MATAYO 22

Mbuza ya Kuzuka Kulawa Mkudanganhika

23 Zua didija Masadukayo, awo wolonga kamba haduhu mzuso, wamcholela Yesu, wamuuza, 24 "Mkulufunzi! Musa katulongela kamba, kamba munhu yahadanganhika bila kuleka mwana, ndugu yake kolondigwa yamsole ija ikizuka giladi yamulelele mwana ndugu yake yadanganhike. 25 Avo kukala na ndugu saba mmwanza wetu, waichanduso kasola mtwanzi, abaho, kadanganhika bila kulela nayo mwana, abaho, ikizuka kamulekela ndugu yake. 26 Na ija waikabili gamulawilila gagaja, na waikadatu, na waja wose saba. 27 Hakimambukizo, na ija imtwanzi kadanganhika. 28 Avo mdizua da mzuso, imtwanzi ija kowa mtwanzi wa munhu yalihi? Kwavija wanhu wose saba wakala wamsolile."

29 Yesu kawedika kawalongela, "Mweye muhonyela! Kwavija hamzitangile Zinyandiko Zing’alile ama mhiko za Mulungu. 30 Kwavija mdizua da mzuso, wanhu hawasola ama kusoligwa, ila wolinga kamba wasenga wa Mulungu wa kuulanga. 31 Mmbuli ya mzuso wa wanhu wadanganhike, hamsomile Mzinyandiko Zing’alile kija kimulongeligwe na Mulungu? 32 ‘Nie iyo Mulungu wa Ablaham, na Isaka, na Yakobo.’ Heyo iyo Mulungu wa wanhu wagima na sio Mulungu wa wanhu wadanganhike."

33 Didale da wanhu vidihulike gano, wakanganya mafundo gake.