୍ତାଲାକା, ଅ଼ଡ଼େ ଏ଼ୱାଣି ଲାମ୍ବା ସକା ଜିକେଏ ଅ଼ତେରି । ଏ଼ ଲାମ୍ବା ସକା ତାଚାହାଁ ହେର୍କି ଟିଏ ପାଃଆନା କଡାୟାଁ ପାତେକା କିୱି ଆ଼ହାମାଚେ । 24 ଏ଼ଦାଆଁତାକି ଏ଼ୱାରି ଏଲେଇଚେରି, "ଈଦାଆଁ ଗେହ୍ଆପ, ସାମା ଈଦି ଆମ୍ବାଆରାୱାୟି ଆ଼ନେ, ଏ଼ଦାଆଁତାକି ପାଦି କିନ ।" ଏ଼ନିକିଁ ଦାର୍ମୁ ପତିତି କାତା ପୂରା ଆ଼ନେ,
"ଏ଼ୱାରି ତାମି ବିତ୍ରା ନା଼ ହିମ୍ବରିକା ବା଼ଗା କିତେରି,
ଅ଼ଡ଼େ ନା଼ ଲାମ୍ବା ସକାତାକି ପାଦି କିତେରି ।" ରିଜାରି କ଼ସ୍କା ସମାନା ଏଲେକିହିଁଏ କିତେରି ।
25 ସାମା ଜୀସୁତି ପା଼ସିମୁଣ୍ତା ଡାଗେ ତାମି ଇୟା, ତାମି ଇୟାନି ତାଙ୍ଗି, କ୍ଲପାତି ଡକ୍ରି ମରିୟମ ଅ଼ଡ଼େ ମଗ୍ଦଲିନି ମରିୟମ ନିଚାମାଚୁ । 26 ଜୀସୁ ତାମି ଇୟା ଅ଼ଡ଼େ ଏମିନି ସୀସୁଇଁ ଜୀୱୁ ନ଼ହିଁମାଚେସି, ଏ଼ୱାସି ଡାଗେ ନିଚାମାନାଣି ମେସାହାଁ ଏଲେଇଚେସି, "ଏ଼ ଇୟା ମେହ୍ମୁ ନୀ ମୀର୍ଏସି ।"
27 ଡା଼ୟୁ ଜୀସୁ ଏ଼ ସୀସୁଇଁ ଏଲେଇଚେସି, "ଈଦି ମୀ ଇୟା ।" ଏ଼ ଦିନାଟିଏ ଏ଼ ସୀସୁ ଜୀସୁତି ଇୟାନି ତାମି ଇଜ ଅ଼ତେସି ।
ଜୀସୁ ହା଼କି
(ମାତି ୨୭:୪୫-୫୬; ମାର୍କ ୧୫:୩୩-୪୧; ଲୂକ ୨୩:୪୪-୪୯)
28 ଡା଼ୟୁ ଜୀସୁ ଦାର୍ମୁ ପତିତି ବ଼ଲୁ ଏ଼ନିକିଁ ପୂରା ଆ଼ନେ, ଏ଼ଦାଆଁତାକି ବାରେ ରା଼ହାମାନେ ଇଞ୍ଜିଁ ପୁଞ୍ଜାହାଁ ଏଲେଇଚେସି, "ନାଙ୍ଗେ ଏ଼ସ୍କି ହ଼ଚିମାଞ୍ଜାନେ ।"
29 ଏମ୍ବାଆଁ ପୁଲାଏ଼ୟୁ ନେଞ୍ଜାମାନି ର଼ ଡ:କା ମାଚେ; ଏ଼ୱାରି ଏମ୍ବାଆଁ ର଼ ଡ୍ରାଃଆଲି ମୁସାହାଁ ବା଼ଲାତି ମୁନୁତା ରୂପାନା ଜୀସୁତି ଗୂତିତା ହୀତେରି । 30 ଏଚେଟିଏ ଜୀସୁ ଏ଼ ପୁଲାଏ଼ୟୁ ଗସାହାଁ ଏଲେଇଚେସି, "ରା଼ହାହାଚେ" ଏଲେଇଞ୍ଜାନା ତା଼ର୍ୟୁଁ ଲେ଼ସାହାଁ ହା଼ତେସି ।