1 Kɔ Balam oloku Balak: «Məcəmbər’em nnɔ metek moloŋnɛ camət-mɛrəŋ, məlomps’em mura camət-mɛrəŋ kɔ ŋkesiya yorkun camət-mɛrəŋ.» 2 Balak ɛnayɔ tɔkɔ Balam ɛnaloku kɔ mɔ. Balak kɔ Balam ŋancɔfɛ MARIKI tetek toloŋnɛ ntɛ o ntɛ kəroŋ tura tin kɔ aŋkesiya ŋorkun ŋin. 3 Kɔ Balam oloku Balak: «Məcəmɛ poloŋnɛ pɔcɔf pam kəsək, ina ibɔlɛ. Tɔlɔma MARIKI pədeder kəbəp im. Indelok’əm ntɛ endementər im mɔ.» Kɔ Balam ɔŋkɔ nde tɔrɔ mpɛ pɔntɔyɔ tɔk mɔ. 4 Kɔ Kanu kəwurər Balam, kɔ Balam oloku Kanu: «Icəmbər metek moloŋnɛ camət-mɛrəŋ, k’iloŋnɛ tetek o tetek kəroŋ tura tin kɔ aŋkesiya ŋorkun ŋin.» 5 Kɔ MARIKI ɛmbɛr moloku Balam dəkusu. K’oloku kɔ: «Məlukus nde Balak eyi mɔ, məloku kɔ ntɛ.»

6 K’olukus nde Balak eyi mɔ, nwɛ ɛnacəmɛ poloŋnɛ pɔcɔf pɔn kəsək kɔ abɛ aka Mohab fəp. 7 Balam oloku taruku ntɛ:

«Balak ɔsɔŋ’em kəder kəyɛfɛ Aram,

wəbɛ wəka Mohab ɔsɔŋ’em kəder nde mɔrɔ ma kəca nkɛ dec dɛmpɛ mɔ.

K’olok’im: ‹Məder mətolanɛ afum a Yakuba pəlɛc!

Ɛy, məder, məsɔŋɛ aka Yisrayel kənesɛ!›

8 Mba cəke c’intam kətolanɛ pəlɛc nwɛ Kanu nkɔnsərka ɔntɔsɔŋ pəlɛc mɔ?

Cəke c’indesɔŋɛ afum kənesɛ aŋɛ MARIKI ɔntɔsɔŋɛ kənesɛ mɔ?

9 Nde masar dətelempan iŋnəŋk afum akaŋɛ,

nde mɔrɔ kəroŋ iŋgbətnɛ ŋa:

Afum ŋɔ, aŋɛ ŋandɛ taciŋa mɔ,

ŋancərɛnɛ a ŋanciyanɛ kɔ tɔf yɔkɔ.

10 An’ɛntam kəlɔm dɛlay da aka Yisrayel-ɛ?

Afum aka kor ka Yakuba ŋala pəmɔ cɔs.

Intola kəfi pəmɔ akɔ ŋaleləs Kanu mɔ,

ilip pəmɔ ntɛ aka Yisrayel ŋaŋlip mɔ.»

11 Kɔ Balak oloku Balam: «Cəke cɔ məy’em-ɛ? Isɔŋ’am kəder nnɔ kətolanɛ aterɛn’em pəlɛc, mba kɔ məna məntolanɛ ŋa pətɔt.» 12 Balam oloku: «K’indelok-loku-ɛ, pəmar fɛ a ickɛmbərnɛ kəloku moloku mmɛ MARIKI ɛmbɛr im dəkusu mɔ ba?»

13 Balak oloku kɔ: «Məder kɔ ina, ilɛtsɛn’am, kəfo kəlɔma nde məndenəŋk ŋa mɔ. Kəsək kin kɔ məndenəŋk, mba məfɔnəŋk ŋa fəp. Mətolan’em ŋa pəlɛc!» 14 Kɔ Balak eŋkekərɛ Balam haŋ dəkiyi da wəbum, nde telempan pa tɔrɔ ta Piska kəsək. K’ɛncəmbər metek moloŋnɛ camət-mɛrəŋ, k’ɔncɔfɛ MARIKI tetek o tetek tura tin kɔ aŋkesiya ŋorkun ŋin. 15 Kɔ Balam oloku Balak: «Məna məcəmɛ nnɔ, poloŋnɛ pɔcɔf pam kəsək. Ina, ikɔcəŋkəl MARIKI.»

16 Kɔ MARIKI ender kədebəpɛnɛ kɔ Balam. K’ɛmbɛr kɔ toloku tin dəkusu k’oloku kɔ: «Məlukus nde Balak eyi mɔ, məloku kɔ ntɛ.» 17 Kɔ Balam oluksərnɛ nde Balak eyi mɔ, nwɛ ɛnacəmɛ poloŋnɛ pɔcɔf pɔn kəsək mɔ, ŋayi kɔ akiriŋ aMohab. Kɔ Balak eyif kɔ: «Cəke cɔ MARIKI oloku-ɛ?» 18 Kɔ Balam oloku taruku ntɛ:

«Məyɛfɛ, Balak, məcəŋkəl im!

Məsu aləŋəs ntɛ indelok’əm mɔ, wan ka Cipor!

19 Kanu, bafɔ wərkun ɔfɔ nwɛ eŋyemɛ mɔ,

bafɔ fum ɔfɔ nwɛ ɛŋŋaŋnɛ tɛlər mɔ.

Ntɛ oloku mɔ, ɔfɔdeyɔ ti ba?

Ntɛ oŋloku mɔ, bafɔ ɔŋyɔ ti ba?

20 Ina, iwosɛ kətolanɛ afum akaŋɛ pətɔt,

bawo MARIKI ɔsɔŋ ŋa pətɔt, ifɔsəkpər.

21 MARIKI ɛnəŋkɛ fɛ Yakuba pəcuca,

ɔfɔnəŋk kətɔrəs aYisrayel dacɔ.

MARIKI, Kanu kəŋan, eyi kɔ ŋa.

Eŋne kəkulɛ-kulɛnɛ pəbotu paŋan pəmɔ wəbɛ.

22 Nkɔn Kanu ɛnawurɛnɛ ŋa Misira,

kɔ sɔkət nsɛ səwurɛnɛ sa wana wa dəkulum mɔ.

23 Kəgbal kəsənc kəyi fɛ aka Yisrayel dacɔ,

dure deyi fɛ nde yuruya ya Yakuba

ŋancərɛ tɛm tɔtɔt mes mmɛ Kanu kəŋyɔ mɔ fəp.

24 Afum akaŋɛ ŋaŋyɛfɛ pəmɔ kusunuŋku kəran,

ŋacəmɛ pəmɔ kusunuŋku kərkun,

nkɛ kəntɔfəntərɛ ta kəntalip kəsɔm wɛsɛm nwɛ kəŋsumpər mɔ,

kəmun mecir ma pedif pa ki.»

25 Kɔ Balak oloku Balam: «Kɔ məntɔwosɛ kətolanɛ ŋa pəlɛc-ɛ, ta mətolanɛ ŋa pətɔt ilɛtsɛn’am!» 26 Kɔ Balam oloku kɔ: «Isɔŋ’am ti kəcərɛ: Pəmar iloku ntɛ o ntɛ MARIKI oŋlok’im mɔ!»

27 Kɔ Balak oloku Balam: «Məder, ilɛtsɛn’am, ikekər’am sɔ kəfo kəlɔma. Tɔlɔma nəŋkɔtəŋnɛ kɔ Kanu a mətolan’em afum akaŋɛ pəlɛc!» 28 Kɔ Balak eŋkekərɛ Balam nde telempan pa tɔrɔ ta Peyɔr mpɛ pentilsərnɛ tɛgbərɛ mɔ. 29 Kɔ Balam oloku Balak: «Məcəmbər’em nnɔ metek moloŋnɛ camət-mɛrəŋ məlomps’em mura camət-mɛrəŋ kɔ ŋkesiya camət-mɛrəŋ.» 30 Kɔ Balak ɔyɔ tɔkɔ Balam ɛnaloku kɔ mɔ, k’ɔncɔfɛ MARIKI tura tin kɔ aŋkesiya ŋin tetek toloŋnɛ ntɛ o ntɛ kəroŋ.