Yesu ewe Matiye
9 Kɔ Yesu osumpur dɔpɔ kəkɔ, k’ɛnəŋk wərkun wəlɔma pacwe kɔ Matiye pəndɛ aŋgbancan ŋa abaŋəs dut. Kɔ Yesu oloku kɔ: «Məcɛps’em darəŋ!» Kɔ Matiye ɛyɛfɛ k’ɛncɛpsɛ Yesu darəŋ. 10 Dɔsɔk dɔlɔma, Yesu kɔ acɛpsɛ ɔn darəŋ ŋaŋkɔ ŋadi yeri nda Matiye. Awa, k’abaŋəs dut alarəm kɔ aciya ŋander ŋadi yeri kɔ Yesu. 11 Ntɛ aFarisi ŋanəŋk tatɔkɔ mɔ, kɔ ŋayif acɛpsɛ darəŋ a Yesu: «Ta ake tɔ wətəksɛ konu eyi kədinɛ yeri kɔ abaŋəs dut kɔ aciya-ɛ? 12 Kɔ Yesu ene ŋa sim, k’oloku: «Pəmar fɛ atamnɛ ŋafaŋ wətɛn cɔl, mba acuy ŋɔ pəmar a ŋafaŋ kɔ. 13 Nəkɔ nətəkəs tɔkɔ moloku ma Kanu mmɛ mementər mɔ: ‹Nɔnɔfɔr d’ifaŋ, bafɔ yoloŋnɛ.›9.13 Hose 6.6 Awa, bafɔ alompu ŋ’inder kəwe, mba aciya.»
Mark 2.18-22; Luk 5.33-39